Na yâ ti dunia kue, azo abâ so ala yeke gï ala oko na ala peut ape ti sara kamarade na ambeni zo. Ambeni zo so amanda ye na ndö ti seni atene so tongana azo ayeke aidé amba ti ala, a yeke sara si ala bâ so ala yeke gï ala oko ape.

•   “Ti aidé azo so ayeke na yâ ti bezoin apeut ti sara si e bâ so gigi ti e ayeke na sens nga apeut ti aidé e ti hon ndö ti kpale ti dutingo gï e oko wala ti hon ndö ti sentiment so e bâ so e yo na azo.”—U.S. National Institutes of Health.

 Bible amû anzoni wango na ndö ti ye so e peut ti sara ti aidé ambeni zo. Tongana e sara ye alingbi na ni apeut ti aidé e ti hon ndö ti kpale ti dutingo gï e oko.

 Mû ye na azo. Gi ambeni lege ti passé temps na ambeni zo, surtout ti gue ti bâ ala. Duti nduru ti mû ye so mo yeke na ni na azo. Tongana mo sara ni, ala yeke tene na mo lakue merci nga ye so apeut ti sara si mo ga kamarade ti ala.

•   Mama-ndia ti Bible: “Ala mû ye lakue na azo, na azo ayeke mû ye ande na ala.”—Luc 6:38.

 Sara kua na ngangu so mo yeke na ni ti aidé ambeni zo. Gi alege kue ti aidé azo so ayeke na yâ ti angangu kpale. Ye so ahunda ti tene mo bâ mawa ti ala, mo mä ala wala mo sara ambeni ye so ayeke sara si ala sentir terê ti ala bien.

•   Mama-ndia ti Bible: “Zo so aye mba ti lo, lo yeke ye lo na ngoi kue.”—aProverbe 17:17, Mbeti ti Nzapa, Tënë so amu fini.

 Ti hinga tongana nyen la mo peut ti bata nzoni songo na popo ti mo na azo, diko article “Ti duti na nzoni songo na sewa nga na akamarade ti e.”