Na lango 21 ti octobre, ngu 1940, na kodro ti Nouvelle-Zélande a bâ aTémoin ti Jéhovah tongana mbeni bungbi so ayeke ga na wusuwusu nga ayeke buba nzoni duti ti azo. Atâa so desizion so aga na akpale mingi na aTémoin ti Jéhovah, ala découragé ape. Na tapande, ala ngbâ ti sara abungbi atâa so tongana a wara ala, akota zo kodro alingbi ti arrêté ala.

 Andy Clarke, so ayeke Témoin ti Jéhovah ape so ayeke koli ti Ita Mary, abâ tongana nyen la wali ti lo angbâ lakue ti gue na abungbi, atâa aye so azo asara ti zia mbeto na yâ ti lo. Lo sara mbeto ti tene a arrêté wali ti lo na ngoi so lo yeke gue na abungbi. Tongaso, Andy akomanse ti gue na abungbi legeoko na wali ti lo, atâa so lâ oko lo gue na bungbi ape; nga lo tene na wali ti lo: “Tongana ala arrêté mo, ala doit ti arrêté mbi nga kue”. Na lango ni so la Andy akomanse ti gue na abungbi kue legeoko na wali ti lo. Ambeni ngoi na pekoni, lo kue lo wara batême lo ga Témoin ti Jéhovah. Atâa so a sara ye ti ngangu na aTémoin ti Jéhovah na Nouvelle-Zélande na ngoi ti Use bira so amû sese kue, tongana ti Mary, ala leke na bê ti ala ti ngbâ be-ta-zo na Nzapa.

 Mbeni lâ, azo ti police a-arrêté John Murray so ayeke na ngu 78 na ngoi so lo yeke fa tënë da na da. A dë ngbanga na ndö ti lo, a tene lo mû mbage ti mbeni bungbi so ayeke ga na wusuwusu na yâ ti kodro. A gue nga na ambeni Témoin mingi na gbele ngbanga; na a hunda na ambeni ti payé amende nga a kanga ambeni teti nze ota.

 Conscience ti aTémoin ti Jéhovah so Bible afa lege na ni apusu ala ti ke ti sara kua ti turugu (Ésaïe 2:4). Ye so asara si ala wara akpale mingi na ngoi ti bira so tongana a hunda na ambeni ti sara kua ti turugu. Ndali ti so aTémoin ti Jéhovah ni ake ti sara kua ti turugu, a kanga ambeni 80 tongaso na yâ ti camp na ngoi ti bira ni. Atâa na yâ ti ada ti kanga so, même aye ti ngangu so a sara na ala nga na ngangu dê ti hiver, aita so angbâ ti voro Jéhovah na ngia.

 Hio, na yâ ti ando so a kanga ala dä, aTémoin ti Jéhovah akomanse ti leke akapa ti bungbi nga na ti fango tënë. Ala leke aye tongana ti so a yeke sara na yâ ti mbeni congrégation: ala yeke sara abungbi lakue nga ala yeke fa tënë na amba ti ala azo ti kanga ni. Na yâ ti ambeni camp ni, a yeda même na aTémoin ni ti sara akota bungbi na a zia mbeni garde na terê ti ala. Ambeni zo ti kanga ni amanda Bible na ala wara batême na yâ ti acamp ni.

 Bruce, tanga ti molenge ti Mary na Andy, so a sara tënë ti ala fade, abâ da ti kanga tongana mbeni lege so azi na lo ti kpengba songo ti lo na Jéhovah. Lo rappelé lo tene: “Ti mbi, a yeke mo bâ mo tene mbi yeke na ekole, ndali ti so mbi peut ti sara lisoro aninga na aita so ayeke na experience mingi so ayeke na yâ ti camp ni nga ti manda ye mingi na mbage ti ala.”

 Na ngu 1944, gouvernement ni aleke ti zi ambeni zo ti kanga so ayeke na yâ ti acamp ni. Me, akota zo ti aturugu ni ake ndali ti so ala yeke sûr so tongana a zi aTémoin ti Jéhovah ni, ala yeke ngbâ ti fa tënë ti mabe ti ala na ambeni zo. Rapport ni atene so: “Atâa so ti ngbâ ti kanga ala ayeke mû lege ti kanga lege kete na kua ti ala, a yeke changé ande ala lâ oko ape.”

 Ndali ti so sango ti kangango lege na akua ti aTémoin ti Jéhovah amû ndo mingi, a sara si ambeni zo agi ti hinga ye na ndö ti ala. Ambeni ngoi na pekoni, mingi ti azo aga ti hinga so aTémoin ti Jéhovah apeut ti ga na kpale na azo ape. Ala hinga so aTémoin ti Jéhovah ayeke aChrétien so aye siriri nga ayeke sara ngangu na azo ape. Ye ti peko ni ayeke so, wungo ti aTémoin ti Jéhovah ti Nouvelle-Zélande ague na li ni; ti londo na ngu 1939 ala yeke 320, ti si na ngu 1945 ala yeke 536!

 Na ambeni ngoi, akota zo ti kodro ni so ayeke sara ye na lege ni ahinga so kangango lege na akua ti aTémoin ti Jéhovah ayeke na lege ni ape. Na peko ti so mbeni juge amä atënë so a bi na li ti mbeni ita-koli so ayeke fa tënë, lo tene so ayeke mbeni tënë ti tene a ga na ni na gbele ngbanga la ape. Lo tene: “Selon ye so mbi hinga na ndö ti ndia, a yeke na lege ni ape ti bi tënë na li ti mbeni zo a tene lo kpe ndia ape ndali ti so lo kangbi Bible na azo.”

 Na peko ti so bira ni ahunzi si a zi lege na aTémoin ti Jéhovah ti sara akua ti ala, ala kiri aleke na bê ti ala ti fa tënë mingi ahon ti kozo na azo na ndö ti Royaume ti Nzapa. Na ngu 1945, filiale atokua mbeni lettre na acongrégation ti Nouvelle-Zélande kue, lo tene: “Zia zo oko oko asara ye na kode nga na nzoni bê na azo kue. Ala kpe ti papa na azo nga ti tiri na ala. Ala girisa ape so azo so e yeke tingbi na ala na fango tënë amä na bê ngangu na afango ye ti eglize ti ala nga ala yeke gi ti sara ye alingbi na ni na yâ ti fini ti ala. . . . Mingi ti ala ayeke ‘ataba’ ti Seigneur so e doit ti gue na ala na mbage ti Jéhovah nga na royaume ti lo.”

 Laso, na Nouvelle-Zélande, aTémoin ti Jéhovah angbâ ti fa tënë na azo ti ndo ni nga na azo so aga gango. Mbeni lâ, gï na yâ ti al’heure 2, mbeni groupe ti aTémoin 4 ti Turangi asara lisoro na azo 67 so alondo na akodro 17!

 A yeke polele so, azo ti Nouvelle-Zélande ahinga so aTémoin ti Jéhovah ayeke aChrétien so aye siriri, so abâ afango ye ti Bible na nene ni nga agi ti sara ye alingbi na ni. Ngu oko oko azo ngbangbo mingi ayeke wara batême na ala ga aTémoin ti Jéhovah. Ti si na ngu 2019, aTémoin ahon 14 000 ayeke sara na Jéhovah na ngia na mbage ti sud ti kodro ni.