Bebungbi aye mingi ti sara kua na a-offrande so e yeke mû ti leke na ada so ayeke aidé e na yâ ti kua ti fango tënë ti Royaume. Na tapande, na yâ ti ngu ti kusala ti 2023, a-association so aTémoin ti Jéhovah ayeke sara kua na ni adépensé million 500 ti dollar ti vo na aye, ti leke ada, ti leke peko ti angbene ni, nga ti bata aDa ti Royaume nga na aDa ti Assemblée na yâ ti dunia kue si angbâ pendere. a Adépense so ayeke nde na nginza so congrégation oko oko na yâ ti dunia kue ayeke dépensé ti bâ lege ti aDa ti Royaume.

 Na ndö ni, a yeke sara nga kua na a-offrande so a mû ti leke afiliale nga ti bâ lege ni, nga a yeke aidé ti soutenir kua ti fango tënë na yâ ti dunia kue. E simplifié akua so e yeke sara na yâ ti aBéthel, tongaso si e peut ti mû ambeni nginza ni ti leke na aDa ti Royaume, aDa ti Assemblée nga ti leke peko ti angbene ni. Me, a bezoin gbâ ti nginza ti leke na aye, ti leke peko ti angbene da wala ti déplacé afiliale na mbeni ndo nde. Ngbanga ti nyen la aprojet so ayeke important? Tongana nyen la afiliale ayeke mû maboko na yâ ti kota kua ti fango tënë? Zia e bâ ni.

 Mingi ti afiliale asara ngu 30 wala 40 tongaso awe. Nicholas, so ayeke na Service ti lekengo ada so andu aye ti Royaume na yâ ti dunia kue, atene: “Même si a mû entretien ti mbeni da nzoni, tongana ngoi ayeke hon ayeke buba. Tongana e yeke leke peko ti angbene da, a yeke aidé ti tene da ni angbâ nzoni tongaso si a peut ti ngbâ ti sara kua na ni.”

 A bezoin nga ti changé ada ti Béthel ti tene alingbi na abezoin so bungbi ti Jéhovah ayeke na ni. Na yâ ti dunia kue, wungo ti awafango tënë ague na li ni mingi depuis so a yeke leke gbâ ti abureau ti filiale. Ti mû maboko na guengo na li ni ti awafango tënë ni so, e yeke na bezoin ti gbâ ti avolontaire ti sara kua na yâ ti abureau ni so. Ye so asara si, ada ti Béthel so lani alingbi na wungo ti azo ni so, fadeso alingbi ape.

 Mbeni ye ni nga so ayeke kota mingi ayeke tënë ti sécurité. Ndali ti so e yeke na hunzingo ti aye ti dunia so, aye tongana ngu so asuku amû ndo wala yengingo ti sese akiri ahon ndö ni na apeut ti zia fini ti e na lê ti kuâ (Luc 21:11). Tongana e sara kua na afini kode ti lekengo ada na ngoi so a yeke leke peko ti mbeni ngbene da, a yeke aidé ti tene a leke ada so gere ni aluti nzoni ndali ti azo so ayeke sara kua na yâ ni. Alekengo ye so apeut nga ti sara si ayeke duti facile na aita ti sara kua na ada ni so ti aidé na ngoi ti akpale nga ti mû maboko na kua ti fango tënë na peko ti mbeni ngangu kpale.

 Na gbe ti fango lege ti Bebungbi, aita asara akota kua ti construction na yâ ti afiliale 43 na yâ ti ngu ti kusala ti 2023. So aye ti tene so a ngbâ lani ti leke presque ndambo ti ada ti Béthel na yâ ti dunia kue. Bâ ambeni tapande ti aye so a leke so afa nene ti akua so a sara.

 Angola. Matt, so ayeke membre ti Komite ti filiale ti Angola, atene: “E yeke na pasa ti bâ prophétie ti Aggée 2:7 so aga tâ tënë na mbeni lege so ahon gbungo li ti zo. Gï na yâ ti ngu bale-oko, awafango tënë ague na li ni 60 pourcent. Ti mû maboko na awafango tënë so, a bezoin nga ti augmenté wungo ti sewa ti Béthel. Me, ndali ti so ada ti Béthel ti e akono mingi ape, e peut ti tisa gbâ ti azo ape ti ga ti sara kua ge. Ye so asara si mingi ti aBéthelite ayeke na gbâ ti akua nga ala yeke sara al’heure supplémentaire.”

 A mû kua na ambeni ita ti gi ti hinga ye so ala peut ti sara ti kono yâ ti Béthel ni. Na début ni, ala pensé so nzoni solution so ayeke pratique ayeke ti tene ala leke peko ti ngbene filiale ni. Me na peko ti so ala sara gbâ ti arecherche, ala ga ti bâ so lekengo peko ti ngbene da ni ayeke nzoni lege ti sarango kua na a-offrande ape. Ahon ti tene ala leke peko ti ngbene filiale ni, ala hunda ti vo mbeni da so ayeke nduru na bâtiment ni nga ti leke peko ni. Matt atene: “Na temps so e fa na Komite ti filiale ye so e décidé ti sara ayeke ti tene e vo mbeni da na e leke peko ni, me gingo bê ti e ayeke so tongana fade e vo mbeni ndo na e leke fini da na ndö ni ka ayeke bien. Me, e ga ti bâ so da so e vo na e leke peko ni alingbi biani na bezoin ti e. Jéhovah asara tufa na ndö ti desizion so.”

 Filiale ti Angola ayeke peut-être na bezoin ti mbeni ndo ande. Me, fini da ni, ada so a peut ti changé ambeni ye dä wala ti kono yâ ni so ayeke na Béthel nga na ati so a loué ni na ambeni ndo nde, a sara si a wara espace so a bezoin ni tongaso si amû maboko na kua ti fango tënë ti tene angbâ ti gue na li ni.

 Japon. Akozo da so a leke na filiale ni asara nduru na ngu 40 tongaso awe nga lâ oko ade a sara kota kua na ndö ni ape. A sara aye mingi ti bata da ni, me atâa a-effort so kue, ada ni angbâ aninga ahon ti so a leke lani ti sara kua na ni. Ndali ti raison so la, e ngbâ ti sara kota kua na ndö ti projet so.

 Tongana ngu ayeke hon, aye ayeke changé nga na Béthel. Kozo, a yeke tö lani kobe na yâ ti lango ni kue ndali ti sewa ti Béthel; me na ngu 2015, ye ni achangé. Tongaso, na yâ ti mingi ti achambre so ayeke na Béthel ti Japon, a leke akete cuisine na yâ ti achambre ni. Fadeso, aBéthelite wani la ayeke tö mingi ti kobe ti ala. Lekengo peko ti angbene da ni asara si a leke mbeni cuisine so ayeke nzoni ahon ti kozo na yâ ti chambre ti aBéthelite, tongaso si apeut ti duti facile na ala ti tö kobe. Kumiko, so ayeke mbeni ita-wali so ayeke na Béthel ti Japon, atene: “Cuisine ni asara si mbi sentir terê ti mbi vraiment bien na yanga-da, nga a aidé mbi ti soutenir fini disposition so Béthel aleke.”

 Akua so a yeke sara na Béthel ti Japon ayeke mbeni mbage ti kota kua so a yeke sara na yâ ti dunia kue (Matthieu 28:19, 20). Japon ayeke mbeni oko ti afiliale so ayeke imprimé Bible. Tongaso, mbeni oko ti aprojet ti construction so a ngbâ ti sara ni ayeke ti zia mbeni système ti rongo asaleté nga ti zingo apoussière ndali ti sécurité ti azo so ayeke sara kua na yâ ti imprimerie ni. Ti vo aye ni nga ti sara installation ti système ni asara million oko ti dollar, me a sara si filiale ni apeut ti ngbâ ti imprimé ambeti nga ti tokua ni, surtout aBible.

 Aita ni asara ye kue so ala peut ti sara ti tene ala ngbâ ti imprimé aBible na temps ti construction ni. Trey, so ayeke membre ti Komite ti filiale ti Japon, atene: “Na temps ti construction ni, a ngbâ ti sigi na gbâ ti aBible, nga azo mingi na yâ ti dunia ayeke na bezoin ti aBible ni. Adépartement nga na azo so asara kua ni ayeke sara kua maboko na maboko, tongaso si ala peut ti installé afini ye ti kua nga ala imprimé ambeti.” Atâa akpale so, na temps so a yeke sara kota projet ti construction ti ndo ti imprimengo ambeti, a imprimé aBible nduru na 220 000 nze oko oko na popo ti mars nga na août 2023. Akua so kue ahunzi alingbi na nginza so a zia lani ndali ni.

 Ti bata énergie ayeke nga mbeni kota ye na yâ ti projet ti lekengo peko ti angbene da so. E yeke installé ande apanneau solaire, tongaso si ngu oko oko e peut ti bata nginza nduru na dollar 120 000. E yeke installé afenêtre so avitre ni ayeke ota na ndö ti terê, tongaso si abata énergie, tongaso si ngu oko oko e peut ti bata nginza nduru na dollar 10 000. Atâa aye so a sara ti bata énergie ayeke sara si e dépensé gbâ ti nginza, me na lege ti aye so, e peut ande ti bata million ota na ndambo ti dollar na temps so e yeke sara kua na apanneau solaire nga na afenêtre so. A yeke sara ande nga si abuba aye so angoro e ape.

 Akota projet use ti afiliale so afa so gbâ ti aye ti sarango ni angbâ ti tene a sara na yâ ti ada ti Béthel so apeut ti mû maboko na kua ti fango tënë. Me, ade kua ni ahunzi ape. Aaron, so asara kua na Service ti lekengo ada so andu aye ti Royaume na yâ ti dunia kue, atene: “E sara akua mingi awe, me gbâ ti akua ti sarango ni angbâ.” A yeke sara ande akua so tongana nyen? Lo kiri lo tene: “Na ndö ti a-offrande so ala yeke mû na bê ti ala kue so ayeke aidé na yâ ti akota projet so, e bâ nga na nene ni mingi bibe so aita afa lani ti mû terê ti ala wani ti duti volontaire nga ala so achangé aye na yâ ti fini ti ala ti mû lege na ala ti sara ambeni kua na yâ ti angoi so ayeke ga ande. So aita amû ngangu ti ala nga na nginza ti ala ti aidé afa na e polele so Jéhovah angbâ ti sara tufa na ndö ti kua so.”—Psaume 110:3.

 Grâce na a-offrande so ala yeke mû na bê ti ala wani, so mingi ni ala yeke mû ni na lege ti donate.dan124.com la ayeke mû lege na e ti sara akua ti construction so kue nga ti leke peko ti angbene da ni. Merci mingi na ala ndali ti bibe ti mungo ye so ala yeke na ni.