Ésaïe 7:1-25
7 Na ngoi so Achaz,+ molenge ti Jotham so ayeke molenge ti Ozias, ayeke gbia ti Juda, Retsin gbia ti Syrie na Pécah,+ molenge ti Rémaliah so ayeke lani gbia ti Israël, aga ti sara bira na azo ti Jérusalem, me ala* wara lege ti mû gbata ni pëpe.+
2 A sara tënë ni na ahale ti David, a tene: “Aturugu ti Syrie ague abungbi oko na ala ti Éphraïm.”
Bê ti Achaz nga na ti azo ti lo afâ nga terê ti ala akomanse ti dö tongana akeke ti gbako so pupu ayengi ni.
3 Jéhovah atene na Ésaïe: “Pardon, mû molenge ti mo Shéar-Jashub*+ mo gue mo wara terê na Achaz na yanga ti canal so ngu so alondo na ndo so a yeke bata ngu dä ayeke sua na yâ ni.+ Ndo ni so ayeke na terê ti lege so ayeke gue na ndo so azo ti sukulango bongo ayeke dä.
4 Mo tene na lo, mo tene: ‘Kanga bê ti mo, mo duti kpô. Sara mbeto pëpe, nga zia bê ti mo awoko pëpe ndali ti kota ngonzo ti Retsin, ti Syrie nga na ti molenge ti Rémaliah+ so ala yeke tongana anduru keke use so ayeke sara guru.
5 Syrie, Éphraïm na molenge ti Rémaliah amä terê na hondengo ni ti ga ti sara sioni na mo. Ala tene:
6 “E gue e tiri na Juda, e futi ni,* e mû ni* ti ga kodro ti e, na e zia molenge ti Tabéel gbia ni.”+
7 “‘Bâ tënë so Jéhovah, Seigneur ti dunia kue, atene la:
“Ye so ala mä terê ti sara so ayeke ga nzoni pëpe,na a yeke si nga pëpe.
8 Damas la ayeke li-kodro ti Syrie,na Retsin la ayeke mokonzi ti Damas.
Na yâ ti ngu 65,a yeke futi ande Éphraïm biani biani na lo yeke ngbâ mara encore ape.+
9 Samarie+ la ayeke li-kodro ti Éphraïm,na molenge ti Rémaliah+ la ayeke mokonzi ti Samarie.
Tongana mo yeke na kpengba mabe pëpe,gere ti mo ayeke gbu sese nzoni pëpe.”’”
10 Jéhovah akiri atene na Achaz:
11 “Hunda mbeni fä na mbi Jéhovah Nzapa ti mo.+ Fä ni alingbi ti duti mbeni ye so alï tongana Dû ti kuâ* wala ayo na nduzu tongana lê ti nduzu.”
12 Me Achaz atene: “Mbi yeke hunda mbeni fä pëpe, na mbi yeke zia Jéhovah na tara pëpe.”
13 Ésaïe atene: “Pardon, ahale ti David, ala mä mbi si. So ala son li ti azo ngbii so, a lingbi ala ape? Si ala ye nga ti son li ti Nzapa so?+
14 Jéhovah lo wani ayeke sara na ala mbeni fä: Bâ, maseka-wali* ayeke mû ande ngo, lo yeke dü mbeni molenge ti koli+ na lo yeke zia iri ti lo Emmanuel.*+
15 Na ngoi so molenge ni ahinga ti ke sioni ye nga ti ye nzoni ye, lo yeke te gï beurre nga na mafuta ti otoro.
16 Kozo si molenge ni ahinga ti ke sioni ye nga ti ye nzoni ye, azo kue ayeke kpe ande kodro ti agbia use so mbeto ti ala ahon ndö ti ala ahale ti David so.+
17 Ti mo Achaz, Jéhovah ayeke sara si mo, azo ti mo nga na ahale ti babâ ti mo ahon na yâ ti mbeni ngoi so mara ni ade ti si pëpe ngbene ye so Éphraïm azi terê ti lo na Juda.+ Nzapa ayeke ga ande na gbia ti Assyrie+ na terê ti ala.
18 “Na ngoi ni so, Jéhovah ayeke hûru yanga ti lo ti iri avuma so ayeke kâ na ando so Ngu ti Nil ti Égypte ayeke tuku na yâ ti ngu-ingo, nga ti iri a-otoro so ayeke na kodro ti Assyrie ti tene ala ga.
19 Ala kue ayeke ga, ala mû ndo na yâ ti apopo-hoto* so a yeke ngangu ti tene zo amonté na terê ni, na yâ ti akota tênë so asuru, na yâ ti akeke ti sisi kue nga na ando kue ti nyongo ngu ti anyama.
20 “Na ngoi ni so, Jéhovah ayeke mû gbia ti Assyrie na ndo so ayeke na terê ti Ngu ti Euphrate ti ga na lo; gbia ti Assyrie+ so ayeke tongana lame so Achaz aloué ni. Nzapa ayeke sara kua na lo ti kpaka kuä ti li, kuä ti gere nga na kuä ti yanga ti azo ni.
21 “Na ngoi ni so, zo ayeke bata na fini mbeni mama ti bagara ti lo so ade maseka nga na ataba use.
22 So lait ayeke gbani, lo yeke te beurre; zo kue so angbâ na yâ ti kodro ni ayeke te gï beurre na mafuta ti otoro.
23 “Na ngoi ni so, na ando kue so lani ngere ti akeke ti vigne 1 000 ayeke lê ti nginza ti argent 1 000, a yeke wara gï akeke ti sisi nga na apere.
24 Azo so aye ti fono ande kâ ayeke gue na kokora nga na alê ni, ndali ti so akeke ti sisi nga na apere amû ndo ni kue.
25 Mbeto ti akeke ti sisi nga na ti apere ayeke sara si azo ayeke gue nduru pëpe na ahoto kue so ândö azo ayeke dë ndo ni na kpoka. Ando ni so ayeke ga place ti tengo pere ti akoli-bagara nga ndo so ataba ayeke fono dä.”
Akete tënë na terê ni
^ A lingbi nga ti tene “lo.”
^ Ndani aye ti tene “Gï kete tanga ti azo ni la ayeke kiri.”
^ A lingbi nga ti tene “e sara si mbeto ahon ndö ti azo ni.”
^ Wala “e kôro dû na terê ti gbagba ni.” Na Hébreu: “e pika ni yâ ni asuru.”
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
^ Wala “maseka-wali so ade ahinga koli pëpe.”
^ Ndani aye ti tene “Nzapa ayeke na e.”
^ Bâ na kete bakari.
