1 Samuel 6:1-21
-
A-Philistin akiri na Sanduku ni na Israël (1-21)
6 Sanduku+ ti Jéhovah asara nze mbasambala na sese ti aPhilistin.
2 A-Philistin airi aprêtre nga na azo ti bango mbadi,+ ala hunda ndo, ala tene: “A yeke nzoni e sara nyen na Sanduku ti Jéhovah? Ala fa na e ye so a lingbi e sara ti kiri na ni na place ni.”
3 Ala tene: “Tongana ala ye ti kiri na sanduku ti mbele ti Jéhovah, Nzapa ti Israël, ala zia mbeni matabisi na terê ni si. Ala sara kue ti mû na Nzapa ti Israël sandaga ti zingo tënë na li ti zo.+ Ala sara tongaso si ala yeke wara sava, na ala yeke hinga ndani so lo ngbâ ti sara ye ti ngangu na ala.”
4 A-Philistin ahunda ala, atene: “E tokua nyen na lo tongana sandaga ti zingo tënë na li ti zo ni?” Ala tene: “A lingbi na wungo ti aseigneur ti aPhilistin,+ ala mû lor, ala sara na aye oku so akpa hémorroïde nga ala sara na aye oku so akpa deku, ala tokua ni, ndali ti so oko sioni kobela so la asara ala oko oko kue nga na aseigneur ti ala.
5 Ala sara astatue ti ahémorroïde nga na astatue ti adeku+ so ayeke buba kodro ni, nga ala gonda Nzapa ti Israël. Peut-être lo yeke zi maboko ti lo kete na terê ti ala, na terê ti nzapa ti ala nga na kodro ti ala.+
6 Ndani nyen si ala yeke kpengba bê ti ala tongana ti azo ti Égypte nga na Pharaon?+ Na ngoi so Nzapa ti Israël asara ye ti ngangu na ala,+ ala bâ gbä ala zia azo ti Israël ti hon, na azo ti Israël ni ahon.+
7 Fadeso, ala leke fini puse, ala mû amama ti bagara use so ayeke na amolenge nga so ade a kanga joug na go ti ala pëpe, ala kanga puse ni na terê ti abagara ni. Me ti amolenge ti abagara ni, ala kiri na ala na yanga-da.
8 Ala zia Sanduku ti Jéhovah na ndö ti puse ni, ala zia astatue ti lor so ala yeke tokua ni tongana sandaga ti zingo tënë na li ti zo so na yâ ti mbeni kete sanduku,+ ala zia ni na ndö ti puse ni, na ala zia ni ague.
9 Tongana ala bâ so abagara ni amû lege so ague na Beth-Shémesh+ ti kiri na Sanduku ni na kodro ti lo, e yeke hinga so lo la lo sara kota ye ti sioni so na e. Me tongana a si tongaso pëpe, e yeke hinga so lo la lo sara ye ti ngangu so na e pëpe; ye ni asi gï tongaso.”
10 Azo ni asara tongaso. Ala mû amama ti bagara use so ayeke na amolenge, ala kanga puse ni na terê ti ala, me ala kanga amolenge ni na yanga-da.
11 Ala mû Sanduku ti Jéhovah nga na sanduku so na yâ ni a wara astatue ti deku so a sara na lor nga na astatue ti hémorroïde so a sara na lor, ala zia na ndö ti puse ni.
12 Abagara ni amû tâ gï lege so ague na Beth-Shémesh.+ Ala mû gï kota lege ni, na ala yeke toto na ngoi so ala tambela; ala zia lege ni ti gue na mbage ti koli wala na mbage ti wali pëpe. Aseigneur ti aPhilistin amû peko ti ala juska na yanga ti gbata ti Beth-Shémesh.
13 Azo ti Beth-Shémesh ayeke ko lê ti blé na yâ ti kota kpangbala ndo so popo-hoto ayeke dä.* Tongana ala yô lê ti ala na nduzu na ala bâ Sanduku ni, terê ti ala anzere ngangu.
14 Puse ni ague alï na yâ ti yaka ti Josué, zo ti Beth-Shémesh, na a luti na terê ti mbeni kota tênë. Azo ni asuru yâ ti keke ti puse ni, na ala mû abagara ni+ ala yâa na Jéhovah na sandaga so a zö ni agbi kue.
15 Azo ti mara ti Lévi+ adescend Sanduku ti Jéhovah nga na sanduku so astatue ti lor ayeke na yâ ni, ala zia ni na ndö ti kota tênë ni. Azo ti Beth-Shémesh+ ayâa na Jéhovah asandaga so a zö ni agbi kue nga ala mû asandaga na lo na lango ni so.
16 Tongana aseigneur oku ti aPhilistin abâ ye so awe, ala kiri na Écron gï na lango ni so.
17 Âdu ti astatue ti lor so akpa hémorroïde so aPhilistin atokua ni na Jéhovah tongana sandaga ti zingo tënë na li ti zo,+ oko ayeke ndali ti Ashdod,+ oko ndali ti Gaza, oko ndali ti Askélon, oko ndali ti Gath+ nga oko ndali ti Écron.+
18 Nga wungo ti astatue ti deku so a sara na lor so alingbi na wungo ti agbata kue ti aPhilistin so aseigneur oku akomande na ndö ni, agbata so ayeke na angangu gbagba nga na akete kodro ni so ayeke na gbagba pëpe.
Juska laso, kota tênë so a zia Sanduku ti Jéhovah na ndö ni angbâ tongana témoin na yâ ti yaka ti Josué, zo ti Beth-Shémesh.
19 Me Jéhovah afâ ambeni zo ti Beth-Shémesh ndali ti so ala ngbâ gï ti bâ Sanduku ti Jéhovah. Lo fâ azo 50 070.* Azo ni asara vundu ndali ti so Jéhovah afâ gbâ ti azo.+
20 Nga azo ti Beth-Shémesh ahunda ndo, atene: “Zo wa la alingbi ti luti na gbele Jéhovah, Nzapa so ayeke nzoni-kue so?+ Lo yeke zia e ti gue na terê ti azo wa?”+
21 Ala tokua azo na azo ti gbata ti Kiriath-Jéarim,+ ala tene: “A-Philistin akiri na Sanduku ti Jéhovah awe. Ala ga amû ni ague na ni na ala kâ.”+
