1 Samuel 8:1-22
8 Tongana Samuel aga mbakoro awe, lo zia amolenge ti lo ti koli ti duti ajuge na Israël.
2 Iri ti kozo molenge ti lo ayeke Joël, na iri ti use molenge ni ayeke Abijah;+ ala duti ajuge na Béer-Shéba.
3 Me amolenge ni asara ye tongana babâ ti ala pëpe; ala ye gï ti wara ye na lege ti likisi,+ azo ayeke pete goro+ na ala nga ala yeke fâ ngbanga na lege ni pëpe.+
4 Mbeni lâ, a-ancien ti Israël kue abungbi ague na ndo ti Samuel, na Ramah.
5 Ala tene na lo: “Mo ga ti mo mbakoro awe, me amolenge ti mo asara ye tongana mo pëpe. Fadeso, soro na e mbeni gbia si lo duti juge ti e, tongana ti tanga ti amara kue.”+
6 Me tongana azo ni atene na Samuel, atene: “Mû na e mbeni gbia ti duti juge ti e”, a nzere na lo pëpe.* Tongaso, Samuel asambela Jéhovah,
7 na Jéhovah atene na Samuel: “Mä tënë kue so azo ni atene na mo; a yeke mo la ala ke mo pëpe, me mbi la ala ke ti tene mbi duti gbia ti ala.+
8 Ye so ala yeke sara so ayeke gï oko ye so ala sara ngbene ye so mbi sigi na ala na Égypte juska laso. Lakue ala yeke zia mbi+ ti voro ambeni nzapa nde.+ Gï oko ye so la ala yeke sara na mo so.
9 Tongaso mo mä ala. Ye oko, gboto mê ti ala; fa na ala ye kue so gbia so akomande ala ayeke na droit ti hunda ni na ala.”
10 Tongaso, Samuel afa atënë ti Jéhovah kue na azo so ahunda lo ti soro mbeni gbia na ala so.
11 Lo tene: “Aye so gbia so akomande ala ayeke na droit ti hunda na ala ayeke so:+ Lo yeke mû amolenge ti ala ti koli,+ lo zia ala na ndö ti apuse ti mbarata ti lo+ nga lo yeke sara si ala ga azo ti kpengo na ambarata ti lo;+ ambeni ayeke mû loro na devant ti apuse ti mbarata ti lo.
12 Lo yeke zia ambeni ti komande azo ti lo 1 000+ nga ambeni ti komande azo 50.+ Ambeni ayeke fâ yaka ti lo,+ ambeni ayeke ko alê ti kobe ti lo+ nga ambeni ayeke leke aye ti bira ti lo na aye ti terê ti apuse ti mbarata ti lo.+
13 Lo yeke mû amolenge ti ala ti wali ti ga azo ti sarango mafuta so afun pendere,* azo ti tongo kobe nga azo ti zongo mapa.+
14 Lo yeke mû tâ pendere sese ti ala, ayaka ti vigne ti ala nga ayaka ti olive ti ala,+ lo mû na azo ti kua ti lo.
15 Lo yeke mû mbeni mbage* ti lê ti kobe ti yaka ti ala nga ti ayaka ti vigne ti ala, lo yeke mû ni na akota zo ti yangbo ti lo nga na azo ti kua ti lo.
16 Lo yeke mû azo ti kua ti ala ti koli na ti wali ti sara kua na lo, nga lo yeke mû anzoni bagara ti ala na akororo ti ala ti sara na kua ti lo.+
17 Lo yeke mû mbeni mbage* ti ataba na angasa ti ala,+ na ala yeke ga azo ti kua ti lo.
18 Ngoi ayeke ga so ala yeke dema ngangu ndali ti gbia so ala wani asoro lo,+ me Jéhovah ayeke kiri tënë na ala na ngoi ni so pëpe.”
19 Me azo ni ake ti mä tënë so Samuel atene na ala, na ala tene: “E ke awe! E ye gï ti wara mbeni gbia ti komande e,
20 si e ga tongana tanga ti amara kue; gbia ti e ayeke duti juge ti e, lo yeke mû li ni, nga lo yeke tiri na awato ti e.”
21 Tongana Samuel amä tënë kue so azo ni atene so awe, lo tene peko ni na Jéhovah.
22 Jéhovah atene na Samuel: “Mä ala, mo soro mbeni gbia ti komande ala.”+ Tongaso, Samuel atene na azo ti Israël: “Zo oko oko akiri na kodro ti lo.”
Akete tënë na terê ni
^ Na Hébreu: “a yeke sioni na lê ti lo.”
^ Wala “azo ti sarango yombo so afun pendere.”
^ Na Hébreu: “oko na ndo ti bale-oko.”
^ Na Hébreu: “oko na ndo ti bale-oko.”
