2 aGbia 10:1-36
10 Achab+ ayeke na amolenge 70 na Samarie. Tongaso, Jéhu asû ambeti lo tokua ni na Samarie na akota zo ti gbata ti Jizréel, a-ancien+ nga na azo ti batango amolenge ti Achab.* Lo tene:
2 “Na ngoi so ala wara mbeti so, amolenge ti seigneur ti ala ayeke na terê ti ala. Ala yeke nga na apuse ti bira, ambarata nga na aye ti bira. Ala yeke lango na yâ ti gbata so ayeke na yâ ti ngangu gbagba.
3 Ala soro molenge ti seigneur ti ala so ayeke nzoni nga mbilimbili ahon atanga ni kue ala zia lo na ndö ti trône ti babâ ti lo. Na pekoni, ala gue ala tiri ndali ti ahale ti seigneur ti ala.”
4 Me mbeto ti lo ahon ndö ti ala na ala tene: “Asingana so agbia use agbu lê ni na lo ape so,+ si e la e lingbi ti luti na lo?”
5 Tongaso, zo ti bango ndo na ndö ti yangbo* ti gbia, gouverneur ti gbata ni, a-ancien nga na azo ti batango amolenge ni atokua mbeti na Jéhu. Ala tene: “E yeke awakua ti ala na e yeke sara ye kue so ala tene na e ti sara. E yeke zia mbeni zo gbia pëpe. Ala sara ye kue so ayeke nzoni na lê ti ala ti sara.”
6 Jéhu akiri atokua mbeti na ala, lo tene: “Tongana ala yeke ti mbi na ala ye ti mä yanga ti mbi, kekereke na l’heure tongaso ala mû ali ti amolenge ti seigneur ti ala, ala ga na ni na mbi na Jizréel.”
Amolenge 70 ti gbia ayeke na ndo ti akota zo ti gbata ni so ayeke bata ala.
7 Gï so ala wara lettre ni, ala mû akoli 70+ so ayeke amolenge ti gbia, ala fâ li ti ala, ala zia ni na yâ ti asakpa na ala tokua ni na lo na Jizréel.
8 Mbeni zo aga atene na Jéhu: “Azo ti gbata ni aga na ali ti amolenge ti gbia.” Jéhu atene: “Ala kangbi yâ ti ali ni na agroupe use, ala dö ni na ndö ti terê na yanga ti gbagba ti gbata ni, a ngbâ kâ juska na ndapre.”
9 Na ndade ni tongana lo sigi na ndapre, lo luti na gbele azo kue na lo tene: “Tënë ayeke na li ti ala pëpe.* Mbi la mbi mä terê na azo ti fâ seigneur ti mbi na mbi fâ lo,+ me zo wa la afâ azo so kue so?
10 A yeke nzoni ala hinga so atënë kue ti yanga ti Jéhovah so Jéhovah atene na terê ti ahale ti Achab ayeke ga tâ tënë, mbeni oko ayeke tï na ngu* pëpe.+ Jéhovah asara ye kue so lo tene na wakua ti lo Élie si lo fa peko ni.”+
11 Na ndö ni, ahale ti Achab kue so angbâ na Jizréel, akota zo ti lo, azo so lo hinga ala nga na aprêtre ti lo,+ Jéhu afâ ala juska zo oko angbâ pëpe.+
12 Na pekoni, Jéhu alondo lo mû lege so ague na Samarie. Lo si na da so aberger ayeke fâ kuä ti terê ti anyama ti ala dä.*
13 Kâ lo tingbi na ambeni koli so ayeke aita ti Achaziah+ gbia ti Juda. Lo tene: “Ala yeke azo wa?” Ala tene: “E yeke aita ti Achaziah, e yeke gue ti bâ wala amolenge ti gbia nga na amolenge ti mama ti kodro* ayeke senge.”
14 Hio lo tene: “Ala gbu ala na fini lê ti ala!” Ala gbu akoli 42 so na fini lê ti ala, na ala gue afâ ala na terê ti adû so a zi ni ti bata ngu dä so ayeke na terê ti da so a yeke fâ kuä ti terê ti anyama dä. Lo zia zo oko na popo ti ala angbâ na fini pëpe.+
15 Na ngoi so lo londo kâ lo hon, lo tingbi na Jonadab+ molenge ti Récab+ so aga ti wara lo. Tongana lo bara lo,* lo tene na lo: “Mbi ye ti sara ye so ayeke mbilimbili na bê ti mbi kue. Eskê bê ti mo nga kue ayeke* tongana ti mbi?”
Jonadab atene: “En!”
Jéhu atene: “Tongana a yeke tongaso, gbu maboko ti mbi.”
Lo gbu maboko ti Jéhu, na Jéhu agboto lo na yâ ti puse ni na terê ti lo.
16 Jéhu atene: “Ga e gue, na mo yeke bâ tongana nyen la mbi yeke zia pëpe si mbeni zo so avoro Jéhovah avoro nga mbeni nzapa nde.”*+ Tongaso a zia lo na terê ti Jéhu na yâ ti puse ti bira ni.
17 Lo si na Samarie, na lo fâ tanga ti ahale ti Achab kue so angbâ kâ juska lo futi ala kue,+ a lingbi na tënë so Jéhovah atene na Élie si lo fa peko ni.+
18 Jéhu abungbi azo kue, na lo tene na ala: “Achab avoro Baal mingi pëpe,+ me mbi Jéhu mbi yeke voro lo mingi ahon ti Achab.
19 Tongaso, ala iri na mbi aprophète ti Baal kue,+ azo kue so ayeke voro lo nga na aprêtre ti lo kue.+ Zia zo oko amanke pëpe, ndali ti so mbi ye ti mû gbâ ti asandaga na Baal. Zo so aga pëpe, a yeke fâ lo.” Andâ Jéhu ayeke sara manière ti futi azo so ayeke voro Baal.
20 Jéhu akiri atene: “Ala fa na azo so mbeni kota bungbi ndali ti Baal ayeke dä.” Tongaso, ala gue afa tënë ni.
21 Na peko ti so Jéhu atokua ndo si a sara tënë ni na yâ ti kodro ti Israël kue awe, azo kue so avoro Baal aga. Zo oko amanke pëpe. Ala lï na yâ ti da* ti Baal,+ na yâ ti da ni asi matamata.
22 Jéhu atene na zo so ayeke bâ lege ti abongo, lo tene: “Sigi na bongo mo mû na azo kue so ayeke voro Baal.” Lo sigi na bongo ni lo mû na ala.
23 Na pekoni Jéhu na Jonadab+ molenge ti Récab alï na yâ ti da ti Baal. Lo tene na azo so ayeke voro Baal, lo tene: “Ala bâ ndo mbilimbili ti bâ si mbeni wakua ti Jéhovah aduti ge pëpe, me gï azo so ayeke voro Baal.”
24 A si na mbeni ngoi, ala lï na yâ ti da ni ti yâa asandaga nga na asandaga so a zö ni agbi kue. Andâ Jéhu azia azo ti lo 80 na terê ti da ni na gigi, na lo tene na ala: “Tongana mbeni zo na popo ti azo so mbi zia ala na maboko ti ala akpe, a yeke fâ ala na place ti zo ni.”*
25 Gï so Jéhu ahunzi ti zö asandaga ni awe, lo tene na agarde* nga na akota zo ti aturugu: “Ala lï na yâ ti da ni ala fâ ala! Ala zia zo oko akpe pëpe!”+ Tongaso, agarde na akota zo ti aturugu ni afâ azo ni na épée na ala bi akuâ ti ala na gigi. Ala gue même na yâ ti da ti Baal, na mbage ti ndo so ayeke nzoni-kue.*
26 Ala sigi na ayanda ti tênë,+ so ayeke na yâ ti da ti Baal, ala gbi ni kue.+
27 Ala kungbi yanda ti tênë+ ti Baal so a yeke voro ni, ala kungbi nga da ti Baal,+ ala sara si da ni aga kabinë. A ngbâ gï tongaso juska laso.
28 A yeke tongaso si Jéhu azi vorongo nzapa Baal biani biani na kodro ti Israël.
29 Me Jéhu azia pëpe lege ti siokpari so Jéroboam molenge ti Nébat apusu azo ti Israël ti sara. Lo zi pëpe akete bagara ti lor so ayeke na Béthel nga na Dan.+
30 Jéhovah atene na Jéhu: “So mo sara ye nzoni nga mo sara ye so ayeke mbilimbili na lê ti mbi so tongana mo sara aye kue so mbi leke na bê ti mbi ti sara na ahale ti Achab,+ ahale ti mo ayeke duti na ndö ti trône ti Israël juska a si na âta ti tarä ti mo.”+
31 Me Jéhu abata Ndia ti Jéhovah Nzapa ti Israël na bê ti lo kue pëpe.+ Lo zia pëpe lege ti siokpari so Jéroboam apusu azo ti Israël ti sara.+
32 Na yâ ti angoi ni so, Jéhovah azia si ambeni kodro aga amû yeke na yeke ambeni mbage ti kodro ti Israël.* Lakue Hazaël ayeke ga ti sara bira na azo ni na yâ ti kodro ti Israël.+
33 Lo sara bira na azo so ayeke na terê ti Ngu ti Jourdain na mbage ti est, na sese ti Galaad kue so azo ti mara ti Gad, ti Ruben nga na ti Manassé+ asara kodro dä. Na yâ ni, a yeke wara nga sese so alondo na Aroër so ayeke na terê ti popo-hoto* ti Ngu ti Arnon. Lo sara bira na azo ni juska na Galaad nga na Basan.+
34 Âdu ti tanga ti mbaï ti Jéhu, tënë ti aye kue so lo sara nga na angangu ye kue so lo sara, eskê a sû ni na yâ ti mbeti ti mbaï ti agbia ti Israël ape?
35 Jéhu akui, na lo wu terê ti lo tongana ti akotara ti lo. A lu lo na Samarie. Molenge ti lo Joachaz+ aga gbia na peko ti lo.
36 Ngoi* so Jéhu akomande na Samarie na ndö ti azo ti Israël ayeke ngu 28.
Akete tënë na terê ni
^ Na Hébreu: “azo ti batango Achab.”
^ Na Hébreu: “da.”
^ Wala “Ala yeke azo ti mbilimbili.”
^ Na Hébreu: “ayeke tï na sese.”
^ Âmanke a yeke ndo so a kanga ataba dä ti tene a fâ kuä ti terê ti ala.
^ Wala “wali so ayeke kota zo.”
^ Wala “iri tufa na ndö ti lo.”
^ Na Hébreu: “bê ti mo ayeke mbilimbili.”
^ Wala “tongana nyen tënë ti vorongo Jéhovah ason mbi mingi.”
^ Wala “temple.”
^ Wala “a yeke fâ âme ti ala na place ti âme ti zo ni.”
^ Na Hébreu: “azo so ayeke gue tokua na loro.”
^ Na Hébreu: “gbata ni,” peut-être mbeni da so ayeke na yâ ti ngangu gbagba.
^ Wala “asara si akono tongana ti kozo pëpe.”
^ Bâ na kete bakari.
^ Na Hébreu: “Alango.”
