2 Chronique 6:1-42
6 Na ngoi ni so, Salomon atene: “Jéhovah atene ni yeke duti na yâ ti ndo so avuko pitipiti.+
2 Me ti fadeso, mbi leke mbeni kota da ti gloire na mo, mbeni ndo ti tene mo duti dä lakue.”+
3 Na pekoni, gbia atourné lo bâ azo ni na lo komanse ti iri tënë nzoni na ndö ti congrégation ti azo ti Israël kue na ngoi so azo ni kue aluti na nduzu.+
4 Lo tene: “Zia a sepela Jéhovah Nzapa ti Israël, lo so amû zendo na yanga ti lo wani na babâ ti mbi David, nga so na lege ti maboko ti lo wani lo sara si ye so lo mû zendo ni asi. Lo tene:
5 ‘Ti londo na lango so mbi sigi na azo ti mbi na Égypte, mbi soro pëpe mbeni gbata na popo ti amara ti Israël kue ti leke da kâ si iri ti mbi angbâ dä.+ Mbi soro nga pëpe mbeni zo ti komande na ndö ti azo ti mbi, azo ti Israël.
6 Me mbi soro Jérusalem+ ti ga ndo so iri ti mbi ayeke duti dä nga mbi soro David ti komande na ndö ti azo ti mbi, azo ti Israël.’+
7 Babâ ti mbi David aye lani mingi ti leke mbeni da ndali ti iri ti Jéhovah Nzapa ti Israël.+
8 Me Jéhovah atene na babâ ti mbi David, atene: ‘Mo ye mingi ti leke da ndali ti iri ti mbi, nga ye so mo ye ti sara so ayeke nzoni mingi.
9 Me mo la mo yeke leke da ni pëpe; molenge ti mo wani so mo yeke dü* ande la ayeke leke da ndali ti iri ti mbi.’+
10 Jéhovah asara ye so lo mû zendo ni so, ndali ti so mbi duti na ndö ti trône ti Israël+ na peko ti babâ ti mbi David, tâ gï tongana ti so Jéhovah amû zendo ni lani.+ Mbi leke nga da ndali ti iri ti Jéhovah Nzapa ti Israël.
11 Kâ la mbi zia Sanduku so tënë ti mbele+ so Jéhovah ate na azo ti Israël ayeke na yâ ni.”
12 Na pekoni, lo luti na gbele gbalaka ti Jéhovah, na devant ti congrégation ti Israël kue, lo yô maboko ti lo na nduzu.+
13 (Salomon aleke lani mbeni ye na cuivre ti tene zo aluti na ndö ni, na lo zia ni na milieu ti lacour ni.*+ Yongo ni ayeke coudée* 5, largeur ni ayeke coudée 5 nga yongo ni na nduzu ayeke coudée 3. Lo luti na ndö ni.) Lo sara agenou na gbele congrégation ti Israël kue, lo yô maboko ti lo na nduzu+
14 na lo sambela lo tene: “Jéhovah Nzapa ti Israël, mbeni Nzapa tongana mo ayeke dä pëpe, atâa na yayu wala na sese. Mo la mo ngbâ ti bata tënë ti mbele nga mo fa tâ ndoye na awakua ti mo so ayeke sara na mo na bê ti ala kue.+
15 Mo sara ye alingbi na zendo so mo mû lani na wakua ti mo, babâ ti mbi David.+ Mo mû zendo na yanga ti mo wani, na laso mo wani mo sara ye so mo mû zendo ni so.+
16 Fadeso, Jéhovah Nzapa ti Israël, sara ye alingbi na zendo so mo mû lani na wakua ti mo, babâ ti mbi David, tongana mo tene: ‘Tongana amolenge ti mo asara hange na lege so ala mû, na tambelango mbilimbili na gbele mbi+ tâ gï tongana ti so mo sara,+ lakue mbeni hale ti mo ayeke duti na gbele mbi na ndö ti trône ti Israël.’
17 Fadeso, Jéhovah Nzapa ti Israël, zia si ye so mo mû zendo ni na wakua ti mo David asi biani.
18 “Eskê Nzapa ayeke sara biani kodro na popo ti azo na ndö ti sese?+ Asingana yayu, même yayu so ayo kâ, si alingbi na mo ape so,+ si da so mbi leke so la alingbi na mo?+
19 Jéhovah Nzapa ti mbi, dengi mê na sambela ti mbi wakua ti mo, nga sara nzoni bê na mbi tongana ti so mbi hunda. Mä toto so mbi yeke toto na mo ti mû maboko na mbi nga mä sambela so mbi wakua ti mo mbi yeke tene na gbele mo.
20 Zia lê ti mo abâ ndo na mbage ti da so bï na lâ, na mbage ti ndo so mo tene mo yeke zia iri ti mo dä,+ ti mä sambela so mbi wakua ti mo mbi tourné na mbage ti da so ti tene na mo.
21 Na ngoi so mbi wakua ti mo wala azo ti mo, azo ti Israël, atourné na mbage ti da so+ ti toto na mo ti mû maboko na e, dengi mê mo mä ni. Zia si, kâ na yayu,+ ndo so mo yeke dä, mo dengi mê mo mä e nga mo pardonné e.+
22 “Tongana mbeni zo asara sioni na terê ti mba ti lo, na a hunda lo ti deba terê ti lo,* nga tongana lo ngbâ na gbe ti bä so, na lo gue na gbele gbalaka ti da so,+
23 zia si, kâ na yayu, mo mä, mo sara ye nga mo fâ ngbanga ti awakua ti mo na lege so mo kiri na zo ti sioni peko ti ye so lo sara nga mo sara si ye so lo sara akiri na li ti lo wani.+ Nga, mo tene so tënë ayeke pëpe na li ti zo ti mbilimbili* nga mo futa lo alingbi na mbilimbili ti lo.+
24 “Tongana azo ti mo, azo ti Israël, angbâ ti sara siokpari na terê ti mo+ si mbeni wato ahon ala na ngangu, me na pekoni ala kiri na mbage ti mo, ala mû gloire na iri ti mo,+ ala sambela+ nga ala voro yanga na mo na yâ ti da so+ ti sara nzoni bê na ala,
25 zia si, kâ na yayu,+ mo mä azo ti mo, azo ti Israël, na mo pardonné siokpari ti ala, nga mo kiri na ala na ndö ti sese so mo mû na ala na akotara ti ala.+
26 “Tongana ala ngbâ ti sara siokpari na terê ti mo+ si lê ti nduzu akanga na ngu-nzapa apika pëpe,+ me na pekoni ala tourné lê ti ala na mbage ti da so ala sambela, ala mû gloire na iri ti mo nga ala ke siokpari ti ala ndali ti so mo bi kamene na lê ti ala,*+
27 zia si, kâ na yayu, mo dengi mê mo mä awakua ti mo, azo ti Israël, mo pardonné siokpari ti ala nga mo fa na ala nzoni lege so a yeke nzoni ala tambela dä.+ Mbi ye nga ti tene mo sara si ngu-nzapa akiri apika+ na ndö ti sese so mo mû na azo ti mo ti ga héritage ti ala.
28 “Tongana kota nzara atï na yâ ti kodro ni,+ wala sioni kobela so ayeke gbu azo mingi,+ wala akobe ti yaka ahule hulengo, wala buruma agbu akobe ni,+ wala gbâ ti agbadora amû ndo wala agbadora so ayeke te aye ti lê ti yaka kue*+ amû ndo, wala tongana awato ti azo ti mo asara camp na terê ti mbeni gbata ti ndo* ni+ wala mbeni ye ti ngangu asi wala mbeni kobela atï na yâ ti kodro ni,+
29 atâa sambela wa mbeni zo atene, atâa tënë wa la mbeni zo atene ti hunda mo ti sara nzoni bê+ na lo wala azo ti Israël kue la atene ti hunda mo ti sara nzoni bê+ na ala, (ndali ti so zo oko oko ahinga kä so ayeke na bê ti lo nga na ye so ason lo),+ na ngoi so ala yôro maboko ti ala na mbage ti da so,+
30 zia si, kâ na yayu, ndo so mo duti dä,+ mo dengi mê mo mä ala, mo pardonné ala.+ Zia nga si mo futa zo oko oko alingbi na aye kue so lo sara, ndali ti so mo hinga ye so ayeke na bê ti lo (gï mo oko la mo hinga tâ ye so ayeke na bê ti azo kue),+
31 tongaso si ala kpe mbeto ti mo na lege so ala tambela na alege ti mo na yâ ti ngoi kue so ala sara kodro na sese so mo mû na akotara ti e.
32 “Nga, tongana wande so ayeke pëpe mbeni oko ti azo ti mo, azo ti Israël, alondo na mbeni yongoro kodro aga ndali ti kota iri+ ti mo* nga ndali ti akpengba ye so mo sara na maboko ti mo, na lo tourné na mbage ti da so+ si lo sambela,
33 zia si, kâ na yayu, ndo so mo duti dä, mo dengi mê mo mä wande so na mo sara ye kue so lo hunda na mo, tongaso si azo ti sese kue ahinga iri ti mo+ na ala kpe mbeto ti mo tongana ti so azo ti mo, azo ti Israël, ayeke sara. Mbi ye nga si ala hinga so iri ti mo ayeke na ndö ti da so mbi sara so.
34 “Tongana mo tokua azo ti mo na mbeni ndo ti gue ti sara bira na awato ti ala,+ na ala tourné lê ti ala na mbage ti gbata so mo soro nga na mbage ti da so mbi sara ndali ti iri ti mo,+ na ala sambela+ mo Jéhovah,
35 zia si, kâ na yayu, mo dengi mê mo mä sambela ti ala na mo sara nzoni bê na ala tongana ti so ala hunda, nga mo sara si a fâ ngbanga ti ala na lege ni.+
36 “Tongana ala sara siokpari na terê ti mo (ndali ti so mbeni zo so asara siokpari pëpe ayeke dä pëpe),+ na bê ti mo ason ngangu na terê ti ala, na mo zia ala na maboko ti wato ti ala, nga azo agbu ala ague na ala na ngbâa na mbeni kodro so ayeke nduru wala ayo,+
37 me na pekoni na kodro ni kâ, li ti ala aga dä na ala kiri na mbage ti mo nga ala voro yanga na mo ti sara nzoni bê na ala, ala tene: ‘E sara siokpari nga e sara ye na lege ni pëpe; e sara sioni mingi,’+
38 nga tongana kâ na kodro ti awato ti ala so agbu ala na ngbâa,+ ala kiri na mbage ti mo na bê ti ala kue+ nga na âme* ti ala kue, ala tourné lê ti ala na mbage ti kodro ti ala so mo mû na akotara ti ala, na mbage ti gbata so mo soro+ nga na mbage ti da so mbi sara ndali ti iri ti mo na ala sambela mo,
39 zia si, kâ na yayu, ndo so mo duti dä, mo dengi mê mo mä sambela ti ala na mo sara nzoni bê na ala tongana ti so ala hunda, nga mo sara si a fâ ngbanga ti ala na lege ni.+ Mbi ye nga si mo pardonné azo ti mo so asara siokpari na terê ti mo.
40 “Ti fadeso, Nzapa ti mbi, pardon, zia si lê ti mo abâ azo so asambela mo na* ndo so,+ na mo dengi mê mo mä ala.
41 Jéhovah Nzapa, monté mo gue na ndo ti wungo terê ti mo,+ mo na Sanduku ni so ayeke ye so afa ngangu ti mo. Jéhovah Nzapa, zia aprêtre ti mo ayü salut tongana bongo, nga zia azo ti mo so azia bê ti ala na mo afa ngia ti bê ti ala ndali ti anzoni ye so mo sara.+
42 Jéhovah Nzapa, ke pëpe* zo ti mo so mo soro lo so.+ Zia si mo dabe ti mo na tâ ndoye so mo fa na wakua ti mo David.”+
Akete tënë na terê ni
^ Na Hébreu: “molenge so ayeke sigi na yâ ti mo.”
^ Wala “na yâ ti gbagba.”
^ Wala “mba ti lo ni ahunda na lo ti deba terê ti lo.” So ti tene tongana lo deba ti mvene wala lo sara ye alingbi na deba ni pëpe, mbeni ye ti sioni ayeke wara lo.
^ Na Hébreu: “mo tene so zo ti mbilimbili ayeke mbilimbili.”
^ Wala “mo sara si ala bâ pasi.”
^ Na Hébreu: “na ndö ti sese ti kodro ti lo so ayeke na yâ ti gbagba.”
^ Wala “angadi.”
^ Wala “sango ti mo so amû ndo.”
^ Bâ na kete bakari.
^ Wala “ndali ti.”
^ Na Hébreu: “ke pëpe ti bâ lê ti.”
