Genèse 15:1-21
15 Na pekoni, Jéhovah asara tënë na Abram na yâ ti mbeni vision, lo tene: “Abram, sara mbeto pëpe.+ Mbi yeke vala ndali ti mo.+ Futa ti mo ayeke duti ande kota mingi.”+
2 Abram atene: “Jéhovah, Seigneur ti dunia kue, so mbi yeke na molenge pëpe nga da ti mbi ayeke ga ande ti Éliézer,+ zo ti Damas, nyen la mo yeke mû ande na mbi?”
3 Abram akiri atene: “Mo mû na mbi molenge*+ pëpe, nga mbeni zo* ti da ti mbi la ayeke ga héritier na peko ti mbi.”
4 Me Jéhovah atene na lo: “Koli so la ayeke ga héritier na peko ti mo pëpe, me a yeke tâ molenge ti yâ* ti mo la ayeke ga héritier na peko ti mo.”+
5 Fadeso Nzapa asigi na Abram na gigi, lo tene na lo: “Pardon, yô lê ti mo na nduzu na diko atongoro, tongana mo lingbi ti diko ala.” Lo kiri lo tene na lo: “Hale* ti mo ayeke ga ande tongaso.”+
6 Abram amä na bê na Jéhovah;+ na Nzapa adiko ni na lo tongana mbilimbili.+
7 Lo tene na lo: “Mbi yeke Jéhovah, lo so asigi na mo na Ur ti azo ti Chaldée ti mû sese so na mo si aga ti mo.”+
8 Abram atene: “Jéhovah, Seigneur ti dunia kue, nyen la ayeke mû lege na mbi ti hinga so sese ni ayeke ga ande ti mbi?”
9 Lo tene na lo: “Mû wali-bagara ti ngu ota so ade ti dü pëpe, wali-ngasa ti ngu ota, koli-taba ti ngu ota, kolokoto oko nga na kete pigeon oko.”
10 Tongaso, lo mû anyama so kue, lo fâ yâ ti ala use use na lo zia ni mbage na mbage,* me lo fâ yâ ti andeke ni pëpe.
11 Andeke ti mungo nyama ato nda ti descend na ndö ti akuâ ti anyama ni, me Abram ayeke tomba ala.
12 Na ngoi so lâ aye ti linda, Abram atï na kota lango, na mbeni kota bingo so amû mbeto mingi na zo aga na ndö ti lo.
13 Nzapa atene na Abram: “Hinga biani so ahale* ti mo ayeke sara kodro na mbeni kodro so ayeke ti ala pëpe; ala yeke ga angbâa na a yeke sara pasi na ala kâ ngu 400.+
14 Me mara ni so ala yeke sara kua na ala so,+ mbi yeke dë ngbanga na li ti ala; na pekoni ahale ti mo ayeke hon na gbâ ti anzoni ye.+
15 Âdu ti mo, mo yeke wu terê ti mo na siriri tongana ti akotara ti mo; a yeke lu mo na peko ti so mo ga mbakoro mingi.+
16 Me tongana a si na ahale ti mo so aga na molongo osio ni, ala yeke kiri na ndo so,+ ngbanga ti so ade faute ti azo ti mara ti Amori alingbi kue pëpe.”+
17 Tongana lâ alinda awe nga ndo avuko mingi, lo bâ mbeni four so guru ayeke sigi dä, nga mbeni keke so wâ ayeke za na yanga ni ahon na popo ti anyama so a fâ yâ ni so.
18 Na lango ni so, Jéhovah ate mbele na Abram,+ lo tene: “Mbi yeke mû sese so na ahale* ti mo,+ a londo na ngu ti Égypte juska na kota ngu, Ngu ti Euphrate:+
19 sese ti azo ti mara ti Kéni,+ ti Kénaz, ti Kadmon,
20 ti azo ti mara ti Heth,+ ti azo ti Périzzi,+ ti azo ti Rapha,+
21 ti azo ti mara ti Amori, ti azo ti Canaan, ti azo ti mara ti Guirgashi na ti azo ti mara ti Jébus.”+
Akete tënë na terê ni
^ Na Hébreu: “ngongoa.”
^ Na Hébreu: “molenge-koli.”
^ Na Hébreu: “ngongoa.”
^ Na Hébreu: “Ngongoa.”
^ Wala “lo zia ni ti tene kate alingbi na place ti kate, gere alingbi na place ti gere.”
^ Na Hébreu: “ngongoa.”
^ Na Hébreu: “ngongoa.”
