Genèse 20:1-18
-
A zi Sara na tïtî Abimélek (1-18)
20 Abraham alondo na ndo so,+ lo gue na sese ti Négueb na lo sara kodro na popo ti Cadès+ na Shur.+ Na ngoi so lo yeke sara kodro* na Guérar,+
2 Abraham akiri atene na ndö ti wali ti lo Sara, atene: “Lo yeke ita ti mbi ti wali.”+ Tongaso, Abimélek gbia ti Guérar atokua ndo na a ga na Sara na lo.+
3 Na pekoni, Nzapa aga na Abimélek na yâ ti bango li na bï, na lo tene na lo: “Bâ, mo kui fade awe ngbanga ti wali so mo mû lo so,+ ndali ti so lo yeke wali ti koli.”+
4 Me Abimélek andu lo pëpe.* Ni la lo tene: “Jéhovah, mo yeke fâ mbeni mara so tënë ayeke na li ti lo ape so?*
5 Lo la lo tene na mbi, lo tene: ‘Lo yeke ita ti mbi ti wali.’ Wali ni nga atene: ‘Lo yeke ita ti mbi ti koli.’ Mbi sara ni na mbana pëpe nga, na yâ ti ye so asi so, maboko ti mbi avuru.”
6 Tâ Nzapa atene na lo na yâ ti bango li ni, atene: “Mbi kue mbi hinga so mo sara ye so na mbana pëpe, ni la mbi kanga lege na mo ti sara siokpari na terê ti mbi. Ndani la mbi zia lege na mo ti ndu lo pëpe.
7 Me ti fadeso, kiri na wali so na koli ti lo, teti koli ni ayeke prophète.+ Lo yeke voro terê na mbi ndali ti mo,+ tongaso mo yeke ngbâ na fini. Me tongana mo kiri na wali ni pëpe, hinga so ti tâ tënë ni mo yeke kui, mo na azo ti mo kue.”
8 Abimélek alondo hio na ndapre, lo iri awakua ti lo kue, lo tene atënë so kue na ala, na mbeto asara ala mingi.
9 Na pekoni Abimélek airi Abraham, lo hunda lo, lo tene: “Nyen la mo sara na e tongaso so? Siokpari ti nyen la mbi sara na terê ti mo si mo ga na kota siokpari na ndö ti mbi na royaume ti mbi? Ye so mo sara na mbi so ayeke na lege ni pëpe.”
10 Abimélek akiri ahunda Abraham: “Nyen la apusu mo ti sara tongaso?”+
11 Abraham atene: “A yeke ndali ti so mbi tene na yâ ti bê ti mbi, mbi tene: ‘Mbeto ti Nzapa ayeke na ndo so oko pëpe, na a yeke fâ mbi ande ndali ti wali ti mbi.’+
12 Nga, lo yeke biani ita ti mbi ti wali, molenge ti babâ ti mbi, me molenge ti mama ti mbi pëpe; na lo ga wali ti mbi.+
13 Tongaso, na ngoi so Nzapa atene na mbi ti sigi na da ti babâ ti mbi ti fono gï tongaso,+ mbi tene na lo, mbi tene: ‘Mo lingbi ti fa so mo yeke na tâ ndoye na mbage ti mbi na lege so: Na ndo kue so e si ande dä, tene na azo, mo tene: “Lo yeke ita ti mbi ti koli.”’”+
14 Abimélek amû ataba, abagara nga na azo ti kua ti koli na ti wali, lo mû ala na Abraham nga lo kiri na lo wali ti lo Sara.
15 Nga, Abimélek atene: “Bâ, sese ti mbi la ayeke na gbele mo so. Sara kodro na ndo kue so bê ti mo aye.”
16 Lo tene na Sara: “Bâ, mbi mû alê ti nginza ti argent 1 000 na ita ti mo ti koli.+ A yeke mbeni ye ti fa na azo kue so ayeke na mo nga na tanga ti azo kue so tënë ayeke na li ti mo pëpe, na azo ayeke hinga so mo sara ye ti kamene pëpe.”
17 Abraham avoro terê na tâ Nzapa; na Nzapa asava Abimélek, wali ti lo nga na angbâa ti lo ti wali, na ala to nda ti dü amolenge,
18 ndali ti so Jéhovah asara si awali kue ti da ti Abimélek alingbi ti dü pëpe* ngbanga ti Sara, wali ti Abraham.+
Akete tënë na terê ni
^ Wala “lo yeke sara kodro tongana wande.”
^ Wala “so ayeke mbilimbili so?”
^ So ti tene lo bungbi na lo pëpe.
^ Wala “akanga yâ ti awali kue ti da ti Abimélek.”
