Genèse 42:1-38
42 Tongana Jacob amä so alê ti kobe ayeke na Égypte,+ lo hunda amolenge ti lo, lo tene: “Ngbanga ti nyen ala duti, ala yeke bâ gï lê ti mba?”
2 Nga lo tene: “Mbi mä a tene alê ti kobe ayeke na Égypte. Ala gue kâ, ala vo mbeni na e, tongaso si e ngbâ na fini, si e kui pëpe.”+
3 Tongaso, aita ti Joseph bale-oko+ adescend na Égypte ti vo alê ti kobe.
4 Me Jacob azia pëpe si Benjamin,+ ita ti Joseph, ague na aita ti lo, ndali ti so lo tene: “Hinga ape, ye ti sioni asi na lo.”+
5 Tongaso, amolenge ti Israël asi na Égypte nga na ambeni zo so ague kâ ti vo alê ti kobe, ndali ti so kota nzara ni asi juska na sese ti Canaan.+
6 Joseph la akomande na ndö ti kodro ni.+ Lo la lo yeke kä alê ti kobe ni na azo kue ti sese.+ Tongaso, aita ti Joseph aga, ala kuku na sese na gbe ti lo.+
7 Tongana Joseph abâ aita ti lo, hio lo hinga ala, me lo sara ti tene ala hinga lo pëpe.+ Tongaso lo sara tënë na ala na ngangu, lo tene: “Ala londo na ndo wa?” Ala tene: “E londo na sese ti Canaan, e ga ti vo kobe.”+
8 Tongaso, Joseph ahinga aita ti lo, me ala hinga lo pëpe.
9 Hio, Joseph adabe ti lo na abango li so lo bâ lani na ndö ti ala,+ na lo tene na ala: “Ala yeke azo ti bembengo ndo! Ala ga ti bâ kodro ni ti hinga mbage so aye ti batango kodro ni ayeke dä pëpe!”*
10 Me ala tene na lo, atene: “A yeke tongaso pëpe, seigneur ti e; e azo ti kua ti mo e ga ti vo akobe.
11 E kue e yeke amolenge ti babâ oko. E yeke azo ti mbilimbili. E azo ti kua ti mo e yeke azo ti bembengo ndo pëpe.”
12 Me lo tene na ala: “Mvene la! Ala ga gï ti bâ kodro ni ti hinga mbage so aye ti batango kodro ni ayeke dä pëpe!”
13 Ala tene: “E, azo ti kua ti mo, e yeke aita, li ti e ayeke 12.+ E yeke amolenge ti babâ oko+ na sese ti Canaan; tanga ti e kue angbâ na terê ti babâ ti e+ na ndembe so, me oko ti e ayeke dä encore ape.”+
14 Me Joseph atene na ala: “Ka tënë so mbi tene na ala so la! ‘Ala yeke azo ti bembengo ndo!’
15 Mbi yeke bâ ande wala ala tene tâ tënë: Na iri ti Pharaon so ayeke na fini, mbi tene na ala so tongana tanga ti ita ti ala ni asi ge pëpe, ala yeke kiri ande pëpe.+
16 Ala tokua mbeni mba ti ala oko ti gue ti ga na ita ti ala ni, me ti ala atanga ni, ala yeke ngbâ ti ala ge. Tongaso si mbi bâ wala tâ tënë la ala tene so. Tongana ala tene tâ tënë pëpe, na iri ti Pharaon so ayeke na fini, ala yeke azo ti bembengo ndo.”
17 Na peko ti ye so, lo zia ala kue na kanga lango ota.
18 Na ota lango ni, Joseph atene na ala, atene: “Mbi kpe mbeto ti Nzapa. Tongaso, ala sara ye so si ala ngbâ na fini:
19 Tongana ala yeke azo ti mbilimbili, zia mbeni ita ti ala oko angbâ na da so a kanga ala dä. Me ti ala atanga ni, ala gue nga ala mû alê ti kobe ti kanga na lê ti kota nzara so atï na ndö ti azo ti da ti ala.+
20 Na pekoni, ala ga na ngambe ti ala ni na mbi, tongaso si mbi hinga so ala tene tâ tënë; na ala yeke kui pëpe.” Ala yeda ti sara tongaso.
21 Ala yeke tene na mba, atene: “Ti tâ tënë ni, a yeke punir e ndali ti ye so e sara lani na ita ti e ti koli so,+ ngbanga ti so na ngoi so lo voro terê na e lani ti bâ mawa ti lo na yâ ti vundu ti lo,* e mä lo pëpe. Ndani la si ye ti vundu so asi na e.”
22 Ruben atene: “Mbi tene na ala lani ape? Mbi tene: ‘Ala sara siokpari na terê ti molenge so pëpe,’ me ala ke ti mä mbi.+ Ala bâ fadeso awe! A yeke hunda mênë ti lo na maboko ti e.”+
23 Me ala hinga pëpe so Joseph ayeke mä yâ ti tënë ni, ndali ti so zo ti kiringo peko ti tënë ayeke na popo ti lo na ala.
24 Tongaso, lo gboto terê ti lo na mbeni ndo, na lo komanse ti toto.+ Na ngoi so lo kiri, lo sara tënë na ala, na lo mû Siméon,+ lo kanga lo na lê ti ala.+
25 Na pekoni, Joseph amû yanga ti tene a tuku alê ti kobe na yâ ti asac ti ala asi, ti kiri na nginza ti zo oko oko na yâ ti sac ti lo nga ti mû na ala ye ti tengo ni na lege. A sara aye ni so na ala.
26 Tongaso, ala zia alê ti kobe ni na ndö ti akororo ti ala, na ala londo ala hon.
27 Na ngoi so mbeni oko azi yanga ti sac ti lo ti mû kobe na kororo ti lo na ndo so ala lango dä, lo bâ so nginza ti lo ayeke na yanga ti sac ti lo.
28 Tongaso, lo tene na aita ti lo, lo tene: “A kiri na mbi nginza ti mbi; bâ ni la na yâ ti sac ti mbi so!” Bê ti ala afâ kue nga terê ti ala adö, ala bâ lê ti mba si ala tene: “Nyen la Nzapa asara na e tongaso so?”
29 Tongana ala si na ndo ti babâ ti ala Jacob na sese ti Canaan, ala fa na lo peko ti aye kue so asi na ala, ala tene:
30 “Koli so ayeke seigneur ti kodro ni asara tënë na e na ngangu,+ nga lo tene so e ga ti bembe ndo na yâ ti kodro ni.
31 Me e tene na lo, e tene: ‘E yeke azo ti mbilimbili. E yeke azo ti bembengo ndo pëpe.+
32 E yeke aita, li ti e ayeke 12.+ E yeke amolenge ti babâ oko. Oko ti e ayeke dä encore ape,+ na tanga ti e ayeke na ndembe so na terê ti babâ ti e na sese ti Canaan.’+
33 Me koli so ayeke seigneur ti kodro ni atene na e, atene: ‘Tongana ala sara ye so, mbi yeke hinga so ala yeke azo ti mbilimbili: Ala zia mbeni ita ti ala oko angbâ na mbi ge.+ Ti ala atanga ni, ala mû mbeni ye ti kanga na lê ti kota nzara so atï na ndö ti azo ti da ti ala, ala gue.+
34 Ala ga na ngambe ti ala ni na mbi, tongaso si mbi hinga so ala yeke azo ti bembengo ndo pëpe, me ala yeke azo ti mbilimbili. Tongaso mbi yeke kiri na ita ti ala na ala, na ala lingbi ti dë buze na yâ ti kodro ni.’”
35 Na ngoi so ala yeke tuku aye ti yâ ti asac ti ala, ala bâ so bozo ti nginza ti zo oko oko nga na nginza ni kue ayeke na yâ ti sac ti lo. Tongana ala na babâ ti ala abâ nginza ni, mbeto asara ala.
36 Babâ ti ala Jacob asara tënë na ala na mawa, lo tene: “Mbi la ala zia mbi na mawa so!+ Joseph ayeke dä encore ape,+ Siméon nga kue ayeke dä pëpe,+ na ala yeke mû ande Benjamin ti gue na lo! Mbi oko so la aye so kue aga na ndö ti mbi so!”
37 Me Ruben atene na babâ ti lo: “Mo peut ti fâ amolenge ti mbi ti koli use so tongana mbi kiri na lo na mo pëpe.+ Zia lo na maboko ti mbi, na mbi la mbi yeke kiri na lo na mo.”+
38 Me lo tene: “Molenge ti mbi ayeke gue na ala pëpe, ndali ti so ita ti lo akui awe, gï lo oko la lo ngbâ.+ Tongana mbeni ye ti sioni asi na lo na lege, ala yeke sara si mbi so mbi ga mbakoro awe so mbi gue na yâ ti Dû ti kuâ*+ na vundu na bê ti mbi.”+
Akete tënë na terê ni
^ Wala “ando so azo alingbi ti mû ni hio.”
^ Wala “na yâ ti vundu ti âme ti lo.”
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
