Genèse 44:1-34
44 Na pekoni, lo mû yanga na koli so ayeke bâ ndo na ndö ti da ti lo, lo tene: “Tuku kobe asi yâ ti asac ti akoli so alingbi na ti so ala lingbi ti yô, na mo zia nginza ti zo oko oko na yâ ti sac ti lo.+
2 Me mo zia kopo ti mbi, kopo ti argent so, na yâ ti sac ti tanga ti ala ni nga na nginza ti lo ti vongo na alê ti kobe.” Tongaso, lo sara tongana ti so Joseph atene.
3 Na ndapre ni, tongana ndo ahan awe, a zia lege na ala ti gue, ala na akororo ti ala.
4 So ade ala hon ayo na gbata ni pëpe, Joseph atene na koli so ayeke bâ ndo na ndö ti da ti lo, lo tene: “Londo! Tomba peko ti akoli so! Tongana mo wara ala, mo hunda ala, mo tene: ‘Mbi sara nzoni na ala, me ala kiri sioni na mbi ndali ti nyen?
5 Kopo so la si wa ti mbi ayeke nyon na ye ape? nga ni la na lege ni lo yeke hinga aye so ayeke si kekereke so ape? Ye so ala sara so ayeke sioni mingi.’”
6 Tongaso lo gue lo wara ala na lo tene tënë ni na ala.
7 Me ala tene na lo: “Seigneur ti e atene mara ti tënë tongaso ngbanga ti nyen? E azo ti kua ti mo e pensé lâ oko pëpe ti sara mara ti ye tongaso.
8 Nginza so e wara na yâ ti asac ti e, e mû ni na sese ti Canaan e kiri na ni na mo.+ Tongaso, a sara tongana nyen si e nzi argent wala lor na da ti wa ti mo?
9 Tongana mo wara ni na maboko ti mbeni oko ti e angbâa ti mo, zia lo kui; me ti e atanga ni, e yeke ga angbâa ti mo seigneur ti e.”
10 Lo tene: “Zia ye ni aduti tongana ti so ala tene: Zo so a wara ni na maboko ti lo ayeke ga ande ngbâa ti mbi, me ti ala atanga ni, tënë ayeke na li ti ala pëpe.”
11 Ge, hio zo oko oko azia sac ti lo na sese na lo zi yanga ni.
12 Lo gi yâ ti asac ni nzoni, lo komanse na yaya ti ala kue na lo hunzi na ngambe ti ala kue. Lo gi kopo ni ngbii lo wara ni na yâ ti sac ti Benjamin.+
13 Tongaso, ala suru bongo na terê ti ala; zo oko oko akiri akanga kungba ti lo na ndö ti kororo ti lo na ala kiri na yâ ti gbata ni.
14 Tongana Juda+ na aita ti lo alï na yâ ti da ti Joseph, lo ngbâ na yâ ni; na ala tï na sese na gbe ti lo.+
15 Joseph atene na ala: “Mara ti kua ti nyen la ala sara tongaso? Ala hinga pëpe so zo tongana mbi so alingbi ti hinga kozo aye so ayeke si?”+
16 Ge, Juda atene: “Ka e tene nyen na wa ti e? E tene ande nyen? E lingbi ti sara nyen ti fa so e yeke azo ti mbilimbili? Tâ Nzapa asigi na faute ti angbâa ti mo awe.+ E ga angbâa ti mo wa ti e fadeso awe, e na lo so a wara kopo ni na maboko ti lo!”
17 Me lo tene: “Mbi lingbi ti pensé lâ oko pëpe ti sara ye tongaso!” Koli so a wara kopo ni na maboko ti lo, lo la lo yeke ga ngbâa ti mbi.+ Âdu ti ala atanga ni, ala gue na siriri na ndo ti babâ ti ala.”
18 Fadeso Juda apusu nduru na lo, na lo tene: “Pardon, wa ti mbi, zia mbi ngbâa ti mo mbi tene mbeni tënë na mê ti mo wa ti mbi, na zia ngonzo ti mo alondo na terê ti mbi ngbâa ti mo pëpe, ngbanga ti so mo yeke tongana Pharaon.+
19 Lani, wa ti mbi ahunda e angbâa ti lo, lo tene: ‘Ala yeke na babâ wala na mbeni ita ti koli?’
20 Na e tene na wa ti e, e tene: ‘E yeke na babâ so lo ga mbakoro awe nga na mbeni molenge ti lâ ti mbakoro ti lo, ngambe ti e kue.+ Me ita ti lo ti koli akui awe,+ gï lo oko la lo ngbâ na yâ ti mama ti lo,+ na babâ ti lo aye lo mingi.’
21 Na pekoni, mo tene na angbâa ti mo, mo tene: ‘Ala ga na lo na mbi si mbi bâ lo na lê ti mbi.’+
22 Me e tene na wa ti e, e tene: ‘Molenge ni alingbi ti hon na terê ti babâ ti lo pëpe. Tongana lo hon na terê ti babâ ti lo, ti tâ tënë ni, babâ ni ayeke kui.’+
23 Si mo tene na e angbâa ti mo, mo tene: ‘Ala lingbi ti kiri ti bâ lê ti mbi gï tongana ngambe ti ala kue aga legeoko na ala si.’+
24 “Tongaso, e monté na ndo ti ngbâa ti mo, babâ ti mbi, na e tene peko ti yanga ti wa ti e na lo.
25 A si na mbeni ngoi, babâ ti e atene: ‘Ala kiri, ala vo mbeni kobe ni kete na e.’+
26 Me e tene: ‘E lingbi ti gue kâ pëpe. Tongana ngambe ti e ni ague legeoko na e, e yeke gue, ngbanga ti so e lingbi ti bâ lê ti koli ni gï tongana lo yeke na terê ti e.’+
27 Ngbâa ti mo, babâ ti mbi, atene na e, atene: ‘Ala hinga bien so wali ti mbi adü na mbi gï amolenge ti koli use.+
28 Me oko azia mbi, na mbi dema, mbi tene: “Âmanke a suru yâ ti lo kete kete awe!”+ na juska laso mbi bâ lo pëpe.
29 Tongana ala hon na lo so nga si mbi lingbi ti bâ lo pëpe na mbeni ye ti sioni asi na lo, andâ ala yeke sara si mbi descend na yâ ti Dû ti kuâ*+ na mawa na bê ti mbi.’+
30 “Ngbâa ti mo, babâ ti mbi, aye molenge ni tongana fini* ti lo wani; ni la tongana mbi kiri na ndo ti lo si molenge ni ayeke na terê ti e pëpe,
31 gï tongana lo bâ so molenge ni ayeke dä pëpe, lo yeke kui; andâ e angbâa ti mo, e sara si ngbâa ti mo, babâ ti e, so aga mbakoro awe adescend na yâ ti Dû ti kuâ* na vundu na bê ti lo.
32 Mbi ngbâa ti mo, mbi mû yanga na babâ ti mbi mbi tene mbi la mbi yeke sara ande kue si sioni asi na molenge ni pëpe, mbi tene: ‘Tongana mbi kiri na lo na mo pëpe, andâ siokpari so mbi sara na terê ti mo babâ ti mbi ayeke ngbâ lakue lakue.’+
33 Pardon, wa ti mbi, zia mbi ga ngbâa ti mo na place ti molenge ni, tongaso si lo na aita ti lo akiri.
34 Mbi yeke kiri na ndo ti babâ ti mbi sân molenge ni na terê ti mbi tongana nyen? Ye ti vundu so ayeke si ande na babâ ti mbi, mbi ye ti bâ ni pëpe.”
Akete tënë na terê ni
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
^ Wala “âme.”
^ Wala “Shéol,” so ti tene dû ti kuâ so azo kue ayeke gue dä. Bâ na kete bakari.
