Genèse 45:1-28
45 Ge, Joseph alingbi ti kanga bê ti lo encore ape na lê ti azo ti kua ti lo kue.+ Tongaso, lo dekongo, lo tene: “Mbi ye azo kue asigi!” Mbeni zo nde ayeke na terê ti Joseph pëpe na ngoi so lo fa terê ti lo na aita ti lo.+
2 Tongaso, lo komanse ti toto ngangu, na azo ti Égypte amä ni nga azo ti da ti Pharaon amä ni.
3 Joseph atene na aita ti lo, atene: “Mbi Joseph la. Babâ ti mbi angbâ na fini?” Me aita ti lo ayeke na ngangu pëpe ti kiri tënë na lo, ngbanga ti so li ti ala akpe kue ndali ti lo.
4 Tongaso, Joseph atene na aita ti lo, atene: “Pardon, ala ga na terê ti mbi.” Ala gue na terê ti lo.
Lo tene: “Mbi ita ti ala Joseph la, mbi so ala kä mbi na azo ti Égypte.+
5 Me zia bê ti ala ason pëpe nga zia ala bi tënë na li ti mba pëpe ngbanga ti so ala kä mbi ge; a yeke ti bata ala na fini la Nzapa atokua mbi kozo ti ala.+
6 Use ngu ti kota nzara na sese ni la,+ na a ngbâ ngu oku so na yâ ni dengo yaka wala kongo lê ti kobe ayeke duti ande dä pëpe.
7 Me Nzapa atokua mbi kozo ti ala ti tene mbeni tanga ti ala+ angbâ na ndö ti sese* nga ti bata ala na fini na lege ti mbeni kota ye so a sara ti zi ala.
8 Tongaso a yeke ala la atokua mbi ge pëpe, me a yeke tâ Nzapa, si lo zia mbi tongana kota zo ti mungo wango na* Pharaon, tongana seigneur ti da ti lo kue nga tongana zo so akomande na ndö ti kodro ti Égypte kue.+
9 “Ala kiri hio na ndo ti babâ ti mbi, ala tene na lo, atene: ‘Molenge ti mo Joseph atene: “Nzapa azia mbi seigneur na ndö ti Égypte kue.+ Ga na mbi ge. Ku pëpe.+
10 Mo yeke sara kodro na sese ti Goshen;+ ge la mo yeke duti ande nduru na mbi, mo, amolenge ti mo, a-âta ti mo, anyama ti mo kue nga na aye ti mo kue.
11 Kâ, mbi yeke sara si mo wara kobe, teti a ngbâ ngu oku ti tene kota nzara ni ahunzi.+ Tongaso pëpe, mo na azo ti da ti mo ayeke tï na yâ ti yere nga aye ti mo kue ayeke buba.”’
12 Ala nga na ita ti mbi Benjamin abâ na lê ti ala so mbi la mbi yeke sara tënë na ala so.+
13 Tongaso, ala fa na babâ ti mbi tënë ti gloire kue so mbi wara na Égypte nga na aye kue so ala bâ. Ala sara hio, ala ga na babâ ti mbi ge.”
14 Na pekoni, lo tï na ndö ti go ti ita ti lo Benjamin, na lo to nda ti toto, Benjamin nga atoto na ndö ti go ti lo.+
15 Lo su ngbangba ti aita ti lo kue nga lo toto na ndö ti go ti ala; na pekoni aita ti lo asara tënë na lo.
16 Sango ni atï na mê ti azo ti da ti Pharaon, a tene: “Aita ti Joseph aga!” Tënë ni azia ngia na bê ti Pharaon na azo ti kua ti lo.
17 Tongaso, Pharaon atene na Joseph: “Tene na aita ti mo, mo tene: ‘Ala sara ye so: Ala kanga kungba na ndö ti anyama ti ala ti yongo kungba, ala kiri na sese ti Canaan,
18 ala mû babâ ti ala na azo ti da ti ala, ala ga na mbi ge. Mbi yeke mû ande na ala anzoni ye ti kodro ti Égypte; na ala yeke te ande anzoni ye ti sese ni.’*+
19 Mo mû yanga na ala, mo tene:+ ‘Ala sara ye so: Ala mû apuse+ ti kodro ti Égypte ndali ti amolenge ti ala na awali ti ala, na ala mû babâ ti ala na ndö ti mbeni oko, ala ga ge.+
20 Ala gi bê ti ala ndali ti aye ti ala pëpe,+ ndali ti so anzoni ye ti kodro ti Égypte kue ayeke ti ala.’”
21 Amolenge ti Israël asara tongaso, na Joseph amû na ala apuse alingbi na yanga so Pharaon amû, nga lo mû na ala akobe ti tengo na lege.
22 Lo mû na ala oko oko kue mbeni bongo, me lo mû na Benjamin alê ti nginza ti argent 300 nga na bongo oku.+
23 Lo tokua aye so na babâ ti lo: akororo bale-oko so ayô anzoni ye ti Égypte, awali-kororo bale-oko so ayô alê ti kobe, mapa nga na aye ti tengo ti babâ ti lo na lege.
24 Lo zia lege na aita ti lo ti hon, me tongana ala mû lege ti hon, lo tene na ala: “Ala sara ngonzo na terê ti mba na lege pëpe.”+
25 Ala zia Égypte, ala monté na sese ti Canaan na ndo ti babâ ti ala Jacob.
26 Ala tene na lo, atene: “Joseph angbâ na fini, na lo la lo komande na ndö ti kodro ti Égypte kue!”+ Me lo duti gï kpô tongaso, ndali ti so lo mä na bê na tënë ti ala ni pëpe.+
27 Na ngoi so ala tene na babâ ti ala Jacob atënë kue so Joseph atene na ala, nga tongana lo bâ apuse so Joseph atokua ti tene a yô na lo, terê ti lo anzere.
28 Na nzerengo terê Israël atene: “Tâ tënë la ala tene so! Molenge ti mbi Joseph angbâ na fini! Mbi yeke gue ti bâ lo kozoni si mbi kui!”+
Akete tënë na terê ni
^ Wala “na yâ ti kodro ni.”
^ Na Hébreu: “tongana babâ ti.”
^ Wala “ala yeke wara ye so ala yeke na bezoin ni ti ngbâ na fini.”
