Lévitique 13:1-59
13 Jéhovah akiri asara tënë na Moïse na Aaron, atene:
2 “Tongana ye asuku na terê* ti mbeni zo, wala lo yeke na kä so lê ni ahule hulengo wala mbeni ye asigi na ndö ti poro ti terê ti lo so alingbi ti ga kobela ti buruma,*+ a yeke ga na lo na prêtre Aaron wala na mbeni molenge ti lo ti koli so ayeke prêtre.+
3 Prêtre ni ayeke bâ ande ye ni so. Tongana kuä ti terê ti place so ye ni ayeke dä so achangé aga vuru nga ye ni alï, so kobela ti buruma la. Prêtre ni ayeke bâ ande ni nzoni, na lo yeke tene so zo ni aga sioni awe.
4 Me tongana ye ni so asigi na ndö ti poro ti terê ti zo ni avuru, na prêtre ni abâ so a lï pëpe, nga kuä ti terê ti place ni so achangé aga vuru pëpe, lo yeke zia zo ni nde na tanga ti azo lango mbasambala ti bâ peko ni.+
5 Prêtre ni ayeke bâ lo na lango mbasambala ni; tongana lo bâ so ye ni angbâ gï tongana ti kozo, a kiri a te poro ti terê ti zo ni pëpe, lo kiri lo zia zo ni nde na tanga ti azo lango mbasambala ti bâ peko ni.
6 “Prêtre ni ayeke kiri ti bâ zo ni na lango mbasambala ni; tongana ye ni ayeke hon me ate poro ti terê ti zo ni pëpe, prêtre ni ayeke tene so lo ga nzoni awe.+ A yeke fade kä so lê ni ayeke hule. Zo ni ayeke sukula bongo ti lo na lo ga nzoni.
7 Me na pekoni, tongana zo ni abâ so kä so lê ni ahule hulengo* so akiri ate poro ti terê ti lo, lo yeke kiri* ande ti fa terê ti lo na prêtre.
8 Prêtre ni ayeke bâ ye ni; tongana ye ni akiri ate poro ti terê ti lo, prêtre ni ayeke tene so lo ga sioni awe. So buruma la.+
9 “Tongana a bâ so mbeni zo ayeke na kobela ti buruma, a lingbi a ga na lo na prêtre,
10 na prêtre ni ayeke bâ lo.+ Tongana ye so asuku na terê ti lo avuru vurungo na asara si kuä ti terê ti place ni so achangé aga vuru nga aga kä,+
11 andâ buruma ni ate lo mingi awe la; prêtre ni ayeke tene so lo ga sioni awe. Lo yeke na bezoin ti zia zo ni nde na tanga ti azo pëpe+ ti bâ peko ni, ndali ti so zo ni aga sioni awe.
12 Tongana buruma ni amû poro ti terê ti mbeni zo kue, a londo na li ti lo juska na gere ti lo, nga na bango lo, prêtre ni abâ so a mû terê ti lo kue,
13 na tongana prêtre ni ayeke bâ lo na lo bâ so buruma ni amû terê ti zo ni kue, lo yeke tene so zo ni ayeke nzoni.* So poro ti terê ti lo kue achangé aga vuru, lo ga nzoni awe.
14 Me na ngoi so kä asigi na terê ti lo, lo yeke ga sioni.
15 Na ngoi so prêtre ni abâ kä ni, lo yeke tene so zo ni aga sioni awe.+ Kä ni ayeke sioni; so buruma la.+
16 Me tongana kä ni achangé akiri aga vuru, lo yeke ga ande ti bâ prêtre.
17 Prêtre ni ayeke bâ lo,+ na tongana place ti kä ni achangé aga vuru, prêtre ni ayeke tene so zo ti kobela ni ayeke nzoni. Lo ga nzoni awe.
18 “Tongana furoncle asuku zo si kä ni amü,
19 si na place ni mbeni ye vuru vuru asuku wala mbeni ye so avuru nga abe kete asigi dä, a lingbi lo ga lo fa ni na prêtre.
20 Prêtre ni ayeke bâ ni,+ na tongana lo bâ so ye ni alï, nga kuä ti terê ti place ni so achangé aga vuru, prêtre ni ayeke tene so zo ni aga sioni awe. So buruma la asigi na place ti kä ni so.
21 Me tongana prêtre abâ place ni, na lo bâ so vuru kuä ti terê ayeke dä pëpe, ye ni alï pëpe nga ayeke hon, lo yeke zia zo ni nde na tanga ti azo lango mbasambala ti bâ peko ni.+
22 Tongana ye ni ayeke kono konongo na terê ti zo ni, prêtre ni ayeke tene so zo ni aga sioni awe. So kobela la.
23 Me tongana ye ni angbâ gï tongana ti kozo, a kono pëpe, andâ a yeke gï place ti furoncle ni la akiri asuku so; prêtre ni ayeke tene so zo ni aga nzoni awe.+
24 “Wala tongana place ti kä ti wâ ayeke na terê ti mbeni zo, na place ni so achangé aga mbeni ye so avuru nga abe kete wala ayeke gï vuru vuru,
25 prêtre ayeke bâ ni. Tongana kuä ti terê so ayeke na place ni so achangé aga vuru nga kä ni alï, buruma la asigi na place ti kä ni so; na prêtre ni ayeke tene so zo ni aga sioni awe. So buruma la.
26 Me tongana prêtre ni abâ ni, na lo bâ so vuru kuä ti terê asigi dä pëpe nga kä ni alï pëpe me ayeke hon, prêtre ni ayeke zia zo ni nde na tanga ti azo lango mbasambala ti bâ peko ni.+
27 Prêtre ni ayeke bâ zo ni na lango mbasambala ni, na tongana ye ni akiri ate poro ti terê ti zo ni, prêtre ni ayeke tene so zo ni aga sioni awe. So buruma la.
28 Me tongana place ni angbâ gï tongana ti kozo na akiri ate poro ti terê ti zo ni pëpe nga ayeke hon, andâ a yeke gï place ti kä ti wâ ni la asuku so; prêtre ni ayeke tene so zo ni aga nzoni awe, ndali ti so a yeke place ti kä ti wâ ni la asuku so.
29 “Tongana mbeni ye asigi na li ti koli wala wali wala na place so kuä ti yanga ayeke sigi dä,
30 prêtre ayeke bâ ye ni.+ Tongana ye ni alï, nga kuä ti li wala kuä ti yanga so asigi na place ni so ayeke jaune na ayeke gï oko oko, prêtre ni ayeke tene so zo ni aga sioni awe. So mbeni kobela la asara si kuä ti li wala kuä ti yanga asigi gï oko oko. So buruma ti li wala ti gbe ti yanga la.
31 Me tongana prêtre ni abâ place ni so kuä ti li wala kuä ti yanga asigi dä so, na lo bâ so place ni alï pëpe nga vuko kuä ti li wala kuä ti yanga asigi dä pëpe, prêtre ni ayeke zia zo ni nde na tanga ti azo lango mbasambala ti bâ peko ni.+
32 Prêtre ni ayeke bâ place ni na lango mbasambala ni; tongana place so kuä ni asigi dä gï oko oko so akiri akono pëpe, nga kuä ti li wala kuä ti yanga so ayeke jaune asigi na place ni so pëpe nga tongana place ti kuä ti li wala ti kuä ti yanga ni so alï pëpe,
33 a yeke kio kuä ti li wala kuä ti yanga ti zo ni, me place so kuä ni asigi dä gï oko oko so, a yeke kio ni pëpe; prêtre ni ayeke kiri ti zia zo ni nde na tanga ti azo lango mbasambala ti bâ peko ni.
34 “Prêtre ni ayeke bâ ande place ni so na lango mbasambala ni; tongana place so kuä ni asigi dä oko oko so akiri akono pëpe nga tongana place ti kuä ti li wala kuä ti yanga ni alï pëpe, prêtre ni ayeke tene so zo ni aga nzoni awe; zo ni ayeke sukula bongo ti lo na lo ga nzoni.
35 Me tongana place ni so akiri akono na peko ti so prêtre ni atene so lo ga nzoni awe,
36 prêtre ni ayeke bâ lo; tongana place ni so akiri akono, prêtre ni ayeke na bezoin pëpe ti gi ti bâ wala kuä ni ayeke jaune; zo ni aga sioni awe.
37 Me tongana place ni akiri akono pëpe nga vuko kuä ti li wala kuä ti yanga asigi dä, andâ ye ni ahunzi awe. Zo ni aga nzoni awe, na prêtre ni ayeke tene so lo ga nzoni awe.+
38 “Tongana aye asigi na terê* ti mbeni koli wala wali, na aye ni avuru vurungo,
39 prêtre ayeke bâ aye ni.+ Tongana aye ni avuru mingi pëpe, a yeke gï asenge ye la asigi na terê ti zo ni so. Zo ni ayeke nzoni.
40 “Tongana kuä ti li ti mbeni koli atuku si lo ga li-mbombo, lo yeke nzoni.
41 Tongana kuä ti li ti lo ni atuku na mbage ti devant si lo ga li-mbombo, lo yeke nzoni.
42 Me tongana ye so avuru nga abe kete ayeke na place so amboko so wala na devant ti li ti lo so amboko, so buruma la angbâ ti sigi so.
43 Prêtre ni ayeke bâ lo, na tongana lo bâ so place ni so asuku nga akpa gï kobela ti buruma,
44 zo ni ayeke na kobela ti buruma. Lo ga sioni awe, na prêtre ni ayeke tene so lo ga sioni awe ndali ti so lo yeke na kobela ti buruma na li ti lo.
45 Âdu ti zo so ayeke na kobela ti buruma, lo yeke yü surungo bongo, lo leke kuä ti li ti lo pëpe, lo bi bongo na ndö ti kuä ti yanga ti lo nga lo dekongo: ‘Mbi ga sioni awe! Mbi ga sioni awe!’
46 Na ngoi kue so buruma ni angbâ na terê ti lo, lo yeke sioni. So lo ga sioni awe, lo yeke duti ti lo nde na tanga ti azo. Lo yeke sara kodro na gigi ti camp.+
47 “Tongana buruma amû mbeni bongo, atâa a yeke bongo ti laine wala ti lin,
48 wala alê ti kamba ti bongo ti lin wala ti laine, wala poro ti nyama wala mbeni ye so a sara ni na poro ti nyama,
49 na tongana ye ni so ayeke na terê ti bongo ni wala na terê ti poro ti nyama ni wala na terê ti alê ti kamba ti bongo ni wala na terê ti ye so a sara ni na poro ti nyama ni aye ti gue vert wala abe kete, ye ni so ayeke buruma la; a lingbi a fa ni na prêtre.
50 Prêtre ni ayeke bâ ni, na lo yeke zia ye ni nde lango mbasambala.+
51 Tongana lo bâ ni na lango mbasambala ni, na lo bâ so ye ni akiri akono na terê ti bongo ni wala na terê ti alê ti kamba ni wala na terê ti poro ti nyama ni (atâa kua wa la a yeke sara na poro ni), so sioni buruma la. Ye ni so aga sioni awe.+
52 Atâa a yeke bongo wala alê ti kamba ti bongo ti laine wala ti lin wala ye kue so a sara ni na poro ti nyama si buruma ni amû ni, lo yeke gbi ande ye ni so, ndali ti so a yeke sioni buruma la. A yeke gbi ye ni so.
53 “Me tongana prêtre ni abâ ni, na lo bâ so ye ni akiri akono pëpe na terê ti bongo ni wala na terê ti alê ti kamba ti bongo ni wala na terê ti ye so a sara ni na poro ti nyama,
54 prêtre ni ayeke mû yanga si a sukula ye ni so buruma amû ni so, na lo kiri lo zia ni nde lango mbasambala ti bâ peko ni.
55 Prêtre ni ayeke bâ bongo ni na peko ti so a sukula ni nzoni. Tongana ye ni achangé pëpe, atâa so a kiri a kono pëpe, bongo ni aga sioni awe. Mo gbi ni. Buruma ni ate bongo ni na mbage ti yâ ni wala na mbage ti gigi.
56 “Me tongana prêtre ni abâ ni, na lo bâ so buruma ni ahon kamême na peko ti so a sukula ni nzoni, lo yeke suru ande place so ye ni ayeke dä na terê ti bongo ni, wala na terê ti poro ti nyama ni wala na terê ti alê ti kamba ti bongo ni.
57 Ye oko, tongana buruma ni asigi na mbeni place nde na terê ti bongo ni, wala na terê ti alê ti kamba ti bongo wala na terê ti ye so a sara ni na poro ti nyama, andâ buruma ni angbâ ti sigi la. Mo gbi ye so buruma ni ayeke dä so.+
58 Me tongana mo sukula bongo wala alê ti kamba ti bongo wala ye so a sara ni na poro ti nyama, na buruma ni ahon, mo kiri mo sukula ni ti fani use ni, na ye ni ayeke ga nzoni.
59 “Ndia na ndö ti buruma so amû bongo ti laine wala ti lin, wala alê ti kamba ti bongo wala ye so a sara ni na poro ti nyama la, si a mû lege na prêtre ti tene so ye tongaso aga nzoni wala ye tongaso aga sioni.”
Akete tënë na terê ni
^ Na Hébreu: “na yâ ti poro ti terê.”
^ Tënë ti Hébreu so a kiri peko ni na “buruma” andu aye mingi, na tapande akobela nde nde ti poro ti terê. A lingbi nga ti ndu ambeni kobela so a wara na terê ti bongo wala na yâ ti ada.
^ Wala “kobela.”
^ Wala “kiri ti fani use ni.”
^ Wala “buruma ti lo ni alingbi ti gbu mbeni zo pëpe.”
^ Na Hébreu: “na yâ ti poro ti terê.”
