Exode 3:1-22
3 Moïse aga zo ti batango ataba ti kogara ti lo Jéthro,+ so lo yeke nga prêtre ti kodro ti Madian. Mbeni lâ, tongana Moïse ayeke gue na ataba ni kâ na mbage ti ouest ti benyama ni, lo si na Horeb, hoto ti tâ Nzapa.+
2 Na pekoni, ange ti Jéhovah asi na lo na yâ ti mbeni wâ so angbâ ti za na popo ti mbeni keke ti kî.+ So lo ngbâ ti bâ ye ni, lo bâ so wâ amû keke ti kî ni me keke ni ayeke gbi pëpe.
3 Moïse atene: “Mbi yeke gue ti bâ ye ti ndima so nzoni, ti bâ ngbanga ti nyen si wâ ni ayeke gbi keke ti kî ni ape so.”
4 Na ngoi so Jéhovah abâ so lo gue ti bâ ye ni, na yâ ti keke ti kî ni kâ Nzapa airi lo, atene: “Moïse! Moïse!” Lo kiri tënë: “Mbi la.”
5 Nzapa atene: “Ga nduru ge pëpe. Mo zi poro na gere ti mo, ngbanga ti so ndo so mo luti dä so ayeke nzoni-kue.”
6 Nzapa atene na lo: “Mbi yeke Nzapa ti babâ ti mo, Nzapa ti Abraham,+ Nzapa ti Isaac,+ na Nzapa ti Jacob.”+ Tongaso Moïse ahonde lê ti lo, ndali ti so mbeto ti bâ lê ti tâ Nzapa asara lo.
7 Jéhovah akiri atene: “Biani, mbi bâ vundu so azo ti mbi so ayeke na Égypte ayeke na yâ ni, na mbi mä toto ti ala ngbanga ti azo so ayeke forcé ala ti sara kua ti ngbâa. Mbi hinga nzoni mingi pasi so ala yeke bâ.+
8 Mbi yeke gue ti zi ala na maboko ti azo ti Égypte+ na ti sigi na ala na yâ ti kodro ni ti gue na ala na mbeni kodro so ayeke pendere na so akono, mbeni kodro so lait na mafuta ti otoro asi singo dä,+ na sese ti azo ti Canaan, ti azo ti mara ti Heth, ti azo ti mara ti Amori, ti azo ti Périzzi, ti azo ti Hévi na ti azo ti mara ti Jébus.+
9 Bâ! Toto ti azo ti Israël asi na mbi, mbi bâ nga lege so azo ti Égypte ayeke sara pasi na ala.+
10 Fadeso, mo ga, mbi yeke tokua mo na Pharaon na fade mo sigi na azo ti mbi, azo ti Israël, na Égypte.”+
11 Me Moïse atene na tâ Nzapa: “Mbi yeke zo wa ti gue na gbele Pharaon ti sigi na azo ti Israël na Égypte?”
12 Nzapa atene: “Mbi yeke duti ande na terê ti mo,+ na ye so afa atene mbi la mbi tokua mo ayeke so: Tongana mo sigi na azo ni na Égypte awe, ala yeke sara* ande na tâ Nzapa na ndö ti hoto so.”+
13 Me Moïse atene na tâ Nzapa: “Ka tongana mbi gue na mbage ti azo ti Israël si mbi tene na ala: ‘Nzapa ti akotara ti ala la atokua mbi na ala,’ me ala tene na mbi, atene: ‘Iri ti lo zo wa?’+ fade mbi tene nyen na ala?”
14 Tongaso, Nzapa atene na Moïse: “Fade mbi ga ye so mbi ye ti ga.”*+ Lo kiri lo tene: “Bâ tënë so mo yeke tene na azo ti Israël la: ‘Fade mbi ga ye so mbi ye ti ga atokua mbi na ala.’”+
15 Na pekoni Nzapa akiri atene na Moïse:
“Bâ tënë so mo yeke tene na azo ti Israël la: ‘Jéhovah Nzapa ti akotara ti ala, Nzapa ti Abraham,+ Nzapa ti Isaac+ na Nzapa ti Jacob+ atokua mbi na ala.’ So ayeke iri ti mbi la, a yeke ngbâ lakue lakue,+ azo ti angoi nde nde kue ayeke hinga mbi na iri so.
16 Fadeso mo gue, mo bungbi a-ancien ti Israël, mo tene na ala: ‘Jéhovah Nzapa ti akotara ti ala asi na mbi, Nzapa ti Abraham, ti Isaac na ti Jacob, lo tene: “Mbi bi bê ti mbi biani na ndö ti ala+ nga na ndö ti ye so a yeke sara na ala na Égypte so.
17 Ni la, mbi tene, mbi yeke zi ala na yâ ti pasi+ so azo ti Égypte ayeke sara na ala so, ti gue na ala na kodro ti azo ti Canaan, ti azo ti mara ti Heth, ti azo ti mara ti Amori,+ ti azo ti Périzzi, ti azo ti Hévi na ti azo ti mara ti Jébus,+ mbeni kodro so lait na mafuta ti otoro asi singo dä.”’+
18 “Ala yeke dengi mê biani ti mä mo.+ Na pekoni, mo na a-ancien ti Israël ni ayeke gue na gbele gbia ti Égypte, na ala yeke tene na lo: ‘Jéhovah, Nzapa ti aHébreu,+ asara tënë na e. Pardon mo zia e gue na mbeni tambela ti lango ota na yâ ti benyama, tongaso si e mû sandaga na Jéhovah Nzapa ti e.’+
19 Me mbi hinga biani so gbia ti Égypte ayeke zia ande lege na ala pëpe ti gue gï tongana mbeni ngangu maboko la aforcé lo si.+
20 Mbi yeke yôro ande maboko ti mbi ti punir Égypte na lege ti aye ti kpene kue so mbi yeke sara ande kâ; na pekoni, lo yeke zi ande lege na ala ti gue.+
21 Mbi yeke sara ande si ala ga nzoni na lê ti azo ti Égypte, si na sigingo ti ala, ala yeke hon biani maboko senge pëpe.+
22 Wali oko oko ayeke hunda na wali ti kodro ti Égypte so ayeke nduru na da ti lo, nga na wali ti Égypte so alango na da ti lo ti mû na lo aye ti argent, aye ti lor nga na abongo, na ala yeke yü ni na amolenge ti ala ti koli nga na amolenge ti ala ti wali. Ala yeke ro ye kue na terê ti azo ti Égypte.”+
