Exode 38:1-31
38 Lo sara gbalaka na keke ti acacia ti tene a zö sandaga na ndö ni. Yongo ni coudée* oku, largeur ni coudée oku. Gbalaka ni ayeke carré carré, yongo ni na nduzu ayeke coudée ota.+
2 Na pekoni, lo leke adidi lo zia ni na acoin osio ti gbalaka ni. Adidi ni ayeke na acoin ti gbalaka ni, lo sara cuivre na terê ni kue.+
3 Lo sara nga akungba ti gbalaka ni kue, aseau, apelle, adû ti sembe, akota fourchette nga na ye ti ziango lê ti wâ ni dä. Lo sara ni kue na cuivre.
4 Lo sara mbeni grillage so ayeke tongana gbanda ndali ti gbalaka ni, lo sara ni na cuivre. Lo zia ni na yâ ti gbalaka ni, na gbe ti ayanga ni, a duti na ndambo ti yongo ti gbalaka ni na nduzu.
5 Lo sara akota bague osio na acoin ni osio nduru na grillage ti cuivre ni si abarre ni alï na yâ ti abague ni.
6 Na pekoni, lo mû keke ti acacia lo leke na abarre na lo sara cuivre na terê ni kue.
7 Lo yôro abarre ni na yâ ti akota bague ni so ayeke na aterê ti gbalaka ni si a yo na ni. Lo mû planche lo sara na gbalaka ni si akpa mbeni sanduku, so gbe ni na yanga ni ayeke senge.
8 Na pekoni, lo sara kota tawa ti cuivre+ nga na ye ti ziango tawa ni na ndö ni. Lo mû atatara* ti awali so a mû ala ti sara kusala na yanga ti tente ti bungbi ni si lo sara na ni.
9 Lo zia mbeni lacour+ angoro tabernacle ni. Ti mbage ti sud, gbagba ti lacour ni so abâ ndo na mbage ti sud ni so, lo sara gbagba ni na abongo ti pendere kamba ti lin so a pe ni pengo, yongo ni ayeke coudée 100.+
10 Apilier ni ayeke 20 na agere ni 20, kue na cuivre. Apiquet ti apilier ni nga na aye ti kangango na ni* ayeke na argent.
11 Nga, na mbage ti nord, yongo ti abongo ni ayeke coudée 100. Apilier ni ayeke 20 agere ni nga 20, kue na cuivre. Apiquet ti apilier ni nga na aye ti kangango na ni* ayeke na argent.
12 Me ti mbage ti ouest, abongo ni ayo coudée 50. Apilier ni ayeke bale-oko na agere ni ayeke bale-oko. Apiquet ti apilier ni nga na aye ti kangango na ni* ayeke na argent.
13 Largeur ni na mbage ti est, mbage so lâ asigi dä, ayeke coudée 50.
14 Yongo ti abongo ti terê ni mbage oko ayeke coudée 15. Apilier ni ayeke ota na agere ni ota.
15 Ti mbeni mbage ti terê ti yanga ti gbagba ti lacour ni, yongo ti abongo ni ayeke coudée 15, apilier ni ota na agere ni ota.
16 Abongo so angoro lacour ti tabernacle ni kue a sara ni na pendere kamba ti lin so a pe ni pengo.
17 Agere ti pilier ni ayeke na cuivre. Apiquet ti apilier ni na aye ti kangango na ni ayeke na argent, a sara argent na terê ti ali ni kue. Aye ti kangango na* apilier ti lacour ni kue ayeke na argent.+
18 A kpo rideau ti yanga ti gbagba ni na kamba ti bleu, kamba ti laine so ayeke violet, kamba ti bengba,* nga na pendere lin so a pe ni pengo. Longueur ni ayeke coudée 20, yongo ni na nduzu kue ayeke coudée 5, na a lingbi na ti abongo ti gbagba ti lacour ni.+
19 Apilier ni osio nga na agere ni osio kue ayeke na cuivre. Apiquet ti apilier ni nga na aye ti kangango na ni* ayeke na argent, nga a sara argent na terê ti ali ti apilier ni kue.
20 Apiquet ti tabernacle ni kue na apiquet ti gbagba so angoro lacour ni kue ayeke na cuivre.+
21 A diko aye so a sara na kua ti tabernacle ti Témoin ni.+ Moïse si amû lani yanga ti tene a diko ni. A mû kua ti dikongo aye ni na azo ti mara ti Lévi,+ Ithamar,+ molenge ti prêtre Aaron, si ayeke bâ ndo na ndö ti kua ni.
22 Bézalel+ molenge ti Uri, molenge ti Hur ti mara ti Juda la asara aye so kue Jéhovah afa lani na Moïse so.
23 Oholiab+ ayeke na terê ti lo, lo yeke molenge ti Ahisamak ti mara ti Dan, lo yeke zo so ahinga ti sara kua ti maboko nzoni nga lo hinga ti kpo apendere dessin na terê ti bongo na kamba ti bleu, na kamba ti laine so ayeke violet, kamba ti bengba nga na pendere lin.
24 Wungo ti lor kue so a mû ni ti sara na kua ti ndo so ayeke nzoni-kue alingbi na ti lor so a mû tongana sandaga so a yengi ni.+ Wungo ni ayeke talent* 29 na sicle* 730; a lingbi na sicle so a yeke sara kua na ni na ndo so ayeke nzoni-kue.*
25 Wungo ti argent so azo so a zia iri ti ala na mbeti aga na ni ayeke talent 100 na sicle 1 775, a lingbi na sicle so a yeke sara kua na ni na ndo so ayeke nzoni-kue.*
26 Ndambo ti sicle so zo oko oko aga na ni alingbi na ndambo ti sicle so a yeke sara kua na ni na ndo so ayeke nzoni-kue,* na wungo ti azo oko oko kue so a zia iri ti ala na mbeti, so ngu ti ala alondo na ngu 20 ti gue na ni,+ ayeke 603 550.+
27 Talent ti argent 100 ayeke ti leke na agere ti pilier ti ndo so ayeke nzoni-kue na agere ti pilier ti rideau ni. Agere ti pilier 100 alingbi na talent 100, talent oko ndali ti gere ti pilier oko.+
28 Lo mû sicle 1 775 ti argent lo leke na apiquet ti apilier ni na lo sara argent na terê ti ali ni nga lo tingbi ni na terê ti terê.
29 Cuivre so a mû na offrande* ayeke talent 70 na sicle 2 400.
30 Lo mû cuivre ni so lo leke na agere ti apilier ti yanga ti tente ti bungbi ni, gbalaka ni, grillage ti gbalaka ni, akungba ti gbalaka ni kue,
31 agere ti apilier ti gbagba so angoro lacour ni kue, agere ti pilier ti yanga ti gbagba ni, apiquet ti apilier ti tabernacle ni kue nga na apiquet ti apilier+ ti gbagba so angoro lacour ni kue.
Akete tënë na terê ni
^ So ti tene atatara ti wen so a leke terê ni pendere mingi.
^ Wala “abague ni.”
^ Wala “abague ni.”
^ Wala “abague ni.”
^ Wala “Abague ti.”
^ A mû mbeni ye ti terê ti kete nyama so a iri lo cochenille la a sara na terê ti kamba ni si abe.
^ Wala “abague ni.”
^ Wala “na lege ti sicle so ayeke nzoni-kue.”
^ Wala “na lege ti sicle so ayeke nzoni-kue.”
^ Wala “na lege ti sicle so ayeke nzoni-kue.”
^ Wala “sandaga so a yengi ni.”
