1-3. (a) Kpale wa la amaseka kue ayeke wara? E lingbi ti haka ni na nyen? (Bâ foto so ayeke na tongo nda ti article so.) (b) Tongana nyen la amaseka alingbi ti hon ndö ti kpale so nzoni?

TARA ti bâ so mo leke ti voyagé na mbeni kete gbata so ayo ndali ti mbeni ye so ayeke kota mingi. Ti si kâ a lingbi mo sara mbeni yongoro voyage na car. Mo si na place ti mungo car ni, azo nga na acar ahon ndö ni. Ye ti nzoni ni ayeke so mo hinga ndo so mo ye ti gue dä nga mo hinga car so mo ye ti mû ni. Tongana mo monté mbeni car gï tongaso ti hon, mo yeke si na ndo so mo ye ti gue dä so ape.

² A lingbi ti haka amaseka laso na azo so aye ti voyagé so. Amaseka ayeke na mbeni yongoro voyage ti sara, a ye ti sara tënë ti voyage ti car ape me ti fini ti ala. Na ambeni ngoi ala lingbi ti bâ so alege mingi azi na ala nga adesizion ti mungo ni ayeke mingi me ala hinga ye so ala lingbi ti sara ape. Amaseka, ala lingbi ti sara si a yeke ngangu na ala ape ti mû desizion tongana ala hinga nzoni ndo so ala ye ti gue dä na yâ ti fini ti ala. Ndo wa la mo ye ti gue dä?

³ Article so akiri tënë na hundango ndo so na lege so a wa amaseka ti zia li ti ala gï na ndö ti nzara so ala yeke na ni ti zia ngia na bê ti  Jéhovah. So ti tene ala yeke sara ye alingbi na awango ti Jéhovah na yâ ti adesizion kue so ala ye ti mû na yâ ti fini ti ala, na tapande desizion na ndö ti mandango mbeti, kua, sarango mariage nga na dungo amolenge nga na ambeni ye tongaso. A ye nga ti tene ala zia aye ti yingo na gbele ala ti si dä. Amaseka so angbâ ti zia li ti ala gï na ndö ti kua ti Jéhovah alingbi ti duti na confiance so lo yeke iri tënë nzoni na ndö ti ala si ye so ala yeke sara aga nzoni.—Diko aProverbe 16:3.

4. Nyen la e yeke bâ na yâ ti article so?

⁴ A yeke nzoni ti zia aye ti yingo na gbele mo na ngoi so mo de maseka. Ngbanga ti nyen? E yeke bâ araison ota. Kozo raison ni nga na use ni afa so tongana zo azia aye ti yingo na gbele lo ti si dä, songo ti lo na Jéhovah ayeke kpengba; ota raison ni afa anzoni ye so zo ayeke wara tongana lo zia aye ti yingo na gbele lo na ngoi so lo de maseka.

5. Kozo raison so adoit ti pusu e ti zia aye ti yingo na gbele e ayeke so wa?

⁵ Kozo raison so adoit ti pusu e ti zia aye ti yingo na gbele e ayeke ti fa na Jéhovah so e kiri singila na lo ndali ti ndoye ti lo nga na aye kue so lo sara ndali ti e. Mbeni wasungo psaume atene: “A yeke nzoni ti kiri singila na mo Jéhovah . . . Jéhovah, mo sara si mbi duti na ngia ndali ti akusala ti mo; mbi dekongo na ngia ndali ti akusala ti maboko ti mo.” (Ps. 92:1, 4). So mo yeke maseka, gbu li ti mo na ndö ti aye kue so mo yeke na ni grâce na Jéhovah. Fini ti mo, mabe ti mo, Bible, congrégation nga na pendere beku ti kekereke so mo yeke na ni. Ti zia aye ti yingo na kozo ndo ayeke mbeni lege ti fa so mo kiri singila na Nzapa ndali ti aye so, na ayeke sara si mo ga nduru mingi na lo ahon ti kozo.

6. (a) Aye ti yingo so e zia na gbele e ti si dä ayeke sara nyen na ndö ti songo ti e na Jéhovah? (b) Ambeni ye wa la zo alingbi ti leke ti sara na ngoi so lo de maseka?

⁶ Use raison so adoit ti pusu mo ti zia aye ti yingo na gbele mo ayeke so, tongana mo gi ti sara ni, mo yeke sara nzoni kua na Jéhovah na ayeke sara si mo ga même nduru mingi na lo ahon ti kozo. Bazengele Paul atene: “Nzapa ayeke kirikiri pëpe si lo girisa kusala ti ala nga na ndoye so ala fa ndali ti iri ti lo.” (aHéb. 6:10). Tene lâ oko ape so mo de maseka mingi, mo lingbi pëpe ti zia ambeni ye na gbele mo ti si dä. Na ngoi so Christine ayeke lani na ngu bale-oko lo leke ti diko lakue mbaï ti gigi ti aTémoin so ayeke be-ta-zo. Na ngu 12, Toby azia na gbele lo ti diko Bible kue kozo ti wara batême. Maxim ayeke lani na ngu 11 na ita ti lo ti wali, Noemi ayeke lani na ngu 10 na ngoi so ala wara batême. Na pekoni, ala use kue azia na gbele ala ti sara kua na Béthel. Ti mû maboko na ala ti zia li ti ala gï na ndö ti ye so ala ye ti sara, ala collé demande ti lingo na Béthel na terê ti mur na yâ ti da ti ala. Ka mo? Eskê mo lingbi ti gbu li ti mo na ndö ti ambeni ye so mo lingbi ti zia na gbele mo nga mo komanse ti sara ngangu ti si dä?—Diko aPhilippien 1:10, 11.

7, 8. (a) Tongana nyen la tongana zo aleke na bê ti lo ti sara ambeni ye ayeke sara si aduti ngangu na lo ape ti mû adesizion? (b) Ngbanga ti nyen la mbeni maseka ake lani ti gue na dasendagi?

⁷ Ota raison so ayeke nzoni ti leke na bê ti mo ti sara ambeni ye na ngoi so mo de maseka ayeke so wa? So mo yeke maseka, mo yeke na adesizion mingi ti mû. A lingbi mo mû desizion na ndö ti mandango mbeti wala kua so mo yeke sara ande nga na ambeni ye. Ti mû desizion ayeke tongana sorongo nzoni lege so mo ye ti mû na ngoi so mo si na mbeni croisement. Tongana mo hinga lege so asi na ndo so mo ye ti gue dä, sorongo nzoni lege ni ayeke ngangu ape. Legeoko nga, tongana mo hinga aye so mo ye ti sara, a yeke duti ngangu na mo ape ti mû adesizion. A-Proverbe 21:5 atene: “Tongana azo so asara kua ngangu aleke gere ti akua ti ala, ye ni ayeke ga gï nzoni.” Tongana mo leke gere ti akua ti mo hio na lege so mo zia na gbele mo aye so mo ye ti si dä, aye ti mo ayeke ga nzoni hio mingi. A yeke ye so Damaris asara na  ngoi so lo yeke lani na mbeni kpengba desizion ti mû na ngoi so lo de lani maseka.

⁸ Damaris awara anzoni note na ngoi so lo hunzi mandango mbeti na lycée. Lo lingbi fade ti gue ti sara droit na dasendagi sân ti futa ni me lo soro ti sara kua na banque. Ngbanga ti nyen? Lo tene: “Mbi leke lani ti komanse kua ti pionnier hio. So aye ti tene so a lingbi mbi sara mbeni kua so amû ngoi ti mbi kue ape. Tongana fade mbi sara droit na dasendagi, mbi lingbi ti wara gbâ ti nginza, me ayeke duti ngangu na mbi ti wara mbeni kua so amû ngoi ti mbi kue ape.” Damaris ayeke pionnier asara fadeso ngu 20 awe. Eskê lo bâ so nzoni ye la lo zia lani na gbele lo ti sara nga so ayeke nzoni desizion la lo mû lani na ngoi so lo de maseka? Lo tene: “Na place ti kua ti mbi na banque ni, mbi wara terê fadeso mingi na a-avocat. Ala sara mara ti kua so mbi lingbi fade ti sara tongana mbi sara droit na dasendagi. Me ala mingi ayeke na ngia na akua ti ala ni oko ape. Desizion so mbi mû lani ti sara kua ti pionnier azi mbi na yâ ti songo bê so zo ayeke wara na place ti kua ti nginza nga azi lege na mbi ti duti na ngia na yâ ti kua ti Jéhovah teti angu mingi.”

9. Ngbanga ti nyen la amaseka ti e alingbi ti tene e gonda ala na bê ti e kue?

⁹ Amaseka saki mingi so ayeke na yâ ti acongrégation na yâ ti dunia kue, a lingbi ti tene e gonda ala na bê ti e kue. Ala mû fini ti ala kue na Jéhovah nga ala zia li ti ala gï na ndö ti kua ti lo. Amaseka so amanda ti sara ye alingbi na fango lege ti Jéhovah na yâ ti aye kue so ala yeke sara, ala yeke na ngia mingi na yâ ti fini ti ala. Ala yeke sara ye alingbi na fango lege ti Jéhovah na ndö ti mandango mbeti, ti kua nga na yâ ti sewa. Gbia Salomon atene: “Zia bê ti mo kue na ndö ti Jéhovah.” Lo kiri lo tene: “Na yâ ti aye kue so mo sara, bi bê ti mo na ndö ti lo, na lo yeke sara si alege ti mo aga nzoni.” (aProv. 3:5, 6). Amaseka so ayeke na yâ ti congrégation ayeke na ngangu ngere mingi na lê ti Jéhovah, lo ye ala mingi, lo yeke fa lege na ala, lo yeke bata ala nga lo yeke iri tënë nzoni na ndö ti ala.

10. (a) Ngbanga ti nyen la a lingbi kua ti fango tënë aduti na kozo molongo ti aye so ayeke kota ye na lê ti e? (b) Tongana nyen la e lingbi ti fa tënë nzoni mingi?

¹⁰ Mbeni maseka so azia li ti lo gï na ndö ti nzara so lo yeke na ni ti nzere na lê ti Jéhovah ayeke ye mingi kua ti fango tënë. Jésus Christ atene lani so “a lingbi a fa nzoni tënë na amara kue kozoni si.” (Marc 13:10). Ndali ti so kua ti fango tënë ayeke mbeni kua so a lingbi a sara ni hio, a lingbi a duti na kozo molongo ti aye so ayeke kota ye na lê ti e. Eskê mo lingbi ti leke na bê ti mo ti fa tënë mingi ahon ti kozo? Mo lingbi ti sara kua ti pionnier? Me ka tongana mo bâ so mo yeke na ngia mingi ape na fango tënë? Tongana nyen la mo lingbi ti fa tënë nzoni mingi? Aye use alingbi ti mû maboko na mo: Leke terê ti mo nzoni nga zia pëpe ti fa na amba ti mo ye so mo hinga na ndö ti Jéhovah. Li ti mo alingbi ti kpe na kota ngia so mo yeke wara na ngoi so mo yeke fa tënë.

11, 12. (a) Nyen la amaseka alingbi ti sara ti leke terê ti ala ti fa tënë? (b) Tongana nyen la mbeni maseka agbu mbeni lege so azi na lo ti fa tënë na ekole?

¹¹ Mo lingbi ti komanse na lekengo terê ti mo ti kiri tënë na mbeni hunda so amba ti mo ti ekole ayeke hunda ka ni mingi, na tapande, hundango tënë so: “Ngbanga ti nyen la mo mä na bê na Nzapa?” Na ndö ti site ti e jw.org, mo yeke wara a-article so alingbi ti mû maboko na amaseka ti kiri tënë na hundango ndo so. Gue na gbe ti AYE SO BIBLE AFA > AMASEKA. Kâ mo yeke wara mbeni fiche ti gbungo li so li ni ayeke “Ngbanga ti nyen la mbi mä na bê na Nzapa?” Fiche ni so ayeke fa na mo tongana nyen la mo lingbi ti wara kiringo tënë ni mo wani. Na yâ ti fiche ni, mo yeke wara aversê ota so mo lingbi ti sara kua na ni na ngoi so mo yeke fa ye so mo mä na bê na ni: A-Hébreu 3:4, aRomain 1:20 nga na Psaume 139:14. Ambeni fiche ni nde ayeke dä so mo lingbi ti sara kua na ni ti kiri tënë na ahundango ndo mingi.—Diko 1 Pierre 3:15.

¹² Tene na amba ti mo ti ekole so ala lingbi ti gi aye na ndö ti jw.org. A yeke ye so Luca asara  lani. Na klase ti lo, mbeni lâ ala yeke mû cours na ndö ti abungbi ti vorongo nzapa nde nde. Luca abâ so ambeni ye so a fa na ndö ti aTémoin ti Jéhovah na yâ ti buku ni so ayeke na lege ni ape. Atâa so mbeto asara Luca kete, lo hunda professeur ti lo ni wala lo lingbi ti fa na klase ni ndani so aye ni so ayeke na lege ni ape. Luca afa gï aye so lo mä na bê na ni ape me lo fa nga site ti e na klase ni kue. Ti mû mbeni devoir na a-élève ni ti sara na yanga-da, professeur ni ahunda na ala ti bâ vidéo Lege ti kanga yanga ti zo so agi yanga ti mo. A nzere lani na Luca mingi so lo wara lege ti fa tënë.

13. Ngbanga ti nyen la a lingbi e découragé ape na ngoi so e wara akpale?

¹³ Tongana mo wara akpale, découragé ape me ngbâ ti sara ye so mo leke na bê ti mo ti sara (2 Tim. 4:2). Katharina ayeke lani na ngu 17 na ngoi so lo leke na bê ti lo ti fa tënë na amba ti lo ti place ti kua oko oko kue. Mbeni mba ti lo ti place ti kua ni azonga lo fani mingi, me lo zia pëpe si mbeto asara lo. Nzoni sarango ye ti lo na ngoi ti akpale apika bê ti mbeni mba ti lo ni nde mingi, iri ti lo ayeke Hans. Ye ti peko ni ayeke so, mba ti lo ni akomanse ti diko ambeti ti e, lo manda Bible nga lo wara batême. Katharina ahinga ye oko dä ape ndali ti so lo quitté lani awe. Tara ti bâ ngia ti Katharina na ngoi so ngu 13 na pekoni, lo duti na Da ti Royaume lo na azo ti sewa ti lo na a tisa Hans ti mû diskur na ngoi so lo ga ti mû diskur na congrégation ti ala. So Katharina adécouragé ape ti ngbâ ti sara ye so lo leke na bê ti lo ti sara, so ayeke ti fa tënë na amba ti lo ti place ti kua, a yeke nzoni mingi.

14, 15. (a) Tongana amba ti mo apusu mo ti sara mara ti ye so ala yeke sara, nyen la a lingbi mo girisa ape? (b) Tongana nyen la amaseka alingbi ti luti na amba ti ala so apusu ala ti sara ye so ala ye?

¹⁴ Juska ge, article so awa mo mingi ti mû fini ti mo ti sara gï na kua ti Jéhovah. So ti tene na yâ ti fini ti mo, mo yeke sara gï aye so mo leke na bê ti mo ti sara na lege ti yingo. Peut-être ambeni maseka ti ngu ti mo amû fini ti ala gï ti sara ngia na peut-être ala lingbi ti tisa mo ti bungbi legeoko na ala. Lawa lawa, mo bezoin ti fa na azo so mo leke na bê ti mo ti ngbâ ti sara aye so mo soro ti sara. Zia pëpe si amba ti mo apusu mo ti girisa aye so mo leke na bê ti mo ti sara. Tongana mo kiri mo gbu li ti mo na ndö ti tapande ti car so e mû fade, kite ayeke dä ape so mo yeke monté pëpe na yâ ti mbeni car tongaso ti hon na mbeni ndö gï ndali ti so na bango ni, azo so ayeke na yâ ti car ni so terê ti ala anzere.

 ¹⁵ Aye ayeke mingi so mo lingbi ti sara ti luti na amba ti mo so apusu mo ti sara ye so ala ye. Na tapande, kpe aye so alingbi ti ga na mo atara (aProv. 22:3). Gbu li ti mo na ndö ti asioni ye so ason mingi so alingbi ti si tongana mo na amba ti mo asara aye so ayeke na lege ni ape (aGal. 6:7). Mbeni ye so alingbi nga ti mû maboko na mo ayeke ti hinga so mo bezoin wango. Ti sara terê ti mo kete ayeke mû maboko na mo ti yeda na awango so babâ na mama ti mo nga na azo so akpengba na lege ti yingo na yâ ti congrégation ayeke mû na mo.—Diko 1 Pierre 5:5, 6.

16. Fa mbeni ye so asi so afa anzoni ye ti peko ti sarango terê kete.

¹⁶ Sarango terê kete amû maboko na Christoph ti yeda na anzoni wango. Ngoi kete na peko ti batême ti lo, lo komanse ti sara sport lakue na mbeni place so azo ayeke sara sport dä. Ambeni maseka so ayeke sara sport kâ awa lo ti li na yâ ti équipe ti ala. Lo sara tënë ni na mbeni ancien, ancien ni ahunda na Christoph ti gbu li ti lo na ndö ti ambeni kpale so alingbi ti ga na pekoni kozo si lo mû desizion, na tapande bibe ti mandako so alingbi ti lï lo. Atâa so kue, Christoph alï na yâ ti équipe ni. Me ambeni ngoi na pekoni, lo bâ so sport ni so ayeke ti sarango ye ti ngangu na zo, na ayeke même sioni. Lo kiri lo sara lisoro na a-ancien mingi, ala kue amû na lo wango na lege ti Bible. Christoph atene: “Jéhovah atokua na mbi anzoni wamungo wango, na mbi mä lo atâa so amû même ngoi.” Mo yeke sara terê ti mo kete ti yeda na anzoni wango?

17, 18. (a) Nyen la Jéhovah aye ti tene amaseka awara laso nyen? (b) Nyen la mo lingbi ti sara ti tene tongana mo ga kota zo mo regretté pëpe aye so mo soro ni lani? Fa mbeni ye so asi.

¹⁷ Bible atene: “Maseka-koli [wala maseka-wali], sara ngia na ngoi so mo ngbâ maseka, na zia bê ti mo aduti na ngia na lâ ti maseka ti mo.” (Zo-ti-fa-tene 11:9). Jéhovah aye ti tene mo duti na ngia na lâ ti maseka ti mo. Article so afa mbeni ye so alingbi ti sara si mo duti na ngia. Zia li ti mo gï na ndö ti aye so mo leke ti sara na lege ti yingo nga sara ye alingbi na awango ti Jéhovah na yâ ti aye kue so mo leke ti sara. Tongana mo sara ni na ngoi so mo de maseka, hio mo yeke bâ tongana nyen la Jéhovah ayeke fa lege na mo, lo bata mo nga lo iri tënë nzoni na ndö ti mo. Gbu li ti mo na ndö ti anzoni wango kue so ayeke na yâ ti Bible, na sara ye alingbi na wango so: “Na lâ ti maseka ti mo, dabe ti mo na Lo so asara mo, so ayeke kota mingi.”—Zo-ti. 12:1.

¹⁸ Zo oko ayeke ngbâ maseka ngbii ape. Amaseka ayeke kono hio na ala ga kota zo. Mawa ni ayeke so mingi ti ala aregretté so na ngoi so ala ngbâ maseka, aye so ala zia na gbele ala ti si dä ayeke na lege ni ape wala ala zia ye oko pëpe na gbele ala ti si dä. Me amaseka so laso angbâ ti zia li ti ala gï na ndö ti aye so ala zia na gbele ala ti sara na lege ti yingo ayeke duti ande na ngia mingi na ngoi so ala ga kota zo ndali ti aye so ala soro lani. A yeke ye so asi na Mirjana, so na ngoi so lo de lani maseka lo yeke sara sport nzoni mingi. A hunda lani na lo ti gue na kota ngia ti awanguru ti hiver me lo ke, lo soro ti sara kua ti ngoi kue. Ngu 30 na pekoni, Mirjana angbâ ti sara kua ti ngoi kue, lo na koli ti lo. Lo tene: “Iri ti zo so awu, nengo, ngangu nga na amosoro ayeke aye so ayeke ninga ape nga ayeke aye so ayeke kota ye ape ti tene zo azia na gbele lo ti si dä na yâ ti fini ti lo. Tâ ye so ayeke na nene ni mingi nga so ayeke ninga so zo alingbi ti leke na bê ti lo ti sara ayeke ti sara kua ti Nzapa nga ti gi ti mû maboko na azo na lege ti yingo atâa e sara ni gï kete.”

19. Fa na nduru tënë anzoni ye so zo ayeke wara tongana lo zia li ti lo gï na ndö ti aye ti yingo so lo zia na gbele lo ti si dä na ngoi so lo de maseka.

¹⁹ Amaseka so ayeke na yâ ti congrégation alingbi ti tene a gonda ala mingi ndali ti so atâa akpale so ala wara, ala ngbâ ti mû fini ti ala ti sara gï na kua ti Jéhovah. Ala sara ni na lege so ala gi ti zia aye ti yingo na gbele ala nga kua ti fango tënë ayeke kota ye mingi na lê ti ala. Na ndö ni, ala leke na bê ti ala ti zia pëpe si dunia so agboto lê ti ala. Amaseka alingbi ti hinga na bê ti ala kue so ngangu kua ti ala ayeke ngbâ senge ape. Aita ti ala ayeke mû maboko na ala na ndoye nga tongana ala zia aye kue so ala ye ti sara na maboko ti Jéhovah, aye so ala leke ti sara na yâ ti fini ti ala ayeke ga nzoni.