1. Ngbanga ti nyen la bazengele Paul awa lani aChrétien Hébreu ti kpengba terê na popo ti ala na ti “ngbâ ti sara ni mingi ahon ti kozo”?

NGBANGA TI NYEN la a lingbi e sara ngangu mingi ti kpengba azo? Bazengele Paul afa raison ni na yâ ti lettre so lo tokua na aChrétien Hébreu. Lo tene na ala, lo tene: “Zia e bi lê na ndö ti mba ti pusu mba ti duti na ndoye na ti sara anzoni kusala, e zia pëpe lege ti guengo lakue na bungbi ti e, tongana ti so ambeni zo ayeke sara ka, me e wa terê na popo ti e nga e ngbâ ti sara ni mingi ahon ti kozo, so ala bâ lango ni ayeke pusu nduru.” (aHéb. 10:24, 25). Gï na yâ ti ngu oku, aChrétien Juif so ayeke lango na Jérusalem ayeke bâ “lâ ti Jéhovah” so aga nduru nga ala yeke hinga fä so Jésus afa na ala ti mû lege na ala ti kpe na yâ ti gbata ni ti hon ti bata fini ti ala (Kus. 2:19, 20; Luc 21:20-22). Lâ ti Jéhovah so asi lani na ngu 70 na ngoi so aRomain asara ye alingbi na ngbanga so Jéhovah afâ na ndö ti Jérusalem.

2. Ngbanga ti nyen la a lingbi e bi bê na mba mingi laso?

² Laso, e yeke tâ na raison mingi ti mä na bê so lâ ti Jéhovah so  “ayeke kota mingi nga amû mbeto mingi” ayeke nduru (Joël 2:11). Prophète Sophonie atene: “Kota lâ ti Jéhovah aga nduru! A yeke pusu nduru, na a yeke ga tâ gï hio hio!” (Soph. 1:14). Prophétie ti gbotongo mê so andu nga ngoi ti e. Ndali ti so lâ ti Jéhovah aga nduru, Paul awa e ti “bi bê na ndö ti mba ti pusu mba ti duti na ndoye na ti sara anzoni kusala”. (aHéb. 10:24, kete tënë na gbe ni). Tongaso, a lingbi e bi bê na amba ti e mingi tongaso si e lingbi ti kpengba ala na ngoi so ala bezoin ni.

3. Paul atene nyen na ndö ti kpengbango zo? (Bâ foto so ayeke na tongo nda ti article so.)

³ “Gingo bê asara si bê ti zo anze, me nzoni tënë asara si bê ti lo akiri awara ngia.” (aProv. 12:25). Ye so asi na e kue. E kue e yeke na bezoin ti tene a kpengba e ngoi na ngoi. Paul afa so même azo so ayeke kpengba azo abezoin ti tene a kpengba nga ala. Lo sû mbeti na aChrétien so ayeke na Rome, lo tene: “Mbi yeke na nzara mingi ti bâ ala, si mbi mû na ala mbeni matabisi ti yingo ti tene asara si ala kpengba, wala ti tene e wa terê na popo ti e, na lege ti mabe ti mba, mabe ti ala na ti mbi nga.” (aRom. 1:11, 12). Biani, même Paul so ayeke kpengba lani azo pendere mingi ayeke na bezoin ti tene a kpengba lo na ambeni ngoi.—Diko aRomain 15:30-32.

4, 5. Azo wa la e lingbi ti kpengba ala laso? Ngbanga ti nyen?

⁴ A lingbi a gonda azo so asara asacrifice na yâ ti fini ti ala. Na popo ti ala mo yeke wara apionnier be-ta-zo. Ala mingi asara akota sacrifice ti wara ngoi ti sara kua ti pionnier. Amissionnaire, aBethélite, asurveillant ti circonscription na awali ti ala nga na ala so ayeke sara kua na yâ ti abureau ti traduction so ayo na Béthel asara nga tongaso. Ala kue asara asacrifice ti wara ngoi mingi ti sara akua so ayeke nzoni-kue. Tongaso, a lingbi a kpengba ala. Ambeni zo mingi aye ti ngbâ ti sara kua ti ngoi kue me dutingo ti ala amû lege na ala ape ti ngbâ ti sara ni. Ala nga kue tongana a kpengba ala, a yeke nzere na ala mingi.

⁵ Aita so angbâ kumbamba ndali ti so ala ye ti sara ye alingbi na wango so ahunda ti sara mariage “gï na yâ ti Seigneur”, ayeke nga ambeni zo so alingbi ti tene akpengba ala (1 aCor. 7:39). Legeoko nga, a yeke nzere mingi na awali ti akoli so ayeke sara kua ngangu ti mä atënë so akoli ti ala atene na ala ti kpengba ala (aProv. 31:28, 31). Nga, aita so angbâ be-ta-zo atâa so a sara ye ti ngangu na ala wala so ayeke na kobela abezoin ti mä atënë so akpengba zo (2 aThes. 1:3-5). Jéhovah na Christ ayeke dë bê ti awakua be-ta-zo so kue.​—Diko 2 aThessalonicien 2:16, 17.

6. Kua wa la a mû na a-ancien so a sara tënë ni na Ésaïe 32:1, 2?

⁶ Diko Ésaïe 32:1, 2. Jésus Christ ayeke kpengba azo so vundu ahon ndö ti ala wala so adécouragé na lege ti aita ti lo so a soro ala ti gue na yayu nga na “amokonzi” so ayeke mû maboko na ala so ti tene a-ancien ti ambeni taba. Lo yeke kpengba ala na ngoi so ala bezoin ni. A-ancien ayeke ‘komande’ na ndö ti mabe ti e ape me ala yeke ‘amba ti e awakua’ ndali ti ngia ti e. Ala yeke mû maboko na e ti duti na ngia nga ti ngbâ be-ta-zo.—2 aCor. 1:24.

7, 8. Na ndö ti so a-ancien ayeke kpengba azo na lege ti atënë ti yanga ti ala, mbeni ye wa la ala lingbi ti sara ti kpengba azo?

⁷ Bazengele Paul azia na e mbeni tapande so e lingbi ti mû peko ni. Lo tene na aChrétien so a yeke sara ye ti ngangu na ala na Thessalonique, lo tene: “So e ye ala mingi, e yeke lani na ngia ti fa na ala gï nzoni tënë ti Nzapa pëpe, me e mû nga terê ti e kue na ala,  ngbanga ti so ala ga azo so e ye ala mingi.”—1 aThes. 2:8.

⁸ Ti fa so gï ti tene tënë so akpengba zo alingbi ape, Paul atene na a-ancien ti Éphèse, lo tene: “A lingbi ala mû maboko na ala so awoko, nga ala girisa pëpe tënë ti Seigneur Jésus, so lo wani lo tene: ‘Mungo ye na zo aga na ngia mingi ahon warango ye na tïtî zo.’” (Kus. 20:35). Paul ayeke lani nduru ti kpengba aita ti lo me nga “ti mû aye ti [lo] kue nga ti kä terê ti [lo] kue ndali ti ala.” (2 aCor. 12:15). Legeoko nga, a lingbi a-ancien akpengba aita nga ala dë bê ti ala gï na lege ti atënë ti yanga ape me a lingbi ala kpengba ala na lege so ala fa so ala bi bê biani na ala.—1 aCor. 14:3.

9. Tongana nyen la a-ancien alingbi ti mû wango so akpengba zo?

⁹ Ti kpengba mba alingbi nga ti ndu mungo wango, me ge encore, a lingbi a-ancien amû tapande ti fason ti mungo wango so akpengba zo so ayeke na yâ ti Bible. Jésus azia mbeni pendere tapande na ndö ti tënë so na peko ti so lo kui nga a zingo lo. Lo yeke lani na ambeni kpengba wango ti mû na ambeni congrégation na Asie Mineure, me bâ fason so lo mû na wango ni. Kozo ti tene lo mû wango na congrégation ti Éphèse, ti Pergame nga ti Thyatire, lo gonda ala kozoni (Apoc. 2:1-5, 12, 13, 18, 19). Lo tene na congrégation ti Laodicée, lo tene: “Azo kue so mbi ye ala mingi, mbi suku na ala nga mbi gboto mê ti ala. Tongaso, yapu na sarango ye nga changé bê ti mo.” (Apoc. 3:19). A yeke nzoni a-ancien amû tapande ti Christ na ngoi so ala yeke mû wango na azo.

GÏ A-ANCIEN LA AYEKE KPENGBA AZO APE

10. Tongana nyen la e kue e lingbi ti kpengba terê na popo ti e?

¹⁰ A yeke gï a-ancien la ayeke kpengba azo ape. Paul awa aChrétien kue ti tene “atënë so ayeke nzoni ti kpengba zo, tongana a yeke ngoi ni, si a sara ye ti nzoni” na azo (aÉph. 4:29). Zo oko oko na popo ti e alingbi ti pensé na ye so lo lingbi ti sara ti mû maboko na amba ti lo. Paul awa aChrétien Hébreu,  lo tene: “Ala mû ngangu na amaboko so ayeke gue ti tï nga na agenou so awoko, ala ngbâ ti leke alege so ayeke nzoni ndali ti gere ti ala, si gere so abuba azi na lê ti terê pëpe, me a sara si a ga nzoni.” (aHéb. 12:12, 13). E kue e lingbi ti kpengba mba na lege ti atënë ti yanga ti e, même amaseka kue.

11. Nyen la amû maboko na Marthe na ngoi so lo yeke na yâ ti vundu?

¹¹ Marthe, * mbeni ita-wali so vundu asara lo, atene: “Mbeni lâ na ngoi so mbi sambela ti tene mbeni zo akpengba mbi, mbi wara terê na mbeni ita-wali so ayeke mbakoro, lo fa so lo ye mbi nga lo bâ mawa ti mbi, a yeke lani ye so mbi bezoin ni. Lo fa nga na mbi ye so asi na lo wani, a yeke mara ti tara so mbi yeke na yâ ni, a sara si mbi bâ so mbi yeke mbi oko ape.” Peut-être ita-wali mbakoro so ahinga ape ye so atënë so lo tene ayeke sara na ndö ti Marthe.

12, 13. Tongana nyen la e lingbi ti sara ye alingbi na wango so ayeke na aPhilippien 2:1-4?

¹² Paul amû lani wango so na amembre kue ti congrégation so ayeke na Philippe, lo tene: “Tongana mbeni tënë ti kpengba zo na yâ ti Christ, wala mbeni tënë ti dengo bê so a tene ni na ndoye, wala bingo bê na mba, wala tâ yengo terê nga bango mawa ti mba ayeke na popo ti ala, ala sara si mbi duti na ngia biani ndali ti so bibe ti ala ague oko, ndali ti so ndoye ti ala nga ague oko, ala duti beoko tongana âme oko, bibe ti ala aduti gï na ndö ti tënë oko, ala sara mbeni ye na gingo yanga wala na fango terê pëpe, me ala sara terê ti ala kete na ala bâ amba ti ala tongana azo so ayeke kota ahon ala; na ziango lê ti ala gï na ndö ti aye ti ala wani pëpe, me nga na ndö ti aye ti amba ti ala.”—aPhil. 2:1-4.

¹³ Biani, a lingbi e sara ngangu ti zia lê na ndö ti aye ti amba ti e, e tene “tënë ti dengo bê so a tene ni na ndoye,” e fa “bingo bê na mba,” nga na “tâ yengo terê nga bango mawa ti mba” ti kpengba aita ti e.

14. Mbeni ye wa la alingbi ti kpengba zo?

¹⁴ Tongana e mä sango ti azo so e mû maboko na ala ândö alingbi ti kpengba e tongana ti so akpengba bazengele Jean. Lo tene: “So mbi mä a tene amolenge ti mbi angbâ ti tambela na yâ ti tâ tënë, mbeni ye ti zia ngia na bê ti mbi ti hon so ayeke dä pëpe.” (3 Jean 4). Terê ti apionnier mingi anzere tongana ala mä so mbeni zo so ala mû maboko na lo ândö ti ga na yâ ti tâ tënë angbâ ti sara na Jéhovah be-ta-zo, peut-être zo ni aga même pionnier. Tongaso, tongana ambeni pionnier adécouragé, e lingbi ti dabe ti ala na aye ti nzoni so ala sara ti mû maboko na azo.

15. Mbeni ye wa la e lingbi ti sara ti kpengba aita so asara na Jéhovah be-ta-zo?

¹⁵ Asurveillant ti circonscription mingi na awali ti ala atene so terê ti ala ayeke nzere ka mingi na peko ti so mbeni zo atokua na ala mbeni nduru mbeti ti kiri singila na ala na peko ti mbeni vizite so ala sara na mbeni congrégation. Ti a-ancien, amissionnaire, apionnier nga na amembre ti sewa ti Béthel alingbi ti duti nga tongaso tongana mbeni zo atokua mbeni mbeti ti kiri singila na ala ndali ti kua so ala ngbâ ti sara atâa akpale so ala awara.

16. Ambeni senge ye wa la alingbi ti kpengba zo?

¹⁶ A yeke duti na lege ni ape tongana e pensé so e lingbi pëpe ti kpengba zo ndali ti so e hinga ti sara lisoro nzoni na azo ape. A hunda nga ye mingi ape ti kpengba zo, peut-être gï ti he ngia kete na ngoi so mo yeke bara mbeni zo. Tongana zo ni ahe ngia ape peut-être mbeni kpale ayeke dä. Gï ti mä zo ni alingbi ti dë bê ti lo.—Jacq. 1:19.

17. Nyen la amû maboko na mbeni ita-koli so ayeke maseka na ngoi so lo yeke na yâ ti vundu?

 ¹⁷ Henri, mbeni ita-koli maseka ayeke lani na vundu mingi na ngoi so ambeni tâ fami ti lo, so na popo ni mo yeke wara babâ ti lo so ayeke lani mbeni ancien so a ne lo mingi, azia tâ tënë. Mbeni surveillant ti circonscription akpengba Henri na lege so lo gue na lo na mbeni ndo ti nyongo café, lo vo na lo café nga lo mû lege na Henri ti zi bê ti lo na lo. Na peko ti lisoro ni, Henri abâ so oko ye so lo lingbi ti sara ti mû maboko na azo ti sewa ti lo ti kiri na yâ ti tâ tënë ayeke ti ngbâ be-ta-zo. Lo wara kota dengo bê na dikongo Psaume 46; Sophonie 3:17; nga na Marc 10:29, 30.

18. (a) Salomon atene nyen na ndö ti kpengbango zo? (b) Wango wa la Paul amû?

¹⁸ Tapande ti Marthe nga na ti Henri afa so e lingbi ti kpengba aita ti e na ngoi so ala bezoin dengo bê. Gbia Salomon atene: “Tënë so a tene na tâ ngoi ni anzere mingi. Zo so abâ mba ti lo na ngia na bê asara si bê ti zo ayeke na ngia; nzoni sango asara si abio ti zo akpengba.” (aProv. 15:23, 30, kete tënë na gbe ni). Na ndö ni, dikongo Tour ti Ba Ndo nga na ambeti so ayeke na ndö ti site ti e alingbi ti kpengba mbeni zo so ayeke na vundu nga so ayeke na beku ape. Paul afa so hengo mbeni bia ti Royaume legeoko na amba ti e alingbi ti kpengba zo. Lo tene: “Ala ngbâ ti fa ye na azo nga ala ngbâ ti wa terê na popo ti ala na lege ti apsaume, abia ti sepelango na Nzapa, abia ti yingo so a he ni nzoni; ala ngbâ ti he bia na Jéhovah na yâ ti bê ti ala.”—aCol. 3:16; Kus. 16:25.

19. Ngbanga ti nyen la ti kpengba terê na popo ti e ayeke duti kota ye mingi na yâ ti ngoi so ayeke ga? Nyen la a lingbi e sara?

¹⁹ Na ngoi so e bâ so lâ ti Jéhovah “ayeke pusu nduru”, a yeke duti ande kota ye mingi ti kpengba terê na popo ti e (aHéb. 10:25). E yeke duti na ngia tongana e sara ye alingbi na wango ti Paul so lo tene: “Ala ngbâ ti dë bê ti mba nga ti kpengba mba gï tongana ti so ala yeke sara so.”—1 aThes. 5:11.