AZO

Ye so Bible atene: Nzapa ‘aleke sese ti tene angbâ gï senge pëpe, me lo leke ni ti tene azo aduti dä.’—ÉSAÏE 45:18.

SESE

Ye so Bible atene: “Azo ti mbeni ngoi ahon, ambeni ayeke ga, me sese ayeke ngbâ kpu na kpu.”—ZO-TI-FA-TENE 1:4.

YE SO AYE TI TENE NYEN: Ti gue oko na tënë ti Bible, a yeke futi sese lâ oko ape nga ayeke ngbâ lakue ti tene azo aduti dä. Tongaso, tënë ti hunzingo ti dunia so aye ti tene nyen?

BÂ TËNË SO: Bible ahaka hunzingo ti dunia so ayeke ga na ye so asi lani na ngoi ti Noé. Na ngoi ni kâ, “sese asi singo na sarango ye ti ngangu”. (Genèse 6:13). Me, Noé ayeke lani zo ti mbilimbili. Nzapa abata Noé nga na azo ti sewa ti lo, me Lo futi azo ti sioni na lege ti kota ngu so apika. Ti fa peko ti ye so apassé lani, Bible atene: ‘Dunia ti ngoi ni so afuti na ngoi so kota ngu apika amene ni.’ (2 Pierre 3:6). Ye so ayeke lani hunzingo ti mbeni dunia la. A futi lani nyen? A futi azo ti sioni, me sese ni ape. Tongaso, tongana Bible asara tënë ti hunzingo ti dunia, a ye ti sara tënë ti futingo ti sese ni ape. Me, a ye ti sara tënë ti futingo azo ti sioni nga na aye ti sioni so ayeke passé na ndö ti sese.

AKPALE NGA NA AZO TI SIONI

Ye so Bible atene: “Na yâ ti kete ngoi, azo ti sioni ayeke duti dä encore ape; mo yeke bâ ande place so ala yeke lani dä, me ala yeke duti dä encore ape. Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.”—PSAUME 37:10, 11.

YE SO AYE TI TENE NYEN: Kota ngu so apika na ngoi ti Noé ahunzi lani azo ti sioni biaku biaku ape. Na peko ti kota ngu ni so, azo ti sioni akiri asara pasi na azo. Na yâ ti kete ngoi, Nzapa ayeke futi azo ti sioni. Tongana ti so wasungo psaume so atene: “Azo ti sioni ayeke duti dä encore ape.” Nzapa ayeke sara ande kua na Royaume ti lo ti hunzi aye ti sioni. Royaume ti Nzapa ayeke mbeni gouvernement so ayeke na yayu na ayeke komande na ndö ti azo so amä yanga ti Nzapa.

BÂ TËNË SO: Eskê azo so ayeke komande dunia so ayeke yeda na komandema ti Royaume ti Nzapa? Bible afa so ala yeke ke ande. Ye ti buba ni ayeke so, ala yeke ke ande Royaume ti Nzapa (Psaume 2:2). Nyen la ayeke passé ande na pekoni? Royaume ti Nzapa ayeke ga ande ti mû place ti agouvernement kue, na “gï royaume so oko la ayeke ngbâ lakue lakue.” (Daniel 2:44). Me ngbanga ti nyen la e bezoin ti tene komandema ti azo ahunzi?

Ye so Bible atene: “Zo so ayeke tambela, a yeke même na lo wani ti fa lege na gere ti lo pëpe.”—JÉRÉMIE 10:23.

YE SO AYE TI TENE NYEN: A leke lani azo ti tene ala komande terê ti ala wani ape. A yeke ndali ni la komandema ti azo amarché ape nga ayeke ngangu na ala ti leke akpale ti azo.

BÂ TËNË SO: Mbeni mbeti (Britannica Academic) atene so na bango ni agouvernement ti akodro oko oko alingbi ape ti leke akpale tongana yere, nzara, akobela, ngu so asuku amû ndo wala yengingo ti sese, bira nga na sarango ye ti ngangu. Mbeti ni akiri atene: “Ambeni zo . . . ayeda so gï mbeni gouvernement oko so akomande dunia kue la alingbi ti leke akpale so.” Ye oko, même tongana agouvernement kue abungbi oko ti leke akpale ti dunia, komandema ni ayeke ngbâ gï na maboko ti azo so ayeke mbilimbili-kue ape na ala peut ape ti leke aye so e sara tënë ni fade. A yeke gï Royaume ti Nzapa oko la ayeke na ngangu ti leke akpale ti dunia so kue biani biani.

Ni la, ti gue oko na tënë ti Bible, hunzingo ti dunia so wala ti aye ti sioni ti dunia so ayeke pëpe mbeni ye so adoit ti mû mbeto na azo ti nzoni. Me, a yeke ye so a lingbi e ku terê ti e na ni ndali ti so mbeni fini dunia ti Nzapa ayeke mû ande place ti sioni dunia so.

Aye ni so kue ayeke si ande lawa? Article ti peko ayeke fa kiringo tënë ti Bible na ndö ni.