Na yâ ti kete ngoi, na temps so fini gouvernement ti Nzapa so ayeke na yayu akomande na ndö ti azo kue, sese ayeke ga ande mbeni pendere ndo so azo apeut ti vivre dä na yâ ti mango terê nga ala yeke sara akua so anzere na ala. Nzapa asoro Jésus Christ ti komande na ndö ti sese kue. Nde na mingi ti azo so ayeke komande laso, Jésus ayeke bi bê ande mingi na azo. Komandema ti lo aluti na ndö ti ndoye, lo yeke sara ye na nzoni bê, lo bâ mawa ti azo nga lo yeke gbia so asara ye mbilimbili.—Ésaïe 11:4.

Tënë ti kodro wala ti mara ayeke duti ande na yâ ti fini dunia ape. Azo ayeke duti ande beoko (Apocalypse 7:9, 10). Azo kue so ayeke vivre ande na ndö ti sese ayeke ndoye Nzapa nga na amba ti ala, nga ala yeke sara kua maboko na maboko na yâ ti siriri ti sara si ye so Nzapa aleke na tongo nda ni ti tene azo abâ lege ti sese aga tâ tënë.—Psaume 115:16.

Na ngoi so Royaume ti Nzapa ayeke komande na ndö ti sese, Wasarango e ayeke bâ ande lege ti aclimat ti tene aye kue atambela nzoni (Psaume 24:1, 2). Na temps so Jésus ayeke lani na sese, lo kaï kota pupu ti fa so na lege ti ngangu so Nzapa amû na lo, lo yeke bâ ande lege ti aye so angoro e (Marc 4:39, 41). Na gbe ti komandema ti Christ, zo oko ayeke sara ande mbeto ape ti yengingo ti sese wala ti angu so asuku amû ndo. Royaume ti Nzapa ayeke kiri ande nga ti leke si aye atambela nzoni na popo ti azo nga na aye so angoro ala.—Osée 2:18.

Azo kue ayeke duti na nzoni seni. Zo oko ayeke tï ande kobela ape, mbakoro wala kuâ ayeke duti dä ape (Ésaïe 35:5, 6). Azo ayeke duti na yâ ti pendere ndo tongana ti kozo koli na wali na yâ ti yaka ti Éden. Na yâ ti fini dunia, gï tongana ti yaka ti Éden, sese ayeke si singo na kobe nga azo kue ayeke wara ni gbani gbani (Genèse 2:9). Tongana ti azo ti Israël ti giriri, azo kue so ayeke duti ande na yâ ti Paradis ayeke “te kobe alingbi na nzara ti ala.”​—Lévitique 26:4, 5.

Tongana gouvernement ti Nzapa akomande ande sese kue, azo kue ayeke duti na siriri nga ala yeke sara ye na lege ni nga na nzoni bê. Abira nga na sarango ye ahon ndö ni na komandema ayeke dä ape, nga azo kue ayeke wara aye so ala yeke na bezoin ni. Bible atene: “Zo oko oko ayeke duti ande na gbe ti keke ti vigne ti lo nga na gbe ti keke ti figue ti lo, zo oko ayeke zia mbeto na yâ ti ala pëpe.”​—Michée 4:3, 4.

Sewa oko oko ayeke wara mbeni da na mbeto ayeke sara zo oko ape ti kpe ti gue na mbeni ndo, nga kua kue so e yeke sara ayeke mû ande ngia na e. Tongana ti so Bible atene, azo kue so ayeke vivre na yâ ti fini dunia ‘ayeke bâ pasi gï senge senge pëpe.’​—Ésaïe 65:21-23.

Bible atene: “Hingango ye na ndö ti Jéhovah ayeke mû ndö ti sese kue.” (Ésaïe 11:9). Azo so ayeke vivre na gbe ti Royaume ti Nzapa ayeke manda ande aye mingi na ndö ti ndara ti Wasarango e, Jéhovah, nga na ndö ti apendere ye so lo créé. Ala yeke mû ande hingango ye ti ala ti sara na angombe ape wala ti sara sioni na azo ape (Ésaïe 2:4). Me, ala yeke manda tongana nyen ti vivre na siriri na amba ti ala nga ti bâ lege ti sese.​—Psaume 37:11.

Nzapa asara kota kua lani ti leke sese tongaso si lâ oko oko gigi anzere na e. Lo leke ti tene azo avivre na ndö ti sese teti lakue lakue (Psaume 37:29; Ésaïe 45:18). Ti tene tënë so aga tâ tënë, Nzapa ayeke “mene ande kuâ biaku biaku”. (Ésaïe 25:8). Bible atene “kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.” (Apocalypse 21:4). Azo kue so ayeke sö ande kuâ na temps so Nzapa ayeke futi aye ti sioni ti dunia so nga na gbâ ti azo so lo yeke zingo ala na kuâ ayeke wara pasa ti vivre teti lakue lakue.​—Jean 5:28, 29; Kusala 24:15.

 Azo kutu mingi ayeke leke terê laso ti vivre na gbe ti Royaume ti Nzapa so aga nduru awe. Atâa so ala yeke mbilimbili-kue ape, ala yeke sara kue ti nzere na lê ti Nzapa si ala duti na yâ ti fini dunia. Na lege wa? Na lege so ala yeke manda ye na ndö ti Jéhovah Nzapa nga na Jésus Christ.​—Jean 17:3.

Gi ti hinga ye mingi na ndö ti tongana nyen la mo peut ti sö kuâ na hunzingo ti dunia so nga ti vivre na yâ ti fini dunia so aga nduru awe. Yeda ti tene aTémoin ti Jéhovah amanda Bible na mo senge senge na lege ti buku Ngbâ na fini lakue lakue!.