Ândö, Zo so acréé e ayeke sara tënë na e azo na lege ti a-ange nga na aprophète. Na ndö ni, lo bâ si a sû na mbeti atënë so lo tene nga na azendo so lo mû. Nzapa amû zendo so ande e peut ti duti na ngia. Tongaso, na ndo wa la laso mo lingbi ti wara azendo ni so?

A yeke na yâ ti Mbeti ti Nzapa la e yeke wara atënë so Nzapa ayeke na ni ndali ti e (2 Timothée 3:16). Na lege wa la Nzapa asara kua na aprophète ti sû atënë ti lo so? Nzapa azia apensé ti lo na yâ ti li ti ala, na pekoni ala sû ni (2 Pierre 1:21). A yeke tongana ti so laso mbeni patron ayeke sara kua na mbeni secrétaire ti sû mbeti na iri ti lo. A yeke tene ande so mbeti ni so alondo na patron ni. Legeoko nga, atâa so Nzapa asara kua na akoli ti sû atënë ti lo, lo la lo yeke biani Zo so ayeke na gunda ti Mbeti ti Nzapa.

Atënë so ayeke na yâ ti Mbeti ti Nzapa ayeke kota mingi, ndani la lo ye si “amara kue, akete mara kue, [nga na] azo ti ayanga ti kodro kue” amanda ni (Apocalypse 14:6). A wara Mbeti ti Nzapa kue wala mbeni mbage ni na ayanga ti kodro ahon 3 000. A yeke wara mbeni mbeti nde na ayanga ti kodro mingi tongaso ape.