MBENI kpengba matabisi so e wara alingbi ti pusu e ti fa singila ti bê ti e. Jésus afa ye so e lingbi ti manda na ndö ni na peko ti so lo sava azo bale-oko so ayeke na kobela ti buruma, so yorö ti soigné na ni ayeke lani dä ape. Mbeni zo ni oko na popo ti ala bale-oko so “[akiri], na mungo gloire na Nzapa na kota go.” Jésus atene: “Ala bale-oko kue la a sara si terê ti ala aga nzoni so ape? Ka atanga ni gumbaya ayeke na ndo wa?” (Luc 17:12-17). Mo manda nyen dä? E yeke girisa ka hio mingi ye ti nzoni so amba ti e asara ndali ti e!

Sacrifice so alingbi pëpe na ambeni matabisi. A yeke mbeni kota matabisi so lâ oko ade mbeni zo amû mara ni ape. Tongaso, mo lingbi ti fa singila ti  bê ti mo ndali ti ye so Nzapa asara ndali ti mo so tongana nyen?

• Gi ti hinga zo so amû ni. Sacrifice ni so ayeke mû gï fini ti lakue lakue hio tongaso na azo kue ape. Nde na so, Jésus atene na yâ ti sambela na Nzapa, lo tene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.” (Jean 17:3). Tongana mbeni zo atene na mo so mbeni koli asö fini ti mo na ngoi so mo ngbâ kete, a yeke nzere ande na mo ti gi ti hinga ye na ndö ti lo ape? Nga mo yeke gi ti hinga ndani so lo sö fini ti mo so ape? Jéhovah Nzapa la amû matabisi so ayeke sacrifice ti Jésus, ti sö na fini ti azo. Lo ye si mo hinga lo nga mo ga nga nduru na lo. Bible atene: “Ala ga nduru na Nzapa, lo yeke ga ande nduru na ala.”—Jacques 4:8.

• Mä na bê na sacrifice ti Jésus. “Zo so amä na bê na Molenge ni ayeke na fini ti lakue lakue.” (Jean 3:36). Ti mä na bê na Molenge ni aye ti tene nyen? Aye ti sara tënë ti kusala. Ti fa mabe na yâ ti sacrifice so ahunda ti sara kusala (Jacques 2:17). A yeke mara ti kusala wa? Mbeni matabisi ayeke ga ti mo gï na ngoi so mo gi ti wara ni nga mo yeda na ni. Tongaso, a lingbi mo gi ti wara sacrifice so nga mo yeda na ni. Tongana nyen? Gi ti hinga tongana nyen la Nzapa aye si mo duti na fini, na pekoni sara ye alingbi na ni. * Sambela Nzapa ti pardonné asiokpari ti mo nga gi ti duti na mbeni nzoni conscience. Hinga biani so sacrifice so Nzapa amû ayeke ga na fini ti lakue lakue, siriri nga na nzoni duti na azo kue so afa so ala mä na bê na ni.—aHébreu 11:1.

• Gue na Dango bê na kuâ ti Jésus. Jésus azia na sese mbeni ye so ngu oko oko e yeke sara ni ti dabe ti e na sacrifice ti lo. Ti sara ye ni so, lo tene: “Ala ngbâ ti sara ye so ti dabe ti ala na mbi.” (Luc 22:19). A-Témoin ti Jéhovah ayeke dabe na kuâ ti Jésus na mardi 11 avril 2017, na peko ti lindango ti lâ. Kapa ni ayeke sara peut-être l’heure oko tongaso, a yeke mû nga mbeni diskur so ayeke fa ndani so Jésus akui nga tongana nyen la kuâ ti lo aga na e ye ti nzoni laso nga kekereke. Na ngu so ahon, azo kutu 20 tongaso na yâ ti dunia la aga na Dango bê so. E yeke na ngia ti tisa mo ti bungbi oko na e ti fa singila ti bê ti e ndali ti kota matabisi ti Nzapa so.