E yeke biani na confiance so azendo ti Nzapa kue ayeke ga ande tâ tënë? Jésus amä na bê na ni, nga afango ye ti lo akpengba lani mabe ti azo so amä lo. Bâ tapande so lo mû lani na yâ ti fango ye ti lo na ndö ti Hoto, so ayeke na Matthieu 5:18: “Ti tâ tënë ni, mbi tene na ala so, ti tene mbeni kete kete gere-mbeti ti Ndia wala mbeni kete marque ti gere-mbeti ti Ndia ni oko ahon na aye ni kue aga tâ tënë pëpe, andâ yayu na sese alingbi ti hon.”

Gere-mbeti ti yanga ti Hébreu so ayeke kete mingi ahon atanga ni kue ayeke י (yod), ni la ayeke kozo gere-mbeti ti agere-mbeti osio ti iri ti Nzapa, Jéhovah. * Na ndö ti so ascribe na aFarizien abâ na nene ni mingi ambupa nga na agere-mbeti ti Ndia ti Nzapa, ala bâ nga na nene ni mingi ‘akete marque ti gere-mbeti’ kue.

Jésus aye ti tene so, tongana akete kete tënë ti yâ ti Ndia aga tâ tënë pëpe, yayu na sese alingbi ti hon. Ye oko, Bible adë bê ti e so ayayu na sese so e yeke bâ ni so ayeke ngbâ ande lakue lakue (Psaume 78:69). Tongaso pendere tënë so afa so même akete kete tënë ti yâ ti Ndia ayeke ga lakue tâ tënë.

Eskê Jéhovah Nzapa abâ akete kete tënë ti yâ ti Ndia na nene ni? En. Bâ tënë so: A tene lani na azo ti Israël ti kungbi pëpe yâ ti abio ti kete taba ti Pâque (Exode 12:46). Peut-être, a yeke mbeni kete kete tënë la. Eskê ala hinga lani ndani so a lingbi ala kungbi pëpe yâ ti abio ni? Peut-être ala hinga ape. Me, Jéhovah Nzapa ahinga so kete kete tënë ti yâ ti Ndia so ayeke prophétie ti ye so ayeke si na Messie na lege so a yeke kungbi yâ ti abio ti lo ape na ngoi so a yeke fâ lo na ndö ti keke ti pasi.​—Psaume 34:20; Jean 19:31-33, 36.

Nyen la atënë ti Jésus so aye ti fa na e? E nga kue e lingbi ti duti na confiance kue so azendo ti Jéhovah Nzapa kue ayeke ga ande tâ tënë, juska na atanga ti kete kete tënë ti yâ ni kue. Bâ tongana nyen la kete kete gere-mbeti ti yanga ti Hébreu so aga na mbeni kpengba tënë ti dengo bê mä!