JÉSUS atene mbeni lâ, atene: “Mungo ye na zo aga na ngia mingi ahon warango ye na tïtî zo.” (Kus. 20:35). Kota tâ tënë so andu songo ti e na Jéhovah. Ngbanga ti nyen? Jéhovah amû na e acadeau mingi so asara si e yeke na ngia, me e lingbi ti wara ngia mingi tongana e mû mbeni cadeau na Jéhovah. Cadeau wa la e lingbi ti mû na Jéhovah? A-Proverbe 3:9 atene: “Gonda Jéhovah na anzoni ye ti mo.” Na popo ti “anzoni ye” ti e a yeke wara ngoi ti e, akode ti e, ngangu ti e nga na aye ti sese so e yeke na ni. Tongana e sara kua na aye so ti sara si tâ vorongo Nzapa ague na li ni, andâ e yeke mû mbeni cadeau na Jéhovah, ye so aga na e ngia mingi.

Tongana a ndu aye ti sese so e yeke na ni, nyen la ayeke mû maboko na e ti girisa ape ti mû cadeau na Jéhovah? Bazengele Paul atene na aChrétien ti Corinthe ti ‘zi mbeni ye ti bata’ ni ndali ti offrande (1 aCor. 16:2). Nyen la mo lingbi ti sara tongana mo ye ti hinga ambeni ye na ndö ti akode ti mungo offrande na ndo so mo yeke dä? Bâ encadré so ayeke na gbe ni ge.

A lingbi ti mû offrande na lege ti Internet na yâ ti akodro kue ape. Ye oko, a lingbi ti wara atënë na ndö ti alege ti mungo offrande na ndö ti site ti mungo offrande. Na yâ ti ambeni kodro, mo yeke wara mbeni mbage na ndö ti Internet so akiri tënë na ahunda so azo ayeke hunda ka na ndö ti mungo offrande.