1-2. (a) Ti gue oko na aProverbe 16:31, a yeke nzoni e bâ aita so aga mbakoro awe tongana nyen? (b) Ahunda wa la e yeke bâ na yâ ti article so?

MBENI parc ayeke na États-Unis so azo so ague kâ apeut ti wara diamant na sese. Me ade a kpaka terê ti adiamant so ape. Ndani la, mingi ti azo so abâ adiamant so ahinga ape so ayeke atênë ti ngangu ngere, na ala hon ni gï hongo.

² Na ambeni lege, aita ti e so ayeke be-ta-zo so aga mbakoro awe ayeke tongana adiamant so; ala yeke aye ti ngangu ngere. Bible ahaka vuru kuä ti li ti aita so na mbeni couronne. (Diko aProverbe 16:31; 20:29.) Ye oko, a yeke ngangu ape ti tene e sara sanka ti aita so. Tongana amaseka abâ na nene ni mingi aita so aga mbakoro, ala lingbi ti wara mbeni ye so ayeke nzoni mingi ahon atâ mosoro. Na yâ ti article so, e yeke kiri tënë na ahunda ota: Ngbanga ti nyen la Jéhovah abâ ambakoro so ayeke be-ta-zo na nene ni mingi? Ngbanga ti nyen la a bâ aita so na nene ni na yâ ti bungbi ti Jéhovah? Nyen la e peut ti sara ti wara ye ti nzoni mingi na lege ti tapande ti ala?

3. Ti gue oko na Psaume 92:12-15, ngbanga ti nyen la Jéhovah abâ ambakoro so ayeke be-ta-zo na nene ni mingi?

³ Jéhovah Nzapa abâ ambakoro so ayeke be-ta-zo na nene ni mingi. Lo hinga ala nzoni mingi nga lo bâ apendere sarango ye ti ala na nene ni. A nzere na Jéhovah tongana ambakoro so asara si amaseka awara mbage ti ndara so ala wara na yâ ti angu mingi so ala sara na lo (Job 12:12; aProv. 1:1-4). Jéhovah abâ nga na nene ni gbungo ngangu ti ala (Mal. 3:16).  Ala wara akpale na yâ ti fini ti ala; me mabe ti ala na Jéhovah awoko ape. Beku ti ala ti kekereke angbâ ngangu, gï tongana ti so ala manda lani tâ tënë na tongo nda ni. Nga, Jéhovah aye ala ndali ti so ala ngbâ ti fa iri ti lo “même na lâ ti mbakoro ti ala”.—Diko Psaume 92:12-15.

4. Atënë wa la apeut ti dë bê ti aita so aga mbakoro awe?

⁴ Tongana ngu ti mo ayeke gue na li ni, zia mo hinga so Jéhovah ayeke girisa akua so mo sara ândö ape (aHéb. 6:10). Na bê ti mo kue, mo mû maboko na kua ti fango tënë, na ye so anzere na bê ti Babâ ti e ti yayu. Mo gbu ngangu na yâ ti akpale, même ati so amû na mo vundu mingi. Mo sara ye alingbi na andia ti Bible, nga mo gbu koko ni. Mo sara akpengba kua na yâ ti bungbi ti Jéhovah, nga mo fa ye na ambeni zo. Mo sara kue ti sara ye alingbi na gbâ ti achangement so bungbi ti Jéhovah asara. Mo kpengba aita so ayeke sara kua ti ngoi kue. Jéhovah Nzapa aye mo mingi ndali ti so mo yeke be-ta-zo. Lo tene so “lo yeke zia abe-ta-zo ti lo pëpe.” (Ps. 37:28). Ti dë bê ti mo, lo tene: “Juska kuä ti li ti [mo] avuru, mbi yeke ngbâ ti yô [mo].” (És. 46:4). Tongaso, pensé ape so ndali ti so ngu ti mo ague na li ni mo yeke encore ye oko ape na yâ ti bungbi ti Jéhovah. A ngbâ ti bâ mo na nene ni mingi.

5. Nyen la a lingbi aita so aga mbakoro agirisa ni ape?

⁵ Ambakoro apeut ti sara aye mingi na yâ ti bungbi ti Jéhovah. Atâa so peut-être ala yeke na ngangu tongana ti kozo ape, ala yeke na ndara mingi ndali ti aye so ala vivre ni na yâ ti gigi ti ala. Jéhovah apeut ti ngbâ ti sara kua na ala na alege mingi, tongana ti so atapande ti awakua ti lo ti ândö nga na ti laso so ayeke na gbe ni ge afa.

6-7. Fa ambeni tapande ti ambakoro so Bible asara tënë ti ala so Jéhovah afuta ala ndali ti so ala sara na lo na bê ti ala kue.

⁶ Na yâ ti Bible, e peut ti wara anzoni tapande ti azo so ayeke be-ta-zo so angbâ ti sara na Jéhovah na ngoi so ala ga mbakoro. Na tapande, Moïse ayeke lani na ngu 80 tongaso na ngoi so lo komanse ti sara kua tongana prophète ti Jéhovah nga lo mû li ni na ndö ti mara ti Israël. Na ngoi so ngu ti  prophète Daniel ahon ngu 90 tongaso, Jéhovah angbâ ti sara kua na lo tongana prophète ti lo. Nga, bazengele Jean ayeke peut-être na yâ ti angu 90 na ngoi so lo sû mbeti ti Apocalypse.

⁷ Gbâ ti awakua be-ta-zo ti Jéhovah ayeke lani dä so iri ti ala awu ape, na a yeke ngangu ape ti tene e girisa na ndö ti ala. Atâa so kue, Jéhovah ahinga ala nga lo futa ala ndali ti so ala yeke lani be-ta-zo na lo. Na tapande, Bible asara tënë gï kete na ndö ti Siméon so “ayeke sara ye [lani] mbilimbili nga lo mû bê ti lo kue na kua ti Nzapa”. Me Jéhovah ahinga lo nga lo futa lo na lege so lo mû na lo pasa ti bâ Jésus so angbâ bébé nga ti tene prophétie na ndö ti lo na mama ti lo (Luc 2:22, 25-35). Gbu li nga na ndö ti prophète-wali Anne so ayeke lani wali-mua. Lo yeke lani na ngu 84, me lo “manke ti gue na temple lâ oko pëpe”. Jéhovah asara tufa na ndö ti lo ndali ti so lo manke ti gue na temple ape nga lo zia si lo bâ Jésus so angbâ bébé. Jéhovah abâ lani Siméon nga na Anne na nene ni mingi.—Luc 2:36-38.

8-9. Nyen la mbeni ita-wali asara na yâ ti bungbi ti Jéhovah na ngoi so lo ga wali-mua?

⁸ Laso, ambakoro mingi so ayeke be-ta-zo azia nzoni tapande na amaseka. Bâ ye so asi na Ita-wali Loïs Didur. Lo komanse ti sara kua tongana pionnier spécial na Canada na ngoi so lo yeke gï na ngu 21. Na pekoni, lo na koli ti lo, John, asara kua ti guengo na ando nde nde teti angu mingi. Na pekoni, ala sara kua na Béthel ti Canada ahon ngu 20. Na ngoi so Loïs ayeke na ngu 58, a tisa lo na John ti gue ti sara kua na Ukraine. Ala sara tongana nyen? Eskê ala tene so ala yeke mbakoro mingi ala peut ti gue ti sara kua na mbeni kodro nde ape? Ala yeda ti gue, na a soro John ti ga membre ti Komite ti filiale kâ. Ngu mbasambala na pekoni, John akui; Loïs amû desizion ti ngbâ ti sara kua kâ. Loïs ayeke na ngu 81 fadeso, na lo ngbâ ti sara kua nzoni tongana mbeni membre ti sewa ti Béthel ti Ukraine, na aita aye lo mingi.

⁹ Peut-être a yeke bâ pëpe aye so awali-mua tongana Loïs ayeke sara tongana ti so a yeke bâ ni lani na ngoi so akoli ti ala angbâ na fini; me a ngbâ ti bâ ala na nene ni mingi. Jéhovah abâ na nene ni mingi aita-wali so amû maboko lani na akoli ti ala teti angu mingi na fadeso ala ngbâ ti sara na lo be-ta-zo (1 Tim. 5:3). Ala yeke kpengba nga aita so angbâ maseka.

10. Pendere tapande wa la Tony azia?

¹⁰ E bâ nga na nene ni mingi ambakoro so ayeke be-ta-zo so ayeke gï na yanga-da. Na tapande, Ita-koli Tony alango na yâ ti mbeni da so a yeke bata ambakoro dä. Lo wara lani batême na Pennsylvanie, na États-Unis, na août ngu 1942 na ngoi so lo yeke na ngu 20. Kete na peko ti batême ti lo, a hunda na lo ti lï turugu. Ndali ti so lo ke, a kanga lo ngu use na ndambo. Lo na wali ti lo Hilda adü amolenge  use so akono na yâ ti tâ tënë. Tony asara kua lani na yâ ti acongrégation ota tongana surveillant-président (so a iri ni laso coordinateur ti bungbi ti a-ancien) nga lo sara kua tongana surveillant ti akota bungbi ti lango use. Lo gue lani na mbeni da ti kanga nga lo mû li ni ti sara abungbi nga lo yeke manda Bible na azo. Na ngu 98, lo ngbâ ti sara kua ti Jéhovah. Lo ngbâ ti sara ye kue so lo peut ti sara ti sara na Jéhovah legeoko na aita ti congrégation ti lo.

11. Tongana nyen la e peut ti fa so e bâ aita so aga mbakoro so ayeke gï na yanga-da na nene ni mingi?

¹¹ Tongana nyen la e peut ti fa so e ne mingi aita so aga mbakoro so ayeke gï na yanga-da? Tongana lege ayeke dä, a-ancien apeut ti aidé ala ti ga na abungbi wala ti mä ni nga ti fa tënë. E lingbi ti fa so e pensé na ala tongana e gue ti bâ ala wala e iri ala ti sara lisoro na ala. Tongana e sara hange ape, e peut ti girisa na ndö ti aita so. A yeke ngangu na ambeni ti sara tënë na ndö ti ala wani wala ala pensé so a yeke na lege ni ape ti sara tënë na ndö ti ala wani. Me tongana e mû ngoi ti hunda atënë na ala nga e dengi mê e mä ala na ngoi so ala yeke fa na e anzoni ye so asi na ala na yâ ti bungbi ti Jéhovah, a yeke kpengba e mingi.

12. Na yâ ti congrégation ti e, e peut ti wara aita so ayeke tongana nyen?

¹² Li ti e apeut ti kpe ti bâ so, na yâ ti congrégation ti e, anzoni tapande ti aita so ayeke mbakoro so ayeke be-ta-zo ayeke dä. Na yâ ti angu mingi, Ita-wali Harriette asara na Jéhovah be-ta-zo na yâ ti congrégation ti lo na New Jersey, na États-Unis. Na pekoni, lo quitté lo gue na ndo ti molenge ti lo ti wali. Aita ti fini congrégation ti lo amû ngoi ti gi ti hinga lo, na ala bâ so lo yeke mbeni zo so ayeke na kpengba mabe mingi. Lo kpengba ala na lege so lo fa na ala aye so asi na lo na fango tënë na ngoi so lo manda lani tâ tënë pan na yâ ti angu 1920. Na ngoi ni so, lakue tongana lo yeke gue na fango tënë, lo yeke mû brosse à dents ti lo, ndali ti so a peut ti gbu lo ti bi lo na da ti kanga. Ti vrai ni, fani use na ngu 1933, lo sara kanga yenga oko. Na yâ ti angoi ni so, koli ti lo so ayeke Témoin ape amû maboko na lo na lege so lo bâ lege ti amolenge ti ala ota so angbâ kete. Biani, ambakoro so ayeke be-ta-zo, tongana Harriette, alingbi ti tene a ne ala mingi.

13. Nyen la e manda na ndö ti place so aita so aga mbakoro awe ayeke na ni na yâ ti bungbi ti Jéhovah?

¹³ Aita ti e so aga mbakoro awe ayeke sara kota kua na yâ ti bungbi ti Jéhovah. Ala bâ tongana nyen la Jéhovah asara tufa na alege nde nde na ndö ti bungbi ti lo nga na ndö ti ala. Ala manda akpengba ye mingi na lege ti afaute so ala sara. Bâ ala tongana “ndo so ndara asigi dä” nga manda ye na lege ti ala (aProv. 18:4). Tongana mo mû ngoi ti gi ti hinga ala, mabe ti mo apeut ti kpengba na mo yeke manda ye mingi.

14. Nyen la Deutéronome 32:7 awa amaseka ti sara?

¹⁴ Mû li ni ti sara lisoro na ambakoro. (Diko Deutéronome 32:7.) A yeke tâ tënë so ala yeke bâ ndo nzoni encore ape, ala yeke tambela gï yeke nga ala yeke sara tënë na ngangu ape. Me ala yeke lakue na nzara ti sara ye, nga ala yeke na “nzoni iri” na gbele Jéhovah (Zo-ti. 7:1). Girisa ape ndani so Jéhovah abâ ala na nene ni mingi. Ngbâ ti ne ala. Sara ye tongana Élisée. Lo ngbâ lani na terê ti Élie na ndangba lango so ala yeke na terê ti mba. Fani ota Élisée atene: “Mbi yeke zia mo pëpe.”—2 aGbia 2:2, 4, 6.

15. Atënë wa la e peut ti hunda na aita so aga mbakoro awe?

 ¹⁵ Fa so mo pensé na aita so aga mbakoro awe na lege so, na nzoni bê, mo hunda na ala ambeni tënë (aProv. 1:5; 20:5; 1 Tim. 5:1, 2). Hunda atënë so: “Na ngoi so mo yeke lani maseka, nyen la apusu mo ti hinga na bê ti mo kue so mo wara tâ tënë?” “Tongana nyen la aye so asi na mo asara si mo ga nduru mingi na Jéhovah?” “Nyen la a-aidé mo ti ngbâ ti duti na ngia na yâ ti kua ti Jéhovah?” (1 Tim. 6:6-8). Mä ala na ngoi so ala yeke kiri tënë.

16. Tongana mbeni mbakoro na mbeni maseka ayeke sara lisoro, tongana nyen la ala use kue apeut ti bâ nzoni dä?

¹⁶ Tongana mbeni mbakoro na mbeni maseka ayeke sara lisoro, ala use kue ayeke kpengba (aRom. 1:12). Ala amaseka, ala yeke hinga nzoni mingi so Jéhovah ayeke bâ lege ti awakua ti lo so ayeke be-ta-zo, nga ita so ayeke mbakoro ayeke bâ so a ye lo mingi. A yeke nzere na lo ti fa na ala tongana nyen la Jéhovah asara tufa na ndö ti lo.

17. Ngbanga ti nyen la e peut ti tene so aita so ayeke mbakoro so ayeke be-ta-zo akiri aga pendere mingi tongana ngoi ayeke hon?

¹⁷ Pendere ti terê ayeke hon ka tongana ngu ti zo ague na li ni, me azo so ayeke be-ta-zo na Jéhovah ayeke ga pendere mingi tongana ngoi ayeke hon (1 aThes. 1:2, 3). Tënë so ayeke tâ tënë ngbanga ti nyen? Ngbanga ti so na yâ ti fini ti ala, ala zia si yingo ti Nzapa aleke ala nga a-aidé ala ti duti na apendere sarango ye. Tongana e mû ngoi mingi ti hinga aita ti e so ayeke mbakoro so ayeke kota mingi na lê ti e, e ne ala nga e manda ye na mbage ti ala, e yeke bâ ala tongana mbeni mosoro so ngere ni ayeke ngangu mingi.

18. Nyen la e yeke bâ na yâ ti article ti peko?

¹⁸ Congrégation ayeke kpengba tongana amaseka abâ ambakoro na nene ni mingi nga tongana ambakoro abâ amaseka na nene ni. Na yâ ti article ti peko, e yeke bâ tongana nyen la ambakoro alingbi ti fa so ala bâ amaseka so ayeke na yâ ti congrégation na nene ni.