1. Na alege wa la e lingbi ti sara kua oko na Jéhovah?

NA PEKO ti so Jéhovah acréé azo, lo ye lani ti tene lo na ala asara kua oko ti sara ye so lo leke na bê ti lo ti sara. Atâa so laso azo ayeke mbilimbili-kue ape, azo so ayeke be-ta-zo alingbi ti sara kua oko na Jéhovah lango oko oko. Na tapande, “e na Nzapa e sara kua oko” na ngoi so e yeke fa nzoni tënë ti Royaume ti lo nga e yeke sara adisciple (1 aCor. 3:5-9). Tara ti bâ tongana nyen la a yeke mbeni pasa so Nzapa, so acréé dunia kue nga so ngangu ti lo ahon angangu kue, asoro e ti sara kua maboko na maboko na lo ti sara mbeni kua so ayeke kota mingi! Me fango tënë nga sarango adisciple ayeke pëpe a-oko lege so e yeke sara kua oko na Jéhovah. Na yâ ti article so, e yeke bâ ambeni lege so e yeke sara kua oko na lo: na ngoi so e mû maboko na azo ti sewa ti e nga na amba ti e aChrétien, na ngoi so e yamba agene, na ngoi so e mû maboko ti sara akua so bungbi ti Jéhovah ayeke sara na yâ ti dunia kue nga na ngoi so e sara akua ti lo mingi ahon ti kozo.​—aCol. 3:23.

2. Ngbanga ti nyen la a lingbi e haka lâ oko ape ye so e sara ndali ti Jéhovah na ye so ambeni zo nde asara?

² Na ngoi so e yeke manda article so, haka pëpe ye so mo lingbi ti sara na yâ ti kua ti Jéhovah na ye so ambeni zo alingbi ti sara. Girisa ape so ngu ti azo, seni ti ala, dutingo ti ala nga na akode ti ala ayeke nde nde. Bazengele Paul atene: “Zia zo oko oko atara kua ti  lo ti bâ wala a yeke tongana nyen, tongaso si lo duti na ngia ndali ti kua ti lo wani, me na hakango terê ti lo na mbeni zo nde pëpe.”​—aGal. 6:4.

3. Ngbanga ti nyen la e lingbi ti tene so zo kue so abâ lege ti azo ti sewa ti lo ayeke sara kua oko na Nzapa?

³ Jéhovah aku ti tene awakua ti lo abâ lege ti azo ti sewa ti ala. Na tapande, peut-être a lingbi mo sara kua ti mû na azo ti sewa ti mo aye so ala bezoin ni. Amama mingi ayeke ngbâ na yanga-da ti bâ lege ti akete molenge ti ala. Nga peut-être a lingbi ambeni molenge so akono awe abâ lege ti ababâ na amama ti ala so alingbi ti bâ lege ti ala wani ape. Aye so ayeke aye so zo adoit ti sara ni. Bible atene: “Tongana mbeni zo abata azo ti lo pëpe, mbilimbili azo ti da ti lo, lo dö lege ti mabe lo zia awe, na sioni ti lo ahon ti zo so amä na bê pëpe.” (1 Tim. 5:8). Tongana mo yeke na kua ti bango lege ti azo ti sewa ti mo, peut-être mo yeke sara pëpe akua ti Jéhovah mingi tongana ti so mo ye. Me découragé ape. Jéhovah ayeke na ngia tongana mo mû na azo ti sewa ti mo aye so ala bezoin ni.​—1 aCor. 10:31.

4. Tongana nyen la ababâ na amama alingbi ti zia aye ti Royaume na kozo ndo? Nyen la ayeke si tongana ala sara ni?

⁴ Ababâ na amama so ayeke aChrétien ayeke sara kua oko na Jéhovah na ngoi so ala yeke mû maboko na amolenge ti ala ti zia ambeni kua na gbele ala ti sara na yâ ti bungbi ti Jéhovah. Ababâ na amama mingi so asara tongaso abâ so na nda ni amolenge ti ala ti koli na ti wali asara kua ti ngoi kue na ndo so ayo na kodro ti ala. Ambeni ayeke amissionnaire, ambeni asara kua ti pionnier na ando so bezoin ti awafango tënë ayeke dä mingi nga ambeni ayeke sara kua na Béthel. Biani, tongana amolenge ayo na ababâ na amama ti ala, ala lingbi pëpe ti duti mingi na terê ti amolenge ti ala tongana ti so ala ye. Ye oko, ababâ na amama so apensé gï na ala wani ape awa amolenge ti ala ti ngbâ ti sara kua ti Jéhovah na ndo so ala yeke dä. Ngbanga ti nyen? Ngbanga ti so a nzere na ala mingi so amolenge ti ala azia aye ti Royaume kozo na yâ ti fini ti ala (3 Jean 4). Peut-être ababâ na amama mingi ayeke na bango ndo ti Hannah, so lo tene so lo mû molenge ti lo Samuel “na bon” na Jéhovah. Ala bâ so a yeke mbeni kota pasa ti sara kua oko na Jéhovah na lege so.​—1 Sam. 1:28; kete tënë na gbe ni.

5. Aye wa la mo lingbi ti sara ti mû maboko na aita ti congrégation? (Bâ foto so ayeke na tongo nda ti article so.)

⁵ Tongana mo yeke pëpe na akua ti bango lege ti sewa ti mo so a lingbi mo sara ni hio, mo lingbi ti mû maboko na amba ti mo aChrétien so ayeke bâ lege ti ababâ na amama ti ala, na aita so alingbi pëpe ti bâ lege ti ala wani, na ambakoro wala na ala so abezoin mungo maboko na mbeni lege nde? Gi ti bâ azo wa la na yâ ti congrégation ti mo abezoin mara ti mungo maboko tongaso. Peut-être mo lingbi ti mû ngoi ti duti na terê ti babâ wala mama ti mbeni ita-wali so lo yeke bâ lege ti lo, tongaso si ita-wali ni asara ambeni ye nde. Wala peut-être mo lingbi ti mû maboko na azo so abezoin ni na lege so mo hunda na ala ti gue na ala na abungbi, ti gue na ala ti vo ambeni ye wala ti sara ambeni ye wala ti gue ti bâ mbeni zo na hôpital. Tongana mo sara tongaso, peut-être mo yeke sara kua oko na Jéhovah ti kiri tënë na sambela ti ala.—Diko 1 aCorinthien 10:24.

6. Ti yamba agene nzoni aye ti tene nyen?

⁶ A hinga azo so ala na Nzapa asara kua oko na yambango agene. Na yâ ti Bible, tënë ti Grec so a kiri peko ni na “yambango agene nzoni” aye ti tene “sarango nzoni bê na awande.” (aHéb. 13:2; kete tënë na gbe ni.) Na yâ ti Bible, e lingbi ti diko ye na ndö ti atapande so afa na e tongana nyen la e lingbi  ti sara nzoni bê na awande (Gen. 18:1-5). E lingbi ti mû maboko na azo nga a lingbi e sara ni lakue tongana lege azi na e ti sara ni, atâa azo ni ayeke “aita ti e na yâ ti mabe” wala pëpe.​—aGal. 6:10.

7. Aye ti nzoni wa la mo yeke wara tongana mo yamba awakua ti ngoi kue nzoni?

⁷ Mo lingbi ti sara kua oko na Nzapa na lege so mo yamba awakua ti Jéhovah so ayeke sara kua ti ngoi kue so abezoin ndo ti lango? (Diko 3 Jean 5, 8.) Mara ti angoi so amû lege na e ti “wa terê na popo ti e”. (aRom. 1:11, 12). Gbu li na ndö ti tapande ti Olaf. Na ngoi so lo de lani maseka, mbeni surveillant ti circonscription so ayeke kumbamba aga ti sara vizite na congrégation ti lo na lo bezoin mbeni ndo ti lango, me zo oko na yâ ti congrégation ni alingbi ti mû maboko na lo ape. Olaf ahunda babâ na mama ti lo so ayeke aTémoin ape ti tene surveillant ti circonscription ni alango na ndo ti ala. Ala yeda, me ala tene na Olaf so lo yeke lango na ndö ti divan na lo yeke mû gbogbo ti lo na surveillant ni. A yeke ye so Olaf asara, na lo regretté ni ape. Olaf atene: “So pendere yenga! Mbi na surveillant ni tongana e zingo lakue hio na ndapre e yeke sara lisoro na ndö ti apendere tënë mingi na ngoi so e yeke te ye. Atënë so lo tene ti kpengba mbi amû na mbi nzara ti sara kua ti ngoi kue.” Na yâ ti angu 40 so ahon, Olaf asara kua ti missionnaire na akodro nde nde.

8. Ngbanga ti nyen la a lingbi e sara ye na nzoni bê même tongana na tongo nda ni azo akiri singila na e ape? Fa mbeni tapande.

⁸ E lingbi ti ndoye awande na alege mingi même tongana na tongo nda ni ala kiri singila na e ape. Na tapande, mbeni ita-wali na Espagne amanda Bible lani na Yesica, mbeni wali so alondo na Équateur. Mbeni lâ na ngoi ti étude ni, Yesica ayeke toto gï totongo. Tongaso ita-wali ni ahunda lo ngbanga ti nyen la lo yeke toto. Yesica atene so kozo ti tene lo ga na Espagne, lo yeke lani na yâ ti kota yere. Mbeni lâ lo yeke na kobe ti mungo na molenge ti lo ti wali ape, me gï ngu. Yesica asambela ti tene lo wara mungo maboko na ngoi so lo gi ti handa molenge ni ti tene lo lango. Kete na pekoni, aTémoin use aga ti bâ Yesica na ala mû na lo mbeni périodique. Me lo sara nzoni bê na ala ape nga lo suru yâ ti périodique ni, lo tene: “Kobe so ala ye ti tene mbi mû na molenge ti mbi la?” Aita-wali ni agi ti dë bê ti lo, me gbä. Na mbeni ngoi na pekoni, aita-wali so azia mbeni sakpa ti kobe na terê ti yanga-da ti lo. Fadeso, na ngoi ti étude ni, lo yeke toto ndali ti so lo hinga so lo sara sanka ti ye so Nzapa asara ti kiri tënë na sambela ti lo. Me Yesica aleke na bê ti lo ti sara na Jéhovah. So pendere ye so sarango ye ti aita-wali so na nzoni bê aga na ni!​—Zo-ti. 11:1, 6.

9, 10. (a) Ambeni lege wa la azi lani na azo ti Israël ti sara kua ti volontaire? (b) Na alege wa la aita-koli alingbi ti mû maboko na yâ ti congrégation laso?

⁹ Na angoi nde nde na yâ ti mbaï ti azo ti Israël ti giriri, a bezoin avolontaire (Ex. 36:2; 1 Chron. 29:5; Néh. 11:2). Laso nga, lege ayeke mingi ti tene na bê ti mo wani mo mû ngoi ti mo, aye ti mo nga na akode ti mo ti mû maboko na aita ti mo. Tongana mo sara ni, terê ti mo ayeke nzere mingi na Jéhovah ayeke iri tënë nzoni na ndö ti mo.

¹⁰ Bible awa aita-koli na yâ ti congrégation ti sara kua oko na Jéhovah na lege so ala gi ti sara kua tongana awakua ti mungo maboko wala a-ancien (1 Tim. 3:1, 8, 9; 1 Pi. 5:2, 3). Azo so asara tongaso aye ti mû maboko na amba ti ala na ambeni nzoni lege nga ti mû maboko na ala na yâ ti aye so andu aye ti yingo (Kus. 6:1-4). Eskê a-ancien ahunda mo awe ti yamba azo na ngoi ti abungbi wala ti mû maboko ti bâ lege ti ambeti, ti aterritoire, ti Da ti Royaume wala ti ambeni kua nde? Aita-koli so amû maboko na yâ ti akua so atene so ala ye ni mingi.

11. Tongana nyen la mbeni ita-wali awara ye ti nzoni na ngoi so lo yeke leke ada ndali ti bungbi ti Jéhovah?

 ¹¹ Fani mingi, azo so asara kua ti volontaire na yâ ti akua ti bungbi ti Jéhovah ayeke wara afini kamarade. Mbeni ita-wali so iri ti lo Margie ayeke sara kua ti lekengo afini Da ti Royaume asara ngu 18 awe. Na yâ ti angu so, lo bi bê mingi na aita-wali so ade maseka na lo fa kua na ala. Lo tene so ngoi so ayeke apendere ngoi mingi so amû lege na avolontaire ti kpengba mba na popo ti ala (aRom. 1:12). Na angoi so Margie ayeke na yâ ti kpale, akamarade so lo wara na ngoi ti akua so akpengba lo. Mo hunda lâ oko awe ti sara kua ti volontaire ti mû maboko ti leke mbeni da ndali ti bungbi ti Jéhovah? Mo lingbi ti sara kua ti volontaire, même tongana mo hinga pëpe ti sara mbeni mbilimbili kua.

12. Tongana nyen la mo lingbi ti mû maboko na azo na peko ti mbeni kpale?

¹² Na ngoi so akpale asi, alege azi na azo ti Nzapa ti sara kua oko na lo ti mû maboko na aita ti ala na ambeni nzoni lege. Na tapande, ala yeke mû nginza ti mû maboko na azo so kpale asi na ala (Jean 13:34, 35; Kus. 11:27-30). Mbeni nzoni lege ni ayeke ti mû maboko ti zi aye so abuba nga ti leke ada so abuba. Gabriela, mbeni ita-wali ti Pologne so mbeni ngu so asuku amû ndo abuba da ti lo mingi, ayeke na ngia ti bâ aita ti acongrégation so ayeke nduru na lo aga ti mû maboko na lo. Lo tene: “Mbi ye pëpe ti sara tënë ti aye so mbi perdre, a yeke gï aye ti sese la. Me mbi ye ti fa na ala aye so mbi wara. Ye so asi so asara si mbi hinga biani so ti duti na yâ ti congrégation ti aChrétien ayeke mbeni pasa so mara ni ayeke dä ape nga ayeke mbeni ye so amû ngia na mbi mingi.” Azo mingi so awara mungo maboko na peko ti mbeni kpale so asi ayeke na oko bibe so. Nga, azo so asara kua oko na Jéhovah ti mû maboko na azo tongaso ayeke na ngia mingi.—Diko Kusala 20:35; 2 aCorinthien 9:6, 7.

13. Tongana nyen la sarango kua ti volontaire ayeke sara si e ye Jéhovah mingi? Fa mbeni tapande.

¹³ Stephanie nga na ambeni wafango tënë ayeke na ngia ti sara kua oko na Nzapa na lege so ala mû maboko na aTémoin so aga na États-Unis tongana aréfugié. Ala mû maboko na aréfugié so ti wara ada nga na  akungba ti da ni. Stephanie atene: “Ngia ti ala nga na singila ti ala andu bê ti e na ngoi so ala bâ ndoye so sewa ti aita so ayeke na yâ ti dunia kue afa na ala. Asewa so apensé so e la e mû maboko na ala, me ti tâ tënë ni, ala la amû maboko na e mingi. Ndoye, beoko, mabe nga na confiance so aita so ayeke na ni na Jéhovah so e bâ na mbage ti ala asara si e ye Jéhovah mingi, nga a sara si e kiri singila mingi ndali ti ye kue so lo mû na e na lege ti bungbi ti lo.”

14, 15. (a) Bibe wa la prophète Ésaïe ayeke lani na ni? (b) Tongana nyen la awafango tënë ti Royaume alingbi ti duti na bango ndo ti Ésaïe laso?

¹⁴ Mo ye ti sara kua oko na Jéhovah mingi ahon ti kozo? Mo yeke yeda ti gue na mbeni ndo so bezoin ti awafango tënë ayeke dä mingi? Biani, awakua ti Jéhovah ayeke na bezoin pëpe ti gue ayo na da ti ala si ala mû aye mingi na azo. Me dutingo ti ambeni ita amû lege na ala ti sara ni. Ala yeke na mara bango ndo ti prophète Ésaïe. Na ngoi so Jéhovah ahunda ndo, atene: “Zo wa la mbi yeke tokua lo zo wa? Zo wa la ayeke gue tokua so na e?” lo tene: “Mbi la! Tokua mbi!” (És. 6:8). Mo yeke na nzara ti mû maboko na akua so a yeke sara na yâ ti bungbi ti Jéhovah nga dutingo ti mo amû lege na mo ti sara ni? Akua wa la a bezoin ti sara ni?

¹⁵ Na ndö ti kua ti fango tënë nga na sarango adisciple, Jésus atene: “Akobe ti fango ni ayeke mingi, me azo ti kua ni ayeke mingi pëpe. Tongaso, ala voro yanga na Wa ti kua ni ti tokua azo ti kua ti fâ akobe ti yaka ti lo.” (Mat. 9:37, 38). Peut-être mo lingbi ti sara kua tongana pionnier na ndo so bezoin ti awafango tënë ayeke mingi dä? Wala mo lingbi ti mû maboko na mbeni zo ti sara tongaso? Aita mingi abâ so tâ nzoni lege ti fa so e ye Nzapa nga na azo ayeke ti sara kua ti pionnier na ndo so a bezoin awafango tënë mingi dä. Mo lingbi ti pensé na ambeni lege so mo lingbi ti sara kua mingi ahon ti kozo na yâ ti kua ti mo? Tongana mo sara ni mo yeke duti na ngia mingi.

16, 17. Na ambeni lege wa la mo lingbi ti sara kua ti Jéhovah mingi ahon ti kozo?

¹⁶ Mo yeke yeda ti sara kua na Béthel wala ti mû maboko na yâ ti kua ti construction, tongana temporaire wala lango oko wala alango mingi na yâ ti yenga oko? Bungbi ti Jéhovah ayeke lakue na bezoin ti azo so ayeke nduru ti yeda ti sara mbeni kua atâa ndo wa la a hunda na ala ti sara kua ni dä nga atâa kua wa la a mû na ala ti sara, même tongana ala yeke na akode ti mbeni kua nde. Jéhovah abâ na nene ni mingi azo kue so ayeke nduru ti sara asacrifice nga ti sara kua na ndo so bezoin ayeke dä.​—Ps. 110:3.

¹⁷ Mo yeke na nzara ti tene a fa kua na mo mingi tongaso si mo lingbi ti sara kua ti Jéhovah nzoni mingi ahon ti kozo? Tongana a yeke tongaso, mo lingbi ti sû demande ti gue na Ekole ti awafango nzoni tënë ti Royaume. Na ekole so, a yeke fa ye na aita-koli nga na aita-wali so ayeke abiazo so ayeke na yâ ti kua ti ngoi kue tongaso si bungbi ti Jéhovah alingbi ti sara kua na ala mingi ahon ti kozo. Azo so ague na ekole so adoit ti duti nduru ti sara kua na ndo kue so a tokua ala dä na peko ti so ala wara diplôme ti ala. Mo yeke duti nduru ti sara kua mingi ndali ti Jéhovah na lege so?​—1 aCor. 9:23.

18. Anzoni ye ti peko ti sarango kua oko na Jéhovah lâ oko oko ayeke so wa?

¹⁸ So e yeke awakua ti Jéhovah, e yeke mû ye mingi na azo, e yeke sara nzoni ye na ala, e yeke sara nzoni bê na ala nga e yeke ye ala. E yeke bâ lege ti amba ti e lâ oko oko. Sarango tongaso aga na e ngia nga na siriri (aGal. 5:22, 23). Atâa dutingo ti mo ayeke so wa, mo yeke duti na ngia tongana mo sara ye tongana Jéhovah so amû ye mingi na azo nga tongana mo ngbâ ti duti mbeni oko ti azo so lo ye ala mingi so ayeke sara kua oko na lo.​—aProv. 3:9, 10.