KUA ti e ti fango tënë ayeke kota ye mingi nga e bâ ni na nene ni mingi. Me a yeke pëpe azo kue so e yeke fa tënë na ala la aye ni. Même tongana azo ayeda na atënë ti Bible so e yeke fa, a yeke pëpe lakue la ala bâ so ayeke kota ye ti tene e manda Bible na ala.

Bâ tapande ti Gavin. Lo yeke gue lani na abungbi ti congrégation, me lo ye ti tene a manda Bible na lo ape. Lo tene: “Mbi hinga lani ye mingi na ndo ti Bible ape, na kamene asara mbi ti tene azo ahinga ni. Mbi yeke sara lani hange ti tene mbeni zo ahanda mbi ape nga mbi yeke sara mbeto ti mû desizion.” Mo tene ti mo nyen? Gavin apeut ti changé ape? Ên-ën. Bâ anzoni ye so afango ye ti Bible alingbi ti sara na ndo ti mbeni zo. Jéhovah atene lani na azo ti lo ti giriri lo tene: “Fade tënë ti mbi ayuru tongana ngu ti pere, tongana ngu-nzapa so atï kete kete na ndo ti pere.” (Deut. 31: 19, 30; 32:2, FD). Ambeni ye so ngu ti pere ayeke sara afa tongana nyen la e lingbi ti mû maboko nzoni na mara ti azo nde nde na fango tënë.—1 Tim. 2:3, 4.

Ngu ti pere ayeke sara nzoni na zo. Angu ti pere ayeke sigigi yeke yeke na peko ti so aguru ti ngu ague na lê ti nduzu si akiri encore na sese. Atënë ti Jéhovah ‘ayuru tongana ngu ti pere’ na lege so lo sara tënë nga lo sara ye na azo ti lo na nzoni bê. E yeke sara ye tongana lo tongana e bâ bango ndo ti azo na nene ni. E yeke wa azo ti tene ala wani agbu li ti ala, nga ala mû desizion ala wani. Tongana e sara tongaso, azo ayeke duti nduru ti mä tënë ti e nga fango tënë ti e ayeke lë lengo mingi.

Ngu ti pere ayeke dë bê ti zo. Fango tënë ti e ayeke dë bê ti azo tongana e gbu li ti e na ndo ti alege nde nde so e lingbi ti mû maboko na ala ti hinga tâ tënë. A forcé lani pëpe Gavin so e sara fade tënë ti lo ti manda Bible. Me Ita Chris, so asara tënë na lo kozo asara kua na alege nde nde ti tene lisoro so lo na Gavin asara na ndo ti Bible anzere na lo. Chris atene na lo so mbeni mama-tene ayeke na yâ ti Bible na tongana lo hinga ni ayeke mû maboko na lo ti mä yâ ti atënë so a yeke tene na ngoi ti abungbi nzoni mingi. Na pekoni, Chris atene na Gavin so a yeke lani aprophétie ti Bible la asara si ni yeda so Bible ayeke tene tâ tënë. Ye so asara si ala sara lisoro mingi na ndo ti aprophétie ti Bible so aga tâ tënë. Alisoro ni adë bê ti Gavin na nda ni lo yeda ti manda Bible.

Ngu ti pere ayeke bata fini. Na Israël, na ngoi ti buru ndo ayeke chauffé mingi, ngu ayeke pika ape peut-être anze mingi. Tongana ngu ti pere ayeke dä ape, akugbe ayeke hule na ayeke kui. Gi tongana ti so Jéhovah atene kozo awe, e yeke laso na ngoi ti mbeni buru na lege ti yingo (Amos 8:11). Lo tene so aChrétien so a soro ala ti gue na yayu ayeke duti “tongana mamio [wala ngu ti pere] so alondo” na Jéhovah na ngoi so ala yeke fa tënë ti Royaume, nga “ambeni ngasangbaga” ayeke mû maboko na ala dä (Mi. 5:6; Jean 10:16). Tënë so e yeke fa ayeke mbeni ye so na lege ni Jéhovah aleke ti mû fini na azo so ayeke na nzara ti tâ tënë. E bâ tënë ti Royaume na nene ni?

Ngu ti pere ayeke tongana tufa ti Jéhovah. (Deut. 33:13) Tënë so e yeke fa alingbi ti ga na tënë nzoni na ndo ti azo so ayeda na ni. Mandango Bible ayeke lani mbeni tënë nzoni ndali ti Gavin teti so amû maboko na lo ti wara kiringo tënë na ahundango ndo ti lo kue. Lo gue na li ni hio, lo wara batême na fadeso lo na wali ti lo, Joyce, ayeke fa nzoni tënë ti Royaume mingi.

Tongana e haka kua ti fango tënë na ngu ti pere alingbi ti mû maboko na e ti hinga so ngangu so e oko oko e yeke sara na fango tënë ayeke kota ye mingi. Na lege wa? Akete kete ngu ti pere so ayeke tï oko oko alingbi ti sara ye mingi ape, me tongana a bungbi ni gbani ayeke sara si sese adë. Legeoko nga, ye so e oko oko e sara na fango tënë a lingbi ti kpa gi mbeni kete ye na lê ti e. Ye oko, ndali ti angangu kue so awakua ti Jéhovah asara na bê ti ala kue, a fa tënë ti Témoin na “amara kue.” (Mat. 24:14). Fango tënë ti e ayeke mbeni tënë nzoni ti Jéhovah na ndo ti azo? A yeke duti tongaso tongana tënë so e yeke fa ayeke tâ tongana ngu ti pere so asara nzoni na zo, adë bê ti zo nga abata fini ti zo.