1-3. (a) Tongana nyen la aChrétien afa so ala ye mingi ti bungbi oko? (Bâ foto so ayeke na tongo nda ti article ni.) (b) Nyen la e yeke bâ na yâ ti article so?

NA NGOI so Corinna ayeke lani gi na ngu 17, a gbu mama ti lo na a tokua lo na camp ti sarango akua ti ngangu. Na pekoni, a tokua nga lani Corinna na Sibérie so ayo akilomètre saki mingi na kodoro ti lo. A sara ye na lo tongana mbeni ngbâa, a yeke forcé lo ngoi na ngoi ti sara kua na gigi na yâ ti sioni dê sân mbeni nzoni bongo ti dê. Atâa so kue, Corinna na mbeni ita-wali aleke na bê ti ala ti gue na mbeni bungbi ti congrégation.

² Corinna atene: “Na lakui e zia ndo so e sara kua dä, na e tambela lani akilomètre 25 ti si na mbeni ndo so atrain ayeke luti dä.” Train so e mû ni ahon na ngbonga use ti ndapre, na e sara l’heure omene na yâ ti train ni na pekoni e descend e tambela kilomètre bale-oko ti si na ndo ti bungbi ni. A yeke lani kota ye ti sara voyage so? Corinna atene: “Na ngoi ti bungbi ni, e manda lani Tour ti Ba Ndo nga e he abia ti Royaume. Aye so akpengba lani e mingi nga akpengba mabe ti e.” Atâa so ala sara lani lango ota si ala kiri, wa ti ferme ni ahinga nga même ape so Corinna na mba ti lo ni ahon.

 ³ Awakua ti Jéhovah abâ lakue angoi so ala yeke bungbi na nene ni mingi. Hio na peko ti so congrégation ti aChrétien abâ gigi lani, adisciple ti Jésus ayeke “gue lakue na temple”. (Kus. 2:46). Kite ayeke pëpe so, mo nga kue a nzere na mo ti gue na abungbi lakue. Me, aChrétien kue ayeke tingbi na akpale. Kua ti nginza, aye mingi so zo ayeke na ni ti sara, wala fatigue ti peko ti akua so zo ayeke sara lâ na lâ alingbi ti sara si a yeke ngangu ti gue na abungbi. Nyen la alingbi ti pusu e ti gi ti hon ndo ti aye so na ti ngbâ ti gue na abungbi? ^[1] Tongana nyen la e lingbi ti mû maboko na azo so e yeke manda Bible na ala nga na amba ti e ti bâ guengo na abungbi na nene ni? Na yâ ti article so, e yeke bâ araison miombe so ndali ni e yeke bungbi oko ti voro Jéhovah. E yeke bungbi araison so na agroupe ota: abungbi ayeke ga na e ye ti nzoni, e yeke mû maboko na amba ti e nga e yeke zia ngia na bê ti Jéhovah na ngoi ti abungbi. ^[2]

4. Tongana nyen la bungbi ti e ayeke mû maboko na e ti manda ye na ndo ti Jéhovah?

⁴ Abungbi ayeke fa ye na e. Abungbi kue ayeke mû maboko na e ti manda ye na ndo ti Jéhovah, Nzapa ti e. Na tapande, na yâ ti angu use so ahon fafadeso, acongrégation mingi amanda buku Ga ndulu na Jéhovah na Mandango Bible ti congrégation. Mandango ye na ndo ti asarango ye ti Nzapa, nga na kiringo tënë so aita akiri na ni na bê ti ala kue, asara si mo ye Babâ ti mo ti yayu mingi. Ni la ape? E yeke hinga nga ye mingi na ndo ti Bible tongana e dengi mê nzoni na adiskur, adémonstration nga na ngoi so a yeke diko Bible (Néh. 8:8). Na tapande, gbu li ti mo na ndo ti aye mingi so mo yeke hinga yenga na yenga tongana mo leke tere ti mo ndali ti angbongboro tënë ti dikongo Bible nga mo dengi mê mo mä acommentaire ti aita na ndo ti aye so ala manda na lege ti dikongo Bible ni.

5. Tongana nyen la abungbi amû maboko na mo ti sara ye alingbi na aye so mo manda na yâ ti Bible nga ti maï kode ti fango tënë ti mo?

⁵ Abungbi ti e afa na e ti sara ye alingbi na afango ye ti Bible na yâ ti fini ti e kue (1 aThes. 4:9, 10). Na tapande, aye so e yeke manda na ngoi ti Mandango Tour ti Ba Ndo alingbi tâ na bezoin ti awakua ti Jéhovah. Eskê Mandango Tour ti Ba Ndo apusu mo awe ti kiri ti bâ ye so mo zia na gbele mo ti sara, ti pardonné amba ti mo, wala ti kiri ti leke yâ ti asambela ti mo nzoni? Bungbi ti mercredi wala ti jeudi ayeke fa na e tongana nyen ti fa tënë. E yeke manda tongana nyen la e lingbi ti fa nzoni tënë nga tongana nyen la e lingbi ti mû maboko nzoni na azo ti mä yâ ti tâ tënë ti Bible.—Mat. 28:19, 20.

6. Tongana nyen la abungbi ayeke dë bê ti e nga ayeke kpengba e?

⁶ Abungbi ayeke dë bê ti e. Dunia ti Satan so alingbi ti woko bibe ti e, atënë ti bê ti e nga alingbi ti sara si e woko na lege ti yingo. Me abungbi ti congrégation ayeke dë bê ti e nga ayeke kpengba e. (Diko Kusala 15:30-32.) Na ngoi ti mingi ti abungbi ti e, e yeke kiri ka na ndo ti aprophétie ti Bible so aga tâ tënë. Ye ti pekoni ayeke so, e yeke na confiance so azendo so Jéhovah amû ayeke ga ande nga tâ tënë. Biani, a yeke gi azo so ayeke monté na pupitre la ayeke dë bê ti e ape. Acommentaire ti aita ti e aChrétien nga na bia so ala yeke he na bê ti ala kue ayeke kpengba e (1 aCor. 14:26). Nga, na ngoi so e yeke sara lisoro na aita kozo si bungbi akomanse nga na peko ti bungbi, bê ti e ayeke dë ndali ti so e hinga so e yeke na gbâ ti aita so ayeke bibe ti ala biani na e.—1 aCor. 16:17, 18.

7. Ngbanga ti nyen a yeke tâ kota ye ti gue na bungbi?

⁷ Yingo vulu ayeke mû maboko na e na  ngoi ti abungbi. Jésus so awara gloire atene: “Zia zo so ayeke na mê amä ye so yingo atene na acongrégation.” (Apoc. 2:7). Biani, Jésus ayeke fa lege na congrégation ti aChrétien na lege ti yingo vulu. E bezoin yingo vulu ti mû maboko na e ti luti na gbele tara, ti leke e ti fa tënë na mbeto ape, nga ti mû anzoni desizion. Ndani la a lingbi e sara ye kue so e lingbi ti sara ti duti dä na ngoi ti abungbi ti e ti tene yingo vulu amû maboko na e.

8. Tongana aita abâ e na abungbi ala mä acommentaire ti e nga na abia so e he, a yeke mû maboko na ala tongana nyen? (Bâ nga encadré “Na peko ti bungbi lo yeke kiri lakue na ngia.”)

⁸ Na ngoi ti abungbi lege ayeke zi na e ti fa na aita ti e so e ye ala. Gbu li nzoni na ndo ti akpale so ambeni ita ti congrégation awara. Bazengele Paul atene: “Zia e bi lê na ndo ti mba.” Na pekoni Paul afa so e lingbi ti bi lê na ndo ti mba tongana “e kpe bungbi ti e pëpe”. (aHéb. 10:24, 25). Na ngoi so e gue na abungbi, e yeke fa na aita ti e so e ye ti duti na tere ti ala ti sara lisoro na ala nga atënë ti bê ti ala agbu bê ti e. Na ndo ni, acommentaire so e yeke sara na bê ti e kue nga abia so e yeke he ayeke dë bê ti amba ti e aTémoin.—aCol. 3:16.

9, 10. (a) Fa tongana nyen la atënë ti Jésus so ayeke na Jean 10:16 amû maboko na e ti hinga ndani so ayeke kota ye ti bungbi oko na aita ti e. (b) Tongana e yeke gue lakue na abungbi, tongana nyen la e lingbi ti mû maboko na mbeni zo so afami ti lo ake lo?

⁹ Abungbi asara si e na amba ti e aChrétien e duti beoko. (Diko Jean 10:16.) Jésus ahaka lo wani na mbeni berger, na lo haka adisciple ti lo na mbeni groupe ti ataba. Tara ti bâ ye so: Tongana ataba use ayeke na li ti mbeni hoto, ambeni use ayeke na yâ ti mbeni popo hoto, na mbeni oko ayeke te ti lo pere na mbeni ndo, e lingbi ti tene so ataba oku so ayeke na yâ ti groupe oko la? Mingi ni, mbeni groupe ti ataba ayeke ngbâ ndo oko na berger ti ala ayeke bâ ndo na ndo ti ala. Legeoko nga, e lingbi pëpe ti mû peko ti berger ti e tongana e wani e duti nde na amba ti e. A lingbi e bungbi na amba ti e aChrétien ti ga “kundu oko” na gbe ti “berger oko.”

¹⁰ Abungbi ti e amû maboko na e ti duti beoko tongana mbeni sewa so aye tere (Ps. 133:1). Ababâ na amama ti ambeni ita ti e nga na aita ti ala ti mitele ake ala. Me Jésus amû zendo so lo yeke mû na ala mbeni sewa na lege ti yingo so ayeke ye ala nga ayeke bâ lege ti ala (Marc 10:29, 30). Tongana mo yeke gue na abungbi lakue, mo lingbi ti ga tongana babâ, mama wala ita ti azo tongaso. Ye so ayeke pusu e ti sara ye kue so e lingbi ti sara ti gue na abungbi kue.

11. Tongana nyen la guengo na abungbi amû maboko na e ti mû na Jéhovah ye so lo lingbi na ni?

¹¹ Na ngoi ti abungbi e yeke mû na Jéhovah ye so lo lingbi na ni. So Jéhovah la créé e, lo lingbi ti tene e gonda lo, e mû gloire na lo, e kiri singila na lo nga e ne lo. (Diko Apocalypse 7:12.) Na ngoi so e sambela, e he bia nga e sara tënë na ndo ti Jéhovah na ngoi ti abungbi ti e, e yeke mû na lo ye so lo lingbi tâ na ni: vorongo ti e. E ye mingi pasa so e yeke na ni ti mû nengo na lo so asara aye mingi ndali ti e.

12. Tongana e mä yanga so Jéhovah amû na e ti gue na abungbi ayeke sara nyen na lo?

¹² A lingbi e mä nga yanga ti Jéhovah. Lo hunda na e ti kpe bungbi ti e ape, mbilimbili na ngoi ti nda ni so. Tongana e sara ye alingbi na commandement so na bê ti e kue, e yeke zia ngia na bê ti lo (1 Jean 3:22). Lo hinga ngangu so e yeke sara ti gue na abungbi oko oko na lo bâ ni na nene ni mingi.—aHéb. 6:10.

13, 14. Tongana nyen la guengo na abungbi ayeke sara si e ga nduru na Jéhovah nga na Jésus?

¹³ Guengo na abungbi afa so e ye ti ga nduru mingi na Jéhovah nga na Molenge ti lo. Na ngoi ti abungbi ti e, Kota Wafango ye na e ayeke fa ye na e na lege ti Mbeti ti lo, Bible (És. 30:20, 21). Même azo so ayeke aTémoin ape so aga na abungbi ti e alingbi ti tene: “Nzapa ayeke biani na popo ti ala.” (1 aCor. 14:23-25). Jéhovah ayeke fa lege na abungbi ti e na lege ti yingo vulu ti lo, na aye so e manda alondo na lo. Tongaso, e yeke mä go ti Jéhovah nga e bâ so lo yeke bâ lege ti e na ndoye. Ye so asara si e ga nduru na lo.

¹⁴ Jésus atene: “Na ndo so azo use wala ota abungbi dä na iri ti mbi, mbi yeke na popo ti ala na ndo ni so.” (Mat. 18:20). Ti bâ ni nzoni, tënë ti Jésus so andu abungbi ti e. So lo yeke li ti congrégation, Christ ayeke ‘tambela na popo’ ti acongrégation ti azo ti Nzapa (Apoc. 1:20–2:1). Bâ ye so si! Jéhovah na Jésus ayeke na e nga ala yeke kpengba e na ngoi ti abungbi ti e. Mo pensé so bê ti Jéhovah ayeke tongana nyen na ngoi so lo bâ so e yeke sara kue ti ga nduru na lo nga na Molenge ti lo?

15. Tongana nyen la guengo na bungbi afa na Nzapa so e ye ti mä yanga ti lo?

¹⁵ Guengo na abungbi afa so e mû mbage ti droit ti Nzapa ti komande dunia kue. Atâa so Jéhovah ahunda na e ti gue na abungbi, lo gbu e gbungo na ngangu ti gue ape (És. 43:23). Me, a yeke na e ti fa na Jéhovah so e ye lo na bê ti e kue nga e yeda so lo la lo yeke na droit ti fa na e ye so a lingbi e sara (aRom. 6:17). Na tapande, patron ti e alingbi ti hunda na e ti ngbâ ti sara kua ti nginza ti e ahon ti gue lakue na abungbi. Azo ti gouvernement alingbi ti kanga lege na e na lege so ala zia mbeto na bê ti e ala tene e yeke futa amande wala a yeke kanga e wala a yeke sara mbeni ye ti sioni na e tongana e bungbi ti voro Jéhovah. Wala e lingbi ti pensé ti gue ti sara ngia ahon ti gue na bungbi. Na yâ ti aye so oko oko kue a yeke na e ti soro zo wa la e yeke sara na lo (Kus. 5:29). Tongana e soro ti mû mbage ti droit ti Jéhovah ti komande dunia, e yeke zia ngia na bê ti lo.—aProv. 27:11.

16, 17. (a) Tongana nyen la e hinga so abungbi ayeke lani kota ye mingi na lê ti akozo Chrétien?(b) Ita George Gangas abâ abungbi ti e tongana nyen?

¹⁶ Na peko ti so adisciple abungbi lani na ngoi ti Pentecôte ti ngu 33, ala ngbâ lakue ti bungbi ti voro Jéhovah. ‘Ala ngbâ lakue ti mû tere na fango ye ti abazengele nga ala yeke gue lakue na temple’ (Kus. 2:42, 46). Tënë ti Grec so a kiri pekoni na “mû tere” aye ti tene ti gbu ngangu wala  ti sara effort ti ngbâ na yâ ti mbeni loro. Na gbe ti komandema ti Rome nga na ngoi so akota zo ti vorongo nzapa ti aJuif akanga lege na aChrétien so, a yeke lani ngangu na ala ti gue na abungbi. Ye oko, ala gbu lani ngangu.

¹⁷ Awakua ti Jéhovah ti laso mingi abâ abungbi na nene ni. George Gangas so ayeke lani mbeni Membre ti Bebungbi teti ngu 22 tongaso atene: “Na mbi, ti wara tere na aita ayeke mbeni kota ye mingi na yâ ti fini ti mbi nga ayeke mbeni ye so akpengba mbi. Mbi ye mingi ti sara kue ti duti na popo ti akozo zo so asi na Da ti Royaume nga ti duti na popo ti andangba zo so azia Da ti Royaume. Mbi yeke na ngia tongana mbi yeke sara lisoro na awakua ti Jéhovah. Tongana mbi yeke na popo [ti azo ti Nzapa], mbi bâ tere ti mbi mo bâ mo tene mbi yeke na yanga-da na azo ti sewa ti mbi, na yâ ti paradis ti yingo.” Lo kiri lo tene: “Pensé ti mbi nga na ye so mbi ye ayeke ti gue na abungbi.”

18. Mo bâ abungbi ti e tongana nyen? Nyen la mo leke na bê ti mo ti sara?

¹⁸ Mo kue mo bâ abungbi so e yeke sara ti voro na Jéhovah tongaso? Tongaso, leke na bê ti mo ti ngbâ ti gbu ngangu nga sara kue ti gue na abungbi lakue. Na sarango tongaso mo yeke fa so mo yeda na tënë ti Gbia David so atene: “O [Jéhovah], mbi ndoye ndo so da ti Mo ayeke dä.”—Ps. 26:8.