1-2. (a) Nyen la a hunda na abazengele ti Jésus ota ti sara? Tongana nyen la ala sara ye alingbi na ni? (b) Nyen la e yeke bâ na yâ ti article so?

NA PEKO ti Pâque ti ngu 32, bazengele Pierre, Jacques na Jean abâ lani mbeni vision so apika bê. Na ndö ti mbeni yongoro hoto, so ayeke peut-être mbage ti hoto ti Hermon, terê ti Jésus achangé na devant ti ala. “Lê ti lo asu tongana lâ, na abongo ti lo ti ndö ni aza tongana lumière.” (Mat. 17:1-4). Nduru na hunzingo ti vision ni, abazengele ni amä Nzapa atene: “So ayeke Molenge ti mbi, lo so mbi ndoye lo mingi, so bê ti mbi anzere na mbage ti lo. Ala mä lo.” (Mat. 17:5). Abazengele so ota kue amä Jésus na yâ ti fini ti ala. E ye ti mû tapande ti ala.

² Na yâ ti article so ahon, e manda so ti mä Jésus aye ti tene ti zia ti sara ambeni ye. Na yâ ti article so, e yeke bâ ande aye use so Jésus ahunda na e ti sara.

3. Ti gue oko na Matthieu 7:13, 14, nyen la e doit ti sara?

³ Diko Matthieu 7:13, 14. Bâ so Jésus asara tënë ti ayanga ti gbagba use so ague na alege use, lê ti mbeni lege ni “akono” na lê ti mbeni ayeke “kete”. Ota lege ni ayeke dä ape. E wani e doit ti soro lege so e yeke tambela dä. So a yeke kota desizion so ahon atanga ni kue ndali ti so lege so ague na fini ti lakue lakue ayeke gï oko.

4. Mo tene ti mo nyen na ndö ti lege so lê ni “akono”?

⁴ E doit ti girisa ape so alege use so ayeke nde nde. Gbâ ti azo amû lege so lê ni “akono” so ndali ti so a yeke ngangu  ape ti tambela dä. Mawa ni ayeke so azo mingi asoro ti ngbâ na ndö ti lege so na ala mû peko ti ye so gbâ ti azo so ayeke na ndö ni ayeke sara. Ala hinga ape so Satan Zabolo la ayeke pusu azo ti mû lege ni so nga lege ti lo ague na zo na futingo.—1 aCor. 6:9, 10; 1 Jean 5:19.

5. A-effort wa la ambeni zo asara ti wara lege so lê ni ayeke “kete” nga ti komanse ti tambela na ndö ni?

⁵ Nde na lege so lê ni “akono”, lê ti mbeni lege ni ayeke “kete” na Jésus atene so azo mingi pëpe si ayeke wara ni. Ngbanga ti nyen? A yeke nzoni ti hinga so, na yâ ti versê so aga na pekoni, Jésus awa adisciple ti lo ti sara hange na aprophète ti wataka (Mat. 7:15). Ambeni zo atene so abungbi ti vorongo Nzapa ayeke saki mingi, na mingi ti ala atene so ala yeke fa tâ tënë. Teti so abungbi ti vorongo Nzapa ayeke mingi, azo mingi adécouragé wala li ti ala aga kirikiri nga ala gi même ape ti wara lege so ague na fini. Me zo apeut ti wara lege ni so. Jésus atene: “Tongana ala ngbâ na yâ ti tënë ti mbi, ala yeke biani adisciple ti mbi, na ala yeke hinga ande tâ tënë, na tâ tënë ayeke zi ala.” (Jean 8:31, 32). A yeke nzoni mingi so mo sara pëpe ye so mingi ti azo asara, me mo gi ti hinga tâ tënë. Mo komanse ti manda ye mingi na ndö ti Bible ti hinga aye so Nzapa ahunda na e nga mo mä afango ye ti Jésus. Ambeni ye so mo manda ayeke so Jéhovah ahunda na e ti ke afango ye ti abungbi ti vorongo nzapa ti wataka nga ti zia ti sara amatanga so alondo na apaïen. Mo manda nga so ti sara ye alingbi na aye so Jéhovah ahunda nga ti zia ti sara aye so lo ke apeut ti duti kete ye ape (Mat. 10:34-36). Peut-être a yeke kete ye na mo ape ti sara achangement so. Me mo ngbâ ti sara achangement so ndali ti so mo ye Babâ ti mo so ayeke na yayu nga mo ye ti zia ngia na bê ti lo. Bê ti lo adoit ti nzere na mo mingi.—aProv. 27:11.

6. Ti gue oko na Psaume 119:9, 10, 45, 133, nyen la apeut ti aidé e ti ngbâ na ndö ti kete lege?

⁶ Tongana e komanse ti tambela na ndö ti kete lege awe, nyen la apeut ti aidé e ti ngbâ na ndö ni? Bâ tapande so. Aye so a lu na terê ti lege so ayeke na terê ti hoto so dû ayeke na mbeni mbage ni ayeke bata zo ti kpengo na oto nga na oto ti lo. Aye ni so ayeke bata azo si ala ga nduru na dû ni ape wala ala tï na yâ ni ape. Zo oko ayeke dema ape so aye ni so ayeke kanga lege na lo ti gue nduru na dû ni na ti tï na yâ ni. Andia ti Jéhovah so ayeke na yâ ti Bible ayeke tongana aye so alu na terê ti lege so. Andia ni ayeke bata e si e ngbâ na ndö ti kete lege.—Diko Psaume 119:9, 10, 45, 133.

7. A yeke nzoni amaseka abâ lege so lê ni ayeke kete tongana nyen?

⁷ Amaseka, eskê na ambeni ngoi ala bâ so andia ti Jéhovah akanga lege na ala mingi? Satan aye ti tene ala pensé tongaso. Lo ye ti tene ala zia lê ti ala na ndö ti aye so azo so ayeke tambela na ndö ti lege so lê ni akono ayeke sara, ndali ti so na bango ni gigi anzere na ala. Lo ye ti tene ala pensé so gigi anzere na ala ape tongana amba ti ala ti ekole wala azo so ala yeke bâ ala na ndö ti Internet. Satan aye ti tene ala pensé so andia ti Jéhovah ayeke kanga lege na ala ti sara ye kue so ala peut ti sara ti tene gigi anzere na ala. * Me ala girisa ye so ape: Satan aye pëpe  si azo so ayeke hon na ndö ti lege ti lo ahinga ye so ayeke ku ala na hunzingo ti voyage ni. Me Jéhovah afa polele na ala aye so lo bata ndali ti azo so angbâ ti tambela na ndö ti lege ti fini.—Ps. 37:29; És. 35:5, 6; 65:21-23.

8. Nyen la amaseka apeut ti manda na lege ti tapande ti Olaf?

⁸ Bâ ye so ala peut ti manda na lege ti ye so asi na Olaf, mbeni ita-koli so ayeke maseka. * Amba ti lo ti ekole apusu lo ti sara lango-sioni. Na ngoi so lo tene so aTémoin ti Jéhovah ayeke sara ye alingbi na andia ti Bible na ndö ti nzoni sarango ye, ambeni molenge-wali ti klase ti lo asara kue ti tene lo bungbi na ala. Me Olaf adö sese. Na a ngbâ gï ge ape. Olaf atene: “Aprofesseur ti mbi agi ti pusu mbi ti manda mbeti ayo ndali ti so na pekoni azo ayeke ne mbi. Ala tene na mbi so tongana mbi sara ni ape, mbi yeke ga zo ape.” Nyen la amû maboko na lo ti dö sese? Lo tene: “Mbi gi ti duti na kpengba songo ti  kamarade na aita na yâ ti congrégation. Ala ga tongana afami ti mbi. Mbi komanse nga ti manda Bible nzoni mingi. So mbi manda Bible mingi, mbi hinga encore na bê ti mbi kue so tâ tënë la. A sara si mbi leke na bê ti mbi ti ngbâ ti sara na Jéhovah.”

9. Nyen la a hunda na azo so aye ti ngbâ na ndö ti lege so lê ni ayeke kete ti sara?

⁹ Satan aye ti sara si ala ngbâ na ndö ti lege so ague na fini ape. Lo ye ti tene ala ga na terê ti gbâ ti azo so ayeke na ndö ti lege so lê ni akono “so ayeke gue na futingo”. (Mat. 7:13). Ye oko, e yeke ngbâ na ndö ti lege so lê ni ayeke kete tongana e ngbâ ti mä Jésus nga ti bâ ni tongana ye so ayeke bata e. Zia e bâ fadeso mbeni ye nde so Jésus ahunda na e ti sara.

10. Ti gue oko na Matthieu 5:23, 24, nyen la Jésus ahunda na e ti sara?

¹⁰ Diko Matthieu 5:23, 24. Ge, Jésus ayeke sara tënë na ndö ti mbeni ye so ayeke kota mingi na aJuif so ayeke mä lani lo. Imaginé mbeni zo so ague na temple so ayeke nduru ti mû mbeni nyama ti sandaga na prêtre. Tongana na ngoi ni so zo ni adabe ti lo so ita ti lo ayeke na tënë na terê ti lo, lo doit ti zia sandaga ni kâ na lo “gue”. Ngbanga ti nyen? Nyen la adoit ti duti kota mingi ahon mungo sandaga na Jéhovah? Jésus afa ni polele, lo tene: “Leke tënë na ita ti mo kozoni.”

11. Fa a-effort so Jacob asara ti leke tënë na Ésaü.

¹¹ E peut ti manda akpengba ye na ndö ti dutingo na siriri na azo tongana e gbu li ti e na ndö ti mbeni ye so asi na yâ ti fini ti Jacob. Na peko ti so Jacob ague ayo na ndo so a dü lo dä lo sara angu 20 tongaso, Nzapa ahunda na lo na lege ti mbeni ange ti kiri kâ (Gen. 31:11, 13, 38). Me mbeni kpale ayeke lani dä. Yaya ti lo Ésaü aye lani ti fâ lo (Gen. 27:41). Jacob asara ‘mbeto ngangu nga lo gi bê ti lo mingi’ so peut-être ita ti lo angbâ ti bata ngonzo na terê ti lo (Gen. 32:7). Nyen la Jacob asara ti leke tënë na ita ti lo? Kozo ni, lo sambela Jéhovah na bê ti lo kue na ndö ti tënë ni. Na peko ni, lo tokua gbâ ti acadeau na Ésaü (Gen. 32:9-15). Na nda ni, tongana Jacob atingbi lê na lê na Ésaü, lo mû li ni kozo ti ne lo. Lo kuku na devant ti Ésaü fani oko ape, fani use ape, me fani mbasambala. So Jacob asara terê ti lo kete nga lo ne zo, lo leke tënë na ita ti lo.—Gen. 33:3, 4.

12. Nyen la e manda na lege ti tapande ti Jacob?

¹² E manda mbeni ye na lege ti fason so Jacob aleke terê ti lo ti tingbi na Ésaü nga na fason so lo sara tënë na lo. Jacob asara lani terê ti lo kete lo hunda na Jéhovah ti aidé lo. Na pekoni, lo sara ye alingbi na sambela ti lo na lege so lo sara ye kue so lo peut ti sara ti kiri ti duti na siriri na ita ti lo. Na ngoi so ala wara terê, Jacob agi pëpe ti fa na Ésaü zo wa la ayeke na raison nga zo wa la ayeke na faute. Ye so Jacob aye ayeke ti kiri ti duti na siriri na ita ti lo. Tongana nyen la e peut ti mû tapande ti Jacob?

13-14. Tongana e son bê ti mbeni ita, nyen la a yeke nzoni e sara?

¹³ E so e yeke na ndö ti lege so ague na fini, e ye ti maï siriri na popo ti e na aita ti e (aRom. 12:18). E yeke sara ni tongana nyen na ngoi so e bâ so e son bê ti mbeni ita? Legeoko tongana Jacob, e yeke sambela Jéhovah na bê ti e kue. E peut ti hunda lo ti sara tufa na ndö ti a-effort so e yeke sara ti duti na siriri na ita ti e ni.

 ¹⁴ A yeke nzoni e mû nga ngoi ti gbu li na ndö ti e wani. E peut ti hunda terê ti e na mara ti ahunda so: ‘Eskê mbi yeke nduru ti yeda na faute ti mbi, ti sara terê ti mbi kete ti hunda pardon nga ti leke tënë? Tongana mbi mû li ni ti leke tënë na ita ti mbi, a yeke sara Jéhovah na Jésus tongana nyen?’ Akiringo tënë ti e apeut ti pusu e ti mä Jésus nga ti sara terê ti e kete ti ga nduru na ita ti e ti leke tënë. Tongana e sara tongaso e peut ti mû tapande ti Jacob.

15. Tongana nyen la ti sara ye alingbi na mama-ndia so ayeke na aÉphésien 4:2, 3 apeut ti aidé e ti leke tënë na ita ti e?

¹⁵ Imaginé ye so apeut ti si tongana Jacob asara ye na baba na ngoi so lo tingbi na ita ti lo. Warango terê ti ala ni apeut ti hunzi kirikiri. Na ngoi so e gue ti leke tënë na ita ti e, e bezoin ti sara terê ti e kete. (Diko aÉphésien 4:2, 3.) A-Proverbe 18:19 atene: “Gingo ti dë bê ti ita so mo son bê ti lo ayeke ngangu ahon mungo mbeni gbata so ngangu gbagba ayeke na terê ni; ambeni tënë so ayeke na popo ti azo ayeke tongana abarre na yanga ti ngangu gbagba.” Mbeni ita so bê ti lo ason ayeke tongana “ngangu gbagba” so, me tongana e sara terê ti e kete ti hunda pardon apeut ti aidé lo ti yeda ti leke tënë na e.

16. Mbeni ye nde wa la a yeke nzoni e gbu li ti e na ndö ni? Ngbanga ti nyen?

¹⁶ A yeke nzoni e gbu nga li nzoni na ndö ti tënë so e yeke gue ti tene na ita ti e nga fason so e yeke tene na ni. Tongana e leke terê ti e awe, a yeke nzoni e sara tënë na zo so bê ti lo ason na mbeni lege so apeut ti aidé lo ti kiri ti duti na nzoni songo na e. Na tongo nda ni, lo peut ti tene atënë so anzere na e ape. A yeke ngangu ape ti sara ngonzo wala ti gi ti fa so e yeke na faute ape, me tongana e sara tongaso e yeke leke tënë ni? Ên-ën. Zia e girisa ape so ti duti na siriri na ita ti e ayeke kota mingi ahon ti gi ti fa zo wa la ayeke na raison nga zo wa la ayeke na faute.—1 aCor. 6:7.

17. Tapande ti Gilbert afa na mo nyen?

¹⁷ Ita-koli Gilbert asara kue ti duti na siriri na azo. Lo tene: “Gbâ ti kpale ayeke lani na popo ti mbi na molenge ti mbi ti wali. Na yâ ti ngu use, mbi sara kue ti sara tënë na lo polele nga yeke ti tene songo ti mbi na lo akiri nzoni.” Mbeni ye nde wa la Gilbert asara? Lo tene: “Lakue kozo si e sara tënë ni, mbi yeke  sambela nga mbi dabe ti mbi ti sara ngonzo ape tongana lo tene mbeni tënë na mbi na lege ni ape. Mbi doit ti duti nduru ti pardonné lo. Mbi hinga so a yeke nzoni ape ti fa so mbi la mbi yeke na raison na kua ti mbi ayeke ti sara kue si e kiri e duti na siriri.” Ye ti pekoni ayeke lani nyen? Gilbert atene: “Laso, mbi yeke na siriri ti bê ndali ti so mbi na azo ti sewa ti mbi kue e yeke na nzoni songo.”

18-19. Tongana e son bê ti mbeni zo, nyen la a yeke nzoni e leke na bê ti e ti sara? Ngbanga ti nyen?

¹⁸ Tongana mo bâ so mo son bê ti mbeni ita, nyen la a yeke nzoni mo leke ti sara? Sara ye alingbi na ye so Jésus afa ti leke tënë na ita ti mo. Sambela Jéhovah na ndö ti tënë ni nga zia bê ti mo na yingo vulu ti lo ti aidé mo ti leke tënë ni. Tongana mo sara ni, mo yeke duti na ngia nga mo yeke fa so mo mä Jésus.—Mat. 5:9.

¹⁹ E kiri singila mingi na Jéhovah so na ndoye lo yeke fa lege na e na lege ti Jésus Christ so ayeke “li ti congrégation”. (aÉph. 5:23). Zia e leke na bê ti e ti ngbâ ti “mä lo” tongana ti bazengele Pierre, Jacques na Jean (Mat. 17:5). E bâ aye so e peut ti sara ti leke tënë na mbeni ita so e son bê ti lo. Tongana e sara tongaso nga e ngbâ na ndö ti lege so lê ni ayeke kete so ayeke gue na fini, e yeke wara gbâ ti atufa laso nga e yeke wara ngia so ayeke ngbâ lakue lakue na yâ ti angoi so ayeke ga.