YOMARA na aita ti lo ti koli Marcelo na Hiver ayeke vivre na yâ ti mbeni kete kodro na Guatemala. A-Témoin akomanse lani ti manda Bible na Yomara, na nda ni aita ti lo ni akomanse ti manda ni. Me mbeni kpale ayeke lani dä. Ala ota kue ayeke bâ ndo ape nga ala peut ti diko braille ape. Tongaso, zo so ayeke manda Bible na ala ayeke diko aparagraphe nga na aversê ti ye ti manda ni na ala.

A yeke nga lani ngangu na ala ti gue na abungbi. Ti gue na dä ti Royaume so ayeke nduru na ala asara minute 40, ala peut ti gue ala wani ape. Me aita ti congrégation a-aidé ala ti gue na abungbi kue. Na ngoi so aita ota so akomanse ti sara adevoir na bungbi ti milieu ti yenga, aita a-aidé ala ti bata adevoir ti ala ni na li.

Na mai 2019, a komanse ti sara abungbi ti congrégation na yâ ti kete kodro ti ala. Na ngoi ni so, mbeni couple so ayeke apionnier permanent ague na yâ ti kete kodro ni. Ala hinga ti diko mbeti nga ti sû ni na braille ape me ala leke na bê ti ala ti fa na awamandango Bible so ayeke bâ ndo ape so, tongana nyen ti sara ni. Tongaso ala gue na yâ ti mbeni bibliothèque ala manda ye na ndö ti braille nga tongana nyen ti fa ni na azo.

A sara anze mingi ape, aita ota so ayeke bâ ndo ape so ahinga ti diko braille na amû lege na ala ti duti na kpengba songo na Jéhovah. Fadeso, Yomara, Marcelo na Hiver ayeke apionnier permanent. Marcelo ayeke wakua ti mungo maboko. Yenga oko oko kue, ala yeke na aye mingi ti sara na yâ ti kua ti Jéhovah. So ala yapu mingi na yâ ti kua ti Jéhovah asara si aita nga kue ayapu.

Aita ota so ayeke bâ ndo ape akiri singila na aita ti congrégation so ndoye apusu ala ti mû maboko na ala. Yomara atene: “A komanse na ngoi so ti kozo ni e wara terê na aTémoin, ala fa tâ ndoye ti aChrétien na mbage ti e.” Marcelo atene: “E yeke na anzoni kamarade na yâ ti congrégation ti e nga e yeke na yâ ti sewa ti aita na yâ ti dunia kue so ayeke beoko.” Yomara ayeke ku kungo ngoi so Jéhovah ayeke sara si azendo ti lo aga tâ tënë na yâ ti Paradis.—Ps. 37:10, 11; És. 35:5.