ARTICLE TI MANDANGO NI 6
BIA 18 Singila ndali ti ye so a futa ti zi e
E kiri singila mingi so Jéhovah ayeke pardonné asiokpari ti e
‘Nzapa andoye tâ azo ti dunia so mingi si lo mû gï oko Molenge ti lo ndali ti ala.’—JEAN 3:16.
KOTA TËNË TI ARTICLE NI
E ye ti kiri singila mingi na Jéhovah so ayeke pardonné e. Ti sara ni, e yeke gi ti hinga aye so Jéhovah asara ti pardonné asiokpari ti e.
1-2. Na lege wa la dutingo ti azo ayeke tongana ti maseka-koli so e sara tënë ti lo na paragraphe 1?
IMAGINÉ mbeni maseka-koli so babâ na mama ti lo ayeke na mosoro mingi. Mbeni lâ, mbeni ngangu kpale asi, babâ na mama ti lo akui na yâ ti mbeni accident. Vundu ahon ndö ti lo. Ye oko, mbeni sioni sango ayeke ku lo encore. Lo mä so babâ na mama ti lo adépensé nginza ahon ti so ala yeke lani na ni na ala kui na kota bon na li ti ala. Ala zia na lo mbeni pata ape, me lo doit ti payé abon kue so ayeke lani na li ti ala, na awa ti bon ni aye ti tene lo payé ni hio. Bon ni ayeke mingi na lo peut ti payé ni kue ape.
2 Na yâ ti ambeni ye, dutingo ti e ayeke tongana ti maseka-koli so. Kozo babâ na mama ti e, Adam na Ève, ayeke lani mbilimbili-kue nga ala vivre na yâ ti mbeni pendere paradis (Gen. 1:27; 2:7-9). Ala peut lani ti duti na ngia na yâ ti gigi ti ala teti lakue lakue. Me mo ye ti bâ, ye kue achangé. Ala perdre Paradis so ala yeke na yâ ni nga ala peut ti ngbâ na fini lakue lakue ape. Héritage ti nyen la ala peut lani ti zia na amolenge so ala yeke dü ande? Bible atene: “Na lege ti zo oko [Adam] siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRom. 5:12). Héritage so Adam azia na e ayeke siokpari so aga na kuâ. Siokpari so Adam azia na e na héritage ayeke tongana mbeni kota bon so zo oko na popo ti e apeut ti futa ni ape.—Ps. 49:8.
3. Ngbanga ti nyen la a peut ti haka asiokpari ti e na “bon”?
3 Jésus ahaka asiokpari ti e na “bon”. (Mat. 6:12; Luc 11:4). Tongana e sara siokpari, a yeke mo bâ mo tene bon ti Jéhovah ayeke na li ti e. Jéhovah apeut ti hunda na e ti futa bon ni. Tongana Jéhovah aleke lani mbeni ye ti pardonné asiokpari ti e ape, gï kuâ ti e la ayeke futa bon ni, na e yeke duti na beku ape ti kiri na fini.—aRom. 6:7, 23.
4. (a) Nyen la ayeke si na awasiokpari kue tongana a mû maboko na ala ape? (Psaume 49:7-9). (b) Na yâ ti Bible, tënë “siokpari” aye ti sara tënë ti nyen? (Bâ encadré “ Siokpari.”)
4 Eskê e peut ti kiri ti wara aye kue so Adam na Ève aperdre ni? Gï e wani e peut ape. (Diko Psaume 49:7-9.) Tongana a mû maboko na e ape, beku ti tene e ngbâ na fini na yâ ti angoi so ayeke ga wala ti tene a zingo e na kuâ ayeke duti ande dä ape. Ti tâ tënë ni, kuâ ti e ayeke duti tâ gï tongana ti anyama.—Zo-ti. 3:19; 2 Pi. 2:12.
5. Nyen la Babâ ti e ti ndoye asara ti zi asiokpari ti e? (Bâ couverture.)
5 Kiri mo gbu li na ndö ti maseka-koli so e sara tënë ti lo na tongo nda ti article so. Tongana mbeni zo ti mosoro ayeda ti futa bon kue so ayeke na li ti lo, a yeke sara lo tongana nyen? Kite ayeke dä ape so lo yeke kiri singila mingi na zo ni nga lo yeke yeda ti tene zo ni afuta bon ni. Legeoko nga, Jéhovah, Babâ ti e ti ndoye, amû na e mbeni cadeau so a payé bon ti siokpari so e wara na lege ti Adam. Jésus afa ni na lege ti atënë so: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). Oko cadeau so asara nga si e peut ti duti na nzoni songo na Jéhovah.
Jésus afa lani nzoni tënë na ndö ti pardon so Jéhovah amû grâce na ye so a futa ti zi azo (Jean 3:16). Na pekoni, Jésus ayeda ti mû fini ti lo na sandaga tongaso si Jéhovah afuta ye ti zi azo (Bâ paragraphe 5)
6. Atënë wa la Bible asara kua na ni so e yeke bâ na yâ ti article so? Ngbanga ti nyen?
6 Tongana nyen la e peut ti bâ nzoni na lege ti pendere cadeau so nga ti tene a pardonné siokpari ti e wala a zi “bon” so ayeke na li ti e? Kiringo tënë na hunda so ayeke na yâ ti atënë so Bible asara kua na ni. A yeke atënë tongana ti kiri ti sara songo na Nzapa, zingo siokpari, lekengo songo na popo ti zo na Nzapa, ye so a futa ti zi azo, ye so a mû ni ti sö fini nga na dikongo zo tongana zo ti mbilimbili. Na yâ ti article so, e yeke bâ nda ti atënë so oko oko kue. Tongana e gbu li na ndö ti nda ti atënë so, e yeke bâ na nene ni mingi ye so Jéhovah asara ti pardonné e.
JÉHOVAH AYE SI E KIRI E SARA SONGO NA LO
7. (a) Mbeni ye nde wa la Adam na Ève aperdre ni? (b) So e yeke ahale ti Adam na Ève, nyen la e bezoin ni mingi? (aRomain 5:10, 11).
7 Adam na Ève aperdre lani beku ti ngbâ na fini lakue lakue, ala perdre nga pendere songo so ala yeke na ni lani na Jéhovah, Babâ ti ala. Kozo si Adam na Ève asara siokpari, ala yeke lani na yâ ti sewa ti Nzapa (Luc 3:38). Me na ngoi so ala ke yanga ti Jéhovah, a tomba ala na yâ ti sewa ni kozo si ala komanse ti dü amolenge (Gen. 3:23, 24; 4:1). So e yeke ahale ti ala, e bezoin ti kiri ti sara songo na Jéhovah. (Diko aRomain 5:10, 11.) So ti tene, e bezoin ti gi ti duti na nzoni songo na lo. Mbeni mbeti atene so tënë ti Grec so a kiri peko ni na tënë “ti kiri ti sara songo” aye nga ti tene ti “sara si mbeni wato aga kamarade.” Li ti e akpe so Jéhovah la amû li ni ti sara ni. Na lege wa?
JÉHOVAH ALEKE TI ZI ASIOKPARI TI E
8. Nyen la a iri ni (a) zingo siokpari? (b) lekengo songo na popo ti zo na Nzapa?
8 Zingo siokpari ti azo ayeke ye so Jéhovah aleke ti tene awasiokpari akiri aduti na nzoni songo na lo. So aye ti tene ti mû mbeni ye na place ti mbeni so ngere ni alingbi terê. So lo sara tongaso, ye so a perdre ni a peut ti wara ni wala a peut ti zia mbeni ye na place ti ye so a futi ni. Mbeti ti Nzapa so aChrétien asû ândö na Grec asara kua na tënë lekengo songo na popo ti zo na Nzapa so ndani ague oko na tënë “zingo siokpari”. (aRom. 3:25). Lekengo songo na popo ti zo na Nzapa ayeke ye so amû lege na zo ti duti na siriri nga na nzoni songo na Nzapa.
9. Nyen la Jéhovah asara ti tene na lege ni lo peut ti pardonné asiokpari ti azo ti Israël?
9 Jéhovah asara mbeni ye so na lege ni lo yeke pardonné asiokpari ti azo ti Israël nga ti mû lege na ala ti duti na nzoni songo na lo. Azo ti Israël adoit ti sara lani mbeni matanga so ayeke nde lango oko na yâ ti ngu oko oko. A iri ni Lango ti zingo siokpari. Na lango ni so, kota prêtre ayeke mû sandaga ti anyama ndali ti azo ni. Ti vrai ni, sandaga ti anyama apeut ti zi asiokpari ti azo biani biani ape ndali ti so azo ayeke kota ahon anyama. Me tongana azo ti Israël so achangé bê ti ala amû na Jéhovah asandaga so lo hunda, lo yeke lani nduru ti pardonné asiokpari ti ala (aHéb. 10:1-4). Asandaga so azo ti Israël ayeke mû lani na Lango ti zingo siokpari nga na ambeni lango nde a-aidé ala ti hinga so ala yeke awasiokpari nga so ala bezoin mbeni ye nde ti kanga ndö ti asiokpari ti ala biani biani.
10. Nyen la Jéhovah aleke ti tene na lege ni lo pardonné asiokpari biani biani?
10 Jéhovah aleke mbeni ye so na lege ni lo yeke pardonné asiokpari biani biani. Lo leke lani ti mû Molenge ti lo so lo ye lo mingi “na sandaga gï fani oko biani biani awe ti yô asiokpari ti azo mingi”. (aHéb. 9:28). Jésus amû lani “fini ti lo tongana ye so a futa ti zi azo mingi.” (Mat. 20:28). Ye so a futa ti zi azo ayeke nyen?
YE SO A FUTA TI ZI AZO
11. (a) Ti Bible, ye so a futa ti zi azo ayeke nyen? (b) Gï zo wa la apeut ti futa ye ti zi azo?
11 Ti Bible, ye so a futa ti zi azo ayeke ngere so a futa ti zi siokpari ti azo nga amû lege na azo ti kiri ti lë songo na Nzapa. a Na lê ti Jéhovah, a mû lege ti kiri ti wara ye so a perdre ni lani. Na lege wa? Girisa ape so Adam na Ève aperdre lani fini so ayeke mbilimbili-kue nga na beku ti ngbâ na fini lakue lakue. Tongaso, ye so a futa ti zi azo adoit ti lingbi na ngere ti ye so a perdre ni lani (1 Tim. 2:6). Zo so apeut ti futa ni ayeke gï mbeni koli so (1) ayeke mbilimbili-kue; (2) apeut ti ngbâ na fini lakue lakue na ndö ti sese nga (3) ayeke nduru ti mû fini ti lo na sandaga ndali ti e. A yeke gï tongaso la fini ti zo ni apeut ti mû place ti fini so a perdre ni lani wala ti zi siokpari ti azo.
12. Ngbanga ti nyen la Jésus apeut lani ti mû ye so a futa ti zi azo?
12 Bâ araison ota so ndali ni Jésus apeut lani ti futa ye ti zi azo. (1) Lo yeke lani mbilimbili-kue, “lo sara siokpari oko pëpe”. (1 Pi. 2:22). (2) Lo peut lani ti ngbâ na fini lakue lakue na ndö ti sese. (3) Lo yeke lani nduru ti kui nga ti mû fini ni so ndali ti e (aHéb. 10:9, 10). So Jésus ayeke mbilimbili-kue, lo na kozo koli Adam alingbi terê kozo si Adam asara siokpari (1 aCor. 15:45). Tongaso, na lege ti kuâ ti Jésus, lo wara lege ti zi siokpari so Adam aga na ni na ndö ti e, so ti tene ti kiri na place ni ye so Adam aperdre ni lani (aRom. 5:19). Tongaso Jésus aga “ndangba Adam”. Bezoin ayeke dä encore ape ti tene mbeni zo so ayeke mbilimbili-kue aga afuta ye ndali ti ye so Adam aperdre ni lani. Jésus akui “gï fani oko biani biani awe”.—aHéb. 7:27; 10:12.
13. Kangbi wa la ayeke na popo ti zingo siokpari ti zo nga na ye so a futa ti zi azo?
13 Tongaso, kangbi wa la ayeke na popo ti zingo siokpari ti zo nga na ye so a futa ti zi azo? Zingo siokpari ayeke ye so Nzapa asara ti tene azo akiri aduti na nzoni songo na lo. Ye so a futa ti zi azo ayeke ngere so a futa so asara si a peut ti zi siokpari ti azo. Mênë ti Jésus so atuku ndali ti e la ayeke ngere ni so.—aÉph. 1:7; aHéb. 9:14.
YE SO A FUTA ASÖ FINI NGA ASARA SI A DIKO E AZO TI MBILIMBILI
14. Nyen la e yeke bâ fadeso? Ngbanga ti nyen?
14 Ye so Jéhovah asara ndali ti e aga na e anzoni ye wa? Ti kiri tënë na hunda so, e yeke bâ nda ti atënë use so Bible asara kua na ni so a-aidé e ti comprendre anzoni ye so e yeke wara tongana Jéhovah apardonné e.
15-16. (a) Na yâ ti Bible, tënë “ye so a mû ni ti sö fini” aye ti sara tënë ti nyen? (b) So a zi e na gbe ti siokpari nga na kuâ asara e tongana nyen?
15 Na yâ ti Bible, ye so a mû ni ti sö fini aye ti sara tënë ti zingo zo wala zingo tënë na li ti zo, so ayeke ye ti peko ti ye so a futa ti zi azo. Bazengele Pierre afa ni na lege ti tënë so: “Ala hinga so a yeke pëpe na aye so ayeke buba bubango, argent wala lor, si a zi ala na yâ ti sarango ye ti ala so ayeke senge senge so ala mû na peko ti akotara ti ala. Me a zi ala na lege ti mênë so ngere ni ayeke kota mingi, mênë so ayeke tongana ti mbeni molenge ti taba so sioni wala saleté oko ayeke na terê ti lo pëpe, so ti tene mênë ti Christ.”—1 Pi. 1:18, 19.
16 Grâce na ye so a futa ti zi azo, a peut ti zi e na gbe ti siokpari nga na kuâ so asara e pasi mingi (aRom. 5:21). E kiri singila mingi na Jéhovah na Jésus so asö e na lege ti ngangu ngere ti mênë ti Jésus.—1 aCor. 15:22.
17-18. (a) Dikongo zo tongana zo ti mbilimbili aye ti tene nyen? (b) So Jéhovah adiko e azo ti mbilimbili asara e tongana nyen?
17 Bible atene so Jéhovah adiko awakua ti lo azo ti mbilimbili. Ye so aye ti tene so lo hunda na e ape ti futa mbeni ye ndali ti asiokpari so e sara. So Jéhovah asara tongaso, lo gue nde ape na andia ti lo na ndö ti ye so ayeke mbilimbili. Lo diko e azo ti mbilimbili, pëpe ndali ti so e lingbi na ni na lo kanga nga lê na ndö ti asiokpari ti e ape. Me lo yeke nduru ti pardonné asiokpari ti e ndali ti so e mä na bê na ye so lo na Jésus asara ti mû ye so a futa ti zi azo.—aRom. 3:24; aGal. 2:16.
18 Ye so aye ti tene nyen ndali ti e oko oko kue? Ala so a soro ala ti komande legeoko na Jésus na yayu, a diko ala awe azo ti mbilimbili nga ala ga amolenge ti Nzapa (Tite 3:7; 1 Jean 3:1). Nzapa apardonné asiokpari ti ala awe. A yeke mo bâ mo tene ala sara siokpari lâ oko ape, tongaso ala lingbi ti duti na yâ ti Royaume ni (aRom. 8:1, 2, 30). Azo so ayeke na beku ti duti na fini na ndö ti sese, a diko ala azo ti mbilimbili na ala ga akamarade ti Nzapa nga lo pardonné asiokpari ti ala (Jacq. 2:21-23). Azo mingi mingi so ayeke sö kuâ na Harmaguédon ayeke na beku ti kui ape (Jean 11:26). A yeke zingo ande na kuâ “azo ti mbilimbili” na “azo so ayeke mbilimbili pëpe.” (Kus. 24:15; Jean 5:28, 29). Na nda ni, awakua ti Jéhovah kue so amä yanga ti lo so ayeke na sese ayeke “wara liberté ti gloire ti amolenge ti Nzapa.” (aRom. 8:21). E yeke ku kungo ngoi so e peut ti kiri ti duti na kpengba songo na Babâ ti e Jéhovah.
19. Tongana nyen la dutingo ti e aga nzoni mingi ndali ti ye so Jéhovah na Jésus asara ndali ti e? (Bâ nga encadré “ A ye ti tene nyen ndali ti e?”)
19 Tâ tënë, dutingo ti e ayeke lani tongana ti maseka-koli so e sara tënë ti lo na tongo nda ni, so aperdre ye kue nga so ayeke na mbeni kota bon, so lo peut ti payé ni lâ oko ape. Me Jéhovah a-aidé e. Dutingo ti e achangé ndali ti ye so a leke so na lege ni a zi asiokpari ti e nga na ye so a futa ti zi azo. Mabe so e yeke na ni na Jésus Christ amû lege ti sö e wala ti zi e na gbe ti siokpari nga na kuâ. Tongana Jéhovah apardonné asiokpari ti e, a yeke mo bâ mo tene e sara ni lâ oko ape. Me, ye so ayeke kota mingi ayeke so e peut fadeso ti duti na nzoni songo na Jéhovah, Babâ ti e ti yayu, so aye e.
20. Nyen la e yeke bâ na yâ ti article ti peko?
20 Tongana e gbu li na ndö ti ye so Jéhovah na Jésus asara ndali ti e, e yeke kiri singila mingi na ala (2 aCor. 5:15). Tongana fade ala mû maboko na e ape, e yeke duti na beku oko ape. Me tongana Jéhovah apardonné e, anzoni ye wa la e yeke wara na pekoni? A yeke ye so e yeke sara tënë na ndö ni na yâ ti article ti peko.
BIA 10 Sepela Jéhovah, Nzapa ti e!
a Na ambeni yanga ti kodro, a kiri na peko ti tënë “ye so a futa ti zi azo” na tënë “ngere ti fini” wala “ye so a futa.”
