ESKÊ mo bâ so mingi ti azo laso aye ti tene a sara ye na ala na mbeni lege so ayeke nde nga ala yeke na droit ti wara ambeni ye so amba ti ala awara ape? Atâa nyen la ala wara, ala bâ so ala lingbi ti wara encore ambeni ye. Azo so apensé tongaso ayeke azo ti kion nga ala kiri singila ape ndali ti aye so ala yeke na ni. Bible atene na lâ ti nda ni azo ayeke sara ye tongaso.—2 Tim. 3:2.

Ti vrai ni, mara ti pensé so ayeke fini ye ape. Adam na Ève asoro lani ti tene ala wani la afa ye so ayeke nzoni na ye so ayeke sioni, na ye ti peko ni ayeke sioni mingi. Angu ngbangbo mingi na pekoni, Ozias so ayeke gbia ti Juda apensé lani so lo yeke na droit ti zö dukane na temple, me lo yeke lani na droit ti sara ni ape (2 Chron. 26:​18, 19). Legeoko nga, aFarizien na aSadducéen abâ lani so Nzapa adoit ti sara ye na ala nde na tanga ti azo ndali ti so ala yeke ahale ti Abraham.—Mat. 3:9.

E yeke vivre na popo ti azo ti kion nga sarango ye ti ala apeut ti pusu e ti sara ye tongana ala (aGal. 5:26). E peut ti komanse ti pensé so e lingbi ti wara mbeni pasa so ayeke nde wala a doit ti sara ye na e na mbeni fason so ayeke nde. Nyen la apeut ti aidé e ti pensé tongaso ape? E bezoin ti hinga pensé ti Jéhovah na ndö ti mara ti apensé tongaso. Amama-ndia use ti Bible apeut ti aidé e.

Jéhovah la ayeke fa ye so e lingbi ti wara ni. Zia e bâ ambeni tapande ni.

•   Na yâ ti sewa, Jéhovah aye ti tene koli abâ so wali ti lo ane lo nga wali abâ so koli ti lo aye lo (aÉph. 5:33). Jéhovah atene so gï azo so asara mariage la apeut ti sara na mba ye so koli na wali ayeke sara ti fa so ala ye terê (1 aCor. 7:3). A yeke na lege ni ti tene amolenge amä yanga ti ababâ na amama ti ala nga a yeke nzoni ababâ na amama andoye amolenge ti ala nga ala bâ lege ti ala.—2 aCor. 12:14; aÉph. 6:2.

• Na yâ ti congrégation, a yeke nzoni e ne a-ancien ndali ti so ala yeke sara kua ngangu (1 aThes. 5:12). Me ala yeke na droit ti lë gbia na ndö ti aita ape.—1 Pi. 5:​2, 3.

• Nzapa amû na agouvernement droit ti tene a futa na ala a-impôt nga ti tene azo so ala yeke komande na ndö ti ala ane ala.—aRom. 13:​1, 6, 7. 

Na ndoye, Jéhovah amû na e aye mingi ahon ti so e lingbi na ni. So siokpari ayeke na terê ti e, e lingbi gï na kuâ (aRom. 6:23). Me tâ ndoye ti Jéhovah apusu lo ti mû na e aye mingi (Ps. 103:​10, 11). Anzoni ye wala pasa kue so e wara na mbage ti lo ayeke grâce na kota nzobe ti lo.—aRom. 12:​6-8; aÉph. 2:8.

Sara hange na bango ndo ti azo ti dunia so. Sân ti hinga, e peut ti komanse ti pensé so e lingbi na aye mingi ahon amba ti e. Jésus afa lani so a peut ti duti ngangu ape ti wara mara ti pensé so na lege ti toli ti lo na ndö ti azo ti kua so a futa ala na denier oko. Ambeni akomanse kua ni hio na ndapre na ala sara kua ni na yâ ti lango ni kue na gbe ti ngangu sungo ti lâ, ti ambeni ala sara kua ni gï l’heure oko. Kozo groupe ni apensé so a yeke futa ala ahon amba ti ala ndali ti kua so ala sara (Mat. 20:​1-16). Jésus amû toli so ti fa so a yeke nzoni adisciple ti lo aduti na ngia na ye so anzere na Nzapa ti mû na ala.

Duti zo so akiri singila me hunda ye hundango ape (1 aThes. 5:18). Sara ye tongana bazengele Paul so ahunda pëpe na aita ti Corinthe ti mû na lo aye so lo bezoin ni atâa so lo yeke lani na droit ti hunda ni (1 aCor. 9:​11-14). A yeke nzoni e kiri singila na azo ndali ti ye kue so ala mû na e, na e hunda ye hundango ape.

Sara terê ti mo kete. Tongana mbeni zo abâ terê ti lo kota mingi, lo yeke komanse ti bâ so  lo yeke na droit ti wara ye mingi ahon ti so lo yeke na ni. Sarango terê kete ayeke yorö ti mara ti sioni pensé so.

Prophète Daniel ayeke nzoni tapande ti zo so asara terê ti lo kete. Lo londo na yâ ti sewa ti akota zo, lo yeke pendere, lo hinga ndo mingi nga lo yeke na akode. Tongaso, lo peut lani ti bâ so, so a sara ye na lo nde nga pasa so lo yeke na ni lo lingbi na ni (Dan. 1:​3, 4, 19, 20). Me Daniel angbâ lani ti sara terê ti lo kete na asara si Jéhovah abâ lo na nene ni mingi.—Dan. 2:30; 10:​11, 12.

Zia e sara ye nde na azo ti dunia so, e pensé ape so e yeke kota ahon amba ti e. Me zia e ngbâ ti duti na ngia na anzoni ye kue so Jéhovah amû na e grâce na kota nzobe ti lo.