1-2. (a) Ngbanga ti nyen la a dö bê ti e ape so Jésus afa na e ti dabe ti e na kuâ ti lo na mbeni fason so ayeke simple? (b) Asarango ye ti Jésus wa la e yeke sara tënë na ndö ni?

MO LINGBI ti fa ye so a yeke sara ka ngu oko oko na ngoi ti Dango bê na kuâ ti Christ? Kite ayeke dä ape so mingi ti e alingbi ti dabe na aye so a yeke sara na ngoi ti Kobe ti Seigneur. Ngbanga ti nyen? Ngbanga ti so kobe ni ayeke simple mingi. Me a yeke mbeni kota ye. Tongaso, e lingbi ti hunda terê ti e: ‘Ngbanga ti nyen la kobe so ayeke simple mingi tongaso so?’

² Na ngoi ti fango tënë ti Jésus na sese, a hinga lani lo tongana zo so afa akota tâ tënë na mbeni lege so ayeke simple, so ayeke polele nga so ayeke ngangu ape ti tene zo amä yâ ni (Mat. 7:​28, 29). Legeoko nga, lo fa na e tongana nyen ti dabe ti e na * kuâ ti lo na mbeni fason so ayeke simple me so ayeke kota mingi. Zia e gbu li nzoni na ndö ti kobe ti Dango bê na kuâ ti Christ nga na ambeni ye so Jésus atene nga lo sara lani. E yeke hinga mbilimbili tongana nyen la Jésus asara terê ti lo kete, lo sara ye na mbeto ape nga lo ndoye azo. E yeke bâ nga tongana nyen la e lingbi ti mû tapande ti lo nzoni mingi.

3. Tongana ti so a fa na Matthieu 26:26-28, tongana nyen la aye use so Jésus asara kua na ni ti zia na sese Dango bê na kuâ ti lo ayeke simple? Aye use so ayeke fä ti nyen?

³ Jésus azia lani na sese Dango bê na kuâ ti lo na ngoi so abazengele ti lo 11 so ayeke be-ta-zo ayeke dä. Lo mû lani tanga ti kobe so angbâ na peko ti kobe ti Pâque na lo sara na dango bê so ayeke simple. (Diko Matthieu 26:​26-28.) Lo sara lani kua gï na mapa so levure ayeke dä ape nga na vin so ayeke lani dä. Jésus atene lani na abazengele ti lo so aye so use so aye ti sara tënë ti terê ti lo nga na mênë ti lo so ayeke mbilimbili-kue, so lo ga nduru ti mû ni ndali ti ala. Peut-être li ti abazengele akpe ape so fason so fini ye so, so ayeke kota mingi, so Jésus azia na sese so ayeke simple. Ngbanga ti nyen?

4. Tongana nyen la wango so Jésus amû lani na Marthe amû maboko na e ti hinga ndani so Jésus asara kue ti tene kobe ti Dango bê na kuâ ti lo aduti simple?

⁴ Gbu li na ndö ti aye so asi ambeni nze na tongo nda ti ota ngu ti kua ti fango tënë ti Jésus, na ngoi so lo gue na ndo ti akota kamarade ti lo: Lazare, Marthe nga na Marie. Na ngoi so ala yeke sara lisoro, Jésus akomanse ti fa ye. Marthe ayeke lani dä, me li ti lo ayeke lani gï na ndö ti tongo gbâ ti kobe ndali ti gene ti lo so a ne lo mingi. So Jésus abâ ni, na nzoni bê lo kiri na Marthe na nzoni lege, na lege so lo mû maboko na lo ti bâ so a yeke lakue kota ye ape ti tö gbâ ti kobe (Luc 10:​40-42). Ambeni ngoi na pekoni, na ngoi so a ngbâ na Jésus angbonga mingi ape ti mû fini ti lo na sandaga, lo sara ye alingbi na wango so lo wani lo mû. Lo sara kue ti tene kobe ti Dango bê na kuâ ti lo aduti simple. Ye so afa na e nyen na ndö ti Jésus?

5. So kobe so ayeke simple so afa nyen na ndö ti Jésus? Tongana nyen la a gue oko na aPhilippien 2:5-8?

⁵ Na yâ ti aye kue so Jésus atene nga lo sara lani, lo sara terê ti lo kete. Tongaso, li ti e akpe ape so lo sara terê ti lo kete mingi na ndangba bï ti lo na ndö ti sese (Mat. 11:​29). Lo hinga lani so lo ga nduru ti mû mbeni sandaga so ayeke kota mingi na yâ ti mbaï ti azo nga so Jéhovah ayeke zingo lo ti duti mbeni gbia na yayu. Atâa so kue, lo gboto lê lani senge senge na ndö ti lo ape, na lege so lo hunda ape ti tene a sara gbâ ti aye ti dabe na kuâ ti lo. Me lo tene na adisciple ti lo so a lingbi ala dabe ti ala na kuâ ti lo fani oko na yâ ti ngu oko oko na lege ti mbeni kobe so ayeke simple (Jean 13:​15; 1 aCor. 11:​23-25). Kobe so ayeke simple me so alingbi na ni so afa so Jésus ayeke zo ti baba ape. E lingbi ti duti na ngia so mbeni sarango ye ti Gbia ti e ti yayu so a hinga lo na ni ayeke sarango terê kete.​—Diko aPhilippien 2:​5-⁠8.

6. Tongana nyen la e lingbi ti sara terê ti e kete tongana Jésus na ngoi so e yeke na yâ ti atara?

⁶ Tongana nyen la e lingbi ti sara ye tongana Jésus so asara terê ti lo kete? Tongana e zia aye so agbu bê ti amba ti e kozo na ti e (aPhil. 2:​3, 4). Dabe ti mo na ndangba bï ti fini ti Jésus lani na sese. Lo hinga lani so na yâ ti kete ngoi lo yeke kui mbeni kuâ so ason mingi; me lo pensé mingi na abazengele ti lo so ayeke be-ta-zo, so na yâ ti kete ngoi vundu ayeke sara ala ndali ti lo. Tongaso, lo mû tanga ti bï ti lo ti fa ye na ala, ti kpengba ala nga ti dë bê ti ala (Jean 14:​25-31). Jésus asara terê ti lo kete lo fa so lo pensé mingi na nzoni ti amba ti lo ahon ti lo wani. So tâ nzoni tapande la lo zia na e so!

7. Tongana nyen la Jésus afa lani so lo sara ye na mbeto oko ape na peko ti so lo zia na sese Kobe ti Seigneur?

⁷ Gï na peko ti so Jésus azia na sese Kobe ti Seigneur, lo fa so lo sara ye na mbeto oko ape. Na lege wa? Jésus aye lani dä na ye so Babâ ti lo aye ti tene lo sara, atâa so lo hinga so ti sara ni a yeke fâ ande lo ndali ti mbeni tënë ti kamene so a bi na li ti lo a tene lo zonga Nzapa (Mat. 26:​65, 66; Luc 22:​41, 42). Jésus aduti lani be-ta-zo na mbeni lege so ayeke mbilimbili-kue ti mû gloire na iri ti Jéhovah, ti mû mbage ti koma­ndema ti Nzapa nga ti zi lege ti fini ti lakue lakue na azo so achangé bê ti ala. Lo leke nga ­adisciple ti lo ndali ti ye so ayeke si na ala na yâ ti kete ngoi.

8. (a) Jésus atene lani nyen na abazengele ti lo so ayeke be-ta-zo? (b) Na yâ ti angu so aga na peko ti kuâ ti Jésus, tongana nyen la adisciple ti lo asara ye na mbeto ape tongana lo?

⁸ Jésus afa nga lani so lo sara ye na mbeto ape na lege so lo zia pëpe pensé ti lo na ndö ti agingo bê so peut-être lo yeke lani na ni nga so lo zia li ti lo na ndö ti abezoin ti abazengele ti lo so ayeke be-ta-zo. Kobe so ayeke simple, so Jésus azia na sese na peko ti so lo tomba Judas, ayeke dabe ti adisciple ti lo so a soro ala ti gue na yayu na anzoni ye ti peko ti mênë ti Jésus so atuku nga na fini mbele so ala yeke na yâ ni (1 aCor. 10:​16, 17). Ti mû maboko na ala ti ngbâ be-ta-zo nga ti duti na terê ti Jésus na yayu, lo fa na ala ye so lo na Babâ ti lo aye ti tene ala sara (Jean 15:​12-15). Jésus atene nga na abazengele ti lo tënë ti atara so ayeke si ande na ala. Na pekoni, lo wa ala ti mû tapande ti lo, lo tene: “Ala gbu ngangu!” (Jean 16:​1-4a, 33). Angu mingi na pekoni, adisciple ti Jésus apensé gï na ala wani ape nga ala sara ye na mbeto ape tongana lo. Atâa so a lingbi ala bâ pasi, ala mû maboko na mba na yâ ti atara nde nde so ala wara.​—aHéb. 10:​33, 34.

9. Tongana nyen la e lingbi ti sara ye na mbeto ape tongana Jésus?

⁹ Legeoko nga laso, e yeke mû tapande ti Jésus ti sara ye na mbeto ape. Na tapande, a lingbi e sara ye na mbeto ape ti mû maboko na aita ti e so a sara ye ti ngangu na ala ndali ti mabe ti ala. Na ambeni ngoi, a lingbi ti kanga aita ti e senge senge. Tongana a si tongaso, a lingbi e sara ye kue so e lingbi ti sara ndali ti ala, mbeni ye so e lingbi ti sara ayeke ti gbu koko ti ala (aPhil. 1:​14; aHéb. 13:​19). Mbeni lege so e yeke fa so e sara ye na mbeto ape ayeke ti ngbâ ti fa tënë na “mbeto pëpe”. (Kus. 14:⁠3). Legeoko tongana Jésus, e leke na bê ti e ti ngbâ ti fa tënë ti Royaume atâa so azo alingbi ti ke e wala ti sara ye ti ngangu na e. Me na ambeni ngoi mbeto alingbi ti sara e. Nyen la e lingbi ti sara?

10. Na yâ ti ayenga so aga kozo na Dango bê na kuâ ti Christ, nyen la a lingbi e sara? Ngbanga ti nyen?

¹⁰ E lingbi ti sara ye na mbeto ape ahon ti kozo na lege so e gbu li na ndö ti beku so e yeke na ni grâce na sandaga so Christ amû ti zi e (Jean 3:​16; aÉph. 1:⁠7). Na yâ ti ayenga so aga kozo na Dango bê na kuâ ti Christ, e lingbi ti kiri singila mingi ndali ti ye so a futa ti zi azo. Na ngoi ni so, sara kue ti diko aversê so a yeke diko ni ndali ti Dango bê na kuâ ti Christ nga gbu li na ndö ti aye so ague juska na kuâ ti Jésus nga sambela Jéhovah ti bâ aye ni na nene ni. Na pekoni, na ngoi so e bungbi oko ndali ti Kobe ti Seigneur, e yeke hinga nzoni mingi nda ti mapa na vin ti Dango bê na kuâ ti Christ nga nda ti sandaga so ayeke nde mingi, so mapa na vin ni aduti fä ni. Tongana e hinga nda ti ye so Jésus na Jéhovah asara ndali ti e nga e hinga aye ti nzoni so e na azo so e ye ala mingi e yeke wara na pekoni, beku ti e ayeke kpengba ahon ti kozo, nga ayeke pusu e ti gbu ngangu na mbeto pëpe juska na nda ni.​—aHéb. 12:⁠3.

11-12. Juska ti si ge, nyen la e manda?

¹¹ Juska ti si ge, e manda so Kobe ti Seigneur adabe ti e na ye so a futa ti zi azo, so ayeke kota mingi, nga adabe ti e na sarango terê kete nga na sarango ye na mbeto pëpe so a hinga Jésus na ni. E kiri singila mingi so Jésus, so ayeke Kota ­prêtre ti e na yayu, so ayeke hunda ye ndali ti e, angbâ ti duti na asarango ye so (aHéb. 7:​24, 25). Ti fa singila ti bê ti e, a lingbi e sara lakue Dango bê na kuâ ti Jésus tâ gï tongana ti so lo hunda (Luc 22:​19, 20). E yeke sara ni na lango so ague oko na lango ti 14 Nisan, lango so ayeke kota mingi na yâ ti ngu ni.

¹² Na lege ti Kobe ti Seigneur so ayeke simple, e lingbi ti manda ye na ndö ti mbeni sarango ye nde so apusu lani Jésus ti kui ndali ti e. Na ngoi so lo yeke lani na sese, a hinga lo na sarango ye ni so. A yeke ye wa?

13. Tongana nyen la Jean 15:9 nga na 1 Jean 4:8-10 afa ndoye so Jéhovah na Jésus afa? Azo wa la awara aye ti nzoni na lege ti ndoye ti ala?

¹³ Na yâ ti aye kue so Jésus asara lani, lo fa mbilimbili-kue kota ndoye ti Jéhovah na mbage ti e. (Diko Jean 15:9; 1 Jean 4:​8-10.) Ye so ayeke kota mingi ayeke so, Jésus ayeda na bê ti lo wani ti mû fini ti lo ndali ti e. Atâa a soro e ti gue na yayu wala e yeke ti “ambeni taba”, e wara aye ti nzoni na lege ti ndoye so Jéhovah na Molenge ti lo afa na mbage ti e na lege ti sandaga so (Jean 10:​16; 1 Jean 2:⁠2). Gbu li nga na ndö ti aye so asara na kobe ti Dango bê na kuâ ti Christ; aye ni afa so Jésus andoye adisciple ti lo nga lo bâ ala na nene ni. Na lege wa?

14. Na lege wa la Jésus afa lani so lo ndoye adisciple ti lo?

¹⁴ Jésus afa so lo ndoye adisciple ti lo so a soro ala ti gue na yayu na lege so lo zia na sese mbeni kobe, mbeni kobe so ayeke simple ti tene ala sara ni. Tongana ngoi ayeke hon, adisciple so a soro ala ti gue na yayu so abezoin lani ti sara Dango bê na kuâ ti Christ ngu oko oko, ala sara ni na yâ ti angoi nde nde, même na da ti kanga (Apoc. 2:​10). Eskê ala mä lani yanga ti Jésus? En, ala mä yanga ti lo.

15-16. Tongana nyen la ambeni ita awara lege ti sara Dango bê na kuâ ti Christ atâa na ngoi ti aye ti ngangu?

¹⁵ Ti londo na ngoi ti akozo Chrétien juska na ngoi ti e, atâ Chrétien asara ngangu ti dabe na kuâ ti Jésus. Ala sara kue ti mû peko ti aye so Jésus afa ndali ti Kobe ti Seigneur, na ambeni ngoi ala sara ni na ngoi ti aye ti ngangu. Bâ atapande so. Na ngoi so Ita Harold King ayeke lani gï lo oko na yâ ti kubu ti da ti kanga na Chine, lo doit lani ti sara kue ti sara Dango bê na kuâ ti Christ. Lo sara lani kua na aye so lo yeke na ni ti sara na mapa na vin ti Dango bê na kuâ ti Christ. Lo gi nga nzoni lani ti hinga lango so Dango bê na kuâ ti Christ ayeke tï na ni. Na ngoi so lango ti dango bê ni alingbi, lo oko na yâ ti kubu ti da ti kanga ti lo, lo he bia, lo sambela nga lo mû mbeni diskur.

¹⁶ Bâ mbeni tapande ni nde. Mbeni groupe ti aita-wali so a kanga ala na yâ ti mbeni camp ti sarango pasi na azo na ngoi ti Use bira so amû sese kue azia lani fini ti ala na lê ti kuâ ti sara Dango bê na kuâ ti Christ. Ye oko, ala wara lege ti sara ni na hondengo ni ndali ti so aye so a sara na kobe ni ayeke simple mingi. Ala tene: “E luti lani na nduzu na cercle nduru na mba, na milieu ti e a yeke wara mbeni kete table ti ziango gere na ndö ni so a bi vuru bongo dä na mapa na vin ni ayeke na ndö ni. Mbeni wâ ti bougie ayeke za na yâ ti chambre ni, ndali ti so wâ ti courant alingbi ti sara si azo ahinga ye so e yeke sara. . . . E kiri e fa na Babâ ti e zendo so e mû na bê ti e kue ti sara kua na ngangu ti e kue ti gbu koko ti iri ti lo so ayeke nzoni-kue.” So tâ kpengba mabe! Nga Jésus asara ye na ndoye mingi so lo sara si e lingbi ti sara Dango bê na kuâ ti lo même na ngoi ti aye ti ngangu.

17. Ahundango ndo wa la e lingbi ti hunda terê ti e na ni?

¹⁷ Na ngoi so Dango bê na kuâ ti Christ ayeke pusu nduru, a yeke nzoni e hunda terê ti e na ahundango ndo so: ‘Tongana nyen la mbi lingbi ti mû tapande ti Jésus nzoni ti ndoye azo mingi? Eskê mbi pensé mingi na abezoin ti amba ti mbi aChrétien ahon abezoin ti mbi wani? Eskê mbi ku na mbage ti aita ti mbi ti tene ala sara aye mingi ahon ti so ala lingbi ti sara, wala mbi hinga so ala lingbi ti sara aye kue ape?’ Zia e sara ye lakue tongana Jésus nga e fa so ‘e hinga ti zia terê ti e na place ti mba ti e’.​—1 Pi. 3:⁠8.

18-19. (a) Nyen la e lingbi ti hinga na bê ti e kue? (b) Nyen la mo leke na bê ti mo ti ngbâ ti sara?

¹⁸ E yeke ngbâ ande lakue ti sara Dango bê na kuâ ti Christ so a hunda na e ti sara ni so ape. Tongana Jésus ‘aga’ ande na ngoi ti kota ye ti vundu, lo yeke bungbi tanga ti “azo ti lo so a soro ala” ti gue na yayu, na a yeke sara Dango bê na kuâ ti Christ encore ape.​—1 aCor. 11:​26; Mat. 24:⁠31.

¹⁹ Même na ngoi so a yeke sara ande Dango bê na kuâ ti Christ encore ape, e lingbi ti hinga na bê ti e kue so a yeke nzere ande na awakua ti Jéhovah mingi ti dabe na kobe so ayeke simple so tongana fä ti sarango terê kete, ti sarango ye na mbeto ape nga ti ndoye so ayeke kota mingi so mbeni zo afa lakue. Na ngoi ni so, kite ayeke dä ape so azo so ayeke ga lani na ngoi ti kobe so ayeke nde so ayeke sara ande tënë ni ndali ti nzoni ti ala so ayeke duti ande na fini na ngoi ni so. Me ti wara aye ti nzoni fadeso na lege ti kobe so, a lingbi e leke na bê ti e ti ngbâ ti mû tapande ti Jésus ti sara terê ti e kete, ti sara ye na mbeto ape nga ti ndoye azo. Tongana e sara tongaso, e lingbi ti duti na confiance so Jéhovah ayeke futa ande e.​—2 Pi. 1:​10, 11.