1. Laso, ye so bê ti Jéhovah aye ayeke nyen?

 LASO, Nzapa aye ti tene a fa nzoni tënë ti Royaume na ndö ti sese kue (Marc 13:10; 1 Tim. 2:3, 4). A yeke kua ti Jéhovah la; so kua ni ayeke kota mingi, lo zia Molenge ti lo so lo ye lo mingi ti bâ ndo na ndö ni. E peut ti hinga biani so, so Jésus la ayeke fa lege na e, e yeke hunzi kua ti fango tënë tâ gï tongana ti so Jéhovah aye kozo si nda ni aga.​—Mat. 24:14.

2. Nyen la e yeke bâ na yâ ti article so?

² Na yâ ti article so, e yeke bâ tongana nyen la Jésus ayeke sara kua na “ngbâa be-ta-zo so ayeke sara ye na ndara” ti mû na e kobe ti yingo nga tongana nyen la lo yeke fa lege na adisciple ti lo ti sara kota kua ti fango tënë so ade a sara mara ni lâ oko ape (Matt. 24:45). E yeke bâ nga ye so e oko oko kue e peut ti sara ti sara kua maboko na maboko na Jésus nga na ngbâ be-ta-zo.

3. Komandema wa la a mû na Jésus?

³ Jésus ayeke bâ ndo na ndö ti kua ti fango tënë. E peut ti hinga ni tongana nyen? Ngoi kete kozo si Jésus amonté na yayu, lo wara terê na ambeni disciple ti lo so ayeke be-ta-zo na ndö ti mbeni hoto na Galilée. Lo tene na ala, lo tene: “A mû na mbi komandema kue na yayu nga na sese.” Bâ so tâ gï na peko ti tënë so, lo tene: “Tongaso ala gue, ala sara si azo na popo ti amara kue aga adisciple.” (Mat. 28:18, 19). Tongaso, na ndö ti ambeni kua so a mû na Jésus ti sara, a mû na lo  komandema ti bâ ndo na ndö ti kua ti fango tënë.

4. Ngbanga ti nyen la e peut ti duti sûr so Jésus angbâ ti bâ ndo na ndö ti kua ti fango tënë?

⁴ Jésus atene lani so a yeke sara kua ti fango tënë nga na kua ti sarango adisciple “na popo ti amara kue” nga so lo yeke duti na adisciple ti lo “lango oko oko kue juska na lâ ni so aye ti ngoi so ayeke gue ti hunzi.” (Mat. 28:20). Atënë so afa polele so Jésus ayeke ngbâ ti bâ ndo na ndö ti kua ti fango tënë juska na ngoi ti e.

5. Tongana nyen la e yeke mû maboko na gango tâ tënë ti Psaume 110:3?

⁵ Jésus agi lani bê ti lo ape so wungo ti awakua ayeke lingbi ape na hunzingo ti aye ti ngoi so. Lo hinga lani so tënë ti prophétie ti zo ti sungo psaume so ayeke ga tâ tënë, so atene: “Na lango so mo yeke gue na aturugu ti mo ti sara bira, azo ti mo ayeke londo na bê ti ala wani ti gue.” (Ps. 110:3). Tongana mo yeke fa tënë, andâ mo yeke mû maboko na Jésus nga na ngbâ be-ta-zo, nga mo yeke mû maboko na gango tâ tënë ti prophétie so. Kua ni angbâ ti gue na li ni, me akpale ayeke dä.

6. Mbeni kpale wa la awafango tënë ti Royaume ayeke wara ni laso?

⁶ Mbeni kpale so awafango tënë ti Royaume ayeke wara ayeke kangango lege. A-apostat, akota zo ti nzapa nga na azo ti poroso atene gbâ ti amvene na ndö ti kua ti e. Tongana afami ti e, azo so e hinga ala nga na amba ti e ti place ti kua ayeda na amvene so, ala peut ti pusu e ti zia ti sara na Jéhovah nga ti zia ti fa tënë. Na yâ ti ambeni kodro, awato ti e ayeke zia mbeto na bê ti aita ti e, ala yeke pika ala wala ala yeke gbu ala, nga ala yeke kanga même ala. Li ti e akpe ape so azo ayeke sara aye so na e. Jésus atene lani, atene: “Amara kue ayeke ke ala ndali ti iri ti mbi.” (Mat. 24:9). So aye so ayeke si na e afa so e zia ngia na bê ti Jéhovah (Mat. 5:11, 12). Zabolo la ayeke na peko ti akangango lege so. Me Jésus ayeke ngangu mingi ahon Satan. Grâce na mungo maboko ti Jésus, azo ti amara kue ayeke mä nzoni tënë. Zia e bâ aye so afa ni.

7. Aye wa la mo bâ so afa so Apocalypse 14:6, 7 ayeke ga tâ tënë?

⁷ Mbeni kpale so e yeke wara na ngoi so e yeke fa tënë ayeke so azo ayeke tene ayanga ti kodro nde nde. Na yâ ti atënë so Jésus afa na bazengele Jean, lo tene kozo awe so na ngoi ti e, kpale so ayeke kanga lege na nzoni tënë ape. (Diko Apocalypse 14:6, 7.) Ngbanga ti nyen la e tene tongaso? E yeke mû lege na azo mingi ti mä tënë ti Royaume. Laso, azo na yâ ti dunia kue apeut ti diko ambeti ti e na ndö ti site ti e jw.org ndali ti so a yeke na ayanga ti kodro ahon 1 000. Bebungbi ayeda ti tene a kiri na peko ti buku Ngbâ na fini lakue lakue!, so e yeke sara kua na ni mingi ti sara adisciple, na ayanga ti kodro ahon 700. A yeke wara nga akobe ti yingo na lege ti avidéo ndali ti awabuburu nga ambeti na braille ndali ti azo so abâ ndo ape. E bâ aprophétie ti Bible ayeke ga tâ tënë. Azo ti “ayanga ti kodro nde nde kue” ayeke manda ti tene “yanga ti kodro so ayeke nzoni kue,” so ayeke atâ tënë ti Bible (Zach. 8:23; Soph. 3:9). A yeke sara aye so kue na gbe ti fango lege ti Jésus Christ.

8. Juska laso, aye ti peko ti fango tënë ti e ayeke nyen?

⁸ Laso, azo ahon 8 000 000 na yâ ti akodro 240 ayeke na yâ ti bungbi ti Jéhovah, nga ngu oko oko azo saki mingi ayeke wara batême. Me ye so ayeke kota mingi ahon wungo ti azo so ayeke sarango ye ti aChrétien, so ti tene “fini zo”, so afini disciple so ayü  (aCol. 3:8-10). Azo mingi azia lege ti sarango asioni ye, sarango ye ti ngangu na zo, kengo zo ndali ti mara ti lo nga yengo kodro ti ala ahon ndö ni. Prophétie ti Ésaïe 2:4, so atene ala yeke “manda sarango bira encore ape”, aga tâ tënë. So e sara kue ti yü fini zo, e yeke aidé azo ti ga na yâ ti bungbi ti Jéhovah, nga e fa so e yeke mû peko ti Christ Jésus so ayeke bâ ndo na ndö ti e (Jean 13:35; 1 Pi. 2:12). Aye so kue asi gï tongaso ape. A yeke ndali ti so Jésus ayeke mû na e maboko so e bezoin ni.

9. Ti gue oko na Matthieu 24:45-47, Jésus atene nyen la ayeke si na lâ ti nda ni?

⁹ Diko Matthieu 24:45-47. Jésus atene lani so na lâ ti nda ni, lo yeke zia mbeni “ngbâa be-ta-zo so ayeke sara ye na ndara” ti mû na e kobe ti yingo. Tongaso, e yeke ku ti tene ngbâa so asara kua ngangu na ngoi ti e. Na a yeke ye so lo yeke sara. Jésus ayeke sara kua na mbeni kete groupe ti akoli so asoro ala ti gue na yayu ti mû na awakua ti Nzapa nga na azo so aye ti hinga ye na ndö ti Nzapa “kobe ti [yingo] na ngoi ni so alingbi”. Akoli so abâ ape so ala la ayeke komande na ndö ti mabe ti amba ti ala (2 aCor. 1:24). Me ala hinga so Jésus Christ la ayeke ‘fa lege nga ayeke komande na ndö ti’ azo ti lo.​—És. 55:4.

10. Na popo ti ambeti so a fa na yâ ti afoto so, ti so wa la asara si mo yeda ti komanse ti sara na Jéhovah?

¹⁰ Ngbene ye na ngu 1919 ti ga na ni, ngbâa be-ta-zo asigi na ambeti nde nde ti mû lege na afini zo so aye ti hinga ye na ndö ti Nzapa ti mä ti kozoni tâ tënë so ayeke na yâ ti Bible. Na ngu 1921, ngbâa ni asigi na buku La Harpe de Dieu ti aidé ala ti hinga akota fango ye ti Bible. So angoi achangé changengo, a sigi na ambeni mbeti encore. Mbeti wa la a-aidé lani  mo ti hinga Babâ ti e ti yayu nga ti ye lo? Eskê a yeke lani « Que Dieu soit reconnu pour vrai ! », Ta Tene so aga na Zo Fini ti La Koue La Koue, Mo lingbi ti douti la koue la koue na paradis na ndo sesse, Hingango Ye So Ague na Fini ti Lakue Lakue, Bible afa nyen biani?, Bible alingbi ti fa nyen na e? wala Ngbâ na fini lakue lakue!, fini mbeti ti e? A sigi lani na ambeti so kue alingbi na bezoin ti azo na ngoi so a sigi na ni.

11. Ngbanga ti nyen la a yeke kota ye ti tene e kue e wara kobe ti yingo?

¹¹ A yeke gï pëpe afini zo la abezoin kpengba kobe ti yingo. E kue e bezoin ni. Bazengele Paul atene: “Kpengbango kobe ayeke ti abiazo.” Paul akiri atene ti sara ye alingbi na aye so e manda na yâ ti Bible ayeke aidé e “ti hinga popo ti ye ti nzoni na ye ti sioni.” (aHéb. 5:14). A peut ti duti ngangu mingi na e ti sara aye so Jéhovah ahunda na e laso ndali ti so azo mingi ayeke sara aye so ayeke tâ sioni mingi. Me Jésus abâ si e manda aye so e bezoin ni ti tene mabe ti e angbâ ti kpengba. Aye so e manda alondo na yâ ti Bible, so a sû ni na gbe ti yingo ti Nzapa. Jésus la ayeke fa lege na ngbâa be-ta-zo ti leke akobe so nga ti kangbi ni.

12. Legeoko tongana Jésus, tongana nyen la e bâ iri ti Nzapa na nene ni?

¹² Legeoko tongana Jésus, e ne iri ti Nzapa tongana ti so a doit ti sara (Jean 17:6, 26). Na tapande, na ngu 1931, e mû iri Témoin ti Jéhovah so ayeke na yâ ti Bible. So e sara tongaso, e fa so iri ti Nzapa ayeke kota ye na lê ti e nga e ye ti tene a hinga e na iri ti Babâ ti e ti yayu (És. 43:10-12). Na ngbene ye na octobre ti ngu ni so, iri ti Nzapa asigi lakue na ndö ti couverture ti Tour ti Ba Ndo. Na ndö ni, a kiri  na iri ti Nzapa na aplace so adoit ti duti dä na yâ ti Mbeti ti Nzapa ti fini dunia. Ye so ayeke tâ nde mingi na a-eglize so atene ala yeke aChrétien so ala zi iri ti Jéhovah na yâ ti mingi ti aBible ti ala.

13. Nyen la asara si mo yeda so Jésus ayeke sara kua laso na “ngbâa be-ta-zo so ayeke sara ye na ndara?” (Jean 6:68).

¹³ Na lege ti “ngbâa be-ta-zo so ayeke sara ye na ndara”, Jésus aleke mbeni bungbi so ayeke pendere mingi na sese ti sara si a voro Nzapa na lege ni. Mo bâ bungbi so tongana nyen? Peut-être mo pensé tongana bazengele Pierre so atene na Jésus, atene: “E gue ande na mbage ti zo wa? Mo yeke na atënë so amû na zo fini ti lakue lakue.” (Jean 6:68). Tongana fade e yeke na yâ ti bungbi ti Jéhovah ape, ka laso e yeke na ndö wa? Na lege ti bungbi so, Christ abâ si e wara aye kue so e bezoin ni ti ngbâ be-ta-zo na Nzapa. Lo yeke fa nga na e tongana nyen ti sara kua ti e ti fango tënë nzoni. Na ndö ni, lo yeke aidé e ti yü “fini zo”, tongaso si e zia ngia na bê ti Jéhovah.​—aÉph. 4:24.

14. Tongana nyen la mo bâ nzoni ndali ti so mo yeke na yâ ti bungbi ti Jéhovah na ngoi ti kobela ti COVID-19 so amû ndo?

¹⁴ Jésus ayeke fa lege na e na ndara na angoi ti akpale. A yeke polele so e bâ nzoni na lege ti fango lege so na ngoi so kobela ti COVID-19 akomanse. Na ngoi so azo mingi na yâ ti dunia ahinga mbilimbili ye ti sara ape, Jésus abâ si a fa na e polele ye so e doit ti sara ti bata terê ti e. A wa e lani ti yü masque na ngoi so e yeke na ndo so azo ayeke dä mingi nga ti duti ayo na mba. A dabe ti a-ancien lani ti ngbâ ti sara lisoro na azo kue ti yâ ti congrégation nga ti hinga aye so ala bezoin  ni ti duti nzoni nga ti ngbâ nduru na Jéhovah (És. 32:1, 2). E wara nga lani afango lege nga na awango na lege ti afini sango so alondo na Bebungbi.

15. Fango lege wa la e wara lani na ndö ti sarango abungbi nga na fango tënë na ngoi ti kobela so amû ndo so? Ye ti peko ni ayeke nyen?

¹⁵ Na ngoi ti kobela ni, a fa nga na e polele tongana nyen ti sara abungbi nga ti fa tënë. Hio, e komanse ti sara abungbi nga na akota bungbi na lege ti vidéoconférence. E komanse nga ti fa tënë mingi ni na lege ti alettre nga na téléphone. Jéhovah asara tufa na ndö ti a-effort ti e. Afiliale mingi afa so wungo ti awafango tënë ague na li ni mingi. Ti vrai ni, aita mingi awara aye ti nzoni na ngoi ni so.—Bâ encadré “ Jéhovah asara tufa na ndö ti fango tënë ti e.”

16. Nyen la e peut ti hinga na bê ti e kue?

¹⁶ Ambeni zo apeut ti pensé so bungbi ti Jéhovah asara ye ahon ndö ni na ndö ti sarango hange na kobela so amû ndo. Me tongana ngoi ayeke hon, e bâ polele so fango lege so e wara ayeke tâ na lege ni (Mat. 11:19). Na tongana e gbu li na ndö ti lege so Jésus ayeke fa lege na azo ti lo na ndoye, e hinga na bê ti e kue so atâa nyen la ayeke si kekereke, Jéhovah na Molenge ti lo so lo ye lo mingi ayeke duti na e.—Diko aHébreu 13:5, 6.

17. Mo pensé nyen na ndö ti sarango kua na gbe ti fango lege ti Jésus?

¹⁷ E yeke na ngia mingi so Jésus ayeke bâ ndo na ndö ti e. E yeke na yâ ti bungbi so tënë ti ngobo, tënë ti kodro ti zo nga na tënë ti ayanga ti kodro aga na kangbi na yâ ni ape. E yeke na gbâ ti akobe na lege ti yingo nga a fa na e nzoni tongana nyen ti fa tënë. A fa na e oko oko kue tongana nyen ti yü fini zo, nga e yeke manda ti ye terê na popo ti e. E yeke na araison kue ti pika kate na ndö ti Jésus so ayeke bâ ndo na ndö ti e.