1-2. Atënë wa la aTémoin ti Jéhovah aye mingi ti sara tënë na ndö ni?

ATËNË so ayeke kota mingi so abâ e laso ayeke tënë ti droit ti Jéhovah ti komande dunia kue nga zingo zonga so a bi na ndö ti iri ti lo. So e yeke aTémoin ti Jéhovah, e ye mingi ti sara tënë na ndö ti atënë so. Eskê droit ti Nzapa ti komande dunia kue nga na sarango si iri ti lo aga nzoni-kue ayeke atënë so ayeke nde nde? Ên-ën.

² E kue e bâ so a doit ti zi zonga so a bi na ndö ti iri ti Nzapa. E hinga nga so fason so Jéhovah ayeke komande na ni ayeke nzoni mingi. Tongaso, atënë so ayeke kota mingi.

3. Iri Jéhovah andu aye wa?

³ Biani, iri Jéhovah andu aye kue na ndö ti Nzapa ti e, a ndu nga fason so lo yeke komande na ni. Tongaso, tongana e tene ti zi zonga kue so a bi na ndö ti iri ti Jéhovah ayeke kota tënë mingi, andâ e yeke tënë so a lingbi azo kue ahinga so fason so Jéhovah ayeke komande na ni ayeke nzoni mingi. Iri ti Jéhovah ague tâ gï oko na fason so lo yeke komande na ni tongana Kota Gbia ti dunia kue so ngangu ti lo ahon angangu kue.​—Bâ encadré “ Ambage nde nde ti kota tënë ni.”

4. Psaume 135:13 atene nyen na ndö ti iri ti Nzapa? Ahunda wa la e yeke kiri tënë na ni na yâ ti article so?

⁴ Iri Jéhovah ayeke tâ nde mingi. (Diko Psaume 135:13.) Nyen la asara si iri ti Nzapa ayeke tâ kota mingi? Tongana nyen la ti kozoni a tene mvene na ndö ti iri so ti buba ni? Tongana nyen la Nzapa asara si iri ti lo aga nzoni-kue? Tongana nyen la e lingbi ti mû maboko ti gbu koko ti iri ti lo? Zia e kiri tënë na ahunda so.

5. Hunda wa la ambeni zo alingbi ti hunda tongana ala mä so a lingbi a sara si iri ti Nzapa aga nzoni-kue?

⁵ “Zia a sara si iri ti mo aga nzoni-kue.” (Mat. 6:9). Jésus atene so tënë so adoit ti duti mbeni kota ye so e sambela ndali ni. Me tënë ti Jésus so aye ti tene nyen? Ti sara si mbeni ye aga nzoni-kue aye ti tene ti zi saleté na terê ti ye ni. Ambeni zo alingbi ti hunda ndo, atene: ‘Iri ti Jéhovah ayeke nzoni-kue awe ape?’ Ti kiri tënë na hunda so a lingbi e gbu li na ndö ti aye so mbeni iri andu ni.

6. Ngbanga ti nyen la iri ti zo ayeke kota mingi?

⁶ Iri ti zo ayeke pëpe gï mbeni tënë so a sû na lê ti mbeni mbeti wala so a tene ni na kota go. Bâ tënë so Bible atene: “A yeke nzoni ti soro nzoni iri ahon ti soro gbâ ti mosoro.” (aProv. 22:1; Zo-ti. 7:1). Ngbanga ti nyen la iri ti zo ayeke kota mingi? Ngbanga ti so a ndu aye so a hinga zo ni na ni nga na ye so azo apensé na ndö ti lo. Tongaso, fason so a sû na iri ti mbeni zo na lê ti mbeni mbeti, wala même fason so a di na iri ni, ayeke pëpe ye so ayeke kota ye; ye so ayeke kota ye ayeke ye so azo apensé na ni tongana ala bâ iri ni wala ala mä ni.

7. Azo agi ti buba iri ti Nzapa tongana nyen?

⁷ Tongana azo atene amvene na ndö ti Jéhovah, ala yeke gi ti sara si azo aduti na sioni bango ndo na ndö ti lo. Tongana ala sara si azo aduti na sioni bango ndo na ndö ti lo, ala yeke gi ti buba iri ti lo. A tene sioni tënë na ndö ti iri ti Nzapa nga a gi ti buba iri ti lo ti kozoni na yaka ti Éden. Zia e gbu li na ndö ti aye so gingo ti buba iri ti Nzapa afa na e.

8. Nyen la Adam na Ève ahinga lani? Ahunda wa la alondo?

⁸ Adam na Ève ahinga lani iri ti Jéhovah nga na akota tâ tënë na ndö ti lo so iri ni so ayeke na ndö ti lo. Ala hinga lani so lo la lo créé ala, lo la  lo mû na ala fini nga na pendere Paradis nga lo sara si mariage ti ala ayeke lani mbilimbili-kue (Gen. 1:26-28; 2:18). Ye oko, eskê ala yeke ngbâ lani ti sara kua na ngangu ti gbungo li ti ala so ayeke mbilimbili-kue ti gbu li na ndö ti aye kue so Jéhovah asara ndali ti ala? Eskê ala yeke ngbâ lani ti maï ndoye ti ala ndali ti Jéhovah nga ti kiri singila na lo? Akiringo tënë ni asigi polele na ngoi so wato ti Nzapa atara ala.

9. Ti gue oko na Genèse 2:16, 17 nga na 3:1-5, tënë ti nyen la Jéhovah atene lani na Adam na Ève? Tongana nyen la Satan asara si ala wara sioni pensé na ndö ti Jéhovah?

 ⁹ Diko Genèse 2:16, 17 nga na 3:1-5. Satan asara kua na mbeni ngbo, lo hunda tënë na Ève, lo tene: “Tâ tënë, Nzapa atene ala te lê ti akeke kue ti yaka so ape?” Na yâ ti hunda so, mbeni mvene ayeke dä so ayeke tongana mbeni poison so a honde ni. Ye so Jéhovah atene biani ayeke so ala lingbi ti te lê ti akeke kue, me mbeni oko ayeke dä so ala doit ti te lê ni ape. Gbâ ti akeke nde nde ayeke lani dä so Adam na Ève alingbi ti te lê ni (Gen. 2:9). Biani, Jéhovah amû aye mingi na azo. Ye oko, lo ke na Adam na Ève ti te lê ti mbeni keke oko so lo fa. Tongaso, hunda so Satan ahunda asara si Ève awara sioni pensé na ndö ti Jéhovah. Satan aye ti sara si ala bâ so Nzapa agbanzi anzoni ye na ala. Peut-être Ève ahunda terê ti lo: ‘Eskê Nzapa agbanzi mbeni nzoni ye na mbi?’

10. Tongana nyen la Satan atene mvene polele na ndö ti iri ti Nzapa ti buba ni? Ye ti peko ni ayeke nyen?

¹⁰ Juska ge, Ève angbâ ti bâ Jéhovah tongana Gbia ti lo. Lo tene na Satan tënë so Nzapa atene ni polele na ala. Lo kiri lo tene so ala doit même ti ndu keke ni so ape. Lo hinga lani so Nzapa atene na ala so tongana ala ke yanga ti lo, ala yeke kui. Me Satan atene: “Ti tâ tënë ni, ala yeke kui pëpe.” (Gen. 3:2-4). Satan ahonde tënë ni encore ape. Ti so ni so, lo tene mvene polele na ndö ti iri ti Nzapa ti buba ni, na lo tene na Ève so Jéhovah ayeke zo ti mvene. So lo sara tongaso, lo ga mbeni zabolo, wala zo so atene mvene na ndö ti mbeni zo ti buba iri ti lo. Satan ahanda Ève biani; lo yeda na tënë so Satan atene (1 Tim. 2:14). Lo sara confiance mingi na Satan ahon Jéhovah. A sara si a yeke ngangu na Ève ape ti mû mbeni desizion so ayeke tâ sioni mingi. Lo mû desizion ti ke yanga ti Jéhovah. Lo komanse ti te lê ti keke so Jéhovah ake lani na lo ti te ni. Na pekoni, lo mû mbeni na Adam.​—Gen. 3:6.

11. Nyen la kozo babâ na mama ti e adoit lani ti sara?

¹¹ Gbu li kete na ndö ti tënë so Ève adoit fade ti tene na Satan. Imaginé so lo tene tënë so: “Mbi hinga mo ape, me mbi hinga Babâ ti mbi, Jéhovah, mbi ye lo nga mbi yeke na confiance na lo. Lo mû na mbi na Adam aye kue so e yeke na ni. Mo tene mara ti sioni tënë tongaso na ndö ti lo ngbanga ti nyen? Hon kâ!” A yeke nzere fade na Jéhovah mingi ti mä mara ti atënë so, so molenge ti lo ti wali so aye lo atene ti fa so lo yeke be-ta-zo na lo (aProv. 27:11). Me Ève ayeke lani na tâ ndoye na mbage ti Jéhovah ape; Adam nga kue. So Adam na Ève ayeke na tâ ndoye na mbage ti Babâ ti ala ape, ala gbu koko ti iri ti lo ape na ngoi so a tene mvene na ndö ni ti buba ni.

12. Satan adü kite na yâ ti li ti Ève tongana nyen? Nyen la Adam na Ève asara ape?

¹² Tongana ti so e bâ, Satan akomanse ti dü kite na yâ ti li ti Ève. Lo sara si Ève ahunda terê ti lo wala Jéhovah ayeke mbeni nzoni Babâ. Na pekoni, Adam na Ève agbu koko ti iri ti Jéhovah ape na ngoi so Satan atene mvene na ndö ni. Ye  so asara si a yeke ngangu na ala ape ti mä Satan nga ti sara kpengba-li na Babâ ti ala. Satan ayeke sara kua na a-oko kode so laso. Lo yeke tene mvene na ndö ti iri ti Jéhovah ti buba ni. A yeke ngangu ape na azo so ayeda na amvene ti Satan ti ke komandema ti Jéhovah so ayeke mbilimbili.

13. Tongana nyen la Ézéchiel 36:23 afa kota tënë ti Bible?

¹³ Eskê Jéhovah akanga lê na ndö ti amvene so Satan atene na ndö ti iri ti lo ti buba ni sân ti gbu koko ti lo wani? Ên-ën. Aye kue so a sû na yâ ti Bible aluti mingi na ndö ti aye so Jéhovah asara ti zi zonga so a bi na ndö ti iri ti lo na yaka ti Éden (Gen. 3:15). Ti tâ tënë ni, e lingbi ti fa kota tënë ti Bible na nduru tënë, e tene: Jéhovah asara si iri ti lo aga nzoni-kue na lege ti Royaume so Molenge ti lo akomande na ndö ni nga lo yeke sara si mbilimbili nga na siriri akiri aduti na ndö ti sese. Ambeni tënë ayeke na yâ ti Bible so amû maboko na e ti hinga tongana nyen la Jéhovah ayeke sara si iri ti lo aga nzoni-kue.​—Diko Ézéchiel 36:23.

14. Tongana nyen la sarango ye ti Jéhovah na gbele kpengba-li so a sara na lo na Éden asara si iri ti lo aga nzoni-kue?

¹⁴ Satan asara ye kue so lo lingbi ti sara ti kanga lege na Jéhovah ti sara ye so lo leke na bê ti lo ti sara. Me Satan awara lege lâ oko ape ti sara ni. Bible afa aye so Jéhovah asara nga afa so mbeni zo ti lingbi na Jéhovah ayeke dä ape. Tâ tënë, kpengbango-li ti Satan nga na azo so amû peko ti lo asara Jéhovah vundu mingi (Ps. 78:40). Me lo leke kpale ni na ndara, na kangango bê nga lo sara ni na lege ti mbilimbili. Lo fa nga ngangu ti lo so ahon angangu kue na alege mingi. Kota ye ni ayeke so lo fa ndoye ti lo na yâ ti aye kue so lo sara (1 Jean 4:8). Jéhovah azia lâ oko ape ti sara si iri ti lo aga nzoni-kue.

15. Tongana nyen la laso Satan ayeke tene mvene na ndö ti iri ti Nzapa ti buba ni? Ye ti peko ni ayeke nyen?

¹⁵ Laso Satan angbâ ti tene mvene na ndö ti iri ti Nzapa ti buba ni. Lo handa azo ti duti na kite so Nzapa ayeke ngangu mingi, lo sara ye mbilimbili, lo yeke na ndara nga lo yeke na ndoye. Na tapande, Satan agi ti sara si azo ayeda so Jéhovah la acréé aye ape. Nga tongana azo ayeda so Nzapa ayeke dä, lo yeke gi ti sara si ala bâ so aye  so lo hunda na e ti sara akanga lege na zo ngangu nga ayeke na lege ni ape. Lo fa même na azo so Jéhovah ayeke Nzapa so ayeke sioni mingi, so ayeke gbi azo na yâ ti enfer ti wâ. Tongana azo ayeda na asioni mvene so, a yeke ngangu na ala ape ti ke komandema ti Jéhovah so ayeke mbilimbili. Juska na ngoi so Jéhovah ayeke futi Satan biani biani, lo yeke ngbâ ti tene amvene na ndö ti Jéhovah ti buba iri ti lo nga lo yeke gi ti sara si mo nga kue mo ke Jéhovah. Lo yeke wara ande mo?

16. Nyen la mo lingbi ti sara so Adam na Ève asara lani ape?

¹⁶ Jéhovah amû lege na azo so ayeke mbilimbili-kue ape ti mû maboko ti sara si iri ti lo aga nzoni-kue. Biani, mo lingbi ti sara ye so Adam na Ève asara lani ape so. Atâa so mo yeke na yâ ti mbeni dunia so asi singo na azo so ayeke tene mvene na ndö ti iri ti Jéhovah ti buba ni nga ala yeke zonga ni, lege azi na mo ti zi yanga ti sara tënë ti fa so Jéhovah ayeke nzoni-kue, lo yeke mbilimbili, lo yeke nzoni nga lo ye azo (És. 29:23). Mo lingbi ti mû mbage ti komandema ti lo. Mo lingbi ti mû maboko na azo ti hinga so gï komandema ti Jéhovah oko la ayeke mbilimbili-kue nga gï ni la ayeke ga na siriri nga na ngia na acréature kue.​—Ps. 37:9, 37; 146:5, 6, 10.

17. Tongana nyen la Jésus asara si azo ahinga iri ti Babâ ti lo?

¹⁷ Tongana e gbu koko ti iri ti Jéhovah, andâ e mû tapande ti Jésus Christ (Jean 17:26). Jésus asara si azo ahinga iri ti Babâ ti lo na lege so lo sara kua na iri ni nga lo fa na azo atâ sarango ye ti Jéhovah. Na tapande, lo ke atënë so aFarizien atene na ndö ti Jéhovah, so ala tene lo yeke sioni, lo hunda ye ahon ndö ni, lo yo na azo nga lo sara nzoni bê na zo ape. Jésus amû lani maboko na azo ti bâ so Babâ ti lo asara ye ahon ndö ni ape, lo kanga bê, lo sara ye na ndoye nga lo pardonné zo. Lo mû nga maboko na azo ti hinga Jéhovah na lege so lo sara ye tâ gï tongana Babâ ti lo na yâ ti fini ti lo ti lâ na lâ.​—Jean 14:9.

18. Tongana nyen la e lingbi ti kinda amvene nga na atënë so abuba iri ti Jéhovah?

¹⁸ Tongana ti Jésus, e lingbi ti fa na azo aye so e hinga na ndö ti Jéhovah, na e fa na ala so lo yeke sara ye na ndoye nga na nzoni bê mingi. Na ngoi so e sara tongaso, e yeke kinda amvene nga na atënë so abuba iri ti Jéhovah. E sara si iri ti Jéhovah aga nzoni-kue na lege so e mû maboko  na azo ti bâ ni tongana ye so ayeke nzoni-kue. E nga kue e lingbi ti mû tapande ti Jéhovah. E lingbi ti sara ni atâa so e yeke mbilimbili-kue ape (aÉph. 5:1, 2). Tongana atënë ti e nga na asarango ye ti e afa na azo atâ sarango ye ti Jéhovah, andâ e mû maboko ti sara si iri ti lo aga nzoni-kue. E yeke zi zonga so a bi na ndö ti iri ti Jéhovah na lege so e mû maboko na azo ti hinga tâ tënë na ndö ti lo. * E yeke fa nga so azo so ayeke mbilimbili-kue ape alingbi ti ngbâ be-ta-zo na Nzapa.—Job 27:5.

19. Tongana nyen la Ésaïe 63:7 amû maboko na e ti hinga ye so adoit ti duti kozo ye so e zia na gbele e na ngoi so e yeke fa ye?

¹⁹ Mbeni ye ayeke dä so e lingbi ti sara ti sara si iri ti Jéhovah aga nzoni-kue. Na ngoi so e yeke fa atâ tënë ti Bible na azo, fani mingi e yeke gboto lê na ndö ti droit ti Jéhovah ti duti Gbia ti dunia kue, na a yeke biani tâ tënë. Ye oko, atâa so a yeke kota ye ti luti na ndö ti andia ti Nzapa, kozo ye so e zia na gbele e ayeke ti mû maboko na azo ti ndoye Jéhovah, Babâ ti e, nga ti duti be-ta-zo na lo. Tongaso, a lingbi e sara tënë na ndö ti apendere sarango ye ti Jéhovah nga e gboto lê na ndö ti asarango ye ti lo so iri ni ayeke na ndö ti lo. (Diko Ésaïe 63:7.) Na ngoi so e yeke sara ni, e yeke mû maboko na azo ti ye Jéhovah na ti mä yanga ti lo ndali ti so ala ye ti duti be-ta-zo na lo.

20. Nyen la e yeke bâ ni na yâ ti article ti peko?

²⁰ Tongaso, tongana nyen la e lingbi ti sara kue ti tene asarango ye ti e nga na fango ye ti e amû maboko na azo ti wara nzoni pensé na ndö ti Jéhovah tongana ala mä iri ti lo nga apusu ala ti ga nduru na lo? Article ti peko ayeke kiri tënë na hunda so.