JÉSUS atene kozo awe so adisciple ti lo ayeke duti ande na gbâ ti kobe ti fango ni na lâ ti nda ni so (Mat. 9:37; 24:14). Bâ tongana nyen la tënë ti lo so aga tâ tënë na mbeni lege so ayeke nde na mbeni mbage ti Transcarpatie, na Ukraine. Gï na yâ ti agbata ota so ayeke na ndo ni so, acongrégation ayeke 50 nga awafango tënë ahon 5 400. * Tongana a mû azo 4 na popo ti azo ti agbata ni ota kue, oko ayeke Témoin ti Jéhovah.

Azo ti yâ ti territoire so ayeke tongana nyen? Vasile, mbeni ita-koli so ayeke na ndo ni, atene: “Azo ni ge abâ Bible na nene ni, ala bâ sarango ye ti mbilimbili na nene ni, ala yeke na kpengba songo ti sewa nga ala yeke gi ti mû maboko na mba na bê kue.” Lo kiri lo tene: “A yeke lakue la ala yeke yeda na aye so e mä na bê na ni ape. Me tongana mo fa na ala mbeni ye na yâ ti Bible, ala yeke mä ni nzoni.”

Biani, aita ti e ayeke wara akpale so ade ala wara kozo ape na ngoi so ala yeke fa tënë na mbeni ndo so wungo ti awafango tënë ayeke mingi ti fa tënë na ndo ni. Na tapande, mbeni congrégation ayeke na awafango tënë 134 me ada ti lango ayeke gï 50 na yâ ti territoire ni. Awafango tënë asara tongana nyen na yâ ti ye so?

Aita mingi ague na ando nde nde so bezoin ti awafango tënë ayeke dä mingi ti fa tënë. Ionash, mbeni ita-koli so ayeke na ngu 90, atene: “Na yâ ti territoire ti congrégation ti e, wafango tënë oko ayeke na da use ti fa tënë dä. Mbi fa tënë na yâ ti mbeni kete kodro, me ade ti ninga ape, na ngoi so mbi wara kpale ti seni, mbi gue nga na mbeni territoire so awafango tënë ayeke dä ape, so ayo kilomètre 160, mbi fa tënë kâ na yanga ti Hongrois.” A lingbi awafango tënë asara asacrifice ti gue ti mû maboko na yâ ti ambeni territoire. Ionash atene: “Ti mû train, mbi londo na ngbonga osio ti ndapre mbi fa tënë juska ngbonga omene ti lakui na ngoi so train ni ayeke kiri. Mbi yeke sara tongaso fani use wala ota na yâ ti yenga oko.” Lo bâ so ngangu so lo sara so ayeke kota ye? Lo tene: “Mbi wara ngia mingi na fason ti fango tënë so. A nzere na mbi lani ti mû maboko na mbeni sewa so alango ayo ti manda tâ tënë.”

A yeke tâ tënë so, azo kue ti yâ ti congrégation ti ndo ni so la alingbi ti gue na ayongoro ndo ape. Me ala kue, so na popo ni mo yeke wara ambakoro, ayeke sara kue ti fa tënë nzoni na yâ ti territoire ti ndo so ala yeke dä. Ye ti peko ni ayeke so, na ngu 2017, tongana a bungbi wungo ti azo so aga na Mémorial na yâ ti akete gbata ota so, a si nduru na wungo ti awafango tënë ni fani use, wala ndambo ti wungo ti azo ti kodro ni kue. Kite ayeke dä ape so, atâa ndo wa la e yeke fa tënë dä, e yeke lakue na “ye mingi ti sara na yâ ti kusala ti Seigneur”.—1 aCor. 15:58.