1-2. (a) Tongana nyen la Jéhovah asara lani tënë na azo? (b) Aye wa la e yeke sara tënë na ndö ni na yâ ti article so?

JÉHOVAH aye mingi ti sara tënë na e. Giriri, lo yeke sara lani kua na aprophète, a-ange nga na Molenge ti lo Jésus Christ, ti fa na e apensé ti lo (Amos 3:7; aGal. 3:19; Apoc. 1:1). Laso, lo yeke sara tënë na e na lege ti Mbeti ti lo, Bible. Lo mû ni na e tongaso si e lingbi ti manda ye na ndö ti apensé ti lo nga ti hinga fason so lo yeke sara na aye.

² Na ngoi so Jésus ayeke lani na ndö ti sese, Jéhovah angbâ na yayu kâ lo sara tënë fani ota. Zia e bâ aye so Jéhovah atene, ye so e lingbi ti manda dä nga tongana nyen la e lingbi ti wara aye ti nzoni dä.

3. Na Marc 1:9-11, aye wa la Jéhovah atene na ngoi so Jésus awara batême? Akota tâ tënë ota wa la atënë ti lo so ayeda na ni?

³ Kozo ngoi so Jéhovah angbâ na yayu kâ lo sara tënë ayeke na Marc 1:9-11. (Diko ni.) Lo tene: “Mo yeke Molenge ti mbi, so mbi ndoye mo mingi; bê ti mbi anzere na mo mingi.” Na ngoi so Jésus amä tënë so Babâ ti lo atene na ndoye, nga so Babâ ti lo azia confiance na lo adoit ti ndu bê ti lo lani mingi. Na yâ ti tënë ti Jéhovah so akota tâ tënë ota asigi dä na ndö ti Jésus. Kozoni, Jésus ayeke Molenge ti lo. Use ni, Jéhovah andoye Molenge ti lo mingi. Na ota ni, bê ti Jéhovah anzere na Molenge ti lo mingi. Zia e bâ akota tâ tënë so nzoni.

4. Tongana nyen la Jésus aga Molenge ti Nzapa na mbeni fini lege na ngoi so lo wara batême?

⁴ “Mo yeke Molenge ti mbi.” Na lege ti atënë so, Jéhovah afa so Jésus, Molenge ti lo so lo ye lo mingi, alï lani na yâ ti  mbeni fini songo na Lo. Na ngoi so Jésus ayeke na yayu, lo yeke lani Molenge ti Nzapa awe. Ye oko, na ngoi so lo wara batême Nzapa asoro lo na lege ti yingo vulu. Na ngoi ni so Nzapa afa so Jésus aga Molenge ti lo na mbeni fini lege. So ti tene, Nzapa afa so Jésus aga Molenge ti lo so ayeke na beku ti kiri na yayu ti ga Gbia nga na Kota prêtre so Nzapa asoro lo (Luc 1:31-33; aHéb. 1:8, 9; 2:17). Tongaso na ngoi so Jésus awara lani batême, a yeke na lege ni so Babâ ti lo atene: “Mo yeke Molenge ti mbi.”​—Luc 3:22.

5. Tongana nyen la e lingbi ti mû tapande ti Jéhovah so lo fa so lo ndoye azo nga lo kpengba ala?

⁵ “Mbi ndoye mo mingi.” Tapande ti Jéhovah so lo fa so lo ndoye azo nga lo kpengba ala adabe ti e ti gi alege ti kpengba azo (Jean 5:20). E yeke maï tongana mbeni zo so e bâ lo na nene ni afa so lo ndoye e nga lo gonda e ndali ti mbeni nzoni ye so e sara. Legeoko nga, aita ti e ti congrégation nga na azo ti sewa ti e abezoin ti tene e ye ala nga e kpengba ala. Tongana e gonda amba ti e, e yeke kpengba mabe ti ala nga e yeke mû maboko na ala ti sara na Jéhovah be-ta-zo. Mbilimbili ababâ na amama la abezoin ti kpengba amolenge ti ala. Tongana ababâ na amama agonda amolenge ti ala na bê ti ala kue nga ala fa na amolenge ti ala so ala ye ala, ala yeke mû maboko na amolenge ti ala ti maï.

6. Ngbanga ti nyen la e lingbi ti duti na confiance na Jésus Christ?

⁶ “Bê ti mbi anzere na mo mingi.” Atënë so afa so Jéhovah ayeke na confiance so Jésus ayeke sara ye so bê ti Babâ ti lo aye. Ndali ti so Jéhovah ayeke na confiance so na Molenge ti lo, e nga kue e lingbi ti duti na confiance kue so Jésus ayeke sara ande si azendo ti Jéhovah kue aga tâ tënë (2 aCor. 1:20). Tongana e gbu li ti e na ndö ti tapande ti Jésus, e yeke  kiri ti leke na bê ti e mingi ti manda ye na lege ti lo nga ti mû peko ti gere ti lo. Gï tongana ti so Jéhovah ayeke na confiance na Jésus, Lo yeke nga na confiance so, tongana mbeni groupe, awakua ti lo ayeke ngbâ ti manda ye na lege ti Molenge ti lo.​—1 Pi. 2:21.

7. Ti gue oko na Matthieu 17:1-5, na ngoi wa la Jéhovah angbâ na yayu kâ lo sara tënë? Lo tene nyen?

⁷ Diko Matthieu 17:1-5. Use ngoi so Jéhovah angbâ na yayu kâ lo sara tënë ayeke lani na ngoi so “terê ti [Jésus] agbian”. Jésus atene lani na Pierre na Jacques nga na Jean ti tene lo na ala ague na ndö ti mbeni yongoro hoto. Na ngoi so ala si kâ, ala bâ mbeni vision so apika bê mingi. Lê ti Jésus nga abongo ti lo aza. Azo use, so aye ti sara tënë ti Moïse na Élie, akomanse ti sara tënë na Jésus na ndö ti kuâ ti lo nga na zingongo ti lo na kuâ so ayeke si ande. Atâa so “lê” ti abazengele ota so “ane na lango”, ala bâ vision so apika bê so na ngoi so lango ahon na lê ti ala kue (Luc 9:29-32). Na pekoni, mbeni mbinda angoro ala nga ala mä mbeni go so alondo na yâ ti mbinda ni. A yeke go ti Nzapa la. Tongana ti so Jéhovah asara lani na ngoi ti batême ti Jésus, lo fa so bê ti lo anzere na Molenge ti lo nga lo ye lo, lo tene: “So ayeke Molenge ti mbi, lo so mbi ndoye lo mingi, so bê ti mbi anzere na mbage ti lo.” Me ti so ni so lo tene nga, lo tene: “Ala mä lo.”

8. Vision so asara nyen na ndö ti Jésus nga na adisciple?

⁸ Vision so afa gloire nga na ngangu so Jésus ayeke wara ande ti duti Gbia ti Royaume ti Nzapa. Kite ayeke dä ape so ye so amû ngangu na Christ nga akpengba lo ndali ti pasi nga na sioni kuâ so lo yeke wara. Vision ni akpengba nga mabe ti adisciple. A mû maboko na ala ti leke terê ti ala ndali ti atara so ayeke si na ala nga na ngangu kua so ala yeke na ni ti sara. Ngu 30 tongaso na pekoni, bazengele Pierre asara tënë ti vision ti gbiango ti terê ti Jésus so, ye so afa so lo dabe ti lo mbilimbili na vision so.​—2 Pi. 1:16-18.

9. Anzoni wango wa la Jésus amû lani na adisciple ti lo?

⁹ “Ala mä lo.” Jéhovah afa polele so lo ye ti tene e mä atënë so Molenge ti lo atene nga e sara ye alingbi na ni. Nyen la Jésus atene na ngoi so lo yeke na ndö ti sese lani? Lo tene gbâ ti aye so ayeke kota ye mingi ti mä ni. Na tapande, na ndoye lo fa na adisciple ti lo tongana nyen ti fa nzoni tënë nga fani mingi lo dabe ti ala ti lango pëpe (Mat. 24:42; 28:19, 20). Lo wa nga ala ti sara ngangu kue ti ngbâ ti sara na Jéhovah na ti zia lege ni ape (Luc 13:24). Jésus awa lani mingi adisciple ti lo ti ndoye terê na popo ti ala, ti ngbâ beoko nga ti bata acommandement ti lo (Jean 15:10, 12, 13). Awango so Jésus amû na adisciple ti lo so ayeke nzoni mingi. Awango so ayeke nga laso kota ye mingi tongana ti ngoi so Jésus amû lani wango ni so.

10-11. Tongana nyen la e lingbi ti fa so e yeke mä Jésus?

¹⁰ Jésus atene: “Zo kue so ayeke na mbage ti tâ tënë amä go ti mbi.” (Jean 18:37). E yeke fa so e yeke mä go ti lo tongana e “ngbâ ti kanga bê na amba ti [e] na popo ti [e], na ti pardonné mba na bê ti [e] kue”. (aCol. 3:13; Luc 17:3, 4). E yeke fa nga so e yeke mä go ti lo tongana e yapu na fango nzoni tënë “na ngoi so aye atambela nzoni wala na ngoi ti wusuwusu”.​—2 Tim. 4:2.

¹¹ Jésus atene: “Ataba ti mbi amä go ti mbi.” (Jean 10:27). Adisciple ti Christ afa so ala mä Jésus na lege so ala mä atënë so lo tene nga ala sara ye alingbi na ni. Ala zia pëpe si “gingo bê ndali ti aye ti gigi” agboto lê ti ala (Luc 21:34). Me na ala, a yeke kota ye mingi ti sara ye alingbi na acommandement ti Jésus, atâa na ngoi so ayeke ngangu mingi ti sara ni. Aita ti e  mingi ayeke gbu ngangu na yâ ti angangu tara, azo so ake e ayeke sara ye ti ngangu na ala, ala yeke na yâ ti kota yere nga ala yeke bâ pasi na peko ti aye tongana ngu so asuku amû ndo wala akota pupu. Na yâ ti aye so kue, ala ngbâ be-ta-zo na Jéhovah, atâa pasi so ala yeke bâ. Jésus amû zendo so na ala: “Zo so ayeke na acommandement ti mbi na lo bata ni, lo si lo ndoye mbi. Nga, zo so andoye mbi, Babâ ti mbi ayeke ndoye lo.”​—Jean 14:21.

12. Mbeni lege nde wa la e lingbi ti fa so e yeke mä Jésus?

¹² Mbeni lege nde so e lingbi ti fa so e yeke mä Jésus ayeke ti tene e sara kua maboko na maboko na azo so lo zia ala ti mû li ni na popo ti e (aHéb. 13:7, 17). Bungbi ti Jéhovah asara achangement mingi na yâ ti angu so ahon ade ti ninga ape. Achangement so andu sarango kua na afini gbakuru nga na afini kode ti fango tënë, lege so e yeke sara na abungbi ti e ti milieu ti yenga nga na lege so a yeke leke na aDa ti Royaume wala a yeke leke peko ni nga na bango lege ni. E kiri singila mingi ndali ti nzoni fango lege so a fa na e na ndoye. E yeke na confiance so Jéhovah ayeke iri tënë nzoni na ndö ti angangu so e yeke sara ti sara ye alingbi na afango lege so bungbi ti lo ayeke fa na e.

13. Tongana e yeke mä Jésus anzoni ye wa la e yeke wara?

¹³ E yeke wara aye ti nzoni tongana e sara ye alingbi na aye kue so Jésus afa. Jésus atene na adisciple ti lo so afango ye ti lo ayeke dë bê ti ala. Lo tene: “Ala yeke wara dengo bê ndali ti ala wani. Ndali ti so a yeke ngangu pëpe ti yô joug ti mbi na kungba ti mbi ayapu.” (Mat. 11:28-30). Bible, so na yâ ni a yeke wara aÉvangile osio so asara tënë ti mbaï ti fini ti Jésus nga na ti kua ti lo ti fango tënë, adë bê ti e nga asara si e yeke na ndara (Ps. 19:7; 23:3). Jésus atene: “Ngia ayeke na ala so amä tënë ti Nzapa na abata ni!”​—Luc 11:28.

14-15. (a) Ota ngoi, so a sara tënë ni na Jean 12:27, 28, so Jéhovah angbâ kâ na yayu lo sara tënë ayeke so wa? (b) Ngbanga ti nyen la atënë ti Jéhovah so adë bê ti Jésus nga akpengba lo?

¹⁴ Diko Jean 12:27, 28. Évangile ti Jean asara tënë ti ota ngoi so Jéhovah angbâ na yayu kâ lo sara tënë. Alango mingi ape kozo na kuâ ti Jésus, lo yeke lani na Jérusalem ti sara ndangba Pâque. Lo tene: “Mbi yeke kpô pëpe.” Na pekoni, lo sambela, lo tene: “Babâ, mû gloire na iri ti mo.” Ti kiri tënë na lo, Babâ ti lo angbâ na yayu kâ atene: “Mbi mû gloire na ni awe na mbi yeke kiri ti mû gloire na ni.”

 ¹⁵ Jésus ayeke lani kpô ape ndali ti kota ye so lo yeke na ni ti sara so ayeke ti ngbâ be-ta-zo na Jéhovah. Jésus ahinga lani so a yeke gue ti pika lo na zaza ngangu nga lo yeke kui sioni kuâ (Mat. 26:38). Ye so ayeke kota mingi na lê ti Jésus ayeke ti mû gloire na iri ti Babâ ti lo. A bi tënë na li ti Jésus a tene lo zonga Nzapa, na lo gi bê ti lo so kuâ ti lo ayeke ga na zonga na ndö ti Nzapa. Kite ayeke dä ape so atënë ti Jéhovah so amû confiance na Jésus mingi. Lo lingbi ti duti na kite ape so iri ti Jéhovah ayeke wara gloire. Atënë ti Babâ ti Jésus so adoit lani ti dë bê ti lo nga ti kpengba lo ti gbu ngangu na yâ ti pasi so ayeke si na lo. Atâa so Jésus alingbi ti duti oko zo so ayeke lani dä so amä yâ ti ye so Babâ ti lo atene na ngoi ni so, Jéhovah asara kue ti tene a sû atënë ti Lo so ndali ti e kue.​—Jean 12:29, 30.

16. Ngbanga ti nyen la na ambeni ngoi e lingbi ti gi bê ti e na ndö ti zonga so aga na ndö ti iri ti Nzapa?

¹⁶ Legeoko tongana Jésus, e nga kue e lingbi ti gi bê ti e na ndö ti zonga so aga na ndö ti iri ti Jéhovah. Peut-être tongana ti Jésus, a sara ye na e na lege ni ape. Wala e lingbi ti gi bê ti e mingi ndali ti atënë ti mvene so azo so ake e ayeke tene na ndö ti e na so ala sara si amû ndo. E lingbi ti pensé na ndö ti zonga so atënë ti ala ni ayeke ga na ni na ndö ti iri ti Jéhovah nga na bungbi ti lo. Na angoi tongaso, atënë ti Jéhovah so ayeke na Jean 12:27, 28 ayeke dë bê ti e ngangu. E bezoin ti gi bê ti e ahon ndö ni ape. E lingbi ti duti na confiance so “siriri ti  Nzapa so ahon ndö ti bibe kue ayeke bata bê ti [e] nga na lege ti hingango ndo ti [e] na lege ti Christ Jésus.” (aPhil. 4:6, 7). Jéhovah ayeke mû gloire lakue na iri ti lo. Na lege ti Royaume, lo yeke zi ande asioni ye kue so Satan nga na dunia ti lo aga na ni na ndö ti awakua ti Lo so ayeke be-ta-zo.​—Ps. 94:22, 23; És. 65:17.

17. Ti gue oko na Ésaïe 30:21, tongana nyen la Jéhovah ayeke sara tënë na e laso?

¹⁷ Jéhovah angbâ ti sara tënë na e laso. (Diko Ésaïe 30:21.) Biani, e lingbi pëpe ti mä Nzapa angbâ kâ na yayu asara tënë na e. Ye oko, lo mû na e Mbeti ti lo, Bible, so na yâ ni lo fa na e aye ti sarango ni. Na ndö ni, yingo ti Jéhovah apusu “zo ti batango ye so ayeke be-ta-zo” ti ngbâ ti mû na awakua ti lo kobe so alingbi na ala (Luc 12:42). E yeke na gbâ ti ambeti so a-imprimé ni nga na ati so ayeke na ndö ti Internet, gbâ ti avidéo nga na ambeti ti mango ni so alingbi ti mû maboko na e ti kpengba mabe ti e.

18. Tongana nyen la atënë ti Jéhovah akpengba mabe ti mo nga azi mbeto na yâ ti mo?

¹⁸ Zia e bata na li ti e atënë so Jéhovah atene na ngoi so Molenge ti lo ayeke lani na ndö ti sese. Zia si atënë ti Nzapa, so a sû na yâ ti Bible, asara si e yeke na confiance so Jéhovah ayeke na komandema na ndö ti aye kue nga so lo yeke zi ande aye ti sioni kue so Satan na sioni dunia ti lo aga na ni. Nga, zia e leke na bê ti e ti ngbâ ti mä go ti Jéhovah nzoni. Tongana e sara ni, e yeke gbu ngangu nzoni na yâ ti akpale kue so e yeke wara laso nga na ati so ayeke ga. Bible adabe ti e atene: “A lingbi ala kanga bê, si na peko ti so ala sara ye so bê ti Nzapa aye awe, ala wara ye ti peko ti zendo ni.”​—aHéb. 10:36.