1. Siokpari so ayeke na terê ti e asara awakua ti Nzapa mingi so ayeke be-ta-zo tongana nyen?

BAZENGELE PAUL atene: “So mawa na mbi!” (aRom. 7:24). Laso, awakua ti Nzapa mingi so ayeke be-ta-zo adécouragé nga vundu asara ala tongana ti Paul. Ngbanga ti nyen? Ngbanga ti so atâa so e ye ti sara ye so anzere na Jéhovah, siokpari ayeke na terê ti e nga e yeke mbilimbili-kue ape. Ni la e lingbi ti découragé na ngoi so e sara pëpe ye so bê ti lo aye. Ambeni Chrétien so asara mbeni kota siokpari apensé même so Jéhovah alingbi ti pardonné ala lâ oko ape.

2. (a) Tongana nyen la Psaume 34:22 afa so a lingbi awakua ti Jéhovah apensé ahon ndö ni ape so tënë ayeke na li ti ala? (b) Nyen la e yeke bâ ni na yâ ti article so? (Bâ encadré “ Aye so afa ye na e wala aye so ayeke fä ti ambeni ye nde?”)

² Bible adë bê ti e so a lingbi azo so akpe na mbage ti Jéhovah ti bata fini ti ala apensé ahon ndö ni ape so tënë ayeke na li ti ala. (Diko Psaume 34:22.) Ti kpe na mbage ti Jéhovah ti bata fini ti e aye ti tene nyen? Aye wa la a lingbi e sara ti tene Jéhovah asara nzoni bê na e nga lo pardonné e? E yeke wara kiringo tënë na ahundango  ndo so tongana e manda ye na ndö ti agbata ti batango zo na Israël ti giriri. A yeke tâ tënë so mbele ti Ndia ahunda ti tene a zia na sese ambeni gbata ti tene zo akpe dä ti bata fini ti lo, me a changé mbele ti Ndia ni na Pentecôte ti ngu 33. Ye oko, girisa ape so Ndia ni alondo na Jéhovah. Tongaso, ziango na sese agbata ti batango zo afa na e pensé ti Jéhovah na ndö ti siokpari, na ndö ti azo so asara siokpari nga na ndö ti changengo bê. Kozoni kue, zia e bâ ndani so a zia na sese agbata so nga na aye so a yeke sara na yâ ni.

3. Azo ti Israël ayeke sara lani nyen na mbeni zo so afâ zo na mbana?

³ Na ngoi kue so a tuku mênë ti zo na Israël ti giriri, a yeke kete ye na Jéhovah ape. Tongana mbeni zo ti Israël afâ zo na mbana, fami ti zo ni ti koli, so a iri lo “zo so ayeke na droit ti fâ zo so afâ mbeni zo,” alingbi ti fâ lo (Nom. 35:19). Na lege so, zo so afâ zo so tënë ayeke na li ti lo ape ayeke futa kuâ ti zo ni so na fini ti lo. Tongana a fâ zo ni hio, a yeke bata Sese ti Zendo si aga sioni ape, ndali ti so Jéhovah atene: “Ala sara pëpe si sese so ala yeke dä aga sioni, ndali ti so [tukungo mênë ti zo] ayeke sara si sese aga sioni.”​—Nom. 35:33, 34.

4. Na Israël, a yeke sara ye lani tongana nyen na mbeni zo so afâ zo na mbana ape?

⁴ Ka tongana mbeni zo ti Israël afâ zo na mbana ape? Atâa so lo sara ni na mbana ape, mênë ti zo so lo fâ lo, so tënë ayeke na li ti lo ape, ayeke na li ti lo (Gen. 9:5). Na nzoni bê, a zia lege na lo ti kpe ti gue na mbeni oko ti agbata omene ti batango zo si zo so ayeke na droit ti fâ zo so afâ mbeni zo afâ lo ape. Kâ, a yeke bata lo. A lingbi zo so afâ zo na mbana ape angbâ na yâ ti gbata ti batango zo juska kota prêtre akui.​—Nom. 35:15, 28.

5. Tongana nyen la ndia so Jéhovah amû ti zia agbata ti batango zo nde alingbi ti mû maboko na e ti hinga lo nzoni mingi?

⁵ A yeke pëpe azo la afa agbata ti batango zo so. Jéhovah atene na Josué: “Mo tene na azo ti Israël, mo tene: ‘Ala soro agbata ti batango zo.’” A ‘zia agbata so nde’. (Jos. 20:1, 2, 7, 8). So Jéhovah la atene na ala ti zia agbata so nde, e lingbi ti hunda terê ti e: Tongana nyen la ziango agbata so nde amû maboko na e ti hinga ye nzoni mingi na ndö ti nzoni bê ti Jéhovah? Tongana nyen la a fa na e laso ye so e lingbi ti sara ti kpe na mbage ti Jéhovah ti bata fini ti e?

6, 7. (a) Fa kua so a-ancien ayeke sara na ngoi so ala yeke fâ ngbanga ti zo so afâ zo na mbana ape. (Bâ foto so ayeke na tongo nda ti article so.) (b) Ngbanga ti nyen la a yeke na lege ti ndara ti tene zo so akpe ague na gbata ti batango zo abâ a-ancien?

⁶ Na peko ti so mbeni zo afâ zo na mbana ape, lo doit ti kpe lo gue na mbeni gbata ti batango zo. Na yanga ti gbagba ni, lo “fa tënë ti ye so asi na lo na a-ancien ti gbata ni so.” A lingbi a-ancien ni ayamba lo nzoni (Jos. 20:4). Ambeni ngoi na pekoni, a yeke kiri na lo na gbata so lo fâ zo ni dä ti tene a-ancien ti gbata ni afâ ngbanga na ndö ti lo (Diko Nombre 35:24, 25.) Tongana a-ancien ni abâ so lo fâ zo ni na mbana ape, lo yeke kiri na gbata ti batango zo.

⁷ Ngbanga ti nyen la a lingbi zo ni asara tënë na a-ancien? A lingbi a-ancien asara kue ti tene sioni alï na yâ ti congrégation ti Israël ape nga ti mû maboko na zo so afâ zo na mbana ape ti tene Jéhovah asara nzoni bê na lo. Mbeni wandara atene tongana zo ni ague pëpe ti bâ a-ancien, a lingbi ti fâ lo. Lo tene nga, lo tene: “Mênë ti lo ayeke na li ti lo wani, ndali ti so lo gi pëpe ti wara nzoni na lege ti ye so Nzapa aleke ti bata lo.” Ye ti mungo maboko na zo so afâ zo na mbana ape ayeke lani dä, me a lingbi lo gi ni nga lo yeda na ni. Tongana lo gue pëpe na mbeni gbata ti batango zo so Jéhovah azia ni nde, fami ti zo so lo fâ lo so ti koli alingbi ti fâ lo.

8, 9. Ngbanga ti nyen la a lingbi mbeni Chrétien so asara kota siokpari asara tënë ni na a-ancien?

 ⁸ Laso, mbeni Chrétien so asara kota siokpari ayeke na bezoin ti tene a-ancien amû maboko na lo ti kiri ti duti na nzoni songo na Jéhovah. Ngbanga ti nyen la a yeke kota ye? Kozoni, Bible afa so Jéhovah la aleke ti tene a-ancien abâ lege ti kota siokpari (Jacq. 5:14-16). Use ni, a-ancien ayeke mû maboko na zo so asara siokpari na so achangé bê ti lo ti kiri ti ga nzoni na lê ti Nzapa nga ti sara siokpari ni encore ape (aGal. 6:1; aHéb. 12:11). Ota ni, a soro a-ancien nga a fa na ala ti dë bê ti azo so asara siokpari na so achangé bê ti ala na lege so ala yeke mû maboko na ala ti hon ndö ti vundu ti ala nga ti bâ pëpe so tënë ayeke na li ti ala. Jéhovah airi a-ancien so “ndo ti kpe dä ti bata terê ndali ti ngu-nzapa so apika na kota pupu.” (És. 32:1, 2). Biani, Jéhovah afa nzoni bê na e na lege so lo mû na e a-ancien.

⁹ Awakua ti Nzapa mingi awara dengo bê na peko ti so ala gi mungo maboko ti a-ancien. Na tapande, Ita Daniel asara lani mbeni kota siokpari, me na yâ ti anze mingi, lo sara mbeto ti sara tënë ni na a-ancien. Lo tene: “Na peko ti so ngoi ahon mingi, mbi pensé so a-ancien apeut ti sara mbeni ye oko ndali ti mbi encore ape. Mbi yeke sara mbeto lakue so mbeni zo ayeke hinga ande tënë ti siokpari so mbi sara nga mbi yeke ku ti wara sioni ti peko ti asarango ye ti mbi. Nga na ngoi so mbi yeke sambela Jéhovah, mbi bâ so a lingbi mbi komanse lakue na hundango pardon ndali ti ye so mbi sara.” Na nda ni, Daniel ahunda na a-ancien ti mû maboko na lo. Tongana lo dabe ti lo na ngoi ni so, lo tene: “Mbeto asara mbi lani ti bâ a-ancien. Me na peko ti so mbi bâ ala, a yeke mo bâ mo tene mbeni zo azi mbeni nengo kungba na ndö ti go ti mbi. Fadeso, mbi bâ so mbi lingbi ti ga nduru na Jéhovah sân ti tene mbeni ye akanga lege na mbi.” Laso, Daniel ayeke na nzoni conscience, na lo ga wakua ti mungo maboko ade ti ninga ape.

10. Tongana mbeni zo so afâ zo na mbana ape aye ti tene a sara nzoni bê na lo, a lingbi lo sara nyen?

¹⁰ A lingbi mbeni zo so afâ zo na mbana ape asara ambeni ye si a sara nzoni bê na lo. A lingbi lo kpe lo gue na gbata ti batango zo so ayeke nduru na lo. (Diko Josué 20:4.) E lingbi  pëpe ti pensé so zo ni ayeke sara ye gï tongaso; tongana lo ye ti ngbâ na fini, a lingbi lo gue na gbata ni hio na lo ngbâ kâ. A lingbi lo sara ambeni sacrifice. A lingbi lo zia kua ti lo, nzoni da ti lo nga na liberté so lo yeke na ni ti voyagé juska kota prêtre ni akui si. * (Nom. 35:25). Me asacrifice so ayeke ndali ti nzoni ti lo. Tongana lo sigi na yâ ti gbata ti batango zo, lo yeke fa so lo bâ mênë ti zo so lo fâ lo tongana senge ye, nga a lingbi ti fâ lo.

11. Tongana nyen la mbeni Chrétien so achangé bê ti lo alingbi ti fa so lo kiri singila mingi ndali ti nzoni bê ti Nzapa?

¹¹ Legeoko nga, ti tene Nzapa asara nzoni bê na mbeni zo so asara siokpari na so achangé bê ti lo, a lingbi zo ni asara ambeni ye. A lingbi lo zia ti sara siokpari nga lo kpe aye kue so alingbi ti gue na lo ti sara kota siokpari. Bazengele Paul afa aye so “vundu so ague oko na ye so bê ti Nzapa aye” apusu aChrétien ti Corinthe, so achangé bê ti ala, ti sara. Lo tene: “Ala sara ye na ngangu ti ala kue, ala gi ti zi tënë na li ti ala, bê ti ala ason na sioni ye so asi, ala yeke na mbeto ti Nzapa, ala ye mingi ti sara ye, ala yapu na sarango ye, ala leke ye ti sioni so asi.” (2 aCor. 7:10, 11). Tongana e sara kue ti zia ti sara siokpari ni, e yeke fa na Jéhovah so e gi bê ti e mingi na ndö ti dutingo ti e nga so e pensé pëpe so nyen na nyen lo yeke sara nzoni bê na e.

12. Aye wa la peut-être a lingbi mbeni Chrétien azia lege ni ti tene Jéhovah angbâ ti sara nzoni bê na lo?

¹² Aye wa la peut-être a lingbi mbeni Chrétien azia lege ni ti tene Jéhovah angbâ ti sara nzoni bê na lo? A lingbi lo duti nduru ti ke même aye so lo ye ni mingi tongana aye ni so ayeke pusu lo ti sara siokpari (Mat. 18:8, 9). Na tapande, tongana akamarade ti mo ayeke pusu mo ti sara aye so anzere na Jéhovah ape, mo yeke fâ yâ ti songo ti mo na ala? Tongana a yeke ngangu na mo ti nyon sämba gï kete, mo yeke kpe aye so alingbi ti pusu mo ti nyon sämba ahon ndö ni? Tongana a yeke ngangu na mo ti kanga nzara ti mo ti bungbingo koli na wali, mo yeke kpe afilm, asite ti Internet wala aye so alingbi ti sara si mo wara asioni pensé? Girisa ape so asacrifice kue so e sara ti ngbâ ti duti be-ta-zo na Jéhovah ayeke ndali ti nzoni ti e. Tongana e pensé so Jéhovah adö e azia, a yeke son e ahon aye kue. Nga, tongana e hinga so “tâ ndoye” ti Jéhovah na mbage ti e ayeke ndoye so “angbâ lakue lakue”, e yeke na ngia mingi.​—És. 54:7, 8.

13. Fa ndani so mbeni zo so ayeke na yâ ti gbata ti batango zo ahinga so a yeke sara sioni na lo ape, lo yeke duti nzoni nga na ngia.

¹³ Na peko ti so zo ni alï na yâ ti gbata ti batango zo, lo hinga so a yeke sara sioni na lo ape. Na ndö ti agbata so, Jéhovah atene: ‘Agbata ni so ayeke ga ande ndo ti batango terê ndali ti ala.’ (Jos. 20:2, 3). Jéhovah ahunda pëpe ti tene a kiri a fâ ngbanga na ndö ti zo so afâ zo na mbana ape, nga a zia lege pëpe na “zo so ayeke na droit ti fâ mbeni zo so afâ zo” ti lï na yâ ti gbata ni ti fâ lo. Na ngoi kue so zo ni ayeke na yâ ti gbata ni, a yeke sara sioni na lo ape nga Jéhovah ayeke bata lo. A yeke pëpe mbeni da ti kanga. Lo lingbi ti sara kua, ti mû maboko na azo nga ti sara na Jéhovah na siriri. Biani, gigi ti lo alingbi ti nzere na lo.

14. Nyen la mbeni Chrétien so achangé bê ti lo alingbi ti hinga ni biani?

¹⁴ Ambeni wakua ti Nzapa so asara akota siokpari na so achangé bê ti ala angbâ ti bâ so tënë ayeke na li ti ala. Ala pensé même so Jéhovah ayeke girisa ande lâ oko ape siokpari so ala sara. Tongana mo bâ ni tongaso, hinga biani so tongana Jéhovah apardonné mo, lo pardonné mo kue kue kue. Daniel, so e sara tënë ti lo fade, ahinga so tënë so ayeke tâ tënë. Na peko ti so a-ancien akiri na lo na nzoni lege nga ala mû maboko na lo ti kiri ti  duti na nzoni conscience, lo tene: “Mbi bâ so mbi lingbi ti kiri ti wu pupu. Na peko ti so a bâ lege ti tënë ni, a lingbi mbi pensé encore ape so tënë ayeke na li ti mbi. Tongana a zi siokpari ti mo awe, a zi ni awe. Tongana ti so Jéhovah atene, lo zi aye kue so ane na ndö ti mo, lo zia ni yongoro na mo. Mo yeke kiri ti bâ ni encore ape.” Na peko ti so mbeni zo alï na yâ ti gbata ti batango zo, lo yeke na bezoin encore ape ti ngbâ ti bâ ndo na peko ti bâ wala zo so ayeke na droit ti fâ zo so afâ zo ayeke ga ti fâ lo. Legeoko nga, na peko ti so Jéhovah apardonné siokpari ti e, e yeke na mbeto ape so lo yeke gi mbeni raison ti kiri na ndö ni wala ti fâ ngbanga na ndö ti e ndali ni.​—Diko Psaume 103:8-12.

15, 16. So e hinga so Jésus afuta ye ti zi azo nga lo yeke Kota prêtre ti e, a sara si e yeke na confiance mingi na nzoni bê ti Nzapa tongana nyen?

¹⁵ Ti tâ tënë ni, e yeke na mbeni raison so ayeke kota mingi ahon ti azo ti Israël ti sara confiance na nzoni bê ti Jéhovah. Na peko ti so Paul atene mawa asara lo ndali ti so lo lingbi pëpe ti mä yanga ti Jéhovah na yâ ti aye kue, lo tene: “Singila na Nzapa na lege ti Jésus Christ Seigneur ti e!” (aRom. 7:25). Biani, atâa so Paul atiri na asioni nzara nga lo sara ândö siokpari, lo changé bê ti lo. Tongaso, lo hinga so Nzapa apardonné lo na lege ti Jésus. So Jésus afuta ye ti zi e, lo sara si e yeke na nzoni conscience nga lo mû na e siriri ti bê (aHéb. 9:13, 14). Ndali ti so lo yeke Kota prêtre ti e, “ala so ayeke ga nduru na Nzapa na lege ti lo, lo lingbi nga ti sö ala biani biani, ngbanga ti so lo yeke lakue na fini ti hunda ye ndali ti ala.” (aHéb. 7:24, 25). Giriri, kota prêtre ayeke mû maboko na azo ti Israël ti hinga biani so Jéhovah ayeke pardonné siokpari ti ala. So Jésus ayeke kota prêtre ti e, e yeke na mbeni nzoni raison ti hinga biani so “a lingbi ti sara nzoni bê na e nga [ti] sara kota nzobe na e na ngoi so e yeke na bezoin ti tene a mû maboko na e.”​—aHéb. 4:15, 16.

¹⁶ Tongaso, ti kpe na mbage ti Jéhovah ti bata fini ti mo, a lingbi mo mä na bê na sandaga ti Jésus. Bâ pëpe ye so a futa ti zi azo gï tongana mbeni ye so a sara ni ndali ti azo mingi. Mä na bê so a sara ni ndali ti mo (aGal. 2:20, 21). Mä na bê so ndali ti so a futa ye ti zi azo, Jéhovah apardonné asiokpari ti mo. Mä na bê so grâce na ye so a futa ti zi azo, mo yeke na beku ti fini ti lakue lakue. Sandaga ti Jésus ayeke matabisi so Nzapa amû na mo.

17. Ngbanga ti nyen la mo ye ti kpe na mbage ti Jéhovah ti bata fini ti mo?

¹⁷ Agbata ti batango zo amû maboko na e ti hinga ye nzoni na ndö ti nzoni bê ti Jéhovah. Ye so Nzapa aleke so afa na e so fini ayeke nzoni-kue, a fa na e tongana nyen la a-ancien alingbi ti mû maboko na e, a fa na e ye so aye ti tene ti tâ changengo bê nga ndani so e lingbi ti hinga biani so Jéhovah ayeke pardonné e. Mo yeke kpe na mbage ti Jéhovah ti bata fini ti mo? Mbeni ndo ti gue dä ti bata terê ti mo nzoni tongaso ayeke dä ape (Ps. 91:1, 2). Na yâ ti article ti peko, e yeke bâ tongana nyen la agbata ti batango zo ayeke mû maboko na e ti sara ye tongana Jéhovah, so lo yeke nzoni tapande ti zo so afâ ngbanga mbilimbili nga asara nzoni bê na zo.