ALLEN * ayeke gi ti sara achangement ti lingbi na fini congrégation ti lo so ayo kilomètre 1 400 na kodro ti lo. Lo tene: “Mbeto asara mbi lani ti ga ge. Mbi hinga lani ape wala mbi yeke wara akamarade ge wala azo ayeke ye mbi.”

Mo kue, tongana mo gue na mbeni fini congrégation, peut-être mbeto alingbi ti sara mo. Nyen la alingbi ti mû maboko na mo ti sara achangement so a hunda? Nyen la mo lingbi ti sara tongana a yeke ngangu na mo mingi ti sara achangement so? Ka tongana mo gue na mbeni fini congrégation ape, tongana nyen la mo lingbi ti sara si a yeke ngangu ape na azo so aga fini fini ti sara achangement?

Gbu li ti mo na ndö ti tapande so: Tongana a zi mbeni keke a gue a lu ni na mbeni ndo nde, keke ni ayeke wara ambeni kpale. Na ngoi so a yeke zi keke ni na yâ ti sese, a yeke fâ ka mingi ti agunda ni, tongaso si a yeke ngangu ape ti hon na ni. Tongana a lu ni awe, gunda ni adoit ti komanse ti lï sese hio. Legeoko nga, tongana mo gue na mbeni fini congrégation, mo lingbi ti wara ambeni kpale. Gere ti mo alï sese na yâ ti congrégation so mo yeke dä kozo na lege so mo yeke na akamarade so mo ye ala mingi nga mo yeke na mbeni kapa ti mo ti sara na kua ti Jéhovah. Fadeso, a lingbi gere ti mo alï sese si mo maï na fini ndo so mo yeke dä. Nyen la alingbi ti mû maboko na mo? Sarango ye alingbi na amama-ndia ti Bible. Zia e bâ ambeni mama-ndia ni.

Zo so ayeke diko Bible lakue ayeke ga “tongana keke so a lu ni na terê ti angu so asua, keke so alë na ngoi ti lo, na kugbe ni ahule pëpe. Ye kue so lo sara ayeke ga nzoni.”​—Ps. 1:1-3.

Gï tongana ti so mbeni keke adoit ti nyon ngu si amaï nzoni, Chrétien adoit ti diko Bible lakue si lo ngbâ ti duti na kpengba songo na Jéhovah. Tongaso, ngbâ ti diko Bible lakue nga ti gue na abungbi lakue. Ngbâ ti bata nzoni kapa ti vorongo Nzapa na yâ ti sewa nga na mandango Bible mo wani. Aye kue so mo yeke sara lani ti kpengba songo ti mo na Jéhovah na yâ ti kozo congrégation ti mo, mo yeke na bezoin ti ngbâ ti sara ni nga.

“Zo so akpengba azo, azo ayeke kpengba lo nga.”​—aProv. 11:25.

Tongana mo yeke fa tënë lakue, mo yeke kiri ti wara ngangu nga mo yeke habitué na ndo ni hio. Kevin so ayeke mbeni ancien atene: “Hio na peko ti so mbi na wali ti mbi e si na yâ ti fini congrégation ti e, ye so amû maboko na e mingi ayeke kua ti pionnier auxiliaire. Hio, e hinga aita, apionnier nga na territoire ti e.” Roger, so ague na mbeni fini congrégation so ayo kilomètre 1600 na ndo so lo sara kodro dä kozo, atene: “Pendere lege ti sara achangement ti lingbi na mbeni fini congrégation ayeke ti fa tënë mingi tongana lege ayeke dä. Nga, fa na a-ancien so mo lingbi ti mû maboko na yâ ti aye kue so a yeke na bezoin ti mungo maboko dä, peut-être ti leke yâ ti Da ti Royaume, ti sara ambeni mbage ti bungbi na place ti mbeni zo so ayeke dä ape wala ti gue ti mû mbeni zo ti gue na lo na bungbi. Tongana aita abâ so mbeni zo so aga fini fini ayeke sara asacrifice, a yeke duti ngangu na ala ape ti sara kamarade na lo.”

“Ala maï ndoye so ayeke na bê ti ala.”​—2 aCor. 6:13.

Maï ndoye ti aita. Na peko ti so Melissa na azo ti sewa ti lo ague na mbeni fini congrégation, ala zia li ti ala gï na ndö ti warango afini kamarade. Lo tene: “E yeke si na Da ti Royaume kozo nga e yeke ngbâ aninga  na peko ti bungbi. Ye so amû maboko na e ti sara lisoro mingi na aita ahon ti bara gï ala.” A mû nga maboko na sewa ni ti hinga hio iri ti azo mingi. Na ndö ni, ala maï ndoye ti ala na lege so ala yamba azo na ndo ti ala, ye so akpengba songo ti ala na afini kamarade ti ala. Lo kiri lo tene: “E mû numero ti téléphone ti e na mba, tongaso si e lingbi ti wara terê hio ti sara kua ti Jéhovah nga na ambeni ye nde.”

Tongana mo gi bê ti mo mingi na ndö ti sarango lisoro na afini zo, mo lingbi ti komanse na akete kete ye. Na tapande, he ngia kete, même tongana mo bâ so na tongo nda ni a yeke ngangu. Tongana mo he ngia na azo ayeke gboto ala na mbage ti mo. Ndali ti so “zo so abâ mba ti lo na ngia na bê asara si bê ti zo ayeke na ngia”. (aProv. 15:30, kete tënë na gbe ni.) Rachel, so ague na mbeni fini congrégation so ayo mingi na ndo so lo kono dä, atene: “Mbi yeke kamene mingi. Na ambeni ngoi, mbi yeke sara ngangu ti sara tënë na aita ti yâ ti fini congrégation ti mbi. Mbi yeke gue na terê ti mbeni zo so aduti na Da ti Royaume na lo sara tënë na zo oko ape. Peut-être lo yeke kamene tongana mbi.” Leke na bê ti mo ti sara lisoro na mbeni fini zo kozo nga na peko ti bungbi.

Nga, na akozo yenga so mo si na yâ ti fini congrégation ni, peut-être a nzere na mo mingi ti wara terê na afini zo. Me tongana ngoi ayeke hon nzara ni so ayeke girisa. Na mara ti ngoi tongaso, mo yeke peut-être na bezoin ti sara ngangu ti ngbâ ti wara afini kamarade.

Ambeni keke ayeke mû ngoi mingi ti tene gunda ni alï sese ngangu na ndo so a lu ni dä. Legeoko nga, zo kue la ayeke habitué hio na mbeni fini congrégation ape. Tongana mo gue na mbeni fini congrégation aninga awe me mo ngbâ ti sara achangement, sara ye alingbi na amama-ndia ti Bible so, so alingbi ti mû maboko na mo:

“Zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, e yeke ko ande lengo ni tongana e woko pëpe.”​—aGal. 6:9.

Mû ngoi mingi ti sara achangement ni ahon ti so mo pensé fade. Na tapande, amissionnaire mingi so asara Ekole ti Galaad ayeke ngbâ na ndo so a tokua ala dä teti angu mingi kozo ti tene ala gue na kodro ti ala ti bâ afami. So ala sara tongaso amû maboko na ala ti kpengba songo ti ala na aita ti ndo ni nga ti sara achangement ti lingbi na ngobo ti ndo ni.

Alejandro, so ague na afini congrégation fani mingi, ahinga so ayeke sara achangement na loro ape. Lo tene: “Na peko ti so e gue na tanga ti fini congrégation ti e, wali ti mbi atene, ‘Akamarade ti mbi kue ayeke na yâ ti congrégation so e yeke dä kozo ti ga ge.’” Lo dabe ti wali ti lo so lo tene lani oko mara ti tënë so asara ngu use awe na ngoi so ala gue na mbeni fini congrégation. Me na yâ ti angu use ni so, wali ti lo abi bê na amba ti lo nga lo na azo so ala hinga terê kozo ape aga akamarade.

“Tene pëpe: ‘Nyen la si ngoi ti ândö ayeke nzoni ahon ti laso so?’ ndali ti so a yeke na lege ti ndara pëpe ti hunda ndo tongaso.” ​—Zo-ti. 7:10.

Haka pëpe fini congrégation ti mo na ti so mo yeke lani dä kozo. Na tapande, aita ti fini congrégation ti mo alingbi ti sara kamene mingi wala ala sara tënë mingi ahon ti so mo yeke sara ka. Bâ gï anzoni sarango ye ti ala, tongana ti so mo ye ala bâ gï anzoni sarango ye ti mo. Li ti ambeni zo so aga fini fini akpe na ala hunda  terê ti ala, ala tene: ‘Eskê mbi ndoye biani “sewa ti e ti aita kue”’?​—1 Pi. 2:17.

“Ala ngbâ ti gi ye, na ala yeke wara ni.” ​—Luc 11:9.

Ngbâ ti sambela Jéhovah ti mû maboko na mo. David, so ayeke mbeni ancien, atene: “Gi pëpe ti gbu ngangu gï mo oko. E lingbi ti sara aye mingi gï tongana Jéhovah amû maboko na e si. Sambela ndali ni.” Rachel, so e sara tënë ti lo fade, atene: “Tongana mbi na koli ti mbi e bâ lani so e yeke amembre ti congrégation ti e ape, e sambela mbilimbili ndali ni e tene: ‘Pardon Jéhovah fa na e ye so e sara si ayeke ngangu na aita ti ga nduru na e.’ Na pekoni, e mû ngoi mingi ti duti na aita.”

Ababâ na amama, tongana a yeke ngangu na amolenge ti ala ti sara achangement, zia ala mû ngoi ti sambela legeoko na ala na ndö ni. Ala mû maboko na ala ti wara afini kamarade na lege so ala leke ambeni ye ti mû lege na ala ti wara terê na aita ti kpengba mba.

Nyen la mo lingbi ti sara ti mû maboko na azo so aga fini fini na yâ ti congrégation ti mo? Na tongo nda ni, sara kue ti duti tâ kamarade. Ti sara ni, gi ti bâ na yâ ti li ti mo aye wa la ayeke nzere na mo mingi tongana mo ga fini fini na yâ ti mbeni congrégation. Na pekoni, sara aye ni so (Mat. 7:12). Mo lingbi ti tisa azo so aga fini fini na ngoi ti vorongo Nzapa na yâ ti sewa ti mo wala ti tene ala bâ JW Télédiffusion? Mo lingbi ti tisa ala ti fa tënë legeoko na mo? Tongana mo na ala ate mbeni kete ye place oko, ala yeke girisa ande ape bibe so mo yeke na ni ti yamba azo. Ambeni ye wa la mo lingbi ti sara ti mû maboko na azo so aga fini fini?

Carlos atene: “Na ngoi so e si na yâ ti fini congrégation ti e, mbeni ita-wali amû na e iri ti amagazin so ngere ti aye ayeke ngangu dä ape. A mû maboko na e mingi.” A yeke nzere peut-être mingi na azo so alondo na mbeni ndo nde si aga ti tene a fa na ala tongana nyen ti yü bongo na ngoi ti ndowa, ti dê wala ti ngu-nzapa. Mo lingbi ti mû maboko na ala ti fa tënë nzoni na lege so mo fa na ala mbaï ti azo ti ndo ni wala ye so azo ni amä na bê na ni.

Allen, so e sara tënë ti lo fade na tongo nda ni, ahon ngu oko na yâ ti fini congrégation ti lo awe. Lo tene: “Mbi doit lani ti mû li ni kozo ti hinga aita. Laso, ala bâ terê ti ala tongana afami ti mbi na a nzere na mbi.” Allen aga ti bâ so atâa so lo gue na mbeni fini congrégation, lo yeke sân kamarade ape. Lo wara afini kamarade so na bango ni ala yeke ngbâ lakue akamarade ti lo.