Versê so, so apusu zo ti gbu li, atene: “Na ndo so mo yeke dä, tongana mo bâ a yeke sara ye ti ngangu na awayere wala a yeke fâ ngbanga kirikiri wala a yeke sara ye ti mbilimbili pëpe, zia bê ti mo adö pëpe, ndali ti so mbeni zo so ayeke kota ahon kota zo ti ndo ni so ayeke bâ aye so lo yeke sara so; nga, ambeni zo so ayeke kota ahon ala use so ayeke dä.”—Zo-ti. 5:8.

Na bango ndo ti zo, versê so asara tënë nzoni mingi na ndö ti azo ti gouvernement so ayeke na komandema. Me tongana e gbu li ti e na ndö ni nzoni, a ye nga ti fa mbeni tâ tënë na ndö ti Jéhovah so ayeke dë bê ti e.

Zo-ti-fa-tene 5:8 aye ti sara tënë ti mbeni zo so ayeke na komandema so asara aye ti ngangu na awayere nga afâ ngbanga ti ala na lege ni ape. A lingbi zo so ayeke na komandema so agirisa ape so peut-être mbeni zo so ayeke na ndö ti lo wala so ayeke na komandema ahon lo na yâ ti gouvernement ayeke bâ aye so lo yeke sara. Nga, peut-être ambeni zo so ayeke même na kota ndo mingi ahon ala ayeke dä. Mawa ni ayeke so peut-être sarango ye ti azo kue so akomande na yâ ti agouvernement ayeke na lege ni ape, nga azo abâ pasi ndali ni.

Me atâa so, na bango ni, mbeni ye ti sarango ni ayeke dä ape, bê ti e adë so e hinga so Jéhovah ayeke bâ même aye so azo so ayeke na kota komandema na yâ ti agouvernement ayeke sara. E lingbi ti voro yanga na Nzapa ti mû maboko na e nga ti bi na ndö ti lo aye so ane e (Ps. 55:22; aPhil. 4:6, 7). E hinga so “lê ti Jéhovah ayeke bâ ndo na ndö ti sese kue ti mû ngangu ti lo ti mû maboko na azo so azia bê ti ala kue na lo.”—2 Chron. 16:9.

Tongaso, Zo-ti-fa-tene 5:8 afa na e tâ tënë na ndö ti azo ti gouvernement; lakue mbeni zo so ayeke na komandema na ndö ti ala ayeke dä. Me kota ye so versê so aye ti dabe ti e na ni ayeke so Jéhovah la ayeke na kota komandema na ndö ti azo kue. Lo yeke komande laso na lege ti Molenge ti lo, Jésus Christ, Gbia ti Royaume. Nzapa so ngangu ti lo ahon angangu kue, so ayeke bâ aye kue nga na azo kue, ayeke mbilimbili kue na yâ ti aye kue, Molenge ti lo nga kue ayeke tongaso.