Na 2 aCorinthien 12:2, 3, Paul asara tënë ti mbeni koli so “a mû lo a hon na lo juska na ota yayu ni”. Koli ni so ayeke lani zo wa? Na ngoi so Paul asû mbeti na congrégation ti Corinthe, lo gboto lê ti ala na ndö ti kua ti lo ti bazengele so Nzapa amû na lo (2 aCor. 11:5, 23). Na pekoni, lo sara tënë ti ‘avision nga na ti aye so Seigneur afa na lo.’ Ge so Paul asara lani tënë ti ambeni ita-koli nde ape. Tongaso, a yeke na lege ni ti tene so lo yeke sara lani tënë ti lo wani tongana koli so awara avision nga so Seigneur afa na lo aye.—2 aCor. 12:1, 5.

Tongaso, Paul ayeke lani zo so “a mû lo a hon na lo juska na ota yayu ni” nga “a hon na lo na paradis”. (2 aCor. 12:2-4). Lo sara lani kua na tënë “aye so Seigneur afa na lo” ti fa so a tene na lo tënë ti aye so ayeke duti ande na yâ ti ngoi so ayeke ga.

Nyen la Paul abâ lani so ayeke tongana “ota yayu ni”?

Na yâ ti Bible, tënë so a kiri peko ni na “yayu” alingbi ti sara tënë ti lê ti nduzu (Gen. 11:4; 27:28; Mat. 6:26). Me a sara nga kua na tënë “yayu” ti sara tënë ti ambeni ye nde. Na ambeni ngoi, a ye ti sara tënë ti komandema ti azo (Dan. 4:20-22). Wala a lingbi ti sara tënë ti komandema ti Nzapa na lege ti Royaume ti lo.—Apoc. 21:1.

Paul abâ lani “ota yayu ni”. Lo ye lani ti tene nyen? Na ambeni ngoi, Bible ayeke kiri na ndö ti mbeni ye fani ota ti luti na ndö ti ye ni, ti fa so ye ni ayeke kota ye (És. 6:3; Ézéch. 21:27; Apoc. 4:8). Na bango ni, so Paul asara tënë ti “ota yayu ni”, lo yeke sara lani tënë ti komandema so ayeke kota ahon atanga ni kue: Royaume ti Nzapa so Jésus Christ na amba ti lo agbia 144 000 ayeke komande na yâ ni. (Bâ Étude perspicace des Écritures, vol. 1, l. 473, 476.) Tongana ti so bazengele Pierre atene, na lege ti zendo ti Nzapa, e yeke ku “afini yayu”.—2 Pi. 3:13.

Ka ti “paradis” so Paul asara tënë ni?

Legeoko nga tënë “paradis” alingbi ti sara tënë ti aye nde nde: (1) Ti gue oko na ndo so Nzapa amû na zo na tongo nda ni, a lingbi ti duti na lege ni ti tene so “paradis” aye ti sara tënë ti vrai Paradis so ayeke duti ande na ndö ti sese na yâ ti ngoi so ayeke ga. (2) A lingbi nga ti sara tënë ti pendere dutingo ti awakua ti Nzapa na lege ti yingo na yâ ti fini dunia. (3) Na ndö ni, a lingbi ti sara tënë ti pendere dutingo ti awakua ti Nzapa na yayu, “paradis ti Nzapa” so a fa na Apocalypse 2:7.—Bâ Tour ti Ba Ndo ti lango 15 ti juillet 2015, l. 8 par. 8.

Peut-être na 2 aCorinthien 12:4, Paul ayeke sara lani tënë ti aye so ota kue na ngoi so lo yeke sara tënë ti aye so lo bâ.

Na nduru tënë:

“Ota yayu ni” so a sara tënë ni na 2 aCorinthien 12:2 alingbi biani ti duti Royaume ti Nzapa so ayeke na maboko ti Jésus Christ na azo 144 000, so ti tene “afini yayu”.—2 Pi. 3:13.

A yeke “ota yayu ni” ndali ti so Royaume ti Nzapa ayeke komandema so ayeke kota ahon atanga ni kue.

“Paradis” so “a mû [Paul] a hon” na lo dä na yâ ti vision alingbi ti sara tënë ti (1) vrai Paradis so ayeke duti ande na ndö ti sese na yâ ti ngoi so ayeke ga, (2) paradis ti yingo so ayeke duti ande dä, so na pekoni a yeke ga ande kota mingi ahon paradis ti yingo so ayeke dä fadeso nga (3) “paradis ti Nzapa” na yayu so ayeke duti ande dä na oko ngoi na yâ ti fini dunia.

Ti gue oko na tënë so, fini dunia ayeke duti ande afini yayu nga na fini sese so a bungbi ala oko. A yeke duti fini ye so a leke ni, so na yâ ni a yeke wara gouvernement ti Royaume so ayeke na yayu nga na azo so ayeke sara na Jéhovah na yâ ti paradis na ndö ti sese.