Ên-ën, Bible wala ambeti ti mbaï atene ape so aChrétien awara lani batême ndali ti akuâ.

Fason so a kiri peko ti versê so na yâ ti aBible mingi asara si ambeni zo apensé so na ngoi ti Paul a batize azo lani ndali ti akuâ. Na tapande, Bible Mbeti ti Nzapa, Tënë so amu fini atene: ‘Nyen la azo so ayeke wara batême ndali ti akuâ so ayeke gi? Tongana akuâ ayeke zingo pëpe?’

Gregory Lockwood, mbeni wandara ti Bible, atene so mbeni ye na yâ ti Bible wala na yâ ti mbaï ti azo afa ape so mbeni zo awara batême na place ti mbeni zo so akui awe. Gordon Fee, mbeni wandara ni nde, ayeda na tënë so. Lo tene so na yâ ti Bible wala na yâ ti mbaï ti azo a wara pëpe tapande ti mara ti batême so. Lo tene so Fini Testament asara tënë ni ape. Mbeni ye oko afa nga ape so akozo Chrétien wala aEglize so abâ gigi kete na peko ti kuâ ti abazengele asara ni.

Bible atene so adisciple ti Jésus adoit ti “sara si azo na popo ti amara kue aga adisciple. Ala batize ala. . . . Ala fa na ala ti bata aye kue so” lo mû yanga na ala ti sara (Mat. 28:19, 20). Kozo ti tene mbeni zo aga disciple na lo wara batême, a lingbi lo manda ye na ndö ti Jéhovah na Molenge ti lo, lo mä na bê na ala nga lo mä yanga ti ala. Mbeni zo so akui awe na so ayeke na yâ ti dû ti kuâ apeut ti sara ni ape; nga mbeni Chrétien so angbâ na fini apeut ti sara ni ndali ti lo ape.​—Zo-ti. 9:5, 10; Jean 4:1; 1 aCor. 1:14-16.

Tongaso, Paul aye ti tene nyen la?

Ambeni ita ti Corinthe atene lani so a yeke zingo ande akuâ ape (1 aCor. 15:12). Tongana nyen la Paul afa na ala so bango ndo ti ala ayeke na lege ni ape? Lo tene so ‘lâ na lâ lo bâ kuâ lê na lê’. Me lo ngbâ lani na fini. Atâa so lo tingbi na akpale so azia fini ti lo na lê ti kuâ, lo hinga lani na bê ti lo kue so lo yeke kui me na pekoni a yeke zingo lo ti wara fini na yayu, tongana ti Jésus.—1 aCor. 15:30-32, 42-44.

A-Chrétien ti Corinthe adoit lani ti hinga so, so a soro ala ti gue na yayu aye ti tene so lâ na lâ ala yeke wara akpale nga ala yeke kui kozo si a peut ti zingo ala. Tongaso, tongana “a batize [ala] na yâ ti Christ Jésus awe, a batize [ala nga] na yâ ti kuâ ti lo”. (aRom. 6:3). So aye ti tene so, tongana ti Jésus, ala yeke wara akpale nga ala yeke kui si na pekoni a zingo ala.

Ahon ngu use na peko ti so Jésus awara batême ti ngu, lo tene na abazengele ti lo use, lo tene: “Batême so mbi ngbâ ti wara ni so, ala yeke wara ni ande nga.” (Marc 10:38, 39). Ge, Jésus angbâ ti wara batême ti ngu ape. Lo ye ti sara tënë ti dutingo be-ta-zo ti lo na Nzapa so ayeke gue na lo na kuâ. Paul atene so aChrétien so a soro ala ti gue na yayu ayeke “bâ pasi legeoko na lo si a mû nga gloire na [ala] legeoko na lo.” (aRom. 8:16, 17; 2 aCor. 4:17). Tongaso, a lingbi ala nga kue akui si a zingo ala ti wara fini na yayu.

Tongaso, a lingbi ti kiri peko ti atënë ti Paul so nzoni tongaso: “Tongana ye ni ayeke tongaso pëpe, ala so a yeke batize ala ti tene ala duti akuâ, ala yeke sara ande nyen? Tongana a yeke zingo akuâ oko pëpe, ngbanga ti nyen a ngbâ ti batize nga ala ti tene ala ga akuâ?”