Atënë so azo ahunda

A yeke sioni ti sala mbeni ngia ti nginza tongana nginza ni ayeke gi kete?

Mbeti ti Nzapa afa tënë mingi pëpe na ndo salango angia ti nginza, me lo fa kamême atënë mingi so amû lege ti hinga so alege kue ti salango ngia ti nginza ague nde na akpengba-ndia ti Bible. * Na tapande, na ndo kue, azo ahinga so salango ngia ti nginza ayeke pusu zo ti sala bê ti wara ye. Gi ye so oko ayeke kota ye mingi ti bâ ndo dä teti aChrétien, ngbanga ti so Bible atene so “azo so bê asala ala” ayeke lï pëpe na yâ Royaume ti Nzapa, na lo zia “salango bê” na popo ti aye so ague oko na sambelango ayanda.​—1 aCorinthien 6:9, 10; aColossien 3:5.

Salango ngia ti nginza ayeke pusu nga zo ti lë fandara, na sioni bibe ti hon gi amba ti lo, kota nzara ti sö gi benda. Bazengele Paul ahunda ti sala hange na amara ti bibe tongaso tongana lo sû na mbeti: “A lingbi e zia fandara, na e zia ti gi tënë na ti sala bê na popo ti e.” (aGalate 5:26). Na ndo ni, salango ngia ti nginza ayeke pusu ambeni zo ti zia bê kirikiri na ndo ngangu ti pasa ti mû maboko na ala. Azo so abi tele ti ala na yâ angia ti nginza ayeke zia bê na aye nde nde so akpa magie, na ala pensé so aye ni alingbi ti sala si ala wara nzoni pasa. Salango ye ti ala adabe e na azo ti Israël so ayeke lani be-ta-zo pëpe na so “[a]leke ndo ti te kobe teti Gad [“nzapa ti Nzoni Chance”, NW], na [a]mû na Meni [“nzapa ti aye so a diko ti si”, NW] vin so agbian yâ ni”.​—Esaïe 65:11.

Ambeni zo alingbi ti pensé so tongana mo parié gi kete nginza ti sala na ngia ti carte wala ngia ti nginza na afami wala akota kamarade ti mo, a yeke gi salango ngia senge awe, mbeni ye ti sioni oko ayeke dä pëpe. Tâ tënë, mbeni zo so aparié gi kete nginza alingbi peut-être pëpe ti bâ tele ti lo so lo yeke lë kota nzara ti wara ye, fandara, bibe ti hon gi amba ti lo, wala mabe na aye so andu magie. Ye oko, tongana lo parié teti nginza tongaso, ye so alingbi ti sala nyen na ndo ala so lo na ala ayeke parié? Mingi ti azo so laso amû tele ti ala kue gi na salango ngia ti nginza ato nda ni kozoni ti parié kete nginza, na tenengo so ‘ala yeke sala ti ala gi ngia awe’. (Luc 16:10). Yeke yeke, mbeni ye so a bâ gi tongana senge ngia akono ti ga mbeni ye so asala sioni ngangu mingi na ndo ala.

Ye so ayeke tâ tënë biani tongana ye ni andu amolenge. Tele ti amolenge mingi ayeke nzere ti te nginza ti amba ti ala na pekoni so ala parié kete nginza na ala, na pekoni ala sala nzara ti te anginza so akono mingi ahon (1 Timothée 6:10). Mbeni gingo nda ti ye so amû angoi mingi, na so mbeni kota bungbi ti bango tënë ti asalango ngia ti nginza asigigi na ni na Amerika, afa so mingi ti azo so ayeke ngbâa ti ngia ti nginza ato nda ni na ngoi so ala de kete “ti parié akete nginza angia ti wanguru wala angia ti carte so ala yeke sala na akamarade wala na afami ti ala.” Mbeni tondo ni afa so “amolenge ayeke to nda ti sala angia ti nginza na yanga-da, na mingi ni, ala yeke sala ni na lege ti angia ti carte na sewa ti ala nga na akamarade ti ala.” Tondo ni atene nga na ndo ni so “tongana a mû azo 100 so abi tele na yâ ngia ti nginza, 30 na popo ti ala ato nda ti sala ni kozoni si ala wara ngu 11.” Mbeni tondo ni nde (Why Do People Gamble Too Much—Pathological and Problem Gambling) atene so mingi ti amaseka so ayeke bi tele ti ala ti sala ngia ti nginza ayeke futa mungo mbage na ni na lege ti nginza so ala wara na yâ kengo ndia wala salango pitan. So tâ ye ti vundu ti bâ sioni lengo ti peko ti mbeni ye so, na tongo nda ni, a bâ tongana gi senge ye!

E yeke fadeso awe na yâ mbeni sese so agbanda na atara ahon ndo ni; tongaso, ngbanga ti nyen ti gi ti zia tele ti e senge senge na gbele mbeni tara nde? (aProverbe 27:12). Atâa amolenge ayeke dä wala pëpe, atâa nginza so a bi ayeke kete wala akono, ti sala ngia teti nginza ayeke sala sioni na e na lege ti yingo, na a lingbi e kpe ni. A-Chrétien so aye ti sala ngia ti carte wala mbeni ye nde na ambeni zo ayeke sala nzoni ti mû gi note awe ti ngia so ala yeke sala, wala ti bâ ni gi tongana mbeni senge ngia. A-Chrétien so ayeke na ndara na so ayeke na nzara ti bata dutingo ti ala, ti akamarade ti ala nga ti sewa ti ala na lege ti yingo ayeke kpe salango ngia kue ti nginza na zo, même tongana a yeke gi teti kete nginza.

[Kete Tene na Gbe Ni]