E kue e ye si a gonda e

LANGO ni anzere lani mingi na mbeni kete molenge-wali. Atâa so a hunda ti tene a se lo na ambeni ngoi, ti lango ni so, lo sala ye nzoni mingi. Ye oko, na bï ni so, tongana mama ti lo ague azia lo na gbogbo awe, lo mä molenge ti lo na totongo ni. Tongana mama ni ahunda lo ngbanga ti nyen lo yeke toto tongaso, na ngule molenge ni atene: “Mbi sala ye ti nzoni laso pëpe?”

Hundango tënë so amû vundu na bê ti mama ni mingi. Lakue, lo yeke ndulu ti se molenge ti lo. Me ti lango ni so, atâa lo bâ so molenge ti lo asala ngangu mingi ti sala ye kue nzoni, mama ni apensé pëpe ti tene kamême mbeni kete tënë ti gonda.

A yeke gi akete molenge ti wali oko si aye ti mä tënë ti gonda na ti dengo bê pëpe. E kue e ye ti mä mara ti tënë tongaso, legeoko tongana a lingbi awa e nga a se e.

Tongana mbeni zo agonda e na tâ bê ti lo kue, e yeke sala ye tongana nyen? A nzere na a mû ngia na bê ti e pëpe? A sala si e hinga so mbeni zo abâ e, abi bê na e. A fa na e so ye so e sala ayeke hon senge pëpe na a pusu e ti kiri ti sala ngangu na yâ ti angoi so ayeke ga. A yeke ye ti dongo bê pëpe so tënë ti gonda so a tene na bê kue ayeke pusu e ndulu ndulu na zo so amû ngoi ti tene mbeni nzoni tënë na e.​—aProverbe 15:23.

Jésus Christ ahinga lani nene ti gonda zo. Na yâ toli ti lo ti atalent, mveni ni (so ayeke fä ti Jésus lo wani) agonda mingi angbâa be-ta-zo ti lo use kue, lo tene: “Mo sala nzoni, mo yeke be-ta-boi ti nzoni.” Tënë so amû wâ na bê biani! Atâa so akode ti ala ayeke nde nde na ala sala aye nde nde, a gonda angbâa ni use kue legeoko.​—Matthieu 25:19-23.

Tongaso, zia e dabe e na mama ti kete molenge-wali so. A lingbi e ku pëpe ti tene ambeni zo atoto kozo si e gonda ala. Nde na so, e lingbi ti zia na gbele e ti gi alege ti gonda ala. Biani, e yeke na tâ nda ti tënë ti sala atënë ti gonda so alondo na bê na alege kue so azi.