Amiracle ti Jésus​—Tâ Ye Wala Senge Pande?

“ALA ga na azo mingi na Lo [Jésus Christ], azo so ayeke na ayingo sioni, na Lo tomba ayingo sioni so na lege ti tënë ti Lo, na Lo lungula kobela ti ala kue so ayeke na kobela.” (Matthieu 8:16). “Lo [Jésus, Lo] londo Lo zingo na pupu ni, Lo tene na Kota Ngu, Kaï! Dë siriri! Na pupu ni akaï, na ndo adë siriri.” (Marc 4:39). Bibe ti mo na ndo ti atënë so ayeke nyen? Mo mä na bê so atënë so afa tâ mbeni ye so asi na yâ mbaï, wala mo bâ ti mo so ayeke atënë ti tere, gi asenge pande?

Azo mingi laso ayeke dë kite wala amiracle ti Jésus ayeke atâ ye so asi na yâ mbaï. Na ngoi ti e, senda-ye ague na li ni mingi na lege ti amasini ti bango ye na le-nduzu, a-microscope, gingo aye na yâ ti nduzu, kode ti gbiango aye na yâ acellule ti tele ti zo. Aye so kue asala si azo mingi fadeso aye ti yeda pëpe na atondo na ndo tënë ti amiracle nga na aye so asi na lege ti angangu so ahon ti zo.

Ambeni zo abâ ti ala so atondo na ndo amiracle ayeke gi ambeni ye so azo asigigi na ni na li ti ala mveni wala gi atënë ti tere. Mbeni wasungo-mbeti so ayeke gi ti hinga ye na ndo “tâ” Jésus ni mveni atene so mbaï na ndo amiracle ti Christ ayeke lani gi mbeni senge kode ti “salango sabango” ti lege ti vorongo ti aChrétien ti tene amaï.

Ambeni zo abâ ti ala amiracle ti Jésus tongana tâ mbeni kota handa. Même azo atene lani nga so Jésus ni mveni lo yeke mbeni zo ti handa. Justin (ngu 100-165), atene: “Azo so ayeke kasa Jésus atene même so lo yeke zo ti magie, mbeni wahandango zo.” Ambeni atene so Jésus “asala lani amiracle ti lo, pëpe tongana mbeni prophète ti aJuif me tongana mbeni zo ti magie, mbeni zo so a fa na lo ngobo ti salango ye ti lege ti vorongo ti apaïen.”

 Mbeni ye so alingbi ti si lâ oko pëpe, a ye ti tene nyen?

Mo lingbi ti bi bê ti mo so, na peko ti adengo kite tongaso, mbeni nda ti tënë ayeke dä so asala si a yeke ngangu ti tene azo amä na bê na amiracle. Ala gi li ti ala na ni gbä, na ala bâ même so a lingbi ti si lâ oko pëpe so angangu so ahon ti zo alingbi ti sala mara ti amiracle tongaso. Mbeni maseka so adë kite na ndo dutingo ti Nzapa so lo yeke dä wala pëpe atene: “Amiracle abâ gigi pëpe, tënë ti mbi angbâ gi ge awe.” Tongaso lo diko peko ti atënë ti wasenda-ndara ti kodoro ti Écosse David Hume, so asû lani na mbeti: “Salango miracle ayeke mbeni ye so adoro biani andia ti ndagigi.”

Ye oko, azo mingi ayeke sala ye na hange na ndo ti tenengo na kuru go so mbeni ye alingbi ti si lâ oko pëpe. Mbeni kota bakari (The World Book Encyclopedia) afa nda ti tënë miracle tongaso: “A yeke mbeni ye so a lingbi pëpe ti fa nda ni na lege ti andia ti ndagigi so azo ahinga ni nzoni.” Tongana ti so kota bakari so afa nda ni, a ye ti tene so gi na yâ ti angu ngbangbo oko so ahon awe, azo mingi ayeke bâ tongana “miracle” avoyage ti guengo na lê ti nduzu, na tapande na lê ti nze, atéléphone ti maboko, akota masini so a tokua ni na lê ti nduzu ti fa lege na aye. Biani, a yeke na lege ti ndara pëpe ti tene so amiracle abâ lani gigi oko pëpe ngbanga ti so hingango ye so azo ayeke na ni laso, a lingbi pëpe ti fa nda ni.

Tongana e bâ ambeni ye so ayeke na yâ Mbeti ti Nzapa so asala tënë na ndo amiracle ti Jésus Christ, fade e yeke wara aye wa? Amiracle ti Jésus ayeke tâ ye wala senge pande?