FANGO nzoni tënë ayeke kota kua so ahon atanga ni kue so a yeke sara ni laso na ndo ti sese. So mo yeke Témoin ti Jéhovah, mo bâ so a yeke mbeni pasa ti mû mbage na kua ti sarango adisciple. Me, kite ayeke pëpe so mo yeda so ngoi na ngoi apionnier nga na awafango tënë ayeke wara akpale so asara si a yeke ngangu na ala ti ngbâ ti yapu na fango tënë.

Ambeni wafango tënë abâ so a yeke ngangu na ala ti wara mbeni zo ti sara lisoro na lo na ngoi so ala yeke fa tënë da na da. Peut-être mingi ti azo ni ayeke na yanga-da pëpe. Na tongana ala wara azo ni, ala lingbi ti ke ti mä tënë ti Royaume wala ti sara ngonzo na tere ti ala. Ambeni wafango tënë ayeke gi bê ti ala ndali ti so territoire so ala yeke fa tënë dä akono mingi nga azo mingi aye ti mä nzoni tënë na ala sara mbeto ndali ti so ala bâ so ala lingbi pëpe ti fa tënë na yâ ni kue. Nga ambeni ita na yâ ti congrégation afa tënë teti angu mingi, me bê ti ala anze ndali ti so nda ni ade ti si pëpe.

A lingbi bê ti e adö pëpe so awakua ti Jéhovah kue awara akpale so alingbi ti sara si ala yapu na fango tënë pëpe tongana ti kozo. E yeke na yâ ti dunia so Satan Zabolo so ayeke “zo ti sioni” la akomande na ndo ni. Tongaso, e hinga so a yeke duti ngangu na e ti fa nzoni tënë.—1 Jean 5:19.

Atâa akpale wa la mo yeke wara na ngoi so mo yeke fa tënë, hinga so Jéhovah alingbi ti mû maboko na mo ti hon ndo ni. Me, nyen la mo lingbi ti sara ti yapu na fango tënë ahon ti kozo? Zia e bâ ambeni ye so mo lingbi ti sara.

Ngu oko oko, azo saki na saki awara batême na ala ga aTémoin ti Jéhovah. Tongana mo wara batême fini fini, kite ayeke dä pëpe so mo yeke manda ye mingi na mbage ti aita so afa tënë aninga ahon mo. Ka tongana mo fa tënë asara angu mingi awe, mo lingbi ti mû maboko na azo so awara batême fini fini? Tongana mo sara tongaso mo yeke wara ngia mingi na peko ni.

 Jésus ahinga so adisciple ti lo ayeke na bezoin ti tene lo fa ye na ala si ala ga anzoni wafango tënë, ni la lo fa na ala tongana nyen ti fa tënë (Luc 8:1). Laso nga, afini zo ayeke na bezoin ti tene a fa ye na ala si ala ga anzoni wafango tënë.

A lingbi e pensé pëpe so mbeni fini wafango tënë ayeke hinga ti fa tënë gi ndali ti so lo yeke sigigi na fango tënë. Lo yeke na bezoin ti tene mbeni ita so ayeke fa ye na nzoni bê nga na ndoye afa ye na lo. A lingbi ita ni afa na lo tongana nyen (1) ti leke tere ti lo nga lo na lo atara peko ti ye ni, (2) ti sara lisoro na azo da na da wala na zo so ahon na lege, (3) ti mû mbeti na azo, (4) ti kiri ti sara lisoro na azo so aye ti mä tënë ni, nga (5) ti to nda ti manda Bible na zo. Kite ayeke pëpe so fini wafango tënë ni ayeke ga nzoni wafango tënë tongana lo bâ akode so ita ni afa na tënë nga lo sara ye alingbi na ni (Luc 6:40). Fini wafango tënë ni ayeke sara mbeto ape ndali ti so lo hinga so mbeni ita ayeke na tere ti lo ti mû maboko na lo tongana bezoin ni ayeke dä. Nga tongana ita ni agonda fini wafango tënë ni nga lo fa na lo ambeni ye so lo lingbi ti sara, a yeke mû maboko na lo.—Zo-ti. 4:9, 10.

Atâa angangu kue so mo yeke sara ti sara lisoro na azo da na da, na ambeni lango, nzoni lisoro so mo lingbi ti sara na fango tënë ayeke gi so mo na zo so mo na lo asigigi asara. Dabe ti mo so Jésus atokua adisciple ti lo “use use” ti fa tënë (Luc 10:1). Na ngoi so ala fa tënë legeoko, ala lingbi ti kpengba mba nga ti pusu mba ti yapu na fango tënë. Tongaso, ngoi so e yeke fa tënë legeoko na aita ti e ayeke mbeni nzoni ngoi ti tene e “kpengba tere na popo ti e”.—aRom. 1:12.

Ambeni ye wa la ala lingbi ti sara lisoro na ndo ni? Mbeni ye asi na ala so ade ti ninga pëpe so ala lingbi ti sara lisoro na ndo ni ti kpengba mba? Mo wara mbeni nzoni ye na ngoi ti mandango ye ti mo wala na ngoi ti vorongo Nzapa na yâ ti sewa? Mbeni ye so mo mä na ngoi ti bungbi akpengba mo? Na ambeni ngoi, zo so mo na lo ayeke fa tënë alingbi ti duti zo so mo na lo ayeke sigigi ka lakue pëpe. Mo lingbi ti hunda lo tongana nyen la lo ga na yâ ti tâ tënë? Nyen la amû lege na lo ti hinga biani so bungbi so lo yeke na yâ ni so ayeke bungbi ti Jéhovah la? Akua wa la lo sara na yâ ti bungbi ti Jéhovah wala ambeni ye wa la asi na lo? Peut-être mo lingbi ti sara lisoro na lo na ndo ti ambeni ye so asi na mo. Atâa sarango ye ti azo na yâ ti territoire ayeke tongana nyen, ngoi so e yeke fa tënë legeoko na mbeni ita ayeke mbeni nzoni ngoi ti “ngbâ ti . . . kpengba mba”.—1 aThes. 5:11.

A lingbi e gi ti maï fason so e yeke manda na ye si e ngbâ ti yapu na fango tënë. “Ngbâa be-ta-zo so  ayeke sara ye na ndara” asigigi na ambeti na ndo ti atënë nde nde so e lingbi ti manda (Mat. 24:45). Tongaso, aye nde nde mingi ayeke dä so mo lingbi ti manda ti kpengba songo ti mo na Nzapa. Zia e bâ tapande ti mbeni nzoni ye so e lingbi ti manda na ngoi ti mandango ye ti e wani: Ngbanga ti nyen kua ti fango tënë ti Royaume ayeke mbeni kota kua mingi? Encadré so li ti tënë ni ayeke “Ngbanga ti nyen ti yapu na fango tënë?” afa na e ambeni raison ni.

Tongana e gbu li ti e na ndo ti aye so a fa na yâ ti encadré ni alingbi ti pusu e ti ngbâ ti yapu na fango tënë. Na ngoi ti mandango ye ti mo wani, tara ti gi ambeni raison so alingbi ti pusu mo ti ngbâ ti yapu na fango tënë. Gbu li ti mo na ndo ti araison ni nga na aversê so asara tënë na ndo ni. Tongana mo sara tongaso, kite ayeke pëpe so mo yeke ngbâ ti yapu na fango tënë.

Bungbi ti Jéhovah ayeke fa na e lakue akode so alingbi ti mû maboko na e ti fa tënë nzoni ahon ti kozo. Na tapande, e yeke fa tënë da na da, me e lingbi ti fa nga tënë na lege ti lettre nga na téléphone. E lingbi nga ti fa tënë na ndo ti alege wala na aplace so azo ayeke dä mingi nga e lingbi ti fa tënë na alege kue so azi na e nga na ando ti dengo buze. Peut-être e lingbi nga ti leke ti fa tënë na ando so aTémoin ti Jéhovah ayeke dä mingi pëpe wala ala yeke dä ape.

Mo yeke sara ye alingbi na afini kode ti fango tënë so bungbi ti Jéhovah ayeke fa na e? Aita mingi so asara ye alingbi na ni awara aye ti nzoni mingi na peko ni. Zia e bâ ambeni tapande ni ota.

Kozo tapande ni andu sarango ye alingbi na mbeni ye so a fa na yâ ti Kusala ti Royaume na ndo  ti tongana nyen ti to nda ti a-étude. Mbeni ita-wali so iri ti lo ayeke April asara ye alingbi na atënë so ayeke na yâ ti Kusala ti Royaume ni na lo hunda ti manda Bible na amba ti lo ota ti place ti kua. Bê ti lo adö nga tere ti lo anzere na ngoi so ala ota kue ayeda ti manda Bible nga ala komanse ti gue na abungbi.

Use tapande ni ayeke na ndo ti ziango apériodique ti e na azo. A wa e ti gi azo so alingbi ti yeda na ambeni mbilimbili article na yâ ti apériodique ti e. Mbeni surveillant ti circonscription na Amerika atene so, na ndo so lo yeke fa tënë dä, lo mû mbeni Réveillez-vous! so asara tënë na ndo ti apneu na awayinda kue ti amagazin so a yeke kä apneu dä. Lo na wali ti lo amû nga na adocteur ahon 100 ti ndo so ala yeke dä mbeni Réveillez-vous ! so kota mama-tene ni ayeke: “Mieux comprendre son médecin”. Lo tene: “Vizite ni aga na aye ti nzoni ndali ti so amû maboko na azo ti hinga ye na ndo ti kua ti fango tënë nga na ndo ti ambeti ti e. Na peko ti so e hinga azo so ayeke na ando ni so nzoni, a mû lege na e ti kiri fani mingi ti sara vizite na ala.”

Ota tapande ni andu fango tënë na téléphone. Mbeni ita-wali so iri ti lo ayeke Judy atokua mbeti na kota ndokua ti e ti fa ngia ti bê ti lo ndali ti wango so amû na ndo ti fango tënë na téléphone. Lo tene so mama ti lo, so ayeke na ngu 86, so ayeke na kpale ti seni mingi, ayeke fa tënë lakue na azo na téléphone na lo yeke na ngia ti sara étude na téléphone na mbeni wali so ayeke na ngu 92.

Akode ti fango tënë so bungbi ti Jéhovah ayeke fa na e na yâ ti ambeti ti e aga na aye ti nzoni mingi. Sara kua na ni. A lingbi ti mû maboko na mo ti ngbâ ti duti na ngia na fango tënë nga ti ngbâ ti yapu na yâ ni.

A yeke pëpe wungo ti ambeti so e yeke zia na azo, wala wungo ti azo so e manda Bible na ala, wala wungo ti azo so e mû maboko na ala ti ga awakua ti Jéhovah la ayeke fa wala e sara kua ti fango tënë nzoni. Gbu li ti mo na ndo ti Noé. Nde na azo ti sewa ti Noé, azo oke la Noé amû maboko na ala lani ti ga awakua ti Jéhovah? Me lo yeke lani mbeni nzoni wafango tënë. Ye so ayeke kota ye ayeke ti voro Jéhovah be-ta-zo.—1 aCor. 4:2.

Awafango tënë mingi abâ so a yeke nzoni ala zia na gbele ala aye so ala lingbi ti si dä tongaso si apusu ala ti duti na nzara ti fa tënë mingi. Ambeni ye wa la ala zia na gbele ala? A fa ambeni ye ni na yâ ti encadré so li ti tënë ni ayeke “Zia na gbele mo aye so mo ye ti si dä”.

Sambela Jéhovah ti mû maboko na mo ti fa tënë nzoni nga ti wara aye ti nzoni dä. Tongana mo si na aye so mo zia na gbele mo, tere ti mo ayeke nzere mingi ndali ti so mo hinga so mo sara kue ti fa nzoni tënë.

A yeke tâ tënë so e lingbi ti wara kpale na yâ ti kua ti fango tënë. Me ambeni ye ayeke dä so mo lingbi ti sara ti yapu na fango tënë ti Royaume. Sara lisoro so akpengba zo na mba ti mo so mo na lo ayeke fa tënë, gi ti maï fason so mo yeke manda na ye nga ngbâ gi dä, gi ti sara ye alingbi na akode ti fango tënë so ngbâa be-ta-zo ayeke fa na e nga zia na gbele mo ambeni ye so mo ye ti si dä. Kota ye ni kue ayeke ti hinga so Jéhovah ane mo mingi la lo mû na mo kua ti fango nzoni tënë tongana Témoin ti lo (És. 43:10). Biani, mo yeke wara kota ngia mingi tongana mo ngbâ ti yapu na fango tënë.