1, 2. Na ndo ti tënë ti aprophétie, sarango ye ti awakua ti Jéhovah ayeke tongana nyen?

AWAKUA ti Jéhovah aku a ninga ti tene aprophétie ti lo so ayeke na yâ ti Bible aga tâ tënë. Na tapande, Jérémie afa kozoni awe so a yeke futi Juda, na a yeke ye so asi na ngu 607 kozo ti Christ na ngoi so azo ti Babylone aga afuti gbata ni (Jér. 25:8-11). Na lege ti yingo ti Jéhovah, Ésaïe afa so Jéhovah ayeke mû aJuif so a gue na ala na ngbâa ti kiri na ala na Juda. Lo tene: “Ngia ayeke na azo kue so aku Lo.” (És. 30:18). Michée nga kue aku ti tene azendo ti Jéhovah aga tâ tënë, lo tene: “Fade mbi yä lê ti mbi na L’Éternel; mbi ku Nzapa ti salut ti mbi.” (Mi. 7:7). Teti angu mingi, awakua ti Nzapa nga kue aku ti tene aprophétie so asara tënë na ndo ti Messie, wala Christ aga tâ tënë.—Luc 3:15; 1 Pi. 1:10-12. *

² Laso nga kue, awakua ti Jéhovah angbâ ti ku, ndali ti so aprophétie so asara tënë na ndo ti Messie ade ti ga tâ tënë kue ape. Na yâ ti ngoi kete, na lege ti Royaume ti Jéhovah so Messie ayeke Gbia ni, Jéhovah ayeke zi apasi ti azo kue na lege so  lo yeke futi azo ti sioni nga lo yeke zi awakua ti lo na yâ ti sioni dunia so, so a yeke na gbe ti ngangu ti Satan (1 Jean 5:19). Tongaso, a lingbi e ngbâ ti ku nga e hinga biani so a ga nduru awe ti futi sioni dunia so.

3. Tongana a yeke depuis la e yeke ku ti tene a futi sioni dunia so, e lingbi peut-être ti hunda tere ti e na tënë wa?

³ E awakua ti Jéhovah, e yeke ku kungo ti bâ ngoi so a yeke sara ande ye so bê ti Nzapa aye na ndo ti sese (Mat. 6:10). Me tongana ayeke depuis la e yeke ku ti tene a futi sioni dunia so, e lingbi peut-être ti to nda ti hunda tere ti e, e tene: ‘Eskê a yeke biani na lege ni ti ngbâ ti ku?’

4. Kota raison so ndali ni e ngbâ ti ku ayeke so wa?

⁴ Bible afa na e ye so a lingbi e sara na ngoi so a ga nduru mingi awe ti futi sioni dunia so. Jésus atene na adisciple ti lo ti “lango pëpe” nga ti “zia lê ti ala angbâ na zingo ni”. (Mat. 24:42; Luc 21:34-36). Kota raison so ndali ni e ngbâ ti ku ayeke so Jésus la ahunda na e ti sara ni. Bungbi ti Jéhovah nga kue ayeke dabe ti e lakue ti ‘ku na ti bata na li ti e ngoi so lâ ti Jéhovah ayeke si na ayeke duti dä,’ nga ti ngbâ ti zia lê ti e gi na ndo ti zendo ti fini dunia so Jéhovah amû na e.—Diko 2 Pierre 3:11-13.

5. Ngbanga ti nyen la a yeke kota ye mingi laso ti tene lê ti e angbâ na zingo ni?

⁵ Tongana a lingbi lani adisciple ti Jésus ti ngoi ti akozo Chrétien angbâ ti ku, a yeke kota ye mingi ndali ti e ti ngbâ ti ku. Ngbanga ti nyen? Ngbanga ti so e yeke na ngoi so Christ asi awe nga lo yeke dä. Ngbene ye na ngu 1914 ti ga na ni, e bâ polele aye so afa so Christ asi awe nga lo yeke dä. Nga, tongana e bâ tongana nyen la aye ayeke ga gi sioni sioni ti gue na ni nga na kua ti fango tënë so a yeke sara ni na yâ ti dunia kue, a fa polele so e yeke na “ngoi so aye ti ngoi so ayeke gue ti hunzi”. (Mat. 24:3, 7-14). Teti so Jésus afa pëpe ngoi oke la alango ti nda ni ayeke ninga, a lingbi lê ti e angbâ na zingo ni.

6. E hinga tongana nyen so aye ayeke ga ande gi sioni sioni tongana e ga nduru mingi na nda ni?

⁶ Bible atene so sarango ye ti azo ayeke ga gi sioni sioni “na alango ti nda ni”. (2 Tim. 3:1, 13; Mat. 24:21; Apoc. 12:12). Atâa so aye ti sioni ayeke mingi laso, e hinga so ayeke ngbâ ande ti ga gi sioni sioni ti gue na ni. Tongaso, “ngoi so aye ti ngoi so ayeke gue ti hunzi” aye ti sara tënë ti mbeni ngoi so ayeke ga ande so aye ayeke ga tâ sioni mingi na yâ ti dunia?

7. Matthieu 24:37-39 atene nyen na ndo ti aye so ayeke passé na yâ ti dunia na alango ti nda ni?

⁷ Ambeni zo alingbi ti pensé so kozo ti tene “kota ye ti vundu” ato nda ni, bira ayeke passé na yâ ti akodoro kue, azo mingi ayeke wara kobe ti te ape nga azo mingi ayeke tï kobela (Apoc. 7:14). Tongana ayeke tongaso, azo kue ayeke hinga so aprophétie ti Bible la ayeke ga tâ tënë so. Même azo so asara sanka ti aye so Bible afa alingbi peut-être ti hinga ni. Ye oko, Jésus atene so mingi ti azo ayeke “hinga tënë ni pëpe”, so ti tene ala yeke sara sanka ti aye so ayeke passé. Ala yeke ngbâ ti sara akua ti ala ti lâ na lâ juska na ngoi so lâ ti Jéhovah ayeke tï na ndo ti ala gi gbagburu tongaso. (Diko Matthieu 24:37-39.) Tongaso, a lingbi e pensé pëpe so aye ayeke ga ande tâ sioni mingi na yâ ti dunia awe si “kota ye ti vundu” ato nda ni.—Luc 17:20; 2 Pi. 3:3, 4.

8. So e “lango pëpe” tongana ti so Jésus atene, nyen la e hinga ni?

⁸ Jésus afa lani na adisciple ti lo aye nde  nde so ayeke si ande mbeni lâ ti tene ala hinga nzoni mingi gigi so angbâ ti ku ala. Lê ti adisciple ti Jésus akpengba lani (Mat. 24:27, 42). Ti londo na ngu 1914 ti ga na ni, aye so Jésus asara tënë ni so afa so e yeke na alango ti nda ni akomanse ti ga tâ tënë. E hinga biani so e yeke fadeso na “ngoi so aye ti ngoi so ayeke gue ti hunzi”. Jéhovah asoro awe ngoi so lo yeke futi sioni dunia ti Satan so.

9. Ngbanga ti nyen a lingbi e ngbâ ti ku ti tene a futi sioni dunia so?

⁹ Tongaso, ngbanga ti nyen a lingbi e aChrétien e ngbâ ti ku? Ngbanga ti so e ye ti mä yanga ti Jésus. Nga, e bâ polele so aye so Jésus afa so afa biani so e yeke na alango ti nda ni aga tâ tënë awe. E hinga so a ga nduru mingi awe ti futi sioni dunia so ndali ti so e hinga biani so aprophétie ti Bible ayeke ga tâ tënë. A lingbi e lango pëpe nga e leke tere ti e ti ku na lango ni so.

10, 11. (a) Ngbanga ti nyen Jésus atene na adisciple ti lo ti “lango pëpe”? (b) Nyen la Jésus atene na adisciple ti lo ti sara tongana ala bâ so futingo dunia so aga hio ape? (Bâ foto so ayeke na tongo nda ti article ni.)

¹⁰ A sara angu mingi awe la mingi ti e aduti be-ta-zo na Jéhovah nga angbâ ti ku lâ ti Jéhovah kungo. Ye oko, atâa tongana e ku asara ngu oke awe, a lingbi bê ti e anze ape nga e ngbâ ti ku lango ni so kungo. A lingbi e leke tere ti e ti ku na ngoi so Jésus ayeke ga ande ti futi sioni dunia ti Satan so. E girisa ape so Jésus awa adisciple ti lo, lo tene: “Ala sara hange, zia lê ti ala angbâ na zingo ni, teti ala hinga pëpe lawa si lango so a fa ni awe ayeke si. A yeke tongana mbeni koli so ayeke gue na kodoro wande na lo zia da ti lo na peko ti lo, lo mû komandema na angbâa ti lo, lo fa kua ti zo oko oko na lo, na lo mû yanga na sinziri ni ti lango pëpe. Ni la, ala lango pëpe, ngbanga ti so ala hinga pëpe ngbonga ni so wa ti da ni ayeke ga na ni, wala na lakui, wala na bê ti bï, wala na toto ti kondo wala na yanga ti ndapre, tongaso si na ngoi so lo si gi hio tongaso, lo wara ala na lango pëpe. Me tënë so mbi tene na ala so, mbi tene ni na azo kue: Ala lango pëpe.”—Marc 13:33-37.

¹¹ Gi na ngoi so adisciple ti Jésus ahinga so ngoi so Christ ayeke si na lo yeke duti dä ato nda ni na ngu 1914, ala leke tere ti ala ti ku futingo sioni dunia so. Ala sara ni na lege so ala kiri afa tënë mingi. Jésus atene so lo yeke ga ande peut-être “na toto ti kondo wala na yanga ti ndapre”. Tongana ayeke tongaso, a lingbi adisciple ti lo asara nyen? Lo tene: “Ala lango pëpe.” Tongaso, même tongana e pensé so e ku a ninga awe, a ye pëpe ti tene so futingo dunia so angbâ ti yô wala ayeke si na ngoi ti e ape.

12. Nyen la Habakuk ahunda na Jéhovah? Tënë wa la Jéhovah atene na lo?

¹² Gbu li ti mo na ndo ti ye so asi na prophète Habakuk so Jéhovah atokua lo ti sara tënë ti futingo Jérusalem. Na ngoi so lo si na Jérusalem, ambeni prophète so ayeke kozo na lo asara nga tënë ti futingo ti gbata ni teti angu mingi awe. Habakuk abâ so sarango ye ti sioni nga na aye ti kirikiri ahon tâ ndo ni. Lo hunda na Jéhovah ti mû maboko na lo, lo tene: “O L’Éternel, a lingbi mbi dekongo lâ oke?” Atâa so Jéhovah afa na Habakuk pëpe lango so a yeke futi gbata ni, Jéhovah atene na lo, lo tene: “A manke pëpe.” Jéhovah atene nga na lo ti “ ku.”—Diko Habakuk 1:1-4; 2:3.

13. Bango ndo wa Habakuk alingbi lani ti duti na ni? Aye wa alingbi fade ti si na lo?

¹³ Tongana fade Habakuk aku gbâ, bê ti  lo anze na lo tene: ‘Depuis angu mingi la mbi yeke ku futingo Jérusalem so. Lango ni angbâ ti yô. Mbi yeke na bezoin ape ti ngbâ ti fa tënë ti futingo ni. Ambeni zo nde apeut ti fa tënë ni.’ Nyen la alingbi fade ti si tongana lo pensé lani tongaso? Jéhovah alingbi lani ti ke lo. Nga, tongana lo leke tere ti lo lani ape ti ku na ngoi so a yeke futi gbata ni, lo lingbi fade ti wara kuâ.

14. Ngbanga ti nyen e yeke mû ande merci mingi na Jéhovah ndali ti so lo wa e ti ngbâ ti ku?

¹⁴ Na yâ ti fini dunia, e yeke bâ ande so aprophétie kue so asara tënë na ndo ti alango ti nda ni aga tâ tënë. Tongana e gbu li ti e ande ti bâ tongana nyen la aye ni asi, e yeke kiri ti zia bê ti e kue na Jéhovah ahon ti kozo nga e yeke duti na confiance so atanga ti azendo ti lo ayeke ga tâ tënë. (Diko Josué 23:14.) E yeke mû ande merci mingi na Jéhovah ndali ti so lo soro nzoni ngoi ti futi sioni dunia so nga lo wa awakua ti lo ti ngbâ ti ku ni.—Kus. 1:7; 1 Pi. 4:7.

15, 16. Ngbanga ti nyen a lingbi e sara kue ti fa tënë laso na azo?

¹⁵ Bungbi ti Jéhovah ayeke ngbâ lakue ti dabe ti e ti ngbâ ti sara na Jéhovah. Adango bê so e yeke wara amû maboko na e ti yapu na kua ti fango tënë nga ti bâ polele so a lingbi e fa tënë hio. E hinga biani so aye so Jésus afa atene a yeke hinga na alango ti nda ni ayeke si na ngoi ti e nga a ga nduru mingi awe ti futi dunia so. Tongaso, a lingbi e ngbâ ti gi Royaume ti Nzapa nga na mbilimbili ti lo kozoni na lege so e yapu na kua ti fango nzoni tënë.—Mat. 6:33; Marc 13:10.

¹⁶ Mbeni ita-wali atene: “Tongana e fa nzoni tënë ti Royaume ti Nzapa na azo, e . . . yeke mû maboko na ala ti sö kuâ na ngoi so a yeke futi ande sioni dunia so.” Ita-wali ni ahinga ye na ndo ti songo azo, ndali ti so lo na koli ti lo asö kuâ lani na ngoi ti mbeni ngangu accident so ala sara na bateau (Wilhelm Gustloff) na ngu 1945. Même na yâ ti ye ti ngangu tongaso, zo alingbi ti girisa ye so ayeke biani kota ye. Ita ni adabe ti lo so mbeni wali ayeke toto lani, lo yeke tene: “Abozo ti mbi-ooo! Abozo ti mbi-ooo! Abijou ti mbi-ooo! Abijou ti mbi kue angbâ na yâ ti bateau. Mbi perdre aye ti mbi kue awe.” Me amba ti lo ahinga ti ala lani ye so ayeke kota ye nga ala sara kue ti sö fini ti ambeni zo so ayeke lani na yâ ti ngu ni. Laso, fini ti azo ayeke na yâ ti kpale. Legeoko tongana ti azo so asara lani kue ti sö fini ti amba ti ala so, e yeke sara kue ti mû maboko na azo. E yeke sara kue ti fa tënë hio na azo ti mû maboko na ala  ti sö fini ti ala na ngoi so a yeke futi sioni dunia so.

17. Ngbanga ti nyen e hinga biani so a yeke futi sioni dunia so na mbeni ngoi so e yeke ku tere ti e na ni ape?

¹⁷ Aye so ayeke si na yâ ti dunia afa polele so aprophétie ti Bible ayeke ga tâ tënë na ngoi ti e nga a ga nduru mingi awe ti futi sioni dunia so. Tongaso, a lingbi e pensé ape so ngoi angbâ mingi ti tene “adidi bale-oko” nga na “nyama ti ngonda” so a sara tënë ni na Apocalypse 17:16 aturne na tere ti abungbi ti vorongo nzapa ti wataka, Babylone, Ngangu gbata. A lingbi e girisa ape so Nzapa ayeke ‘zia na yâ ti bê ti ala’ ti sara bira na abungbi ti vorongo nzapa ti wataka na ye so alingbi ti si gi hio tongaso na ngoi so e ku tere ti e na ni ape (Apoc. 17:17). A ga nduru mingi awe ti futi sioni dunia ti Satan so. Tongaso, a lingbi e sara ye alingbi na wango ti Jésus so lo tene: “Ala sara hange si tënë ti tengo kobe ahon ndo ni, nyongo sämba ahon ndo ni nga na gingo bê ngbanga ti aye ti gigi ane bê ti ala pëpe, na lango ni so aga hio tongaso na ndo ti ala tongana mbeni kûkû.” (Luc 21:34, 35; Apoc. 16:15). Zia e leke na bê ti e ti ngbâ ti yapu na kua ti Jéhovah na e hinga na bê ti e kue so lo yeke “sara na zo so aku Lo.”—És. 64:3.

18. Hundango ndo wa la e yeke kiri tënë na ni na yâ ti article ti peko?

¹⁸ Na ngoi so e yeke ku ti tene a futi sioni dunia so, zia e sara ye alingbi na wango ti disciple Jude, so atene: “Ala so mbi ndoye ala mingi, tongana ala yeke kpengba na ndo ti mabe ti ala so ayeke nzoni ahon tanga ti aye kue, na ala yeke sambela na yingo vulu, zia ala ngbâ na yâ ti ndoye ti Nzapa na ngoi so ala yeke ku ti tene Seigneur ti e Jésus Christ asara nzoni bê na ala si ala wara fini ti lakue lakue.” (Jude 20, 21). Tongaso, tongana nyen la e lingbi ti fa so e leke tere ti e awe nga e yeke ku kungo fini dunia so Nzapa amû zendo ni? E yeke kiri tënë na hundango ndo so na yâ ti article ti peko.