Ga nduru na Nzapa

Vundu alingbi ti sara Nzapa?

AJUGE 2:11-18

E SO e yeke azo so alingbi kue pëpe, ngoi na ngoi vundu ayeke sara e. Na tapande, vundu alingbi ti sara e tongana e hinga so e sara sioni. Ye ti dongo bê ayeke so, Bible atene vundu alingbi ti sara Jéhovah. Peut-être mo tene: ‘Me Nzapa ayeke nzoni-kue. Lo yeke sara sioni pëpe!’ Tongaso, na lege wa vundu alingbi ti sara Nzapa? Kiringo tënë ni alingbi ti mû maboko na e ti hinga mbeni ye so apika bê ti e mingi: Aye ayeke gbu bê ti Jéhovah, so ti tene aye so e yeke sara alingbi ti mû ngia na lo wala ti zia vundu na bê ti lo. Zia e bâ tënë so a sû na mbeti ti aJuge 2:11-18.

Mbeti ti aJuge afa peko ti angoi ti wusuwusu so asi na yâ ti mbaï ti azo ti Israël. Azo ti Israël asara kodoro fadeso na Canaan, sese so Nzapa amû zendo ni ândö na Abraham. Na yâ ti angu ngbangbo mingi so aga na pekoni, e lingbi ti fa dutingo ti azo ti Israël na lege ti aye osio so asi na peko ti tere: ala sambela ayanda, awato asara ye ti ngangu na ala, ala toto na Nzapa, nga Nzapa asö ala. *

Ala sambela ayanda. Sarango ye ti azo ti Canaan asara ngangu na ndo ti azo ti Israël na ala “zia L’Éternel,” na ala to nda ti mû peko ti ambeni nzapa nde; mbilimbili ala “sambela Baal na a-Astarté.” * Sarango tongaso ayeke tongana turnengo peko na Jéhovah. Kite ayeke pëpe so azo ti Israël ‘asara si ngonzo ti L’Éternel alondo’, Nzapa so azi ala na Égypte!​—Versê 11-13; aJuge 2:1.

Awato asara ye ti ngangu na ala. A yeke na lege ni si Jéhovah asara ngonzo na tere ti Israël, na tongaso lo zi maboko ti lo na ndo ti ala teti ala turnê peko ti ala na lo. Azo ti Israël atï “na tïtî awato ti ala”, so aga na agbu aye ti kodoro ni.​—Versê 14.

Ala toto na Nzapa. So fadeso ala yeke na yâ ti akota kpale, azo ti Israël ato nda ti sara vundu teti asioni lege ti sarango ye ti ala, na ala toto na Nzapa ti mû maboko na ala. “Bimango ti ala ngbanga ti azo so agi ala na azo so asara ngangu na ala” afa so ala toto na Nzapa. (Versê 18). Fani mingi ala toto na Nzapa (aJuge 3:9, 15; 4:3; 6:6, 7; 10:10). Nzapa asara nyen?

Nzapa asö ala: Jéhovah amä bimango ti azo ti Israël na lo ‘ke’ ti sara ye ti sioni na ala teti vundu agbu lo. Mbupa ti Hébreu so a kiri pekoni na ‘ke’ aye nga ti tene “ti changé bibe wala ti ke ti sara mbeni ye”. Mbeni buku atene: “Teti so ala bima, vundu asara Jéhovah na ye so lo ye kozo ti sara na ala, lo changé ni na lo sö ala.” Jéhovah abâ mawa ti azo ti lo, na lo ‘yä juge’ ti sö ala na maboko ti awato ti ala.​—Versê 18.

Mo bâ ye so apusu Nzapa ti sara vundu, wala ti changé bibe ti lo? A yeke ngbanga ti so azo ti lo achangé bibe ti ala. A yeke tongana ti so mbeni babâ ti ndoye alingbi ti se molenge ti lo so asara sioni, peut-être na gbanzingo na lo ambeni ye. Me tongana lo bâ na pekoni so molenge ni ayeke biani na vundu, babâ ni ayeke zia ti se lo.

Mbaï ti azo ti Israël afa na e nyen na ndo ti Jéhovah? Atâa so sarango siokpari na mbana ayeke zia ngonzo na bê ti lo, gbiango bê ayeke pusu lo ti sara nzoni bê. Ye so amû lege na e ti hinga so ye so e yeke sara alingbi ti ndu bê ti Nzapa. Tongaso, e wa mo ti gi ti “mû ngia na bê ti” Jéhovah (aProverbe 27:11). Fade mo yeke wara vundu na pekoni pëpe.

[Akete tënë na gbe ni]