1. Ayengingo ti sese

“Fade sese ayeke yengi ngangu na ando mingi.”​—LUC 21:11.

● Azo agboto Winnie, so ayeke na ngu oko na nze osio, na gbe ti ada so akungbi lani na kodoro ti Haïti. Awagosinga ti mbeni da-limon so ayeke fa aye so abuba la amä go ti lo na ngoi so lo yeke dema. Lo sö kuâ, me babâ na mama ti lo akui ti ala.

AYE SO ASI AFA NYEN? Na ngoi so sese ayengi ngangu na kodoro ti Haïti na nze ti janvier 2010, a fa a tene azo ahon 300 000 awara kuâ. Nga, gi hio tongaso, azo 1 300 000 ayeke na da pëpe. Atâa so sese so ayengi na Haïti ayeke ngangu mingi, mara ni tongaso asi na ando mingi awe. Ti londo na avril ti ngu 2009 ti si na avril ti ngu 2010, wungo ti ayengingo ti sese so ayeke ngangu mingi asi 18.

TËNË WA AZO AYEKE TENE KA MINGI? Sese ayengi mingi na ngoi ti e ahon ti kozo pëpe. A yeke gi amasini so senda-kode asigigi na ni la asara si e hinga tënë ni mingi ahon azo ti giriri.

TËNË SO ALA TENE AYEKE NA LEGE NI? Gbu li na ndo ti ye so: Bible afa pëpe wungo ti ayengingo ti sese so ayeke si na alango ti nda ni. Me, Bible atene so ‘sese ayeke yengi ngangu mingi’ “na ando nde nde”. Ye so asara si a ga oko ti akota ye so asi na yâ ti alango ti nda ni so ayeke mbeni kpengba ngoi na yâ ti mbaï.​—Marc 13:8; Luc 21:11.

MO TENE TI MO NYEN? E yeke bâ sese so ayeke yengi ngangu mingi na ando mingi tâ gi tongana ti so Bible afa tënë ni kozo?

A yeke pëpe gi ayengingo ti sese la afa polele so e yeke na alango ti nda ni. Me, ayengingo ti sese so ayeke gi gango tâ tënë ti mbeni prophétie oko. Bâ use prophétie ni.

[Kete tënë na lembeti 4]

“E [awandara so ayeke gi nda ti aye so ayeke si na gbe ti sese e] iri ni e tene sese so ayengi ngangu mingi. Tanga ti azo airi ni ngangu sioni ye.”​—KEN HUDNUT, U.S. GEOLOGICAL SURVEY.

[Lingu ti foto na lembeti 4]

© William Daniels/Panos Pictures