2. Kota nzara

“Kota nzara ayeke tï.”​—MARC 13:8.

● Mbeni koli akpe ague na Quaratadji, mbeni kete kodoro ti Niger. Afami ti lo, angambe ti lo so ayeke akoli na awali akpe nga aga na yâ ti kete kodoro ni so ndali ti so nzara ahon ndo ti ala. Ye oko, koli so alango gi lo oko na ndo ti mbeni ye tongana konza na sese. Ngbanga ti nyen lo yeke gi lo oko? Sidi so ayeke mokonzi ti kodoro ni atene: “Lo yeke na kobe ti mû na [sewa ti lo] pëpe nga a yeke ngangu na lo ti bâ ala tongaso.”

AYE SO ASI AFA NYEN? Na ndo ti sese kue, tongana a mû azo mbasambala, zo oko na popo ti ala ayeke te ye alingbi na nzara ti lo ti lâ oko oko pëpe. Na Afrika, ye ni ayeke tâ ngangu mingi. Azo mingi ayeke lango na nzara. Tara ti gbu li na ndo ti mbeni sewa so na yâ ni mo yeke wara babâ, mama nga na mbeni kete molenge. Tongana kobe ti tengo ni ayeke gi ndali ti azo use, babâ na mama ni ayeke zia kete molenge ni ate ye yâ ti lo asi. Me zo wa la ayeke lango na nzara zo wa? babâ ni wala mama ni? A yeke kpale so mara ti asewa so ayeke tingbi na ni lâ oko oko.

TËNË WA AZO AYEKE TENE KA MINGI? Sese ayeke dü kobe so alingbi azo kue. A hunda gi ti tene a bâ lege ni nzoni.

TËNË SO ALA TENE AYEKE NA LEGE NI? Tâ tënë, laso azo ti fango yaka ayeke fâ yaka ti kobe mingi ahon ti kozo nga a yeke ngangu pëpe na ala ti mû akobe so ti gue na ni na ambeni ndo. Angorogbia alingbi fade ti bâ lege ti akobe so ti sara si kpale ti nzara ahunzi. Me, atâa so ala tara ti sara ni a sara angu mingi awe, ala wara lege pëpe ti hunzi kpale ti nzara.

MO TENE TI MO NYEN? Tënë so ayeke na Marc 13:8 aga tâ tënë? Atâa so senda-kode ague na li ni mingi, azo angbâ ti bâ pasi na kota nzara na ando mingi?

Mingi ni, na peko ti yengingo ti sese nga na kota nzara, ambeni kpale ayeke ga na lege ti mbeni ye so ayeke nga fä ti alango ti nda ni.

[Kete tënë na lembeti 5]

“Tongana a mû amolenge ota, oko na popo ti ala ayeke kui ndali ti kobela ti fufu, ti sasa nga na ambeni kobela. Amolenge so alingbi fade ti sö kuâ tongana ala te kobe nzoni.”​—ANN M. VENEMAN, NGBENE WAYINDA TI BENDO TI GIGI SO AYEKE BÂ LEGE TI AMOLENGE.

[Lingu ti foto na lembeti 5]

© Paul Lowe/Panos Pictures